EgypToz: قصتى مع الايدز

Saturday, August 17, 2013

قصتى مع الايدز

قبل ثوره يناير بسنتين سافرت الى يوروبا للهروب من الوضع الصعب في مصر... و طلعت بعثه للدراسات العليا كباب خلفى للاقامه في الخارج...و في الفتره الاولانيه كنت منبهر من الحياه في يوروبا...و كنت منغمس في الشغل و الدراسه... و سنه ورا سنه بدأت احس بالوحده و الملل...قررت انزل من فتره الى أخرى مصر ادور على عروسه و اكمل نص دينى...و لكن ما لاقيتش الواحده اللى تناسبنى...و لما سنين الوحده و الغربه بقت اتنين و تلاته و اربعه...كنت محتار هل اترك الشغل و الدراسه و الاقامه في يوروبا و استقر في مصر علشان اتجوز...و لا استمر على النظام كما هو عليه...فى فتره كنت مقرر اتجوز واحده اجنبيه و اكبر دماغى...و لكن ابويا و امى هددونى ان ده لايمكن يحصل...و ده مش تقاليد العيله...و ما ينفعش تكون مش فيرجن...و انت ابننا الوحيد...و ما تجيش تبوظ الحياه المثاليه  اللى احنا بانينهالك...و اصبر و صوم و الكلام ده...زمان بعد سن العشرين كنت تعبان بسبب الشهوه الجنسيه...و الوقتى بعد التلاتين ما بقتش قادر خلاص افضل فيرجن و امشى حالى بضرب العشره...فقولت لنفسى خلاص حاستمر في النزول من وقت الى اخر مصر ادور على بنت الحلال المصريه...بنت بلدى و تحدى...و في الوقت ده لغايه ما لاقى زوجه المستقبل امشى نفسى مع نسوان بلاد بره...مع انى عمرى في حياتى ما كنت اتخيل انى أوصل للوضع ده...بس مش عارف وقتها كنت بقول لنفسى اهو الضروريات تبيح المحظورات...و ربنا شايف و عارف قد ايه صبرت و تعبت و و و ...و الله غفور رحيم...المهم الموضوع ابتدى بلعب على خفيف و انتهى بالشغل اللى على تقيل...و انا علشان كان عندى ثقافه جنسيه...كنت بحافظ على نفسى من الامراض الجنسيه عن طريق استخدام التوبس...بس في مره من المرات الكوندوم اتقطع و ما عرفتش غير بعد انتهاء العلاقه الجنسيه...قلقت و سارحتها بمخاوفى بعد انقطاع الكوندوم...قالت لى انى ما اخافش علشان هى ما عندهاش امراض...و هي بتكشف على نفسها بصفه دوريه علشان عندها علاقات كتيره...قولتلها ده زاد الطينه بله و طلبت منها انها تروح تكشف علشان تريحنى فرفضت انى اتحكم في حياتها بالطريقه دى...انا من ليلتها و ما جاليش نوم...و اليوم اللى بعده روحت فورا للدكتور اطلب منه الكشف قال لى انى لازم استنى على الأقل تلات شهور قبل ما اكشف علشان الاختبار يبقى صحيح...قولت له ما اقدرش...من يوميها و انا مش عارف اركز في حاجه في حياتى...و لا في شغلى و لا في دراستى...كل يوم قاعد ادام النت ابحث عن طرق سريعه للكشف عن الايدز...لاقيت فحص سريع بس لما شوفت سعر الكشف انهرت...رقم ما اقدرش ادفعه...فى النهايه ادركت انى لازم اصبر التلات شهور...و ما فيش حل اخر...الوقت ده أصبحت انسان ميت...لا اكل و لا شرب ليه طعم...انفصلت عن العالم الخارجي...مش عاوز اكلم حد و لا حد يكلمنى...فضلت ليل نهار عمال اتفرج على يوتيوب اشخاص بيحكوا عن تجربتهم مع الايدز...و عن الادويه الكتيره اللى بياخدوها...و الجوانب السلبيه بتاعه الادويه...كنت باخرج كل يوم اتمشى لوحدى في الغابه...افكر ازاى حاعيش مع الايدز...ازاى حاخبى الموضوع ده عن بابا و ماما...و كل الاهل و الأصدقاء...طب حاجيب الادويه ازاى...مين حايقدر يدفع تمنها...هل أحاول اخد الجنسيه و افضل في يوروبا علشان اتجنب الاسئله من المجتمع في مصر...طب لو قولت لماما...يبقى ابنها الوحيد زانى و عنده الايدز...يعنى بدل مصيبه مصيبتين...و لو حد تانى عرف هل اضحك عليه و أقول انه بسبب نقل دم ملوث...ادمان...اصل الحاجات دى ما باقيتش تنفع تتقال اليومين دول...بالذات لو انا عايش في دوله اجنبيه...يعنى تهمه انى نمت مع عاهره لازقه في قفايه لازقه...ده انا لو كان عندى سرطان...كانت الناس طبطبت عليه و هونت من مصيبتى...لكن ايدز...حايقولوا يستاهل...بقى يبقى عنده نعمه انه يسافر بره و يدرس و هوه يرميها في الزباله بالنوم مع النسوان...اتفوه عليه انسان نجس وسخ...طب الدراسات العليا...طب الشغل...طب الجواز...مين حاترضى تتجوز واحد عنده الايدز...فكرت و لاقيت انه ممكن بس مع واحد تكون عندها الايدز زيى...طب انا طول عمرى نفسى في أطفال...ممكن في الوقت الحالي بالاساليب الحديثه...بس مكلف و صعب...و مع الادويه و المتابع الدوريه ممكن الناس تعيش اكتر من عشرين سنه مع الايدز...معقول يا ربى بعد ما تعبت طول حياتى و شقيت و اتهببت عملت كل اللى عاوزه والدى و والدتى...معقول تكون نهايتى كده...هل ده عقاب فعلتى في الدنيا...الدنيا كلها اسودت في عينى و اكتئبت اكتئاب شديد...كل يوم كان بيعدى سنه...و كل يوم بيزيد ضغط انى اتخلص من حياتى...موتى ارحم لى من حياتى مع الايدز.
يوم من الأيام صحيت و روحت السوبر ماركت اشترى اكل...و دايما باشترى الايس كريم العادى ابو يورو...و عينى جت على ايس كريم هاجن داز...و دايما أقول لأ ما اقدرش ادفع في ايس كريم سبعه يورو...فى اللحظه دى قولت ما انا كده و لا كده حياتى ادمرت...خلينى استمتع بحياتى و اشترى اللى نفسى فيه...طول حياتى عمال اقول اوفر فلوس التاكسى و اتمشى المشوار احسن...اوفر فلوس الديليفرى و اروح انزل اشترى البيتزا بنفسى احسن...انا اعمل ده و ده علشان فلان ما يزعلش... معلش بلاش سينما و تلفزيون و سماع موسيقا و اعمل معسكر مذاكره علشان  اخد امتياز...انا اموت نفسى في الشغل و افشخ نفسى في المذاكره علشان ابقى متفوق و اخد جايزه نوبل...انا لازم لما اتجوز اتجوز احسن بنت في الدنيا...اللى الكل يتمنى يتجوزها...اللى اموت في حبها...لازم اخلى بابا و ماما و الاهل و الأصدقاء و المجتمع كله مبسوط منى...الدنيا انتهت علشان تليفونى المحمول الجديد باظ...انا زعلان موت علشان شعرى بيقع و بابتدى اصلع...انا متضايق كيك علشان ما حدش عمل كومنت على البلوج اللى كتبته...انا الغضب ملينى علشان نزلت النهارده الصبح لاقيت حد خدش عربيتى...انا مقروف علشان السيكس باك بتاعى بقى كرش

طوووووووووووووووظ...كله طظ في طظ...ايه الهيافه اللى كنت عايش فيها دى...ايه العبط اللى انا كنت فيه ده...من لحظه ايس كريم هاجن داز بقيت ببص على الحياه من منظور تانى خالص...بقيت بعيش كل يوم على الاخر...مش لازم اشترى اغلى اكل أو اغلى لبس...بس بقيت بقدر نفسى و عيشتى...بقيت باحاول اهون على نفسى...اكافىء نفسى...اطبطب على نفسى...اهزر مع نفسى...كله بقى بييييييس...كله في اللذيذ...نفسى النهارده في الشيكولاته دى...خلاص خد الشيكولاته دى...نفسى النهارده ما اروحش الشغل...يلا اقدم على اجازه مرضى...نفسى النهارده ما اروحش الجيم...و ايه يعنى...مش قادر اذاكر النهارده...اذاكر بكره او بعده...المدير متضايق من التقرير بتاعى...طظ...دخلت السينما الفيلم طلع وحش...و ايه يعنى...الاهلى خسر الدورى...و ماله...اتنين بس من عشره اللى عزمتهم في عيد ميلادى جم...هايل...الواحد بيعيش مره واحده بس...يا تعيشها صح...يا تعيشها غلط...بطل تحسب حسابات بكره و المستقبل...عيش فى الحاضر...عيش النهارده.

و جه يوم الكشف الطبي...و الدكتور اخد منى عينه دم و قال لى لازم انتظر أسبوع على النتيجه...و فضلت ادعى لربنا و اتوب على الحاجات الوحشه اللى عملتها في حياتى...انا عرفت خطئى و قررت انى انا اللى امسك دفه سفينه حياتى...مش بابا و لا ماما و لا مجتمعى...قررت انى ارضى بالبنت اللى مكتوبالى...مش لازم تكون اجمل بنت و الا احسن بنت...مش لازم حياتى تبقى بيرفكت...مش لازم ابقى مشهور و متفوق...مش لازم كل الناس تحبنى...ارضى بحياتى كما هى...و اسعى للتغير إلى الاحسن إذ امكن...احسست فجأه بالحريه الحقيقيه...و حتى مع الايدز ربنا ان شاء الله يغفر لى و ادخل الجنه...و حتى لو طلع ما عنديش ايدز...حاكمل أعيش حياتى على اخرها...اكنى عندى الايدز...اكن كل يوم هو اخر يوم في حياتى

حياتى مع الايدز ما كانتش النهايه...حياتى مع الايدز كانت البدايه



الايدز في الموضوع بمعنى فيروس نقص المناعه البشريه

بعض التفاصيل تم تغييرها لتلائم الموضوع

7 comments:

Mariam said...

I follow your blog obsessively lately (lately meaning the past four years), I read, I never had the guts to comment before (and simply because I don't have much to add, I only nod in agreement or hate you for the resolutions you come up with)

I found myself crossing my fingers about this aids thing, hoping it would end well and sincerely concerned about those results, but you know what, I'm pissed off..I hate the fact that you actually gave in to sleeping around..you know why, coz that's sooo not you, wala tarbeyyetak, wala deenak, wala ay 7aga

I'm telling you this coz I kind of understand how sexual desires can take over us sometimes, it really consumes you and becomes all you need in life, but believe me at some point, you will hate yourself, your everything

I honestly have no solution and no idea how one can quit after they're already tried intercourse but seriously, you have to stop

I NEVER get into peoples lives, but I felt a real urge to tell you how this usually ends badly

Other than that, I want to congratulate you on reaching the point of simply enjoying life, day by day..these facts never strike us 3'eer be moseeba lel asaf

just keep us posted on the results, will you?

WS said...

Mariam,

Thank you for your comment. I was really moved by the part "coz that's sooo not you, wala tarbeyyetak, wala deenak, wala ay 7aga"...I felt as if you know me for years, know that I can not do something like that...you see, we keep fighting and fighting for our morals and beliefs, but somehow external factors are stronger than ourselves, and sometimes you need to do things you don't want only to survive. You know...I have left many details out of my blog, to understand my situation you have to see the whole picture, to know my whole life...and God only knows.

Anyway, maybe you are less pissed off if you read the last sentence of the post...and imagine something different.

Anonymous said...

awel tadwena bta3m el2amal
super like ;)

Abdallah Mortada said...

متبقاش تغيب علينا كدة يا عم

وان شاء الله ميطلعش عندك حاجة

Anonymous said...

انت كمان يا عبد الله بتغيب علينا كتير

Anonymous said...

3ada el2osbo3 wala tamintina 3alek

Anonymous said...

YOU NEED SOMETHING TO LIVE FOR.