EgypToz: 5 YEARS EGYPTOZ

Monday, February 28, 2011

5 YEARS EGYPTOZ

 هاى
همم
السلام عليكم
مش عارف ابتدى منين
اولا عندى امساك بلوجى لغايه الوقتى مش عارف ليه
كل مره اقعد ادام الكومبوتر علشان اكتب عن حاجه عاوز اقولها ما اعرفش
المشكله انى عندى حاجات كتيره عاوز اتكلم فيها و الافكار كتيره و كله مكس فى دماغى خلطبيتا و فى الاخر ما اعرفش اكتب جملتين
خمس سنين ايجيبت طظ...و الا ازاى تتكتب بالعربى ايجيبطظ...ايجيبت طز...ياااه...كانت فكره زمان لما كنت بقابل مصريين فى الشارع ما اعرفهمش و اخليهم يكتبوا الطظ اللى تناسبهم
المهم
خمس سنين ايجيبطظ و بعدين
مش عارف
اكنى خلفت عيل و اكلته و شربته و ربيته و علمته الكلام و الوقتى فى كى جى تو
بس بصراحه البوست ده مختلف عن كل البوستات اللى فاتوا
البوست ده يو نيك...فريد يعنى... مش الكلمه اللى فى بالك...يا خبيث انت يا خبيث
البوست ده اول بوست اكتبه بعد ثوره 25 يناير
مش حاقعد بقى اتكلم على الثوره و شكرا لشباب الثوره و مش عارف ايه علشان انا بصراحه زهقت من المواضيع دى هارونى اخبار ثوره لغايه ما قولت يا بس
اكن الناس ما صدقت و لبست فى حاجه و هات يا مظاهره
المهم خاللينا فى الموضوع بتاعى
كنت باقول ايه
اصل انا باكتب جملتين و كده و اروح اعمل حاجه أو اقضى مشوار و ارجع اكتب تانى
كنا فين؟
اه الثوره و البلوج بتاعى و كده و انه نيك...قصدى يو نيك و فريد من نوعه
ايوه بجد...النهارده باكتب فى البلوج بعد ما اتحررت...طول حياتى لابس و النهارده اقدر اقلع و انا مطمن و اكتب عريان...ايوه عريان...بلبوز...فكريا طبعا...فكريا ايه؟...فكريا و معنويا و شخصيا و كل حاجه
يلا ممكن ابتدى؟
ثرى تو وان

دى كانت ايام سوده مهببه بستين نيله
يا خراب بيتك
حسبى الله و نعم الوكيل فيك يا شيخ
سيبونى
سيبونى يا جماعه اطلع اللى جوايه
ايام زفت
حياه زفت
زفت الطين
يا حسنى يا مبارك

بصوا
مش عاوز اسمع كلمه مبارك دى تانى إلى ما لا نهايه
لا مبارك بعد اليوم
خربت بيتى يا راجل
خليت حياتى جحيم
ايوه كده يا جماعه ابتديت اسخن
دمرت شبابى و خاصه فتره البلوغ
جعلتنى معقد نفسيا...عقيم جنسيا
فقعت بروستاتى يا ريس سابقا
مش عارف اقول ايه

اولا عاوز اقول حاجه يا جماعه
البلوج ده كان نتاج الزمن الخره اللى كنا عايشين فيه

كنت واد عادى امور فرفور عنده بابا و ماما و كده و بيروح المدرسه و كده و شطوره و مؤدب و كده لغايه ما بلغ و كده و دخل الثانويه العامه و اكتشف انه طظ...فجاله شلل خماسى

لأ خلينا اتكلم بجد...بصوا...علشان اختصر حياتى فى جملتين علشان انا بصراحه زهقت من الكلام...كنت فى مدرسه اجنبى محترمه...فشخت نفسى مذاكره و خرجت للعالم الحقيقى و لقيت إن الحياه عكس الى أنا اتعلمته...بالبلدى كده اكن مصر بتقول لى  بالفم المليان...طظ فيك و فى اللى اتعلمته...طظ فى حياتك...طظ فى احلامك...طظ طظ طظ

و ابتدت الخناقات الاسريه...و الخناقات بينى و بين الشعب المصرى...و الخناقات مع دبان وشى...اده الشعب المصرى...طب ما انا مصرى و ابويه مصري و امى مصريه و الا ايه...بصراحه حاسيت انى من كوكب تانى ما انفعش مع المصريين دول...مين الناس دى؟...و ادعكت يمين و شمال...فوق و تحت...فى البيت و فى الغيط...على الاسفلت و على الرصيف...ابويه الاستاذ الجامعى بقى بيشحت...و امى بتطرقع لبان فى النادى...و انا لايس و اخويه هايس...بابا جاله هايبر تنشن راح راكب اول طياره على دوله خليجيه يلمله قرشين يأكل بيهم الاسره ميسوره الحال بتاعتى...و امى استمرت فى الذهاب إلى الجيمينيزيوم...اخويه خلص خامس مرحله من وور كرافت و انا لميت حاجاتى و الفار سنونو بتاعى و ركبت تاكسى و روحت لبيتنا المهجور القديم

وضبت الشقه من جديد...و اشتريت مستلزمات البيت...مش عارف...ممكن اكون من اول الناس اللى سابت بيت اهلها و راحت تعيش فى شقه تبعد على رأى جوجل مابس 2 كيلومتر أو 20 دقيقه مشى على الرجلين من باب البيت

كنت وحيد...وحيد...وحيد...و ركبت نت...و وصلت السلك شخصيا من الشارع لبير السلم للبيت...و تركت العالم الخارجى...و دخلت العالم السيبارى...و اتكعبلت فى حاجه اسمها مدونه...و كانت لواحد اسمه علاء...و اتعرفت على منال...و دخلت عالم منالا...و ده كان فى شتاء  2005  القارص...و قررت انى اعمل عالمى الخاص ادون فيه يومياتى فى مصر المهروسه لغايه لما اطلع منها... و بدل ما تقول لى طظ فيك...أنا اللى اقول لها طظ فيكى و فى بلاويكى و إن شاء الله ما ارجع ليكى

و ابتديت اتعرف على الشباب الهيبيز...أو بالاصح شباب صوصو و هوهو زى ما كان بيطلق عليهم زمان...دول شباب بيختلفوا تماما عن شباب الفيسبوك سيلانترو...شباب غريبه كده تقعد فى الشوارع... و شويه منهم بيشربوا بيره...و شويه كده ملحدين و سايبين دقنهم و شعرهم مش محلوق...و بيسمعوا منير و ابو شمه...و شويه نيردز بنظاره و لبس سبعيناتى...بيشربوا سجاير و بيقروا اصدارات دار ميريت و بيتفلفسوا فى الشوعيه و الديمقراطيه و حقوق الحيوان...بيقعدوا فى قهاوى وسط البلد أو تحت الكوبرى اللى فى الزمالك يسمعوا موسيقا...أو لو فايقين يروحوا يصوصووا و يهوهووا شويه قدام نقابه و الا نقيب شرطه...و يا سلام لو اتلموا فى البوكس و اتنفخوا علشان يدونوا عن النفخ و التنفيس...و ينفسوا عن اللى جواهم و شغل نفسنه بقه و تدوين...و قال ايه...أنا كنت واحد وسطيهم...أنا هيرو المدونين

وقتها كنت فى الجامعه...و يا للعجب صاحبى الانتيم متدين حبتين و بيحب ربنا...و بيحب يدعوا الناس إلى الالتزام...كنا بنعمل كل حاجه مع بعض...مذاكره صلاه خروجات اعمال خيريه... لغايه لما اسمى نزل فى البلاك ليست بتاع مباحث امن الدوله...و علشان ابويه معروف بقه و عنده كونيكشنس...بدأت الاتصالات و لقيته نازللى بالطياره على البيت و بيلمنى كده هيله هوبه على مكان مهيب مش عارف امن الدوله و الا ايه و دخلت على الكبير و طلب انه يقعد معايه لوحدى و إن والدى ينتظر فى الخارج

اول حاجه قالهالى: ما انت زى الفل روش زى الشباب الحلوين اهو...ايه اللى لمك على الناس دى بقه
دخل ضابط صغير و معاه الملف بتاعى...مكتوب فيه كل صغير و كبيره...روحت فين امتى ازاى مع مين لمين...أنا اساسا مين...من الاخر خلاصه حياتى من البامبرز للحين...حاسيت إنى فى ساينس فيكشن...خلاصه الكلام...قال لى انت شكلك واد متربى و ابن ناس...خليك بعيد عن الناس دى و بالذات صاحبك  ابو دقن الانتيم ده و احنا حانمحى ملفك و ننساك...و علشان والدك راجل محترم مش عاوزين نإذيك

خرجت من عنده اكنى اتنفخت نفسيا...جالى شيزوفرينيا...ابص يمين و شمال حد بيتابعنى...حد بيتجسس على التليفون...دول عارفين ادق ادق التفاصيل اللى امى نفسها ما تعرفهاش...يا نهار بامبى تنين

قابلت صاحبى الانتيم...و قولت له على الحقيقه...و إن ده آخر يوم حاشوفه فيه...هوه اعطانى قرآن صغير لغايه النهارده محتفظ و اللى بقرا فيه...و حضنا بعض...و قولت له خد بالك من نفسك... و دموع بقه...اكنه فيلم درامه هندى على تركى مدبلج...و بارك الله فيك...و قولت له إن شاء الله حايجى اليوم اللى أنا اقدر احضنك فيه فى ميدان التحرير بدون خوف...و ما فيش شهرين و لقيت صورته طالعه على الجزيره فى خليه مش عارف المنوفيه و الا ايه اللى اتقبض عليها و دخل السجن ظلم...و مستقبله اتدمر...و انا كملت تدوين

ادون ادون ادون...بكره مصر...مصر خره...و اصور...شوفوا الزباله...شوفوا الناس...شوفوا القرف...علشان كده بكره مصر...علشان كده مش عاوز اقعد دقيقه واحده فى مصر...كنت عارف إن كل حاجه بيتجسس عليها...و إنى مراقب...و علشان كده كنت مصمم إن ما حدش يعرف أنا مين فى الحقيقه...و ابتدت حياتى الخفيه...بالإسم الحركى السرى ولد شاب أو الكود دبليو أس

على فكره التدوينه طولت و انا زهقت...أنا حاكروت فى الكلام علشان اخلص و انام...أنا ولد شاب...و الخطه الهروب من الجحيم اكا مصر

فضلت اخطط...و اخطط...و الخبط...و اعك...و اخطط...و امط...و اشك...لغايه لما لقيت طريقه انى اهرب بيها من مصر...حياتى بتتسرق منى يا ناس يا هوو...باتهدد...كئابه بلا حدود...دموع دموع دموع...مستقبلك ضاع يا ولدى...المهم لقيت فرصه فجأه إنى اعمل الدكتوراه فى الباليه فى ارقى المدن العلميه الاوروبيه...و موضوع الرساله اللف اللولبى على اتراف صوابع الرجل اليمنى لاوديت فى الحركه الثانيه من المدخل الثالث لبحيره البجع لتشايكوفسكى...و ماله...بالرغم انى ماليش فى الباليه الكلاسيكى و إنما فى الرقص التجريبى...اهو طريقه للهروب و السلام...خول اقول ايه بقه...واد ساب البلد و هرب زى الارانب... و اسيب المصريين بقه يحكوا مع بعضيهم على راحتهم فى جحيم مبارك

و فضلت ادون...و ادون...و اكتب مواضيع ملتويه...بكلمات سريه...و اللى يفهم يفهم...و اللى ما يفهمش عنه ما فهم...و فضلت علاقاتى مع الشباب الهيبيز...شباب النت الكوول...المدونين العسل...نتكلم فى الشات...نتكلم فى تويترز...و قالوا ما يلا نعمل ثوره...نهوهو و نصوصو شويه...و حددوا يوم...و هزرنا مع بعض
#Jan25و الهاش السرى
#EgyptianRevolution و أنا اهشتك كمان
و نزلوا الشوارع...و أنا مع الباليه...و راحوا ميدان التحرير...و رفضوا اكل الكنتاكى...و دوروا على هارديز...و الناس العاديه اللى ماشيه فى الشارع قالوا عاوزين احنا برضوا من الهرايز ده...و شويه اتلموا على شويه...ميه على الف على مليون...كونوا تلاته اربعه مليون...و التلفزيون جه يصور و الموضوع كبر و الدنيا سخنت و العالم ولع و ناس استشهدت و مبارك طلع على التلفزيون يكاكى كنتاكى و أنا اتخصيت عبر الاقمار الصناعيه...و جاء اليوم المنتظر...و غار مبارك جوود باى اذهب إلى الجحيم

ستوب...معلش ثانيه واحده...بجد..اصل أنا مش قادر استوعب اللحظه الحاليه اللى أنا فيها الوقتى...معقول باكتب لمبارك اذهب إلى الجحيم...لمبارك...مبارك...الريس سابقا...يا لهوى...واو...بجد واو...معقول...ده اكنى باحلم...مش مصدق...عااااه ه ه ه

و اتحررت مصر...و الناس زغردت...و عينيه دمعت...و حاسيت انى خول تانى علشان هربت من مصر و ما كنتش شجاع و نبيل زى المصريين العظام اللى استشهدوا فى سبيل الوطن...اخس يا ولد يا شاب...بقى مسمى نفسك ولد شاب و مستخبى ورا الكيبورد فى بلاد الفرنجه... و المصريين الشرفاء ضحوا بأرواحهم فى سبيل تحرير الوطن...اخس

اده و لسه مسمى مدونتك ايجيبطظ...طظ فى مصر يعنى؟...من النهارده ايجيبت و بس...مصر...مصر...تحيا مصر

امضاء

طظ

8 comments:

MedZag said...

انا متابعك من زمان...... بصة يمين وشمال .......!!!!

انت احلي فيك انك صادق مع نفسك

والاكيد ان معندكش subconscious كله خارج من الوعي....

WS said...

MedZag
معقول متابعنى من زمان
يا خبر ابيض
يبقى اكيد انت من اللى بيتجسسوا عليه
بهزر
ما هى المصيبه انى كل شغلى فى الصب صبكونشس
لغايه ما اتجننت

helperF1 said...

انا اول ما شفت في الجوجل ريدر ان فيه تدوينه جديدة منك قولت لازم اكتب تعليق و اديلو كلمتين في العضم
انت هريت المصريين توبيخ و تحقير في المدونات
بس بصراحة اخر فقرة في تدوينة النهارده غيرت كل حاجة
الحمد لله ان انت عرفت و كلنا عرفنا المصريين يقدروا يعملوا ايه و بجد مش كلام شعارات و اغاني
مافيش شعب اشرف و انبل من كده خرجين ثورة في وش ابشع جهاز امن في التاريخ الشرطة تفتح عليهم الرصاص الحي و هما يرفعوا شعار سلمية
ايه التقدم ده ايه الرقي ده
مع احترامي لاوربا و عدم انكاري لفضلها على العالم لكن التغيرات الجزرية كانت دموية مصر مره تانية اصبحت مثل يحتذى به
الحمد لله ان مبارك غار و معدن المصريين الاصلي بان ولو كان عليه شوية صداء لفترة من الزمن
و ان شاء الله ترجع مصر في يوم من الايام و تفيدها بعلمك و ان شاء الله نعيش و نشوف مصر في يوم زي اوربا و احسن
والله ممكن والمثال موجود تركيا

WS said...

لو كنت تعرفنى شخصيا ما كنتش تقول إنى هريت المصريين توبيخ و تحقير

على فكره علشان ما يجيلكش صدمه
أنا اتفرجت على الثوره و هى بتتولد على تويتر بالصدفه
و بصراحه لولا ثوره تونس
ما كانت ثوره مصر

أنا من كتر حبى لمصر عملت المدونه دى اتكلم عنها

كنت بنادى مع اصدقائى المدونين على التويتر بالثوره قبل يوم 25 يناير

http://www.egyptoz.ws/2011/01/jan25.html

قبل ما حد كان يتخيل إن يكون فى كلمه ثوره
ده حتى اليوم كان متحدد قبليها باسابيع
و بصراحه كنت متشائم من عدم نجاح الثوره

المشكله مش فى الثوره
المشكله ما بعد الثوره
و لو قرأت بوست اللى انتم عارفين قصدى مين

http://www.egyptoz.ws/2010/12/blog-post.html

حتلاقينى باتكلم عن الثوره و سقوط مبارك بشكل رمزى قبل الحدث الحقيقى بشهر و نص
و الجزء الاخير باتكلم عن خوفى فى عدم تغير اسلوب حياه المصريين بعد الثوره

إن شاء الله حارجع مصر
علشان افيدها بعلمى
علشان أنا مصرى و فخور إنى مصرى و بحب مصر

Anonymous said...

أنا على فكرة بقرالك من زمان كنت مرة باعمل بحث عن حاجة في جوجل و كانت مدونتك من وسط النتايج أفتكر كان عن الفيسبوك أول ما ظهر و قريت اللي انت كاتبه و من وقتها يا معلم و المدونة بتاعتك عندي في البوكماركس بصراحة استفدت منها كتير و كانت بردو من ضمن أسباب الاكتئاب اللي جالي و اتعالجت منه كنت باتفق و اختلف معاك لكن عمري ما علقت
أتمنى انك تفضل تكتب بنفس الصراحة و الأمانة
شكراً بجد يا ولد شاب
Tarek

أحمــــــــدبــــــــــلال said...

يبدو أن مصر كلها كانت متابعة مدونتك فى السر
أحلى حاجة أنك كنت بتقول كل اللى نفسى و نفسنا كلنا نقوله
متربى و خريج لغات و جامعة خاصة
نفس الصفات
تخرج للعالم و تقول رأيك و تتفاجأ بالقفا اللى نزل على قفاك
أتخرجت من الاعلام جامعة خاصة و كتبت فى صحف معارضة و عند أول مكتب أمن دولة قررت أبطل أكتب خالص عن كل حاجة و أى حاجة
خفت بقيت جبان
بقيت بهرب من وجودى مع أهلى علشان مايخفوش عليا سافرت بره مدينتى علشان أبعد بس عنها من الخوف بقالى خمس سنين أعيش منفصل حتى بعد مارجعت تقدر تقول انى مازلت منفصل عنهم
بتكلم مع الناس اللى اعرفها بس
ملفى فى أمن الدولة بقى تصنيفى
معارض متعاطف غير فعال
بس برضه لسه ليا أصحاب فعالين
كل مايعملوا حاجة يحطوا موبايلى و تليفون البيت تحت المراقبة علشان يوصلولهم
يعنى مستحيل امن الدولة تنساك أو تقفل ملفك لازم تشيله لوقت اللزوم
أدق أسرار حياتى سمعتها و قالوهالى فى أمن الدولة
حتى مكالمة أستعلامى عن رصيد الموبايل متسجلة
قلت يمكن ناويين يشحنولى و لا حاجة
لغاية النهاردة مش مصدق انه مشى
انا كنت قربت أقتنع انى هاعيش و أموت و انا ماشفتش رئيس غيره
و كل ده فساد اتفضح بعده
نزلت مظاهرات بعد ما عصيت أمر امى و أبويا
زعقت بعلو صوتى قلت أن شاء الله أموت بس أقولها بصوت على مرة فى حياتى
يسقط يسقط حسنى مبارك

amrali2000 said...

ياااااااااااااه
حمد الله عالسلامه يا راجل

انا مستنيييييك من اول ما بدات الثوره

كنت متحمس اشوف الشب اللي جسد كلمة طز اونلاين

اللي هو واحد من شباب البلوجات :) - قبل هوجة شباب الفيسبوك - هيكون ايه رايه في اللي بيحصل

مش لوحدك اللي حسيت انك *ول او كنت هربان من مصر

كتير كانو جوا مصر وكانو هربانين ومستخبين بس لا اراديا

غصب عنا

انا اتولدت وعشت اول 10 سنين من عمري بره مصر

ولما جيت مصر عشان 20 سنه - عمري 30 - في نظام واحد متغيرش

كبرت واتعودت انو في ممنوعات منقدرش نفتح بقنا فيها في العلن والا هتكون العواقب زي اللي انت حكيت عنها في تجربتك مع امن الدوله الله لا يرجعها

انا كنت بتابعه اخبار المظاهرات قبل ما تحصل بالدعوات عالفيسبوك ومكنتش مقتنع ان ممكن تعمل حاجه

كنت بقول مبارك مش بن علي ده جبااااااااااااااااااار ومفتري وعمره ما يهتزحزح غير بقدرة ربنا

بس عقلي مستوعبش ان قدرة ربنا هتسخر الظروف عشان تقضي على البلطجي اللي عاش يرعب فينا هو ونظامه

اللي حصل مش بسبب المظاهرات في رايي بسبب غباء مبارك ونظامه البلطجي اللي معرفش يتعامل مع التطور السريع للاحداث

ولما حاولوا يردوا ردوا باساليب متخلفه زي موقعة الجمل المشهوره وضرب رصاص على المتظااهرين متجاهلين ان العالم كلو متابع ومترقب وان مبقاش ينفع استخدام اساليب البلطجة المتخلفه دي

يعني مالاخر قضى على نفسه بنفسه

كابوس وانزاح

وربنا يستر على مصر من اللي جاي

بحييك على البلوج ده تاني مره وبقولك اني قريت اغلب اللي فيه واستمتعت جدا باسلوبك الجميل في التعبير عن رايك بشكل طبيعي وصادق وقريب لاحساس اللي بيقراه

بس برضه لسه مش عايز تعرفنا بيك بشكل مكشوف

شكلك لسه خايف هههههههههههههه

Anonymous said...

كلنا كنا بنقول طظ انت هربت منها لبره لانك عرفت وغيرك حاول يهرب بره معرفش فهرب جوه
المهم في النهايه كلنا هنرجع في كلمنا وال هرب جوه او بره هيرجع يفيد البلد باحلامه وطموحاته ومن هنا ورايح لا يوجد غير عقولنا
وبعد 25 مفي حكومه احنا ال حكومه
:D
اما موضوع الشتيمه كلنا كنا بنمشي نشتم في بعض كنا بنفرغ طاقه ومتزعلش علشان دي غلطه كانت منتشره وجيه اليوم ال نغير بايدينا الكون