EgypToz: ∞

Sunday, December 12, 2010

هو انا عايش ليه؟
الله سبحانه و تعالى خلق الإنس و الجن علشان تعبد الله سبحانه و تعالى
أنا إنسان اعبده ليه؟
علشان هو اللى خلقك
و حايستفيد ايه لما اعبده؟
هو امرك انك تعبده و تشكره

هو مين قال إن فيه الله سبحانه و تعالى؟
و الله سبحانه و تعالى فين؟
الله سبحانه و تعالى موجود فى كل مكان و زمان
و الله سبحانه و تعالى جه ازاى؟
و الله سبحانه و تعالى عباره عن إيه؟
الله سبحانه و تعالى هو الخالق و أنا المخلوق
النحات هو اللى عمل تمثال من حجر
النحات ليه خصائص غير التمثال الجماد اللى من حجر
فلا يقارن الله سبحانه و تعالى بخصائص البشر المكون من وجه و عينين و نتاج ولاده
لإن التمثال من حجر شىء
و النحات شىء آخر
الله سبحانه و تعالى قال انه موجود
عرفت من القرآن إنه موجود
القرآن كلام الله سبحانه و تعالى الموجه للبشريه
و ايه الدليل إن القرآن كلام الله سبحانه و تعالى؟

طب ليه الله سبحانه و تعالى ما ظهرش و قال إنه موجود؟
كانت كل الناس آمنت بيه
لو الله سبحانه و تعالى كان عاوز الناس كلها تؤمن بيه كان عمل كده
طب ليه الناس المؤمنه عاوزه الناس اللى مش مؤمنه انها تؤمن بالله سبحانه و تعالى لو الموضوع كده

و مين قال إن فيه حساب و جنه و نار؟
الله سبحانه و تعالى قال كده
و ليه فيه حساب و جنه و نار؟
علشان الناس المؤمنه بالله سبحانه و تعالى و عملت اعمال كويسه تدخل الجنه و الناس اللى مش مؤمنه بالله سبحانه و تعالى و عملت اعمال وحشه تدخل النار
الله سبحانه و تعالى ممكن يغفر الذنوب كلها إلا الشرك بالله سبحانه و تعالى
المؤمن بالله سبحانه و تعالى اللى عمل اعمال وحشه حايدخل النار شويه و بعدها حايدخل الجنه للابد
و اللى مش مؤمن بالله سبحانه و تعالى  حايدخل النار للابد

يعنى ايه للابد؟
يعنى بلا نهايه
يعنى ايه بلا نهايه؟
يعنى يعيش عالطول عالطول عالطول
و بعدين؟
ما فيش بعدين
إلى اللا نهائيه

و المؤمن بالله سبحانه و تعالى اللى عمل اعمال وحشه و ربنا رحمه ممكن الله سبحانه و تعالى ما يدخلوش النار خالص
طب اللى عمل اعمال كويسه بس مش مؤمن بالله سبحانه و تعالى حايدخل النار؟
و اللى عمل اعمال وحشه و مؤمن بالله سبحانه و تعالى حايدخل الجنه؟
يعنى اللى عمل اعمال وحشه و اغتصب و سرق و قتل و مؤمن بالله سبحانه و تعالى و تاب قبل ما يموت و حايدخل الجنه بعد النار احسن من اللى عمل اعمال كويسه و ساعد الفقراء و الايتام و عمل اعمال صالحه و كان طيب مع الناس بس مش مؤمن بالله سبحانه و تعالى و حايدخل النار؟
هل الخير من الله سبحانه و تعالى و الشر ايضا من الله سبحانه و تعالى؟
ام الشر خلق نفسه؟
ام هناك اله للخير و اله للشر و الاتنين ينتظرا من سيفوز فى نهايه لعبه الحياه؟
هل الحياه و خلق الشيطان الرجيم و الانسان الخير و الانسان الشرير و الحروب و الحساب و الجنه و النار نوع من العبثيه أو التسليه؟
الله سبحانه و تعالى رحيم و انت ما تعرفش الله سبحانه و تعالى حايحاسب الناس ازاى

الله سبحانه و تعالى عارف مين حايدخل الجنه و مين حايدخل النار
يبقى احنا مصيرين؟
احنا مخيرين
اللى عاوز يؤمن بالله سبحانه و تعالى هو اللى بيختار يؤمن بالله سبحانه و تعالى و اللى مش عاوز يؤمن بالله سبحانه و تعالى هو اللى بيختار ما يؤمنش بالله سبحانه و تعالى
الله سبحانه و تعالى هو اللى خلقنا و اعطى الحريه لكل واحد يختار طريقه
اكن الحياه فيلم
الله سبحانه و تعالى خلقك و اعطاك الحريه تختار طريقك و سجل الفيلم ده و عرف فى آخر الفيلم انت اخترت اى طريق و عرف مصيرك الجنه أو النار و انت الوقتى عايش الحياه اكنه حاضر و الحياه فى الحقيقه ماضى و انتهى و الله سبحانه و تعالى عارفه
بتحاول تحلل الموضوع بنفسك مش كده؟
يعنى اللى اتولد اعمى اختار انه يبقى اعمى و اللى ما بيعرفش يخلف اختار انه ما بيعرفش يخلف و اللى ماشى و خبطته عربيه و اتشل اختار إنه يتخبط بالعربيه و يتشل؟
الله سبحانه و تعالى عامل الحياه اختبار لكل إنسان
الحياه اختبار محكم بالعدل لكل البنى ادمين و الفائز هو اللى يعرف يتغلب على صعوبات الحياه

و ليه فيه حياه اصلا اللى البنى ادم عايشها؟
علشان الله سبحانه و تعالى طلع ادم و حوا من الجنه و نزلهم على الارض و احنا اولادهم
و ليه الله سبحانه و تعالى طلعهم من الجنه؟
علشان خالفوا امر الله سبحانه و تعالى و اكلوا التفاحه من الشجره المحرمه
و ليه اكلوا التفاحه؟
علشان الشيطان غرهم
و ليه غرهم الشيطان؟
علشان الشيطان رجيم
و ليه الشيطان رجيم؟
علشان الشيطان خالف امر الله سبحانه و تعالى و ما سجدش لادم
و ليه الشيطان خالف امر الله سبحانه و تعالى؟
علشان الشيطان قال لربنا انه ازاى هو يسجد لادم اللى اتخلق من طين و هو اتخلق من نار
و ليه النار احسن من الطين؟
و مين خلق الشيطان؟
الله سبحانه و تعالى خلق الشيطان
و ليه الله سبحانه و تعالى خلق الشيطان مادام عارف إن الشيطان مش حايسجد لادم و إن ادم مش حايفضل فى الجنه و إن البنى ادم حايعيش على الارض؟
يعنى البنى ادم احسن من الجن؟
و الجن عنده برضه حساب و جنه و نار؟
و الجن عايش فين؟
و الجن عندهم برضو رسل و قرآن؟
و الجن عارف عن الإنسان و الارض؟

و ليه فيه موت؟
علشان الحياه ما فيهاش الابديه
و مين قال إن ده موت؟
ما ممكن بعد الموت يكون فيه حياه بس بطريقه تانيه
أو الواحد يتولد فى زمن و مكان تانى
أو البشر كلهم فى كل الازمنه شخص واحد
أو الإنسان بعد الموت بيتحول لجان

معقوله الناس فضلت تتناقل قصه الرسل عبر السنين و حتى الآن
و القصص تقريبا مضمونها واحد مع بعض التغييرات
و مذكوره كلها فى القرآن
و الا ده حواديت و تقاليد الشعوب
معقوله واحد أو بعض الاشخاص فضلوا يجمعوا القصص دى و يتعبوا نفسيهم و يعملوا القرآن

و ايه الدليل إن القرآن كلام الله سبحانه و تعالى؟
و ليه ما يكونش محمد صلى الله عليه و سلم هوه اللى كتب القرآن؟
لإن محمد صلى الله عليه و سلم كان لا يعرف القراءه و الكتابه
و القرآن لا احد حتى يومنا هذا ممكن يكتب ايه أو سوره منه
و علشان الله سبحانه و تعالى قال إنه حفظ القرآن من التحريف
طب مين قال إن محمد صلى الله عليه و سلم ما كانش يعرف القراءه و الكتابه
و هوه اللى قال إن القرآن محفوظ من التحريف؟
السيره النبويه و الاحاديث هى اللى قالت كده
و ليه فيه احاديث؟
علشان تعاليم الدين الإسلامى مش كلها مذكوره فى القرآن زى كيفيه الصلاه و الحج و علشان نتعلم تطبيق الإسلام الصحيح عمليا فى حياه الرسول صلى الله عليه و سلم
و ليه التعاليم لم تذكر فى القرآن؟
و مين قال إن الاحاديث دى صحيحه؟
الائمه اللى جمعوا الحديث تأكدوا من ده
و مين قال إن الائمه ما غلطوش؟
مش الائمه بشر

و ليه محمد صلى الله عليه و سلم اخر الانبياء؟
و ليه الله سبحانه و تعالى ارسل المسيح مادام عارف إن ناس كتيره حاتؤمن انه ابن الله سبحانه و تعالى و إنه عاش علي الأرض بكامل ألوهيته ولكن في صورة انسان و مات على الصليب و دفن بس قام و بعد كده عاش على يمين الله سبحانه و تعالى؟
أو إن المسيح هو الله سبحانه و تعالى؟
ازاى الله سبحانه و تعالى يموت؟
أو إن المسيح اتصلب ومات علشان تدفع ثمن خطيئه البشريه؟
و ليه يدفع ثمن خطيئه البشريه لو هو اللى عمل البشريه؟
و لو المسيح الله سبحانه و تعالى ازاى مريم عليها السلام ولدته؟
و مين اللى خلق مريم عليها السلام؟
أو الرمزيه هو المقصود
و ليه ما يكونش الدين المسيحى صح و الدين اليهودى صح و الدين الإسلامى صح و كل الاديان اللى بتؤمن بوحدانيه الخالق صح مادام كلهم بيؤمنوا بنفس الله سبحانه و تعالى و إن دى حكمته فى الموضوع؟

و ليه الله سبحانه و تعالى ارسل كل الرسل دى؟
علشان كل قوم فى كل زمن يعرف عن الله سبحانه و تعالى
الله سبحانه و تعالى ارسل رسل ذكروا و رسل لم يذكروا فى القرآن
و ليه ما فيش معجزات فى زمننا ده؟
و ليه زمان كان فيه معجزات ايام الرسل؟
علشان الناس تؤمن بإنه رسول من الله سبحانه و تعالى
و ليه حتى فى وجود المعجزات زمان كان فيه كفار و لم يؤمنوا؟

و ليه ايام محمد صلى الله عليه و سلم كان فيه كفار؟
و ليه البشريه كلها ما اسلمتش لو الإسلام هو الدين عند الله سبحانه و تعالى؟
و ليه المسيحى و اليهودى ما بيؤمنش بالإسلام و المسلم بيؤمن بالمسيح و موسى؟
و ليه المسلم ما بيؤمنش بالقرآنيين و البهائيين و البوذيه و السينتولوجيه؟
اكيد الاديان التانيه برضو فيها دلائل جعلت الناس تؤمن بالاديان دى و انا ما اتعرفتش عليها زى ما الناس اللى مؤمنه بالاديان التانيه ما اتعرفتش على دلائل الدين بتاعى
هل كنت حاقتنع بالدلائل بتاعتهم و اعتنق ديانتهم ام همه اللى حايقتنعوا بالدلائل بتاعت دينى و يعتنقوا ديانتى؟

معقوله الناس قعدت تألف كل القصص و الخرافات دى و سمتها دين؟
و كل التعاليم الدينيه دى علشان ايه؟
على مر العصور و القرون؟
هل الدين هو الوهم الجماعى؟
مجموعه من الناس عاوزه تصدق حاجه و تخلى اللى ما صدقش يصدق؟
مجموعه من الناس بتحاول تستخدم الحاجه اللى اسمها الدين لاهداف سياسيه و اقتصاديه و شخصيه؟ 
و يحاولوا يجدوا دليل علشان تصدق؟
و لو ما فيش دليل يقول ماهو هوه ده الإيمان
إنك تؤمن بشىء من باب الإيمان بالشىء
و العالم يولع و البنى ادمين يقتلوا فى بعض
و كل ده حكمه من الله سبحانه و تعالى لا نعلم عنها شىء
زى ما بيتقال
هل الدين افيون خدر كل واحد عايش فى مجتمع متدين محاط بالمساجد و الكنائس و القنوات الدينيه و جعله يمشى مع الركب بدون تفكير؟
ليه ما يكونش العالم جه بالصدفه؟
و إن الإنسان نوع من الكائنات زى الحيوان و النبات و الجماد
و إن الكوكب اضخم كائن حى
مش لازم كل كائن يبقى عنده عينين و بق و مناخير
و إن الفضاء ده مع الارض و كل الكواكب و المجرات داخل جسم كائن ضخم
زى الفيروسات مع كرات الدم داخل جسم الإنسان
ليه كان فى ديناصورات زمان؟
علشان فى اثار هيكل الديناصورات
و البنى ادم البدائى كان ضخم كما تقول الروايات
فين هيكل هذا البنى ادم الضخم لو كان جه بعد الديناصور؟
موسى عليه السلام عاش سنين و سنين ايام فرعون
و الله سبحانه و تعالى ارسله بمعجزات كثيره لا تنسى كمعجزه السحره و البحر
ليه ما فيش حد من الفراعنه كتب القصه دى على الجدران؟
و فين سفينه نوح عليه السلام؟
و فين ملك سليمان عليه السلام؟
أو ذو القرنين و يأجوج و مأجوج؟
لو دوله من الدول ارسلت صاروخ يضرب الكعبه هل ستظهر معجزه كسحابه تحيط الكعبه و تكون كصدر واق يدمر الصاروخ فيؤمن و يسلم كل من على كوكب الارض فى ليله؟
لو الله سبحانه و تعالى عاوز كده ما عملش كده ليه؟
لو ولاده الإنسان هى بدايته و موته هو نهايته ليه الواحد ما يقدرش يولد نفسه بس يقدر يموت نفسه؟
حاخسر ايه لو آمنت بالله سبحانه و تعالى و طلع فى الآخر ما فيش الله سبحانه و تعالى؟
بس حاخسر كتير لو ما آمنتش بالله سبحانه و تعالى و طلع فى الآخر إن فيه فعلا الله سبحانه و تعالى

هل الله سبحانه و تعالى خلق مخ الإنسان بحدود معينه لا يستطيع مخه أن يفكر بعدها؟
زى الابديه و ازاى الله سبحانه و تعالى جه و ايه اللى كان قبل الله سبحانه و تعالى؟
هل البشريه تنتظر يوم القيامه و ما فيش يوم قيامه؟

هل على سواق ميكروباص عتبه و على ام سيد بتاعه الخضار و عم محمد البواب و كيمو بتاع الفيديو جيم و معالى الوزير و سياده الرئيس أن يفكروا فى كل هذا؟
هل كان فيه يوم فى حياتهم فكروا فى كل هذا؟
ام هى عيشه و السلام؟

اتعلمنا الدين من ابله عفت فى الفصل
حفظت السوره و كتبتها صح فى الامتحان
اقطع ايد اللى سرق
مصر هى امى
محمود بتاع الكشرى بقى الحج محمود
اقتل الزوج اللى زنا
يلا نصوم عاشوراء
الغناء حرام
حتى لو الخنزير نضيف حرام ناكله علشان الله سبحانه و تعالى قال كده
ساعات بصلى و ساعات ما بصليش
العذرا ظهرت امبارح فوق الكنيسه ونورت
و حانحرر المسجد الاقصى من ايدى الطغاه
اقتل اللى خرج من الدين
لو ما غطتش شعرى حادخل النار
استمنيت
قول الدعاء ده و ادخل برجلك اليمين المسجد
بخرى سلوى يا ماما
شوفت حاربى لحيتى و ابطل اشرب بيريل
ما تطهرى بتك يا وليه
دع الخلق للخالق
صراع الحضارات
اللهم اجعل قبرى روضه من رياض الجنه
حوار الاديان
ستعذب على كل كبيره و صغيره مثل اللفظ السىء كأحه و نيك و نظره عابره على مؤخره امرأه و هذا المقال الذى يعد من عمل الشيطان
توب يا اخى
توب

أنا آمنت بالله سبحانه و تعالى
و سلمت نفسى لله سبحانه و تعالى
و آمنت برسول الله محمد صلى الله عليه و سلم
و آمنت بكل الملائكه و الكتب و الرسل
و آمنت باليوم الآخر
بعد ما شعرت بصلتى بالله سبحانه و تعالى
و صله الله سبحانه و تعالى بى
آمنت بعد أن قرأت القرآن
الدليل على إن القرآن كلام الله سبحانه و تعالى
إعجاز القرآن نفسه
القرآن الكريم هو معجزه هذا الزمان
لو قرأت كل الدنيا القرآن و تدبرته
لآمنت كل الدنيا بالله سبحانه و تعالى
و لوجد الإنسان معنى الحياه

هو انا عايش ليه؟

12 comments:

Anonymous said...

امممم.. انت عايش علشان ربنا خلقك
-اداك حاجة بيقولوا عليها جوهرة الوجود: العقل
-نفخ فيك من روحه
سخر ليك الكون-

المفروض ان الانسان مخلوق مميز، لأن ربنا خلقه واداله مصير
أنا ممكن أشتغل خالقة وأخلق مثلا كوبيات، بس مش هتكون زى خلق ربنا ليا، لأن الكوباية اللى هخلقها مثلا مش ممكن تفكر وتعمل مصنع معالق، أو تتناسل وتجيب كوبيات صغيرين
ومش ممكن حتى تعصينى

البنى ادمين علشان ربنا خلقهم عندهم صفة الخلق برضه.. لكن ربنا أحسن الخالقين
انا لما أربى ابنى وأديله حبة تعليمات ويفضل يقولى حاضر يا مامى حاضر يا مامى فى كل الظروف هبقى فرحانة
لكن ممكن أحس انه عامل زى "البروطّة" زى (عبدا مملوكالا يقدر على شىء) أو مثلا ( كَلُ عل مولاه أينما يوجهه لا يأت بخير)
ده غير ابن تانى ممكن يقولى أنا معملتش اللى قلتى عليه المرادى علشان حصل كذا وأنا استخدمت عقلى والتربية اللى انتى ربيتهانى وشفت ان الصح انى أعمل حاجة تانية غير اللى قلتيها ساعتها، مش بقصد عناد مثلا
متهيألى ده مش بروطة او مستنينى كل شوية أقوله ده صح وده غلط علشان يتحرك ف الدنيا
م الاخر متهيألى ربنا سبحانه وتعالى فخور بعبيده

كل الكتب وكل المسميات وكل التحليلات ملهاش معنى لأن ربنا منفخش فيها روحك واداها عقلك

WS said...

يعنى معنى إن الله سبحانه و تعالى نفخ في الإنسان من روحه
إن الإنسان جزء من روح الله سبحانه و تعالى؟

هل اعطانى الله سبحانه و تعالى عقلى علشان افكر بالطريقه دى؟

و بعدين؟

Anonymous said...

امممم.. أيوة
أنا لما قلت انى ممكن أخلق كوباية أنا عارفة انى مش هخلقها من العدم.. لكن من حاجات ربنا أوجدها أصلا
ربنا لما خلقنى خلقنى من العدم مش من حاجة كانت موجودة.. ولما ادانى روح نفخ فيا من روحه.. يعىن من حاجة موجودة.. لأن ربنا كان موجود قبل كل شىء
ماهوا ممكن علشان كده أجسامنا هتفنى مع الدنيا.. لكن أرواحنا هتعيش ∞ للمالانهاية

Anonymous said...

ووبس! بتكلم عن سيدنا آدم.. اتخلق من التراب اللى ربنا أوجده فى الكون اللى خلقه أساسا من العدم.. وبعدين نفخ فيه من روحه

Anonymous said...

من اخلي المقالات الي قراتها انا بفكر بنفس التفكير ده و مش لاقي حل ..شوية و الدنيا حتشغلك وتنسي

WS said...

لو اخلى بمعنى احلى يبقى ثانك يو
فعلا...لو الواحد ما نساش
كان اتجنن

Anonymous said...

إن الكوكب اضخم كائن حى
مش لازم كل كائن يبقى عنده عينين و بق و مناخير
و إن الفضاء ده مع الارض و كل الكواكب و المجرات داخل جسم كائن ضخم
زى الفيروسات مع كرات الدم داخل جسم الإنسان

eih el kalam dah? gamed geddan. I really haven't met someone who got an idea like that.
تمرد على النمطية

هل الدين هو الوهم الجماعى؟
i always thought thinking doesn't kill, ideas don't kill, reading books don't kill (no matters what ideas, books...etc, and no matter what they say about these books, ideas, thoughts...etc)
so I suggest reading "the god delusion" by Richard Dawkins.

WS said...

The point of this article is not to fall into the trap of atheism.It is a call for meditation.I believe in god not because people say there is god.I believe in god because there is evidence of his existence.You don't need a book or a person to tell you how to think or believe.Use your brain.

Anonymous said...

انت فكرتني بالمقطع ده من فيديو شفته عاليوتيوب هو بيتكلم على المسيحية بس اعتقد نفس الكلام يتطبق عالاسلام
http://www.youtube.com/watch?feature=player_detailpage&v=fZpJ7yUPwdU#t=156s

Anonymous said...

يانهااااااااار اسود , عمري ماتخيلت في حياتي ان ممكن يكون في حد ورد عليه الافكار اللي بفكر فيها دي
خصوصاً الحتة دي


و ليه محمد صلى الله عليه و سلم اخر الانبياء؟
و ليه الله سبحانه و تعالى ارسل المسيح مادام عارف إن ناس كتيره حاتؤمن انه ابن الله سبحانه و تعالى و إنه عاش علي الأرض بكامل ألوهيته ولكن في صورة انسان و مات على الصليب و دفن بس قام و بعد كده عاش على يمين الله سبحانه و تعالى؟


دايما بقعد اسأل نفسي ليه ربنا انزل اليهودية والمسيحية قبل الاسلام؟
الاسلام دين اخذ كل حاجة حلوة من اليهودية والمسيحية وساب الحاجات الوحشة
يعني زي نسخة تعديلية
طب ربنا بألوهيته ازاي محتاج يعدل حاجة؟
وليه الاسلام نزل علي البدو حصراً في البداية؟
ليه القرآن باللغة العربية ؟
مش ده يعتبر تمييز؟
حتي لو ترجم في حاجات لا يستوعبها الا العقل العربي

ده غير تساؤلات لا حصر لها عن بداية الكون والي آخره
انا جيت في فترة كانت دماغي هاتنفجر بجد ومش ببطل تفكير لدرجة اني لما كنت بتناقش مع اهلي في الكلام ده كانوا بيصوتوا

أشرف صبري said...
This comment has been removed by the author.
Anonymous said...

السلام عليكم ورحمة الله وبركاته

وجدت هذا المقال أثناء رحلة تسكع على الإنترنت وهالتني تساؤلاتك

أخي، لا تظن أنك الوحيد الذي تدور في رأسه هذه التساؤلات (بل دعني أسميها باسمها الصحيح وهو: الوساوس)، أنا رجل ثلاثيني سلفي ممن يناديهم الناس بكلمة "شيخ" و "مولانا" مع أني لست شيخاً ولا مولاهم، وأحياناً تأتيني هذه الوساوس

أنصحك باختصار
1- أكثر من سؤال الهداية من الله عز وجل خاصة في أوقات الإجابة كالثلث الأخير من الليل وأثناء الصيام وبين الآذان والإقامة وفي السجود، فكما قال الله عز وجل في حديث قدسي: يا بني آدم كلكم ضال إلا من هديته، فاستهدوني أهدكم
2- علم نفسك. ستجد كثير من الإجابات على أسئلتك في كتب العقائد التي ألفها علماء المسلمين عبر العصور. إقرأ مثلاً لمعة الإعتقاد والعقيدة الطحاوية والعقيدة الواسطية والسنة للإمام أحمد
http://www.ajurry.com/vb/showthread.php?t=26403
3- لا تسترسل مع الوساوس فنهايتها هي الهلاك. من تجدهم حولك في كل مكان من الملحدين بدأ إلحادهم في الخوض في هذه الوساوس.
واعلم أن هذه الوساوس لم يسلم منها حتى بعض أصحاب رسول الله صلى الله عليه وسلم الذين جاءوه يشكون إليه أنهم يجدون في أنفسهم "خلق الله كل شيء، فمن خلق الله؟" فأمرهم النبي صلى الله عليه وسلم بطرح هذا لأنه من الشيطان.
لابد من أن تقبل في النهاية بوجود أسئلة لا ينبغي سؤالها كسؤالك في البداية "لماذا خلقنا الله؟"
وهذا ليس هروباً أو عجزاً كما يقول الملحدون، بل هذا مقبول حتى في الدنيا، فهل عندما يهم رئيس بلد ما بحرب بلد آخر ويأمر الجيش بالتحرك يكون كل جندي على علم بسبب التحركات أم أنه ينفذ التعليمات على عمى؟ فإذا قبلنا هذا في أمور الدنيا من البشر فكيف لا نقبله في أمر الخلق والبلاء والميعاد من رب العالمين؟

هدانا الله جميعاً لما يحب ويرضى