EgypToz: من فضلك ما تقراش الكلام اللى مكتوب تحت العنوان ده لإنه كلام خطير جدا وعيب و موجه ليه بس و بقول تانى اوعى تقرا علشان انا عارف اللى انت بتفكر فيه

Monday, April 30, 2012

من فضلك ما تقراش الكلام اللى مكتوب تحت العنوان ده لإنه كلام خطير جدا وعيب و موجه ليه بس و بقول تانى اوعى تقرا علشان انا عارف اللى انت بتفكر فيه


اوووف...بص أنا حاتكلم كده و خلاص... حاكتب اللى حايجى فى مخى من غير ما اوضب الجمله لأنى زهقت...مش عارف اقول ايه...كل يوم اقعد ادام شاشه الكمبيوتر عاوز اكتب حاجه ما اعرفش...عارف أنا عاوز اتكلم عن حاجات كتير...بس من كتر الحاجات مش عارف ابتدى منين...أو أى موضوع اهم علشان ابتدى بيه...مخى بقى مليان كلام و افكار و احداث و ذكريات و افلام و صور و موسيقى و اشخاص و قصص و و و...مخى كأنه حاينفجر
بس فى الأول باسأل نفسى هو أنا باكتب فى ايجيبت طظ ليه؟ ايوه فعلا سؤال مهم بالنسبه لى ... بس هل مهم بالنسبه لك؟ و بعدين أنا باسأل مين هنا؟ أنا باسأل نفسى ؟ طب ليه باكتب السؤال على الشاشه؟ هل علشان الشاشه ترد عليه؟ و الا باكتب لحد فى الناحيه التانيه من الشاشه ماعرفوش؟ هل الحد ده ممكن يرد عليه؟ و يرد عليه ليه؟
طب رد عليه لو تقدر

شوف حاكتب موضوع...و احط صور...و كمان فيديو...و واحده قرأت الموضوع اللى عجبها و علقت...و بعدين...ايه اللى حصل؟
هل المفروض افرح؟ ليه...علشان الموضوع عجبها؟ و الا علشان علقت؟ و افرح ليه...ايه اللى يفرح إن حد موضوع كتبته يعجبه؟ كأنى فى المدرسه و الواجب إنى اكتب موضوع التعبير عن الربيع...و اخدت ممتاز....هيييه برافو عليه....ايه الهبل اللى أنا فيه ده؟

النت مليان مواضيع...و صور...و افلام كمان...ايه بقى اللى حايفرق إنى اكتب موضوع يتحط فى خزينه المواضيع النتيه و يصبح اجمالى المواضيع شرليار موضوع و و احد

شوف اهو كتبت شويه جمل فوق عن موضوع خرافه اسمه الولد الاهبل الزوبرمان اللى مسمى نفسه قال ايه ولد شاب و مستخبى ورا البلكونه يفكر لماذا يكتب هذا الموضوع الذى يدور حول سبب عدم قدره ولد شاب فى كتابه موضوع و السؤال الفلفسى عن الهدف الاساسى من الكتابه فينقلب الموضوع الرئيسى رأسا على مش عارف ايه الكلمه فيصبح الموضوع فى ذاته موضوع يكتبه ولد شاب و تصبح الجمل التى قبل هذه الكلمه موضوع و تصبح الجمل التى بعد الكلمه موضوع اخر يشرح ظاهره تحول فكره البحث عن موضوع إلى موضوع

السؤال هنا...ما هى الكلمه؟

بص...انسى اللى كتبته فوق ده...و أنا هنا باتكلم مع نفسى مش معاك ... لو كنت واحد أو واحده أو اشخاص اتكعبلت أو اتكعبلتى أو اتكعبلتم فى الموضوع ده بدون قصد أو بقصد...شوف ياض ازاى طولت الجمله و كبرت الموضوع

الموضوع هو انى لما طلعت فوق فى السما و اتفرجت كده على الكوره الارضيه و هيه بتلف...و شوفت السحب و المحيطات و النور بتاع قال ايه مدن ...وقلت لنفسى ايه اللى انت بتعمله فى نفسك بس....ليه يابنى بتعمل فى نفسك كده؟
علشان ايه كل ده...اقولك حاجه...انا ما شوفتش انس واحد على الكوره اللى بتلف دى...ولا واحد زى ما انت فاكر

انت فاكر انك انسان عايش على كوكب الارض...و الشمس بتشرق من المشرق و  بتغرب من المغرب ...و دى ماما...و ده بابا...و دى عربيتك...و دى مراتك...و دول عيالك....ها ها ها

ايوه...ها ها ها...لقد كنت فى سهوه يلله...لم اجد اى انسان أو حيوان أو أى حاجه بتمشى ولا بتتكلم على الكره اللى بتلف دى اللى انت فاكر نفسك عايش عليها

ها ها ها...قال فاكر نفسى إنسان...يا راجل روح العب بالكوره السراب...أيوه من غير نقط

و قال ايه تيتو بيعيط علشان خد زيرو فى موضوع التعبير اللى كان عن الخريف...و طول الليل بيفكر يخبى كراسه التعبير فين علشان امه ما تلاقيهاش فتضربه كالعاده بالقلم و تمنعه يروح السينما يوم الخميس

يا راجل روح مص لولى باب

و الا ام سيد اللى بتحضر نفسها الساعه اربعه الفجر علشان تنزل قبل كل ستات المانتيأه و تلحقلها انبوبه بوتاجاز علشان تعرف تقلى بيها البطاطس المحمره لسيد و ابو سيد

يا شيخ روح اتجوز

و قال شعب كامل عمال يمخمخ و يتظاهر و يعتصم على ده زور و ده نصب و ده موت و مش عارف قانون ايه و دستور ايه و انتخابات و مجلس شعب و سورى ...ايوه من غير نقط

يا بيه روح احس لاحسن ازعل منك

و أنا بقه...أنا باعمل ايه؟؟؟
عمال كل يوم افكر ابتدى اكتب عن ايه؟؟؟؟؟
و لما ملاقيتش كتبت عن إنى مش عارف اكتب ايه
و قال ايه باعمل نفسى اكنى باكتب حاجه مهمه
و بطريقه صايعه و بتاتش فكاهى

ها ها ها

لأ ده انت فكاهى بصحيح...ايه الحلاوه دى

ايه التفاهه اللى انا فيها دى
ده أنا طلعت اتفهه من الفزوره يا ولد
بس خلاص كفايه كده
الموضوع كده بوخ
و البلوج كده اخر حلاوه
و الفهرس تمام يا ريس

و للحد اللى اتكعبل فى الصفحه اللى اسمها ايجيبت طظ ...ها ها ها...ايه الاسم ده...الضحك للركب...ها ها ها...أنا اسف انى ضيعت وقت سمين من حياتك...ها ها ها... ايه الزرافه دى...مش ممكن...قصدى ثمين من حياتك...ها ها ها...ايه اللذاذه و الطعامه دى... قصدى ايه الظرافه دى

يا حد
اقولك حاجه و ما تزعلش
انت ماضيعتش وقت و الا حاجه
لإن وقتك ده ضايع ضايع
عارف ليه
علشان ما فيش وقت
و ما فيش حياه

 فى بس
 فينيتو

11 comments:

9h8 said...

وبعد خمسين سنة ناقد كبير هيكتب عن حركة المدونين والاغتراب اللى حسوا بيه بعد ما زهقوا م السياسة وهيستشهد بموضوعك ده ويفعص فيه ويطلع برابيره الوجودية

WS said...

نياه نياه نياه
مش قولت من فضلك ما تقراش الكلام ده
نوء نوء نوء
كده خطر
ها ها ها

9h8 said...

but ya wald shab that's your restrictions not mine
i couldn't fight the temptation of 0 comment. im young and weak and i need to make a point somewhere! come on! :D

aMRALi said...

انا مسيف بلوجك ومن وقت للتاني بدخل اشوفك كاتب ايه جديد
ومبتابعش غير بلوجك لاني من هواة الفيسبوك وتويتر اكتر من البلوجات ومتابعك على تويتر على فكرة :D

والي بيميزك بالنسبالي انك بتكتب دايما حاجات كتير مرت عليا او فكرت فيها بتعبر عن حاجات كتير انا محاولتش اعبر عنها كتابة من قبل

والحاله اللي بتحكي عنها هنا كتير بتيجي ببالي نتيجة اللخبطه اللي احنا عايشنها والحياة اللي من غير هدف واضح او مفهوم

حالة انا عايش ومش عايش

esraa said...

w ana etk3blt f elmwdo3 da sodfa w shayfa eno a7laaaaaaa kalam 2reto f 7yate bgd
d 7alet kol wa7d fena 3aysh 7yat tafha w byr3'e w 5alas w fakr nafso bysn3 mo3gzat

Anonymous said...

el donya khrbana ya sadeky

محمود said...

انا افكر اذا انا محمود

Anonymous said...

hi from morocco
ana 7abet kitabtak inta momtaz wi 2oslobak 2areb min nas wi mawade3ak
to7fa

Anonymous said...

انا مش عارفه انتا هتشوف الكلام اللى انا كاتباه ده ولا لاء ،، علشان انا شايفاه كله عباره عن مربعات اصلا ،، بس اللى اعرفه ان انا اكتشفت ان انا عندى حب استطلااااع رهييييب وانا مكنتش كده قبل كده

WS said...

فين المربعات...هاتولى مربعات

ٱيُـ‘ـُٱكُ يُـ‘ـُٱ قُـ‘ـُلُـ‘ـُبُـ‘ـُيُ said...

يارجل كبر مخك 😂😂😂😂