EgypToz: يومين فى ستراسبورج

Tuesday, August 10, 2010

يومين فى ستراسبورج

كنت زهقان جت فى دماغى فكره مجنونه…ليه ما اروحش فرنسا فى الويك اند…لما قولت لـ مم لو تحب تيجى معايه كانت حاتموت من الفرحه…بصينا فى خريطه جوجل و قولنا ننقى أى مكان كده بالحظ و طلعت مدينه ستراسبورج…سمعنا انها مدينه البندقيه للفرنسيين…قولنا نروح يوم السبت الصبح و نرجع الاحد…دورنا على هوتيل رخيص…كلمنا الهوتيل و قولنا للوران فى الريسبشن اننا حانيجى الصبح…قالنا اوكيه...الأقباط استقبلوا البابا بـ الزغاريد

اتقابلنا الساعه سبعه الصبح…شربنا كافيه عند محطه البنزين…انطلقنا بالسياره إلى الطريق العالمى السريع…و لقيت مم بتقوللى الوقتى اقدر اسوق على راحتى…قولتلها بس خدى باليك من الرادار…ضحكت و قالت لى الطريق العالمى ما فيهوش حدود للسرعه يا بابا…قولتلها يا لهوى…قالت لى مش انتم بتؤمنوا بربنا...توكل على الله…قولتلها ماشى ياختى...و انطلقت مم بعربيتها السات 190 كيلو فى الساعه...كنت حاعمل على نفسى...فضلت تحكيلى عن كذا و كذا و احنا طايرين على الطريق السريع بس ايه...انا و الا هنا...و شغلتلى مزيكتها المحببه ستارفور...و غنت لاه لاه لاه...و انا قريت القرآن فى سرى و قولت هى دى اخرتك يا واد
ما فيش بعد ساعتين لقيت نفسى ادام حدود دوله فرنسا...قولت بقه حلاقى عساكر و رشاشات و عربات و حايمسكونى و يفتشونى و يلاقوا انى مصرى و يرحلوك يا واد على بولاق الدكرور...بس لقيت المفاجأه...هوس ما فيش حد...يافطه مكتوب عليها اهلا بك فى فرنسا و لقينا اليفط بعد كده قلبت فرنساوى...معقول يا جماعه...لأ ستوب...دى لاحظه تاريخيه...لازم تتصور...معقول اعدى كده بين بلدين من غير ما حد يسألنى انت مين و جى هنا تعمل ايه...حاسيت انى عصفوره بتطير...حر طليق زى ما ربنا خلقنى...خلق الأرض واسعه نهاجر من مكان لمكان...بس العصر الجديد عمل حدود و قوانين مش عارف ليه و لو أنا من اليمن انسى يا عمرو...ده أنا من مصر...مفاجآت جديده فى قضيه المذيع بالتلفزيون قاتل زوجته
حاولنا نلاقى الفندق بس استحاله...ما نعرف فرنش يا ولدى...نسأل الفرنسويين فى الشارع بالانجليش يردوا بالفرنش...طب ليه الغلط ده...بس هنا جاء اختراع الجى بى اس...المرتبط بالاقمار الصناعيه...تطور يا جدعان...تكنولوبيا...كتبنا اسم الفندق...و جهاز الجى بى اس نطق...امشى عالطول لمسافه 100 متر...احود يمين...خش شمال...اقف...لف يو ترن...يمين شمال لغايه ما لقينا نفسنا قدام الفندق
كانت الساعه تسعه و ربع...روحنا الريسبشن...فينك يا لورين...أنا اهو...يو سبيك انجليش...ياس...جوود...كلمناك امبارح إن احنا جايين النهارده...ايوه ايوه...اسمك ايه...اسمى مم...اوضه اتناشر...بس تعالوا على الساعه واحده الظهر لما الناس اللى فى الاوضه تطلع و بعدين تتنضف...قولناله اوكيه...شيكابالا لن يكون فى تشكيله المنتخب و جدو يقدم ببلاغ ضد الزمالك
قولنا نروح بقى نتجول فى ستراسبورج على رجلينا...كان السبت الصبح...الشوارع فاضيه...و العصافير بتزقزق...روحنا وسط البلد...و اتفرجنا على الشعب الفرنسى يوم السبت الصبح...اكنى فى فيلم كلاسيكى فرنسى...المخبز فتح...ريحه المخبوزات الفرنسيه شدتنى أنا و مم...روحنا و اشترينا عيش باجيت...واه على الطعم...يتاكل بجد حاف...و فضلنا ناكل فى الباجيت و احنا بنتمشى فى حوارى ستراسبورج...لا تقارن بأى حال من الأحوال بحوارى بولاق...مدام جاكوه فى محل تقليم الاظافر...و مدام سيدال عند الكوافير...و ميسيو بوجون يشرب قهوه الصباح المعتاده و يقرأ صحيفه لو موند... و بيلوش لابسه ككل يوم اغلى و ارقى الفساتين الباريسيه...مازالت تعتقد انها بعد سن الستين مرغوبه من رجال جراند ريو... اكنى فى روايه من روايات القرن التسعتاشر...عماد الكبير يثير الشغب فى بولاق الدكرور
المهم روحنا لكاتدراليه ستراسبورج... انبهرنا بجمال المعمار...و قدسيه المكان...و مشينا فى الطرقات الضيقه...و لاحظت إن كل بيت معمول باتقان...مبنى باخلاص و حب...كل صغيره و كبيره فيه بيشع ابداع...و ضوء الشمس و الظل يعطى للمكان جو من العراقه و الدفىء الاصيل...الانهار الصغيره تمر من كل جانب...و الكبارى تذكرنى فعلا بالبندقية... ضبط 2575 كيلو لحوم بالقاهرة غير صالحة للاستهلك الآدمى
قولنا نرجع الفندق و نبقى نيجى نكمل جولتنا بعد الضهر...روحنا للورين...ادلنا مفتاح اوضه اتناشر...طب اسأل احنا مين...جيين منين...طب شوف بطايقنا...و الا حاجه...غريبه جدا...بساطه بلا حدود...طلعنا الاوضه...استريحنا شويه و بعدين نزلنا و اشترينا تذكره لشخصين لمده يوم نقدر نستخدم بيها الترام و الاوتوبيس...نبيه الوحش يتصدى للفساد

لفينا ستراسبورج كلها...الترام عامل زى مركبه فضاء...متعه الركوب فيه فعلا...و احنا ماشيين فجأه لقينا واحده ماشيه جنبنا بتقول أنا شايفه نار طالعه من باب البيت ده...مم بصت و لقت البيت فعلا مولع من جوه...قولت لـ مم و احنا مالنا خلينا نكمل مشى... الست طلبت المطافى...و مافيش دقيقتين و لقيت المطافى و الاسعاف و البوليس الفرنسى محوط البيت و المنطقه...هو احنا بنصور فيلم هنا و الا ايه...واحده واحده عليه...الحريقه مسكت فى البيت كله...بس المطافى سيطرت على الموقف بسرعه و فينيه... مرتضى منصور لن يسامح شوبير ابدا
مم كانت عاوزه تعمل شوبنج...فعلا اللبس من فرنسا حاجه تانيه...احدث و ارقى الموديلات...و باغلى الاسعار...مم اشترت جزمه...مبروك عليكى...تريه شيك
و احنا بنتمشى لقينا صحن فضائى عملاق...ما كنتش فاهم ايه ده بالظبط...روحنا لقينا عباره عن مبنى تاريخى كبير محوط بصحن زجاجى جبار و كل ده عباره عن محطه القطر...واو...خرافه...المرشد العام للإخوان يهنىء أيمن نور برئاسة الغد
و بعدين روحنا للميدان العام...كانت الناس بتتفرج و بتستمع لموسيقى بعض الشباب بيضرب على الطبول...الجو روعه...الشمس مشرقه...الناس مستمتعه بالحياه...مسالمه و الهدوء فى كل مكان...الاطفال تلعب...والطيور تغنى...واحنا بناكل الغدا فى الريستوران...ممممم...لذيذ...مصرع و اصابه 23 على الطريق الدائرى
بعدها روحنا السوبر ماركت نشترى شويه اكل و شرب علشان بالليل و بكره...و استريحنا فى الفندق و نزلنا تانى بالليل علشان نتفرج على عرض الصوت و الضوء فى الكاتدراليه الستراسبورجيه
علشان نلاقى الاوتوبيس الصح روحت اسأل واحده كانت مستنيه برضو الاوتوبيس...قالتلى انت مغربى...قولتلها لأ مصرى...قالتلى لأ يا شيخ أنا برضك مصريه...برضك...و ستراسبورج...ياى بيئه طحن...و فضلنا ندردش عن مصر و هى بتعمل ايه و أنا باعمل ايه لغايه ما ركبنا الاوتوبيس و عرفت ازحلقها...ازمه قمح قبل رمضان
عرض الصوت و الضوء كان روعه...تجربه لا توصف...و ستراسبورج بالليل مدينه غايه فى الجمال...رجعنا منتصف الليل مش قادرين نشيل رجلينا و نمت فى السرير زى القتيل...اتفرجنا شويه على التلفزيون الفرنسى و اكلنا شويه مكسران و حلويات و ما حاسيناش بنفسنا إلا و احنا بنصحى الصبح من النوم على صوت اجراس الكنائس
نزلنا نروح نفطر فى كافيه دى فينسنسز...كوراسون فرنسى اصيل بالشيكولاته و كابوتشينو فى موقع رائع...و بعدين روحنا مهرجان الرقص الشعبى...و لقيت راقصه جايالى و بتسألنى لو احب ارقص قولت لها...نو مرسى بوكوه...و بعدين اتمشينا شويه فى المدينه و لاحظت إن فى كل ركن فى ورود...ازهار من كل لون و نوع...ايه ده...لوحه فنيه
و بعدين زرنا المحكمه الاوروبيه لحقوق الانسان...و رجعنا الهوتيل لمينا حاجتنا و ادينا المفتاح للورين و دفعنا فلوس الليله و ركبنا العربيه و مشينا من فرنسا
و احنا فى الطريق السريع لقينا رساله راديوهيه اوتوماتيكيه طلعت فجأه بتحذرنا إن الطريق بعد 40 كيلو متر فيه زحمه مروريه و واقف لمسافه 20 كيلو متر... مم قررت تروح من طريق تانى بين قرى ريفيه و مزارع...و لقيتها بتسوق فى حتت تاته تاته...قولت لها كتر خيرك...ربنا هداكى و بطلتى رعونه الشباب و بقيتى بتسوقى بسرعه 30...ضحكت هاهاها...و شاورتلى على يافطه مرسومه عليها ضفدعه...قال ايه لازم نمشى بالسرعه دى علشان فيه ضفادع بتعدى ساعات الطريق بين المزارع...و قال ايه علشان ما ندوسهاش يا حرام...و الله عال
من زمان و أنا باشتكى من إنى مريض بالبيرن اوت سيندروم...اليوم فى الشغل بيجرى زى الهوا...و كل يوم عامل زى التانى...و أنا فى التوهان...سنه قضيتها فى اوروبا عاملين زى شويه ساعات...بس رحله ستراسبورج ورتنى ازاى إن الواحد ممكن يتحكم فى الوقت و مضمونه...مش هوه الى يتحكم فيه...و إن جزء من الاستمتاع بالحياه هو اكتشاف اماكن و ثقافات و ناس جديده على كوكب الارض...اتعلمت فى يومين حاجات لو قعدت فى مصر قرن مش حاتعلمه...مش القعده جنب الحيط و اقول كفايه عليه شارع ناهيا...فاليومين دول كانوا من اجمل ايام حياتى...يومين باحساس سنه...السبكى اكد بدأ تامر حسنى تصوير عمر و سلمى 3 بعد العيد مباشره

8 comments:

Anonymous said...

أنا كل ما اندمج ف الموضوع الاقيك كتبت
جملة غلطكده.. توء

Anonymous said...

بغض النظر عن الجمل اللى فى النص اللى انت كتبتها عشان تبين ليه اوروبا حلوة وليه معاك حق تتخنق من البلد

بغ النظر عن ده التدوينة جميلة جدا وحسيت انك نقلتلى جزء من احساسك واستمتاعك بفرنسا و حسستنى انى نفسى مووووووت اروح فرنسا
اجازة سعيدة ورمضان كريم و يارب تقضى اجازة حلوة فى مصر

محمد ناصر الدين الهلالى said...

يابختك ياعمونا ..انا نفسى أقعد فى الصباح الباكر وارتشف القهوة الإيطالية الأصيلة بينما اطالع صحيفة دير شبيجل وأستمتع بهواء إسبانيا المنعش تحت ظلال أمطار إنجلترا الحزينة وياسلام على كرواسو فغنسا تغية تغية مانيفيك ونقعد نقول لبعض بونجور ياحاج بونجور ياحاجة اوووه مون ديو!رحلة ممتعة وعرض مشوق بس برده أسلوبك فى التخفى مكنش لادد عليا ، مالهاش لازمة يعنى نشرة الأخبار دى وشريط العنواين فى نهاية كل فقرة ، بس الا بصحيح انت مشفتش كاتدرائية نهيا ؟ فيها عرض الصوت والريحة يهبل !!

WS said...

يا محمد
اتمنى من كل قلبى أن تحقق هذه الامنيه قريبا إن شاء الله
و اتمنى لمصر و القاهرة بالاخص أن تصبح كستراسبورج فى يوم من الايام
بس انا مش فاهم اسلوب ايه فى التخفى اللى انت قصدك عليه؟
و فين نشره الاخبار
دى بس فلاشات باكيه
مش انا من مصر برضو
مش عارف هناك ليه كانت بتجيلى لحظات اقول هو ايه يا ترى اللى بيحصل فى مصر دالوقتى
و مش عارف ليه كل ما افتكر مصر تطلعلى الحاجات دى
على فكره للاسف ماشوفتش غير كاتدرائيه الوراق
و الزاويه الحمرا
و ما كانش فيها غير عرض التكاتك

oyon said...

والله انت حسستني انى مش مجنون
هههههههههههههه
متستغربش اصل بجد تفكيرك يعني قريب لحد ما من تفكيري
وتدويناتك جميلة بجد
الى الامام
وسعيد بمعرفتك
انا معرفكش اها بس فى مثل
تكلم حتى اراك
حاجة زي كدة سلاموز يمان

WS said...

oyon
سانك يو فرى مكس
أنا سعيد بمعرفتك انت
يااه عندك تدوينات كتير كيك
بس انا بتكلم علشان ترانى ليه؟
ليه؟
ليه؟
بهزر

Anonymous said...

انت بطيخه
ابقى دور فى يو تيوب عن كاميليا شحاته
والناس البتبات من غير عشاء
و الدويقه و البلااوى و المجعات فى افرقيا
وفيضانات بكستان
انت بطيخه قال ايه مش عجبانى عروسه من مصر هو حد لاقى يجوز
بتصلى جنب الخماره و لسه تفضل عايز تقعد هناك عندك تلتين سنه ومبتشتغلش و بابا بيصرف عليك مانت اصلك بطيخه يا بطيخه انزل مصر دور على شغل و اجوز و اعرف ان الحياة امتحان و انك هنا عشان ترضى ربنا و ان الدنيا امتحان و مش ديما ظريفه و ممكن تفضل سنين مش ظريفه و ممكن متبقاش ظريفه خالض المهم انك تكون ديما راضى عود نفسك على الرضا فى الحلوه و المره اليصيبك مصلحه عشان انت مسلم ييرفعك درجات ييكفر سيأتك و هدفك فى الحياة لازم يكون الجنه وانك ترضى ربنا فى كل حاجا بتعملها عشان يكون يوم القيامه عليك سهل و متتعبش هناك كتير و تروح الجنه بدرى بدرى و طول مانت مبترضاش و مش عايش غير لنفسك و متفكرش غير فى نفسك و مشاكل نفسك و سعادة نفسك و اكتئاب نفسك سيلف سنتر يعنى هتفضل مكتئب و اول متعود نفسك على الرضا هتشوف الفرق محتاج تقراء فى الدين كتير عشان انت بطيخه فهمت يا بطيخه ولا لسه يا بطيخه لأنك لو مفهمتش ممكن تكلم بابا يبعتلك فلوس عشان الدروس الخصوصيه سلام يا بطيخه

Anonymous said...

انا مصري من سكان ستراسبورج و هي صحيح مدينه حلوه كتير و أحلى مافيها كم القرى الصغيره الملاصقه لها مما يجعل محيط ستراسبورج كبير جداً و الطبيعه خلابه ولكن
و الله مصر هي مصر قلبي و روحي و عقلي يارب احفظ مصر