EgypToz: الانسان و الشعب المصرى الغلبان

Sunday, August 25, 2019

الانسان و الشعب المصرى الغلبان


لما كنت ولد شاب فى مصر... كنت فاكر ان مصر هى ام الدنيا...كنت فاكر ان مصر هى مركز الكره الارضيه...مصر هى فى منتصف العالم... مصر هى اهم دوله فى العالم... و ان انظار العالم كلها على مصر... و ان كل العالم نفسها تيجى و تزور مصر
لما كنت ولد شاب فى مصر... فى حصه التاريخ و الجغرافيا... كان بيتقال لى ان مصر جغرافيا فى السنتر اوف ذا وورد...و ان مناخها علشان كده حار جاف صيفا دافئ ممطر شتاء... و ان المصرى اساس الامه البشريه... و ان الفراعنه اساس الحضاره الانسانيه
لما كنت ولد شاب فى مصر... كنت فاكر ان لازم يبقى صوتى عالى لما اتكلم... و الا ما حدش حايسمعك... و انى لازم اخلص كل الاكل اللى على الطبق و الا الشيطان حايدخل البيت و ياكل الاكل... و ان بابا لازم يضربنى لو ما سمعتش الكلام... علشان بابا بيحبنى و عاوزنى ابقى راجل... و انى لازم اخد حقى بدراعى... و انى لازم اخد اييه بلاس فى كل المواد و اعلى مجموع فى الثانويه العامه... و الا مش حاعرف ابقى مهندس و الا دكتور...و مستقبلى حايدمر و حاشحت فى الشارع
لما كنت ولد شاب فى مصر... كنت فاكر ان المهندس و الدكتور ارقى من الزبال و الخباز علشان بيفيدوا المجتمع اكتر... و علشان كده المجتمع بيحترمهم اكتر
لما كنت ولد شاب فى مصر... كنت فاكر انى احسن و اقوى من اخواتى البنات... و ان كلمتى لازم تتسمع من اخواتى البنات... و انى اقدر اخرج بالليل مع صحابى علشان انا راجل و همه بنات... و ان لو اختى خرجت مع شاب لازم اخرج معاها علشان احرسها و احميها من التحرش و الاغتصاب...و انى حابقى زعيم العيله بعد ما بابا يموت
لما كنت ولد شاب فى مصر... كنت فاكر ان ضرب العشره حرام... و انى حابقى علشان كده عقيم... و ان رجليه من كتر ضرب العشره حاتتشل لما اكبر
لما كنت ولد شاب فى مصر... كنت فاكر ان تربيه اللحيه اخوان... و ان التدين اخرته اخوان... و ان الاخوان ارهابيين... و ان اليهود اسرائيليين... و ان الاسرائيليين فى كل انحاء العالم هم اعداء البشريه الاشرار
لما كنت ولد شاب فى مصر... كنت فاكر ان الخولات الجايز لازم يعدموا... و الست اللى ما تسمعش كلام جوزها لازم تنضرب... و ان مش لازم يبقى فيه حب عند الزواج... و ان اللون البينك مش للرجال... و ان لو اكلت برازى اموت... و ان الفلاحين بيئه... و ان الشغالين فى الحكومه حراميه... و الشغل بس بواسطه...و ان الملحد لازم يتصلب... و ان الدين الاسلامى هو الدين الصحيح... و ان المسيحيين فى ضلال... و كل اللى مش مسلم فى نار جهنم اجمعين
لما كنت ولد شاب فى مصر... كنت فاكر انى لازم اسمع كلام بابا و ماما لغايه ما يموتوا و الا ابقى ولد عاق... و ان كلام ماما و بابا دايما صح و رأيى غلط علشان عندهم خبره الحياه و يعرفوا مصلحتى اكتر منى... و ان لازم حياتى تمشى زى ما همه عاوزين و الا يطردونى من المجتمع
لما كنت ولد شاب فى مصر... كنت فاكر ان اللى ينتحر انسان غبى و حايدخل النار... و ان ما فيش حاجه اسمها اكتئاب... و لو زعلان لازم الم نفسى و استرجل
لما كنت ولد شاب فى مصر... كنت فاكر انى لازم البس نايك و اديدس علشان ابقى كوول... و لازم اشرب سجاير علشان ابقى كوول... و لازم اشرب بيره و احشش علشان ابقى كوول... و اركب جيت سكى علشان ابقى كوول... و اصاحب بنات كتير علشان ابقى كوول... و اركب عربيه سبور علشان ابقى كوول... و اسمع موسيقى ترانس علشان ابقى كوول... و يبقى عندى شاليه فى دبلو فى الساحل الشمالى علشان ابقى كوول... و اعيش فى التجمع الخامس علشان ابقى كوول... و اعمل تاتو علشان ابقى كوول... و اشير صورتى على الانستا علشان ابقى كوول... علشان لو انا كوول حايبقى عندى اصحاب... و اصحابى حايحبونى
لما كنت ولد شاب فى مصر... كنت فاكر ان الغرب عاوز يدمرنا... و ان العادات الغربيه عاوزه تدمر شباب مصر... و ان الاعلام الغربى عاوز يدمر مصر... و ان اى حاجه من بره مصر وراها مخطط خفى لتدمير مصر
لما كنت ولد شاب فى مصر... كنت فاكر ان الحيوانات و النباتات مالهاش عقل... و علشان كده ما بتفكرش... و علشان كده ما بتفهمش... و موجوده علشان تخدم الانسان و بس
لما كنت ولد شاب فى مصر... كنت فاكر انى لازم اتجوز علشان ده الطبيعى و كل واحد لازم يتجوز فى مصر... و انى لازم اخلف علشان اعمر الارض و يبقى عندى عيله و اعرف المعنى الحقيقى للسعاده
لما كنت ولد شاب فى مصر... كنت فاكر انى لازم ابقى طول عمرى مصر... و باسبورى مصرى... علشان اللى يتجنس بجنسيه تانيه مش مصرى يبقى خاين... و الخاين لازم يتشنق
لما كنت ولد شاب فى مصر... كنت فاكر انى لازم اسمع كلام الاغلبيه... و رأيى يبقى زى رأى الاغلبيه... و الا مش حايبقى ليه مكان فى المجتمع المصرى
لما كنت ولد شاب فى مصر... كنت فاكر الخ الخ الخ


لما بقيت ولد شاب بره مصر... اكتشفت ان مصر مش ام الدنيا... و الدنيا كلها ما بتدورش حولين مصر... و اتفاجئت ان العالم مش مهتم باللى بيحصل فى مصر زى ما انا كنت فاكر... و عرفت انى ممكن اشغل مخى و عندى امكانيه التفكير و الفلسفه... و انى ممكن اكون رأى مختلف عن الآخر و بالرغم من كده الآخر يقدرنى و يحترمنى و يحبنى... و سألت نفسى كتير لو ان الشعب المصرى مكون من ناس بتفكر زى ما انا كنت بفكر كده... و هل الافكار و الآراء دى تتوارثها الاجيال و العائلات المصريه... و تنشرها القنوات الاعلاميه المصريه إلى ما لا نهايه... و تدرس فى المدارس و الجامعات... و شعرت ان المجتمع المصرى مجتمع اغلبه فاكر انه يعرف ما هو معنى السعاده الحقيقيه... مجتمع اغلبه اقنع نفسه ان لولا الدين و العادات و التقاليد المصريه لفسد المجتمع و العالم اجمع... شعب مقتنع انه مالهوش اراده... شعب يخاف من الآخر و لا يحب التغيير... مجتمع اغلبه يا اما تبقى معاه يا اما ينبذك... و ان المجتمع المصرى اغلبه مجتمع صعب و قاسى لا يرحم... فاشفقت على احبائى اللى مضطرين يعيشوا وسط المجتمع المصرى...و شكرت الله عز و جل انه اعطانى الفرصه انى اتحرر على ارض الله الواسعه... و اتعرف على شعوب و عادات و افكار و ديانات اخرى... ده مش معناه ان ما فيش فى مصر ناس بتفكر... و ناس بترحم... و ناس بتحترم رأى الآخر بدون ما تقضى عليه... و لكنهم الاقليه... اقليه تعانى... اقليه تهرب...اقليه تهاجر بره مصر
لما كنت ولد شاب فى مصر... كنت فاكر ان الشعب المصرى شعب غلبان... شعب مظلوم من حكامه... شعب مطحون بيحاول يعيش و بيدور يوميا على لقمه العيش... ازاى انتظر من الشعب ده انه يفكر... ازاى اطلب من الشعب ده انه يرحم و هوه ما اتعلمش الرحمه علشان ما حدش رحمه
لما بقيت ولد شاب بره مصر... عرفت انى ما انتظرش من المجتمع اللى انا فيه انه يتغير...علشان انا واحد من المجتمع ده... و لو انا ما اتغيرتش...المجتمع مش حايتغير...فعرفت ان الامل مش فى المجتمع... و الا فى الشعب المصرى الغلبان... و لكن فى الفرد الانسان


2 comments:

mohamed mahmoud said...

انا عرفتك من زمان اوي يمكن من 3 او 4 سنين كنت ببحث عن موضوع ولقيتك كاتب الموضوع عندك وبعدين مدخلتش المدونة تانى لاني نسيتها وكنت عاوز ادخل تانى بس مكنتش فاكر الاسم المهم انى بحثت تانى بنفس الموضوع ومن هنا عرفتك وخليتك فى الموقع المهمة وبدأت اقرأ مقراتش صراحة كل المواضيع ولكن عجبني طريقة الكتابة وسردك عن الموضوع حسيت بحاجة مش عارف اوصفها ... اني مشتاق لحاجة او مواضيعك وبالذات اللى فيها صور قديمة بحس انى عايش فى الموضوع ونفسي ارجع ومشتاق لزمان ومكان الموضوع مش عارف صراحة اوصف الشعور ولكن الشعور ده كان جميل اوي وبيزيد انى كل شوية ادخل واقرأ شوية وبسبب انى عندي طبيعي ملل من المواضيع الكبيرة بس لو حبيت حاجة بفضل اقرأ ومش بقف ..
وصلت لمرحلة انى نفسي اكون زيك واكتب الكتابة بتريحني جدا وانا اصلا بحب الكتابة مع انى سبحان الله مش بحب القراءة اوي او المواضيع الكبيرة لو مكتوبة بشكل صعب مش بحبها ولكن ... فى مدونتك حبيت طريقة الكتابة وقولت هفتح بلوج وفعلا عملت كل حاجة وخفيت كل حاجة بحيث محدش يعرف انا مين عاوز اكون لغز زيك كدا انا افتكر انى قعدت يوم تقريبا احاول اعرف انت مين وموصلتش لحاجة غير لموقع اجنبي مش عارف صراحة او فاكر بظبط بس انا فاكر انى معرفتش اي علاقته ومش عارف هل هو تبعك ولا هو بيسرق مواصيع الموقع وبيحطها ولا اي بظبط ودي كانت اكتر حاجة بتشدني اكتر انك عبارة عن لغز !

ومن هنا بدأت كل يوم اعمل رفرش واستني منك موضوع جديد اعمل رفرش كل فتره واستني موضوع جديد لحد ما فتحت الوقتي ولقيت موضوعك ده وقراته كله وكل كلمة انت كاتبها حاسس بيها وبتفق معاها وانا من الناس القليلة اللى نفسها تغير المجتمع دي بس مش لوحدي نفسي كله يبقي كدا ومش عارف هل هقدر وهل لو هعمل كدا الموضوع هياخد مني قد اي هل هموت والمجتمع كده بردو ولا هكون عايش وهضيع وقتي ف اني اغيره وهو متغيرش ! مش عارف صراحة بس اعتقد انى مش عاوز اضيع وقت مع العدد الكبير ده والعقول اللى صعب تغيرها وانى اسافر بره مع العقول اللى نفسي اكون معاها واستمعت بوقتي ... =فى النهاية انا سعيد ان ده اول كومنت انا كتبتبه عندك فى مدونتك ليحتفظ بيه التاريخ وسعيد انك كتبت موضوع جديد لانى كنت قلقان عليك من اخر تويته على تويتر ، ارجوك اكتب ديما ومتوقفش كتابة ومتغبش علينا فتره كبيرة كدا :") وربنا يوفقك ويسعدك يارب انا بحبك فى الله اخي نفسي اعرفك شخصيا بس مش عارف هل ينفع ولا لا بس عموما انا سعيد جدا جدا انك كتبت موضوع جديد ♥♥

Younis said...

اهلا بعودتك
انت يمكن متعرفنيش ولا انا اعرفك
بس انا متابعك من اول مقال لضرب العشرة
دخلت كنت ايام اعدادي ولسه ولد شاب زي ما بتقول و خايف بقي و ده حرام
تابعت كل مقاللاتك من بعدها
معرفش ازاي بس انت بتمثلني بكل خطوات حياتي
من اول تصرفاتي الطايشة من وانا صغير و فترة خوفي من ربنا
و مروري فترات اكتئاب و انتصار
وكرهي للمجتمع و ان التغيير لازم يكون من كل فرد و عمرنا ما هنتغير بثورات غير ثورات النفس
و ان الي بيبذل مجهود في البلد محدش بيقدره
انا بشكرك علي كل كلمة بتكتبها
كان نفسي اكتب زيك و اعمل مذكراتي بس يمكن انا جبان وانت بطل بالنسبالي
ارجوك متتاخرش تاني ..انا بدخل علي مدونتك كل لما ابقي مكتئب ..بحس اني في واحد شبي بسمعه
اتمني انك تكتب بانتظام..تكتب بقلب...تكتب لان في ناس بتحبك من غير ما تعرفك <3