EgypToz: my last day on earth

Friday, August 19, 2011

my last day on earth

فى اول دقايق 18 اغسطس 2011...الساعه اتناشر و خمسه بالليل...و انا بابتدى اوضب و الم فى حاجياتى...قبل السفر على رحله التاسعه إلى اويروبيا...تفقدت حجرتى القاهريه المليئه بالاتربه و بيوت العنكبوت...و المكتبه المقتظه بالكتب و الافلام و صورى و أنا صوغنون...و مكتبى الذى شاخ عليه كومبوترى العتيق و ماوسى القديم و كى بوردى المكسور...و بجانبه السرير اللى نمت عليه طوال فتره طفولتى و شبابى و ما بعد البلوغ...و الدولاب المليان بكل ملابس البيت و ملابس الخروج... اكتشفت إن اليوم ده احتمال يكون آخر يوم فى حياتى...يوم 18 رمضان 1432

جوزى اتصل بيه بعد صلاه العصر و قال لى و هوه منهار : الحقى...الطياره اللى كان عليها ابننا الوحيد وقعت

انا كنت باتفرج على نشره الاخبار و لقيت خبر عن سقوط الطائره اللى كانت متجهه إلى اويروبيا و ما كنتش مصدق و اتصلت بشركه مصر للطيران و اكدولى بعدها الخبر و كنت وقتها مش عارف مراتى عرفت الخبر ده و الا لسه

أنا فى مأذق...الوقت ضيق للغايه لكى احكى لابى و امى و عائلتى و اصدقائى عن حياواتى المختلفه...حياتى الطبيعيه المعروفه للجميع...و ثلاثه حياوات لا يعرف عنها الكل...حياتى كولد شاب مدون...و حياتى الخفيه كفنان...و حياتى السريه... و تذكرت الاف الصور التى التقطها فى معظم لحظات حياواتى المختلفه...و جائتنى فكره عرض الجوانب المختلفه لحياواتى عن طريق البوم صور شامل يحكى قصتى...توقفت فورا عن توضيب شنطه السفر...و نزلت اشتريت فلاش ميمورى و نقلت البوم صورى الشامل عليه و اخفيت الفلاشايه فى مكان سرى فى حجرتى منتظرا احد ليكتشفه بعد مماتى

بعد لما خلصنا مراسم الدفن و العزا باسبوع...سافرت لوحدى إلى اويروبيا علشان اخلص اجراءات اقامه ابنى هناك و الم مقتنياته و ارجع بيها لمصر...و بعد لما فتحت باب شقته و لميت حاجاته اكتشفت إن ابنى اللى كنت فاكر إنى اعرفه... ما اعرفوش...و قررت إنى اعيش مع امه بذكرياتنا عنه زى ما كنا نعرفه

بعد لما ابوه مات و اختى جت تاخدنى اعيش معاها فى البيت...العمال جم و لموا كل عفش الشقه و فضوها قبل ما نعرضها للبيع...قولت لهم سيبونى يوم اخير مع اوضه ابنى قبل ما تفضوها...دخلت الاوضه...ابنى قال لى مش كل مره اقول لك يا ماما قبل ما تدخلى تخبطى على الباب...قفلت الباب بسرعه و خبطت...قال لى ايوه...دخلت قولت له تحب اعملك ساندويتش فراخ بالاوطه و عصير كانتالوب بالتلج علشان تعرف تركز فى مذاكرتك...قال لى لأ يا ماما...قولت له انت محتاج طاقه يابنى...قال لى اوكيه يا ماما...سيبينى بقه علشان اخلص المذاكره اللى عليه...قفلت الاوضه و روحت المطبخ لقيت اختى بتقول لى احنا متأخرين و لازم نمشى...قولت لها مش حاقدر امشى و اسيب الشقه...سيبونى هنا...عاوزه اعيش و اموت هنا...رجعوا بسرعه العفش فى الشقه...لازم اوضب البيت حالا علشان لما جوزى و ابنى يرجعوا يلاقوا الشقه زى الفل

10 comments:

amrali2000 said...

ده خوف من السفر

ولا حزن على فراق مصر ؟

كئيب قوي البوست التخيلي ده

وان شاء الله تكون وصلت بالسلامه

WS said...

amrali2000
شكرا على التعليق
ده مش خوف من السفر
ده خوف من الوصول
بعد رحله الحياه

AbdAllah said...

يا ترى اخبارك ايه دلوقتي
انا متابع من زمان بس اول مرة اعملك كومنت
هممم
اتجوزت ولا لسا ؟
و لسا عايش برا و لا رجعت مصر
يعني ايه اخر اخبارك ؟
وبرضه عايز اعرف ايه الدولة الي كنت عايش فيها في اوروبا
سواء رديت و لا لأ اتمنالك التوفيق في الايام الي جاية
:)

WS said...

AbdAllah
شكرا على المتابعه
أنا لسه ما اتجوزتش
و لسه عايش بره
و آخر اخبارى إنى محتار اعيش بره و الا ارجع مصر

aMRALi said...

اكييييييييييييد خليك بره
البلد حالها من نيله لانيل
حلمي اعيش في المالديف
عيشة بسيطه وهاديه
ادخل بلوجي واقرا اخر بوست :(

WS said...

لو عاوز فعلا تعيش فى المالديف
لم شنطتك و روح احجز طياره و سافر المالديف
المشكله انك حتلاقى لنفسك ميت سبب إنك ما تقدرش تروح المالديف
مع إنك جوه نفسك عارف لو عاوز تسافر فعلا و تعيش فى المالديف
إنك تقدر و نص

أنا طول حياتى كئيب
بس عمرى ما كنت اتخيل إن هدف حياتى حايبقى جعل المكتئبين سعداء
و قد كان

aMRALi said...

للاسف في حاجات كتير مكتفاني وفعلا مش قادر افك نفسي منها
يمكن لو الحاجات دي مش موجوده كنت قدرت اعرف انا فعلا بخلق لنفسي اسباب تمنعني ولا لا

بس ازاي هدف حياتك دلوقتى انك تجعل المكتئبين سعداء ؟ وازاي قدرت تعملها|؟

الاكتئاب لما بييجي مفيش حل لانك تمشيه الا لما ياخد فعدته ويشبع

AbdAllah said...

hmmm
من 7 ايام انتا نزلت بوست على تويتر بتقول انك مكتئب
و من فترة نزلت بوست بتقول ان الاستمتاع بالحياة دا قدر كل واحد
طب انتا دلوقتي هارب من القدر دا و لا ايه
على اي حال بما انك محتار تعيش برا و لا ترجع
الي هقدر اساعدك فيه هو اني اقولك شوف الي كنت انتا كاتبه في البلوج لما كنت في مصر و الي كتبته لما سافرت
و اظن انك تصلي استخارة و تفكر في الحوار داه
و بالنسبة ان هدفك بقى انك تساعد المكتئبين ,فمستحيل هتعرف تساعدهم الا لما تساعد نفسك الاول
و برضو مش عايز تقول انتا في انهو دولة , ماشي يا سيدي الي يريحك
:)
و برضو سواء رديت و لا لأ ربنا يوفقك و توصل لحالة الزن او مش فاكر اسمها ايه الي انتا كتبت عنها في بوست قبل كده
:D

WS said...

AbdAllah
رسالتك جميله جدا
جدا
جدا
و اجمل جمله فيها لما قولت إنى اقارن البلوج لما كنت فى مصر و اللى كتبته لما سافرت
حاجه بصراحه لا تقارن
أنا حصلى استخاره
و اطلب من ربنا إنه يهدينى إلى الطريق الصحيح
زن

AbdAllah said...

ربنا يوفقك
:)
بس مهما كان اختيارك
يا رب ملقيش الصورة السودة الي فيها كلمتين بالابيض
اكا ذي ايند
:D
بالتوفيق :)