EgypToz: مُصخيريات

Sunday, October 28, 2012

مُصخيريات

ماما سألتنى: انت بتحبنى؟
سكت و لم ارد
ماما سألتنى تانى:انت بتحبنى؟
فضلت ساكت و لم ارد
ماما سألتنى بإلحاح:انت مش عاوز ترد ليه يا بنى...انت بتحبنى و لا لأ؟
كنت عاوز اضغط على زر غلق السكايب بس ترددت و رديت: ايوه بحبك

و بعد مكالمه السكايب فضلت نايم على السرير ابحلق فى سقف الاوضه الابيض افكر فى الرد بتاعى
 
انا فى الحقيقه ما باحبش ماما...بس ما اقدرش اقول انى ما باحبش ماما...لإنها هى اللى حملت فيه و رضعتنى و اكلتنى و ربتنى و كبرتنى و و و ...و دينى قدر الام اكبر تقدير و وضعها فى مرتبه عاليه جدا...لازم ابوس اديها و رجليها...و زى ما بيقولوا الجنه تحت اقدام الامهات...و الام بتحس بابنها حتى لو عايش فى اخر الدنيا...و الام لو دعت لابنها ربنا بيتقبل دعائها و يوفق ابنها...و الام لو زعلانه من ابنها و دعت عليه...بتحصله مصائب و بلاوى الدنيا

بس امى ما كانتش من الامهات اللى الواحد بيشوفهم فى افلام ابيض و اسود...الحنان و الحب اللى انا حاسيته منها كان نسبته قليله للغايه مقارنه بعدم الاهتمام و حب الذات و الاهمال و السيطره و و و اللى جعل العائله كلها تتجنبها و الاصدقاء ينفروا منها و معظم الناس تكرهها و جعلنى فى يوم من الايام اترك بيت العيله و انام فى الشارع...و ادون فى ايجيبت طظ

و لما جيت اقارن امى بوالدى...لقيتنى اكنى بقارن ملاك بوحش تائب...اب دمر حياه ابنه بجبروته و تحكمه و ديكتاتوريته و تسلطه و تعذيبه و و و اللى جعل إن ما يكونش ليه و لو صديق واحد فى الحياه

و كانت اخر حواراتنا على سكايب عباره عن وقفه مع الزمان...وقفه مع النفس...محاكمه للماضى اسابيع قليله قبل بلوغى منتصف العمر...بعد ادراكى ان حياتى راحت بسبب هذا الاب و هذه الام...و فى النهايه تأتى هذه العبارات التى لا طعم لها و لا رائحه

احنا عمرنا كله عاوزنلك الخير...احنا كنا عاوزين نساعدك...احنا اهم حاجه عندنا انك تبقى سعيد يابنى...احنا بسبب خبرتنا فى الحياه كنا لازم نوجهك للطريق الصح...احنا عمرنا ما كنا عاوزين نضايقك...ما فيش اب و لا ام عاوزين يشوفوا ابنهم حزين و تعيس...احنا عمرنا ما غصبناك على حاجه...اعمل اللى انت عاوزه يابنى

ها ها ها...بعد ما عمرى ما راح...الف شكر

النقطه الفاصله هى هل ربنا بيحاسب الاعمال على النيات...يعنى انا قولت لماما انا بحبك...بس انا من جوه ما باحبهاش...هل ربنا حايحاسبنى على الرد اللى هو كذب و الا على النيه و الاحساس الحقيقى الداخلى؟

و ده ودانى لنقطه ابعد...واحد ما بيصليش فى المسجد...و بيشتغل فى سوبر ماركت...جم بتوع الدين و قفلوا المحل و مسكوه من ايديه و راحوا بيه المسجد علشان يصلى جماعه...هل ربنا حايحاسبه على صلاته فى المسجد اللى هوه بيصليها بس من غير نيه؟

و ده ودانى لنقطه ابعد...لو الشريعه الاسلاميه اصبحت الدستور...هل ربنا حايحاسب الناس اللى مجبره تعمل بالشريعه الاسلاميه من غير نيه؟

ايه معنى واحد يدفع الزكاه و هوه مش مقتنع يدفع زكاه؟

و العكس...ايه معنى واحد يسرق و هوه نيته ما يسرقش بس مجبر بسبب ظروف الحياه؟

و ايه معنى واحد يزنى و هوه نيته ما يزنيش بس مجبر بسبب ظروف الدنيا؟

و ايه معنى إن الواحد يبقى ملاك ما يعملش خطىء و احنا بشر بنتوب و حانحاسب و حايغفر لنا؟
 
يعنى من الاخر...ايه معنى الحياه لو الواحد عمال ليل نهار يعمل حاجات هوه مش عاوز يعملها...مجبر بظروف البيئه و المجتمع و السياسه و الدين و الاقتصاد و و و...هل ده دليل على إن الإنسان فى الاخر مصير برغم انه مخير؟

انا عاوز اختار انى ما احبش ماما و بابا علشان انا ما بحبش ماما و بابا...بس لو ما حبتش ماما و بابا يبقى حاخد ذنب ربنا يعذبنى عليه؟

ام ارد على ماما و اقول: بصى يا ماما...انا ما بحبكيش...بس حاعاملك انت و بابا بالحسنى

اختيار من اجل الفوز بالجنه و ليس من اجل ماما و بابا...هل يقبل الله بذلك؟

بابا قال لى:بص يابنى...ما تحاولش تغير فى طريقه تفكيرى...انا فضلى خمس ست سنين و اموت

ليه بافكر فى الكلام المكعبر ده الوقتى...علشان تخيلت نفسى و انا عندى تمانين سنه...من غير زوجه و الا اولاد والا احفاد

قاعد وحيد فى شقه تصرخ بالسكوت انتظر الموت و اتحسر على حياتى اللى فهمتها غلط

بابا كلمنى من تلات تيام من على جبل عرفات يسألنى: عاوزنى ادعيلك بايه؟

قولتله: انى ادخل الفردوس الاعلى من الجنه

و قررت ان اترك الدنيا و اتصوف للآخره 

5 comments:

aMRALi said...

بشكل او باخر عشت نفس الحاله مع والدي في محاولاته للسيطره على مستقبلي وكان دايما كلامه بيحطم معنوياتي وده كان بيضيع اي حماس لعمل اي حاجه في حياتي وبالتالي محققتش اللي كنت بحلم بيه .

بس بعد وفاته نسيت كل المشاعر السلبيه اللي كنت بحسها وبقيت اوقات اندم ليه كنت برد بالشكل ده او ليه اخدت الموقف ده معاه

لو تفهمت حقيقة موقفهم هتعذرهم على غباءهم في التعامل معاك لانه اكيد مش مقصود بيه الضرر ليك حتى ولو حصل

من المنطلق ده هتحبهم زي حبك لنفسك رغم انك كتير بتسيء لنفسك بتصرفاتك وبتضر نفسك بس بالاخر بعتذر نفسك وتفضل تحب نفسك

ومفيش حاجه اسمها حياتك اتحطمت او عمرك ضاع طالما لسه فيك نفس وصحه تقدر بسهوله تبدا حياتك من جديد ولو عمرك 50 مش يادوب لسه 30 على ما اعتقد :D

Anonymous said...

شوف مهما عملوا فيك و مهما بوظولك الدنيا هيفضلوا الوحدين البيحبوك وبيخافوا عليك من غير حاجه حتى لو كان فيك العبر هو ده ميزة الاسرة ابوك امك ولو عندك اخوات انسى و اكبر و الحصل حصل خلاص و عمر التفكير فيه ما هيرجعك عشان تغيره لو سالوك بتحبنا قلهم من كل قلبى

abdallah said...

انا موافق على الكلام اللى الناس قالته .. وبالأخص aMRALi
طيب مش ممكن هما بيعملوا كدة معاك عشان عايزين يتفادوا أخطاء مروا هما فيها ووقعوا فيها ... يعني من كتر الخوف عليك بيعملوا معاك كدة .. خصوصا انك الابن الذكر البكري والوحيد .. ده اللى انا فاهمه من متابعتي ليك انك ملكش غير اخت بنت تقريبا ... ساعات من كتر الخوف عليك بيعملوا كدة .. أبويا كان شديد عليا انا واخواتى ولما كنا بنعترض كان بيقول عشان تنشفوا .. أبويا ما وانا عندى 16 سنة سنة 2003 وملحقتش اقعد معاه كتير واتعلم من كتير .. واغلب الذكريات اللى عندي ليه قرف وزهق بس أنا نفسي لو كان معايا دلوقتى .. اي كلمة منه كانت هتفرق حتى لو لو زعقلى واتحجج انه عشان انشف ... وفعلا طريقة تربيته خلتني ناشف وبعرف اتكيف مع اي خرا .. بس في المقابل مبعرفش ازاي ابقى حنين مبعرفش الاعب العيال الصغيرة .. وخطيبتي السابقى استغلت ده واستغلت نقص الحنان اللى عندى وبهدلتني بس الحمد لله كل حاجة خلصت ... المهم انك متكرهش ابوك او امك لأنهم في لحظاتهم دي أكيد معندهمش حاجة اغلى منك ... بس راعي فرق العمر والتجارب ... احترمهم على الاقل عشان هما ناس مروا بتجارب كتير عنك .. والزمن علم عليهم كتير فعايزين يحافظوا عليك

Anonymous said...

الدين افيون حلو...الدين افيون حلو مفيش كلام.

Anonymous said...

ive the same problem bro