EgypToz: يومين فى كايرو

Saturday, August 21, 2010

يومين فى كايرو


 يومين فى القاهرة و مش قادر استحمل دقيقة واحده فى المدينة العشوائيه دى...و بصراحه ما كنتش حاطت امل كبير يعنى... لما ارجع اجازه اسبوعين تلاته لمصر بعد ما عيشت اكتر من سنه فى اوروبا...عاوز ارجع اقول ايه...مصر حلوه...مصر كميله كماله...مصر عسل ابيض زى السكر

من الاول و انا عامل حسابى انى انزل هوس و الا انتقد و الا اولول و الا الطم على حال البلد...انزل للمهمه المستحيله و ارجع هوس لاوروبا تانى...ما هو اصل كلامى مش حايغير فى حاجه...و الا ايه

 يوم الجمعه بالليل...ماما و بابا و اخويه كانوا مستنيين فى المطار...اول لما شافونى فرحوا و حضنونى و باسونى...و بس...هوه ده كان اول و  اخر حب حاسيته منهم

و انا راجع البيت الشوارع زى ما هيه...نورها ضعيف...عربيات عماله تبيب بيب...عيال بتنط ادام العربيه و هى بتعدى و بتقول ما تدسونى...شحاتين واقفين متربصين اول ما الاشاره تبقى حمرا يلزقوا فى ازاز العربيه منبى يا بيه...زهور اوروبا الجميلة

المهم وصلت البيت فى امان الله...العماره قذره زى ما هيه بس حاطوا اشجار بلاستيك زينه بواءت منظر المدخل...الاتنين البوابين جريوا على العربيه و قالوا افتحوا ضهر العربيه علشان نطلع الشنط لقوا ما فيش شنط...كنت جاى بشنطه هاند باك واحده بس شايلها فى ايدي...دخلت اوضتى بسم الله ما شاء الله...اكوام تراب فوق تراب...جبال من الاتربه اوح اوح كح كح هاتشو...ياااه...الكتب جنب بعضها زى ما سبتها...شرايط الكاسيت...اسطوانات الدى فى دى...هدومى عفنت تمام...الحيطه مخرمه كلها و فيها بواقى لزق من البوسترات اللى كانت زمان متعلقه...الساعه ما بتمشيش...و النور بينور خفيف...و الدنيا حر موت...ناس اوروبا المحترمين

ايه الحر ده...40...عمال اعرق و اعرق و اعرق...و تراب و عفره و عرق ...و عرق و عرق

يوم السبت اهلى كانوا عازمين العيله كلها على شرف قدومى من اوغوبا...و الطباخه بقه شغاله عماله تعك...جم الناس و سلموا عليه اكنهم لسه شايفينى من اسبوعين...نسيوا انى كنت اكتر من سنه متغرب فى الخارج...و دخلوا على البوفيه هم هم هم...و الكل يرفع شعار "اصل انا كنت صايم"...يا راجل...ما كانش ليه نفس اكل...للدرجه دى الاكل اهم منى...سبتهم ياكلوا و دخلت اصلى المغرب...بعد ما خلصوا اكل مااعرفش بدئوا يتلخموا ببعضيهم...العيال بقه عماله تجرى فى الشقه...و البيبى عمال يواء واء...و مرات خالى عماله ترضع...و جوز خالتى باطنه بتوجعه و قرفان من جسمه علشان بقاله فتره ما استحماش علشان هوه ساكن فى فيلله فى التجمع الخامس و يا حرام ماسوره الميه الرئيسيه اتكسرت و الميه مقطوعه بقالها ايام...تيته عماله تلعب بالحفيد الجديد...بابا ملخوم بتحضير الحلويات...و ماما بتعمل نفسها انها بتعمل حاجه مهمه...و خالو الوحيد اللى ابتدى يسألنى عن احوالى هناك فى اوروبا كانت عامله ازاى...اتبسط جدا و ابتديت احكيله و اجاوبه على كل سؤال...ما فيش بعد خمس دقايق قاموا يصلوا المغرب جماعه...بعدها قعدوا يعرقوا على نفسيهم و يقولوا فين يا عمونا التكيف...ازاى ما عندكوا تكيف...تق تق تق...امبوظى بيللى...الاوضه الوحيده اللى فى الشقه اللى فيها تكيف هى اوضتى...و طبعا اوضتى تراب بالهابوللى...دخلت اوضتى...و حشرت فى السريع هدومى و حاجاتى اللى مترميه على الارض فى الدولاب...و جبت اباجوره من الصاله علشان النور واطى حقير...و الناس ابتدت تهجم على اوضتى...و ابتديت اجيب كراسى من الصالون و احشر فى الاوضه...و الناس عماله تحشر نفسها فى الاوضه اللى اتملت على الاخر...و التكيف اللى نص حصان بقى ربع...و العرق اختلط بالتراب بالكلام بالسكر بتاع حلويات لو كارنفال اللى البسبوسه فيه بمتين جنيه مش عارف ليه...و العيل ماسك طبق الايس كريم معووج و عمال ينقط على السجاده و بيعيط...و انا بعيط معاه على السجاده...جو اوروبا البديع

زهقوا و عاوزين يتسلوا بحاجه…التلفزيون فى اوضه الوالده و ماينفعش نشيل الناس للتلفزيون أو نشيل التلفزيون للناس…رحت جايب اللاب توب بتاعى علشان افرجهم على التالافازيون…شافوا الاب توب قالوا لى طب ورينا بقى صور اوروبا…طبعا الصور محطوته فى اللاب توب سداح مداح…صور بنات على صور حاجات لا تناسب رمضان و صور للكبار فقط و الاطفال و الرضع فى الاوضه…كذبت و قولت له اصل الصور فى الهارد ديسك و لازم لسه اطلعهم و افرمتهم فى الاب توب و ده حاياخد وقت…أى كلام فى الهالوكش و الخباثه هو حد فاهم حاجه فى التكنولوبيا…دول فلاحين كامبايوطر ياض…المهم فتحتلهم قناه القاهره و الناس على النت و فوازير مريام العسوله و عرفت الهيهم من الحر و الطين اللى هو نتاج عرقهم مع تراب الاوضه...بنات اوروبا المزز

و بعد فتره وجيزه الناس زهقت و طلعت من هدومها…اللى نام بعد الاكل من التخمه على سريرى المترب…و اللى بربر…و اللى راح يتسير…و هوب كله عاوز يروح…يلا مع السلامه فى ستين داهيه تخدكم…قال اهل قال…انا ماليش اهل خلاص

يوم الحد نزلت الشارع الضهر رايح اشترى حاجه من مول الكمبيوتر…مالاقيتش رصيف…الرصيف و الشارع و مدخل العمارات حاجه واحده…قذاره ماليه الشوارع…ناس معفنه بشباشب مستوليه على المنطقه…و الفاظ تخدش الحياء...و الستات بقت بتقول احه عادى...و العربيات عاوزه تخبطنى…و الميكروباصات  متهوره و السواقين متسحرين على قله…البلد زى ما هيه...سداح مداح...عك مزدوج...تقدمت بس قليلا للخلف...ما فى شىء اتغير يا ولدى...الناس بس بقت مبرشمه...و جلها خرس ليلى...يمكن علشان الصيام...بس لاحظت إن القروش النص و الجنيه زادوا اوى و مش لاقى مكان احطهم فيه فى جيوبى…و البيبسى الكانز بقت باتنين جنيه و نص بدل جنيه خمسه و سبعين…و التاكسيات البيضه فى حرب شرسه مع التاكسيات السوده...و لما روحت الجيم لقيت الشباب الفل لسه زى ما هوه قاعد يقول آه آه آه بقاله سنه على امل يطلعله عضلات ...و الجو مازال حر يقرف…و التكيف باظ من الحر…و الميه نازله من الحنفيه مغليه و بتقطع…رجعت البيت قبل الفطار و هيا بنا نأكل بواقى العزومه بتاعت امبارح...طبيعه اوروبا الخلابه

كلمت صاحبى انزل معاه بالليل لقيت بتوع الحى قطعوا النور على المنطقه…و الناس بتصلى التراويح فى سرها بعد ما فطرت فى الضلمه…قولت له ودينى حته نضيفه يا قدوره…قال لى بس لازم تكون فيها شيشه… ودانى رستوران وسخ قال عاوز 30 جنيه مينيمام شارج…شارج فى عينك…قولت له لأ ودينى حته تانيه…زهقته فى عيشته من كتر الحتت المعفنه اللى رفضتها…قولت له بص ودينى ماك اشترى ساندويتشات و اتسحر بيهم فى المكان اللى انت عاوزه…راح مودينى فى غرزه ورا جامع  ملتقى بلطجيه المانتيآه...لقيته فتح ضهر العربيه و طلع خرطوم عامل زى خرطوم الجنينه…قال ايه علشات يشيش على نضيف…قال لى اصل مامى مش عاوزانى اجيب شيشه فى البيت…مانعه دخول الشيشه تماما…ربنا يهديها...بيوت اوروبا العريقه

يوم الاتنين كنا معزومين عند عمتى…برضو يعنى علشان الواد جه من الخارج…بس الصبح الاول قابلت ميكو فى النادى...بقاله سنه خاطب و مش عارف يتجوز...قعد يحكيلى عن اجتهاده و تضحياته علشان الجوازه تتم و مشاكل الشقه و العفش و الشغل بعد ما اتخرج... صعب عليه...بعدها روحت مع اهلى على فطار عمتى…قعدنا على السفره…الراجل ادن…ابتديت اشرب الشربه لقيت بنت عمتى بتصرخ آه حاولد…اصل هى حامل و الواد حبك وقت الفطار ينزل يفطر معانا…جوزها الفنان اللى كان قاعد جنبى كان حايخلف هو كمان…اصل ده اول مولود ليه… راح واقف و مصرخ "بينا على دار الفؤاد"…يا بابا احنا فى المعادى…دار الفؤاد فى اخر الدنيا…اصل الدكتور اللى بتتابع عنده التيم بتاعه اللى بيرتاح معاه فى دار الفؤاد…يا حبيبى انت عارف الصويت هناك…قصدى السويت هناك بكام…ما يهمش…البيبى حاينزل…هيا بنا إلى دار الفؤاد…أنا امى ضربت فى دماغها انها تقعد و تاكل و تحلى كمان…ابويه راح مع البنيه و امها و جوزها على دار الفؤاد…و حظهم الجنان الطريق اخد ساعتين علشان كان فى حادثه على الدائرى...جوز عمتى و بناته الاتنين كان لازم يقعدوا مادام امى خللت فى المكان…و انا البساط انسحب من تحتى…عزومه ما تمت...نو كومنت...طعام اوروبا اللذيذ

كلمت صحابى اللى بقالى كتير ما شوفتهمش…هاى ازيك فينك يا بنى مختفى ليه…لأ مش حاقدر انزل اصل عندى مش عارف ايه النهارده و مش عارف ايه بكره و معظوم بعده الخ الخ الخ…بس ابقى خالينا نشوفك…هاى ازيك يا باشا عاش من شافك…ممكن يبقى عندى معاد فاضى اخر الاسبوع…صاحبك ده خارج نطاق الخدمه…صاحبك ده غير موجود حاليا…صاحبك ده متابع جميع مسلسلات رمضان و الاعاده...و زعلت لما عرفت إن صاحبى الانتيم ايه واى فى ابوظبى...بس روحت قاعد فى البيت ادام التلفزيون اقلب فى القنوات مش عارف اتفرج على حاجه…كله زى بعضه…مالهوش طعم…و انا ماليش نفس…جالى اكتئاب…ارجع لاوروبا بتاعتك يا عم و ابقى  خاليها تنفعك

صدمه ما بعدها صدمه… حاسيت اد ايه انا مش مهم فى الدنيا… فى اسرتى…بين اصدقائى… فى الحياه كلها…انا فعلا كئيب...الناس ملخومه فى نفسها…فى الحياه الصعبه فى مصرنا…الناس مش شايفه غير نفسها…الناس بقت انانيه…و انا كمان انانى…أو يمكن كنت شايف نفسى زياده حبتين…بس بجد…هو أنا غلطان لما اكون بحلم باستقبال حافل من الاهل و الاصدقاء…مش حافل يعنى بس اهتمام و لو بسيط عن احوال ولد متنيل شاب اعد طفح و اتغرب و اشتغل فى الخارج…ايوه انا غلطان…عمر ما جه يوم فى السنه اللى كنت فيها فى اوروبا و اتنرفزت...أو اتعصبت...أو ضغط دمى على...بقالى سنه ما عيطش...بس من اول ما جيت و كل يوم زعيق و خناق مع الوالد و الوالده...و ايه و احنا فى رمضان و ايام مفترجه...و امى فى لحظه غضب قالت لى يا رب تغور فى اوروبا و مترجعش ابدا ابدا ابدا...قالتها تلات مرات...حسيت انى حاموت فى الغربه...و يعنى لو مت حد حايهتم...و حاسيت إنى ضيعت وقتى و اجازتى على فشوش و حرقه الدم...يعنى اضرب نفسى ميت جزمه لو جيت مصر تانى…طب قول لى حاجه واحده حلوه فى مصر...ما كنتش فاكر ايجبت طظ حايبقى اسم على مسمى… صحيح… ويلكم واد باك و سهلا فى هوم كايرو

14 comments:

GURU said...

علي فكرة انا متابع مدونتك من زمان وبصراحة عجبااااني جدا
صدقني يا عزيزي
سخطك وكرهك لبلدك ما هو الا نتاج ما تربيت عليه
ربما يكون ذويك مخطئون او "دقة قديمة"
ممكن يكونوا متسلطين
بس صدقني مش حتلاقي احن من مصر

PS
عجبني اوي وصفك لميريام فارس "بالعسولة"
اخييييييييييييييرا يا جدعااااااااااااااااااااااااااان
لقيت دكر في مصر معجب بيها غيري
معظم جمهورها بنات

http://shab-masry93.blogspot.com/

helperF1 said...

اقولك ميزه في مصر مش في اي بلد تاني؟؟
مصر بلدنا غصب عن عين التخين بلدنا حتى لو الحكومة قالت غير كده و معظم اهلها كرهونا في عيشتنا هتفضل برضوا بلدنا لسببين
1-هتروح اوربا او امريكا او المريخ هتلقي نفسك متابع اللي بيحصل في مصر اكتر ميت مرة من ما انت متابع اللي بيحصل في البلد اللي انت عايش فيها
بزمتك بتقرا كا خبر عن مصر في اليوم او الاسبوع و بتقرا كام خبر عن المانيا؟

2- لو عملت قرد لو يرب خدت نوبل في الطب هتفضل طول عمرك اجنبي بالنسبة للناس هنا . ده مش وحش طبعا بس عمرهم ما هيعملوك كانك الماني

و اخيرا احكيلك حكايه حصلت النهارده في برلين مع مراتي الالمانية ابا عن جد
كانت رياحا السوبر مركت و معدية من قدام مكان لعب اطفال
spielplatz
واد عنده 5 سنين زعق فيها و قال لها ايه القماشه اللي انت حطاها فوق دماغك دي، روحي ارميها و البس هدوم غير دي
و وهي راجع كان الواد لسه قاعد هو و والديه في الملعب شتمها تاني و قالها انت واللي من دينك المفروض تطلعوا من البلد دي
........
و دي الالمانية اللي زيها زيو بس علشان لابسه حجاب، على فكره مراتي بتتشتم و تتهان في المانيا تقريبا كل اسبوع و هي اتعودت على كده لكن الغريب انها تتشم من طفل عنده خمس سنين
وبصراحة لما انا كل يوم و التاني بشوف اللي بيحصل مع مراتي و بعدين اشوفك عمال تنشد شعر في جمال و روعة اوربا بقول لنفسى انت بتخبي نص الحقيقة

WS said...

helperF1

كنت فاكر حاتفهم الغرض اللى ورا الموضوع
انا ما باقولش مصر وحشه و اوروبا حلوه
انا باوصف الاحداث اللى حصلت ليه
و ازاى انى لو عاوز ابص للحاجه بنظره جميله
حلاقى كل حاجه جميله حتى لو كانت قبيحه
و لو حابص للحاجه بنظره سوداويه
مش حلاقى غير الوحش فى الحاجه دى

انت حصلك موقف وحش فى المانيا
كرهت المانيا و اللى عايشين فيها

انا حصلى موقف وحش فى مصر
حبيت مصر برضو علشان دى بلدى و انا اتولدت فيها
و فيها اهلى و ناسى و اتربيت و كبرت فيها
سبب كافى مش كده
لا اظن

و بعدين ده موقف واحد حصلك مره فى اوروبا و فين و فين لما يتكرر
اهو من امثال الموقف الوحش ده بيحصل لى طول النهار فى مصر

مصر مش وحشه و عمرها ما كانت وحشه
المصريين همه اللى بقوا وحشين

كل مكان فيه مزاياه و عيوبه
و الحكمه انك توزن الامور

مشكلتنا اننا عايشين فى اناشيد تقليديه

نمره واحد فى ردك انا ما بتابعش حاجه فى مصر علشان ما فيش حاجه فى مصر حاليا بتهمنى
كله زى بعضه

نمره اتنين مين قال انى عاوز اتعامل كواحد منهم...انا انسان على كوكب الارض...انتمائى الوحيد لدينى...غير كده ارض الله واسعه...و لو انت حاسس بظلم و قهر و فساد فى بلدك...و لقيت فى بلد تانيه مستريح و لك حقوق و واجبات و بتعامل من منظومه البلد ككل ( و مش من افراد ) باحترام كبنى ادم و مش كحيوان
خلاص...ليه ما تعيش فيها

انت فى الاول و فى الاخر عايش مره واحده
و الناس فى جميع انحاء العالم ولاد تسعه
عباد الله

زى ما المثل بيقول
نام على الجنب اللى يريحك

انت عاوز تعيش فى مصر
اهلا و سهلا
انت حر عيش

انا عاوز اعيش بره
برضو انا حر

ممكن واحد يسافر بره و يكره اليوم اللى ساب فيها بلده

ممكن انا السنه اللى جايه ابيع اللى ورايه و اللى ادامى علشان اهرب من جحيم اوروبا لو حصلتلى مصيبه هناك

و مين قال اللى انا ما قابلتش صعاب كتير كانت ممكن فى اى لحظه تكون سبب انى ارجع مصر تانى؟

الموضوع صعب نعممه

و فى الاول و فى الاخر انا بحب مصر حب لا تتخيله
و علشان كده عامل المدونه

ما تاخدش الكلام بحروفه
حاول تفهم المعنى اللى وراه

مش دايما باقصد اللى باكتبه

Hoda said...

بص انا مش هاخد الكلام بحروفه زي مانت ماقولت

بس حقيقي وبكل صراحه

انت كنت باني جسور وآمال وناطحات سحاب ان كل العيله والاهل والاصدقاء يركعوا تحت رجليك ويسكتوا ومايسمعوش الا صوتك

بص هو ده احساس طبيعي الواحد يحسه خصوصا انه كان متغرب وكان مشتاق للناس دي كلها

بس انت كان المفروض تتعامل مع كل المواقف دي بنضج اكتر من كده...
عيشت سنه في اوروبا...وايه يعني؟؟
غلطان انك نسيت كل السلبيات اللي في بلدك دي وغلطان اكتر انك نازل وفاكر انك هاتلاقي نفسك في مكان تاني!!!

الحلاوه بتنسي الوحاشه..بس بشيء من العقلانية هاتقدر توافق بين الاتنين
:)
مش بهاجمك..بس حقيقي رفقت بيك

شوف ..انت جيت كام يوم كرهت الدنيا..وانت ممكن يكون عندك الاوبشن انك ماتعيشش فيها..

شوف بقى الناس دي كلها اللي مجبرين غصب عن عين اهلهم..يعيشوا فيها..
سريرك مليان تراب...ماعدهمش سراير اصلا

لازم تقدر ان اهلك عندهم مشاكل كل اللي عايشين في مصر..هايقعدوا يسمعوا كنت عامل ايه هناك عشان يتقهروا؟..طبيعي لا..بالعكس هايحاولوا يهربوا من اي محاوله لأنك تحكيلهم اي ايجابيه تقطم الضهر من القهر

مابقولكش حبها بكل قرفها زي ماكلنا عاملين

بس بقولك...قدر اهلك وقدر الناس..قدر الضغوطات..
ممكن تكون بتحمل والدتك فوق طاقتها في اي موضوع حتى وان كان موضوع صغير..
ممكن تكون متعصبه وبتتخانق معاك عشان من جواها متدايقه انك هاتسيبها تاني..

ممكن تقرا كل كلامي ده وتقول عك من عك مصر..
بس حقيقي مش هاتصدق ان فيه كتير صح..زي مافيه غلط بردو مابقولش لا

بس زي مابقولك..انت نازل حاسس ان الدنيا بتدور حواليك..وهو الموضوع مش كده...الدنيا بتدور حوالين نفسها مش حوالين حد معين

ماتستناش مامتك تيجي تحضنك
روح احضنها انت

وهاتلاقيها حضنتك غصب عنها وبكل حب مش بكل غصب..

ماتستناش حاجه من حد..زي مادورت على صحابك..دور جوه والدك ووالدتك واهلك..

اعمل لليوم اللي ممكن ماتشوفهمش فيه تاني ابدا
(لاقدر الله)

اسفه اني طولت..وبرجاء ماتخدش الموضوع بمحمل شخصي

شكرا
ورمضان كريم

WS said...

Hoda الله يا
ربنا بعتك ليه

كلامك جميل جدا
و فعلا وضح لى الامور بشكل تانى

زى ما قولت انا انانى و كنت فاكر الدنيا كلها بتدور حوليه
بس الحقيقه مش كده

و الواحد لازم يبقى ايجابى اكتر من كده زى ما بتقولى
هوه اللى يبدأ بالسؤال عن الناس

و يحمد ربنا إن ربنا اداله الفرصه إنه يعيش الحياه بره
مليون واحد بيتمنوا يعيشوها

أنا فخور إن فى ناس لسه عاقله زيك
و عندها حب إعطاء النصيحه بشكل غير مباشر و جميل زى ما عملتى

مش حاتصدقى إنى بقالى و الله العظيم اسبوع مكتئب إكتئاب شديد
و نايم نهار و ليل رمضان فى السرير

علشان عاوز الايام اللى فى مصر دى تعدى بسرعه لغايه ما يجى ميعاد الطياره

بس تعليقك ده حايخلينى افكر ابص على موقفى بنظره تانيه

فعلا لازم انضج شويه

عيشت سنه فى اوروبا و ايه يعنى
نفس الكلام اللى امى قالتهولى

Hoda شكرا يا
ربنا حايكرمك لإنك بكلامك ده ساعدتى إنسان كان حايعمل تصرف حايندم عليه طول حياته

و احمدك يا رب

أحمــــــــدبــــــــــلال said...

مش أول مرة أقرا بوست ليك
بس أول مرة أعلق
بجد ماكنتش قادر أمنع نفسى من أنى ادمع و انا بقرا شعورك ناحية أستقبال أهلك ليك
عارف الناس بقت عندها لامبالاة و تبلد طبيعى خلاص
ماحدش حاسس بحاجة
البلد كلها متخدرة
احد اعز أصدقائى رجع من أمريكا لظروف عائلية قهرية
بعد خمستاشر سنة هناك من غير ولا زيارة لمصر
تخيل صدمته فى كل حاجة قابلها هنا
و شعور الناس أنه أجنبى لأنه مش عارف يتكلم عربى كويس
ده لو أعتبرنا اللى بنتكلمه ده عربى
كله عايز يشتغله و عايزين يقلبوه فى أى فلوس و السلام
الشعب بقى كله حرامية و نصابين و جهلة و مدمنين مخدرات

afew good men said...

انا الوحيد اللي رجع المجونة بعد سنة زي حالاتك

بجد وحشتني داااااااااااا

وانا معا هدي وردك عليها طمني

عموما اهلك عايزين تكون ايجابي ولو بالكلام

تسمع الملسل مع ماماتك

وتصل بباكي علي الصبح تهزر وتصبح ياعم الحاج

وتاخد اخوك غلاسة تفطر عند عمك وخالتك يوم

وماتنتقدش مصر لانها هي خي من 50 سنة

ليك وحشة كبيرة

انشاء الله اعلق تاني

Ayman said...

ممكن تديني إيميلك
عاوز أتكلم معاك ضروري
إنتا متعرفنيش بس أنا مهتم جداً بمعرفتك
ده إيميلي
mazinker@gmail.com
مستنيك ترد عليا

human being said...

حمد الله ع السلامة
بص يا سيدى كل اللى انت قلته ده محبط طبعا و يبدو ان حضرتك حساس شوية كمان وده اللى مزود الموضوع
انا عن نفسى طهقانة من حاجات كتير فى البلد دى و دمى بيتحرق من حاجات كتير و كان حلم حياتى انى اسافر ادرس واشتغل برة فى اى بلد غربية بس ببعد اعادة التفكير لقيتها فكرة فاشلة جدا بالنسبالى
انا بكره الغربة موت و اكتشفت انى للأسف بحب البلد دى رغم انها قاسية على ولادها و مهما قعدت فى اى بلد مهما كانت عمرك ما هتحس انك جزء منها زى ما استاذ
helper
قال
انا كنت فى ليبيا و انا صغيرة و متتخيلش انا كنت بكرهها ازاى عشان كدة اتمنى انى معملش كدة فى ولادى ان شاء الله
م الاخر كدة لو شايف انك مرتاح فى الغربة برة اكتر من هنا ومش فارق معاك ولادك هيطلعوا مصريين ولا اوروبيين
و مش شايف اى حاجة او اى حد فى مصر يستاهل
يبقى خلاص فى الحالة دى الغربة اكيد هتبقى احسن
انما لو شايف و لو جزء بسيط من الامل يبقى متفكرش انك تهاجر
على فكرة مش عيب ولا حرام انك تبقى عايز تسيب البلد دى للأبد المهم متندمش
و حضرتك اكتر واحد فى الدنيا دى هتبقى عارف سعادتك فى ايه

مُحَمَد أُسـَامَه said...

متابع مدونتك بقالي فتره . . النوت دي تحديدا استفزتني عشان أرد ..
شوف يا ريس أنا ليا اعتراض علي موضوع تهويلك للغربة سنه !... يا راجل وحّد الله ... هي سنه دي ايه في عمر الواحد خصوصا لو غربه .. هقولك حاجه ممكن تكون قاسية .. انت عاوز تشوف الدنيا كلها حلوة و خلاص بغض النظر عن أي حاجة تانية .. و ده مش وحش بس انت لازم تقدر .. انت عيشت في اوروبا حياة مرفهة و مريحة لانك ظروفك ساعدتك علي ده .. نعمه جت لك من عند ربنا .. أنا مثلاً واحد متغرب بقالي بالضبط سنة اهو في الخليج .. مش لاقي كلام اوصف بيه اول خمس شهور من الغربه ما بين حالة نفسية زفت و طفحان الكوتة في الشغل و مرمي في الصحرا و في الوقت اللي انت كنت بتلعب فيه شات روليت انا كنت بدور علي مكان اشتري منه مية ! .. لاني مقيم في مدينة صناعية عمال .. عاوز اقولك حاول تكسر نفسك كل فتره .. لان لو مكسرتش نفسك .. نفسك اماره بالسوء و تلقائيا بدون قصد هتلاقيك بتتعالي علي الناس من غير وعي .. مش لازم تبقي كل الناس وحشه و انت اللي حلو .. مش كل الناس وسخه و انت اللي نضيف و مستحمي .. مش كل مصر خرابه و اوروبا اللي جنه .. انا مسيبتش مصر اربعين سنه عشان ترجع تقول كل ده عليها ...

شكرا

أحمــــــــدبــــــــــلال said...

مع احترامى لجميع اللى أدلوا بتعليقاتهم
للأسف أنا مش شايف اى حاجة من اللى بتقولوا عليها
و فكرة اللى يشرب من النيل يرجعله
و يا حبيبتى يا مصر
و الحاجات دى للأسف مابقتش جايبة همها
فى الوقت اللى كلنا بنعلن بوضوح حبنا لمصر
كان فى مننا بيموتوا و بيتعذبوا و بيغتصبوا على أدين الامن فى مصر
الامن اللى المفروض يحمينا
و ياريت ماحدش يقولى دى أقلية لأن دى حاجة شائعة
أنا عملت محضر فى القسم قبل كده
أتعاملت معاملة قمة فى المهانة
حصلتلى مشكلة و انا فى شرم الشيخ قبل كده
ماقولكش بقى على قسم شرم الشيخ
سياحة بجد
بتقلع حزامك و جزمتك و بيتاخد منك موبايلك و فلوسك و محفظتك
و بتترمى فى حجز عبارة عن اتنين متر و نص فى اتنين متر و نص مع أربعين واحد غيرك
و كل شوية بيتكبلك ميه فى الأرض علشان متقعدش و الحمام عبارة عن حفرة فى نفس الحجز
بعيداً عن أن مافيش تهوية
طبعاً لو مالكش حد يجبلك أكل يبقى هاتموت من الجوع

ليا كتير من عائلتى عايشين بره سواء فى الخليج أو أوروبا أو أمريكا
كلهم بلا أستثناء حتى اللى عايشين عزاب مش متجوزين
كل مرة بيجوا فيها هنا بيأكدوا على حاجة واحدة
أنهم مستحيل يرجعوا يستقروا فىالمخروبة اللى اسمها بلدنا دى

ويلكم باك تو أيجيبت

Fly High said...

اولا هو انا حاجاوب على السوال الى انت سالته هو ناس كتير جاوبه عليه بس مش اجابه مباشره
"نقولك حاجه واحده حلوه فى مصر ترجع لها"
سهل قوى
"والدك ووالدتك"
لشوية اسباب كتير قوى
اولها طبعا ان المفروض ان ربنا فوق وهما على الارض قبل نفسك كمان ودا كلام كلنا عارفينه ان المفروض علينا ان احنا نطيعهم فى اى حاجه يقولوها الا لو كانت معصيه لربنا دا الى ربنا فارضه علينا
انا مش بحاول اعمل شيخ ولا حاجه ومش حاقولك ان انا بطبق الكلام دائه فى كل الاوقات لو قلت لك كده يبقى بكدب عليك
وياريت ماتزعلش من الكلام دائه لانك مش حتحس قد ائه انهم اكتر اتنين بيحبوك فى الدنيا اكتر من اى حد تانى اكتر حتى من نفسك الا اما تفقد حد فيهم ولو لا قدر الله فقدت حد فيهم
وهو زعلان منك مش حتعرف تسامح نفسك خالص وبقالولك دائه عن تجربه شخصيه ليا انا,
بالنسبه لمصر بقا دى موضوع تانى خالص فى ايه فى القران فيما معناها
(ان الله لا يغير ما بقوم حتى يغيروا ما بانفسهم)
فمصر مش حتتغير لوحديها احنا الى لازم نبدا بانفسنا مش نستنا لغاية ما حد تانى يغيرها لينا ولو قولت ان الموضوع صعب او انك حاولت اكتر من مره ومش قادر
طوماس اديسون قال جمله لذيذه قوى بيقول انا ما فشلتش الف مره انا اكتشفت الف طريق تودى
الى الفشل
(I will not say I failed 1000 times ,I will say that i discovered there are 1000 ways that can cause failure - - )
ودائه احد الاسباب الى خلا اوروبا تسبقنا انهم بيحاولول لغاية ما يوصلوا
واوروبا مش كامله باردوه لسبب الموضوع الى قالك عليه
helperF1
الولد الى عنده خمس سنين حاول تفكر فى الموضوع دائه بيقولك عنده خمس سنين حاول تتخيل كمية الشحن اللى الناس اللى حوليه شحنوه بيها عشان يعمل الى عمله شوف دا اما يكبر حيعمل ائه ودائه كله ضد بيقولك لانه شافها لابس الحجاب طب حيعملهاائه لو عملت اكتر
وباردوه حارجع واقولك انى مش بطبق الكلام دائه طول الوقت وان الدنيا وردى,فى اوقات بقعد فى البيت ما بطلعش حتى البلكونه مش الشارع بس عادى,ربنا يهدينا جميعا,
وفى الاول والاخر انا اسف لو كنت اتكلمت كتير او اتكلمت بطريقه مش حتعجبك بس دا رائى ليك كامل الحريه انك تتقبله او ترفضه
وعلى فكره طريقتك فى الكتابه حلوه اوى بحس انك بتكتب من قلبك بجد انت لو كتبت كتب ممكن تبيع كويس.:D

WS said...

Fly High
helperF1مش عارف لو كنت قرأت ردى على
عندك حق فعلا
الحاجه الوحيده اللى الواحد ممكن يرجع فيها بلده هو ابوه و امه
بس ابوه و امه ممكن يعيش معاهم برضو بره مصر
و أنا عن تجربه شخصيه حاسيت إن علاقتى مع والدى و والدتى احسن بكتييييييييير و انا مش عايش معاهم
بنحب بعض اكتر
بنخاف على بعض اكتر
مش ايام ما كنا عايشين مع بعض
خناق و عقوق لحد الصبح
و عاوز اقول لك إن مصر حاتتغير بس بعد ما تكون مت
و بعدين؟
هايل

الحق عيش

MedZag said...

مبروك النشر

http://wasla.anhri.net/