EgypToz: شات روليت من التواليت

Saturday, April 17, 2010

شات روليت من التواليت


اف9...ادمنت القاعده من غير تى شيرت اشيت مع مجهولين من كوكب الارض على اجمد و اخطر و امتع موقع جديد على شبكه الانترنت...شات روليت...و الادمان ده ما جاش من فراغ...ده جه بعد حياه طويله ممله من الوحده و الكآبه و الفراغ...بالرغم من إن كلمه عولمه موجوده بقالها فتره الوقتى...إلا إن معنى العولمه الحقيقى بقى ملموس بشكل واضح من خلال الشات روليت...فما هو الشات روليت يا جدع

ببساطه الشات روليت عامل زى بكره ورق التواليت...بتقعد ادام شاشه الكمبيوتر و تنتظر نصيبك...شاشه كام صغيره فيها وشك العكر...و شاشه كام صغيره حايظهر فيها حاجه ما تعرفهاش...إنسان...حيوان...جماد...ممكن تتكلم معاه بصوت و صوره...او تكتب على الشات...و فى زرار اف9 ممكن تضغط عليه فى اى وقت عاوز تجر بيها بكره ورق التواليت...قصدى الشات روليت

انا مثلا كل يوم بعد الشغل ارجع اطبخ و اكل ادام الشات روليت...بعد سنين و سنين من الاكل لواحدى...بس من يوم ما طلعتلى واحده موزه و إيه من سويسرا...سيبت الأكل...و بقيت البس شيك...و اسرح شعرى...و اوضب اوضتى... و اقول هاى..تقول لى هاى...عامله ايه...أنا كويسه و انت...أنا تمام...منين؟...من سويسرا و انت؟...من مصر...اف9 نكست اللى بعده...بمعنى البت زحلقتنى...مش مهم بنات العالم كتير...الموزه اللى بعده...و هكذا لغايه ما الاقى اليوم خلص...انام...احلم بالمزز اللى قابلتهم...اروح الشغل...افكر ازاى اعرف ابهر المره الجايه البت على الشات روليت من غير ما تعملى اف9 بعد 3 ثوانى...و ارجع و اشيت عالشات روليت من التواليت من تانى

طبعا لو الشعب المصرى...و خاصه شباب و شابات الشعب المصرى عرف الموقع المصيبه ده...سوف تحدث ثوره...بجد...ثوره ما اعرفش محتواها...اكيد بنات كتير حاتعنس...اكيد شباب كتير حايهنج...اكيد اطفال كتير حاتنحرف...و اكيد جوازات كتير حاتتفشكل...بس على الاقل الشعب المصرى لأول مره حايلاقى نفسه ما بيهشش دبان وشه و وش بعض...لأول مره بيدخل بيوت و عقول ناس من دول عمره ما كان يحلم يكلمهم...مش مهم تكون بتعرف تتكلم انجليش...المهم تكون بتعرف تظبط...تبتسم...تأثر

كل اتنين او تلاته اف9 الاقى زب حد طالعلى على الشاشه بيضرب أو ما بيضربش عشره...الأول ما كنتش فاهم ليه...لغايه ما طلعلى كس واحده...فطلعتلها انا بقى زبى و هيا بنا نلعب...طب تصدق الجنس الاكترونى ده طلع قشطه يا مان

ممكن مشاهده الاعضاء الذكريه تخدش حياء بعض الفتيات و السيدات المصريات المحترمات...المحجبات أو المش محجبات...المتزوجات و العانسات...بس فيه حل يا انسه و يا مدام...لو طلعلك زب دوسى اف9
و على موقع اليوتيوب فيديوهات جميله بتظهر إلى اى مدى ممكن الواحد يطور و يبدع مع الشات روليت...و اهم و اول فيديو كان لشاب قاعد فى البيت ادام البيانو بتاعه...و اول ما يطلع حد على الشاشه التانيه...الشاب يغني له اغنيه ارتجاليه يوصف بيها البنى ادم اللى شايفه على الشاشه...و الشاب غنى لعشرات من البنى ادمين من جميع انحاء العالم و اشتهر
و ده خلى مغنى مشهور فى حفله مليانه مئات الاشخاص يعمل نفس الحكايه...يعنى واحد يصحى من النوم...شعره منعكش...مش حالق...عينيه مليانه عماص...يدخل على الشات روليت و صورته تظهر على شاشه عملاقه... و يلاقى ادامه جمهور كامل بيصرخ و بيغنى له...حاجه مدهشه مش كده يا بنى

انا اكتشفت إننا بالرغم من اختلاف الاديان و الاشكال و اللغات و الالوان...إلا إننا كلنا إنسان واحد...و ده ظهر واضح لما طلع فيديو السمكتين اللى دخلوا فى طيز الراجل...فكل مره حد يلاقى سمكتين فى طيز واحد... رد فعله بيكون اندهاش على استغراب على اشمئزاز على صريخ صويت اف9...اتفرجت على فيديو عشر دقايق مكون من رئاكشنات ناس من جميع انحاء العالم على السمكتين فى طيز الراجل ده...و فيديو تانى بيظهر راجل مخصى ببضان واحده...و هكذا...و عرفت إن اليابانى زى الالمانى زى الانجليزى زى الهندى ميندى فيندى...كلنا بنى آدميين يا راجل
الحاجه اللى فعلا بتدخل الفرحه فى قلبى لما ابي بى للناس على الشات روليت...يعنى اعملهم بايديه باى باى...او اعمل علامه النصر...او علامه اوكيه...و الاقى حد بيرد عليه بابتسامه و يعمل اوكيه او باى باى بايديه
او نلعب مع بعض اى لعبه...او ندردش عن اى حاجه...احكيله عن حياتى التعيسه... احكيله عن بلدى...عن احلامى و طموحاتى...و الشخص اللى ادامى يحكيلى عن اليوم بتاعه...كان عامل ازاى ...عمل ايه...حايعمل ايه...بالرغم إن الشخص ده عمرى فى حياتى ما شوفته و لا اعرفه...بس فعلا الواحد بيتعرف على ناس مثيره بحكايات مدهشه......ياااه...حد اخيرا اكلمه وجها لوجه...و فعلا عملت لحد الوقتى ست اصحاب...و تبادلنا الايميلس...و اتكلمنا كمان بره الشات روليت...و فى واحده منهم احتمال نتقابل فى الحقيقه كمان

و الشات روليت اختراع مدهش لشاب صغير من روسيا جاتله الفكره المجنونه دى فى يوم من الايام و كبرى الشركات العالميه بتتهاتف عليه علشان تشترى منه فكره هذا الاختراع...اختراع ممكن اوصفه بلعبه الحظ...أو لعبه الياناصيب...السيستم بيجمع اتنين مع بعض كيلو باميه...و انت و حظك...يا يطلعلك موزه تعمل ادامك ستربتيز...يا واحده عجوزه قاعده على السرير فى بيت للمسنين...المشرفين بعد ما زهقوا من طلباتها حطوا فى اوضيتها شاشه كبيره للشات روليت و زرار جنب المخده...قالولها لو عاوزه حاجه دوسى على الزرار ده...قالت لهم ايه الزرار ده...قالولها اف9 يا ماما
النهارده بقى فيه مواقع كتيره مشابهه للشات روليت...شات روليت لراغبى الزواج...شات روليت للشاذين...شات روليت للجنس...شات روليت على حسب الدوله اللى انت فيها...شات روليت على حسب اهتمامك...شات روليت لمحبى موسيقا الايموز...شات روليت لمحبى اكل المحشى ورق عنب...او تعمل شات روليتك الخاص باسم معين اى حد من العالم ممكن يدخله يشيت معاك انت و بس
اجمل شىء إنى ممكن اشيت روليت من ستار بكس...ممكن اشيت روليت من الجامعه...من ميدان التحرير...من حصه فى المدرسه...من حفله فى الاوبرا...من ميكروباص عتبه عتبه...من قهوه ام كلثوم...من مطبخ ام سيد...من على سرير اوضه النوم...شات روليت فى اى وقت...فى اى مكان...من أى إنسان...بس خد بالك...و خدى بالك...لما تدخل ولما تدخلى احترم و احترمى نفسك و ادعى انت و انتى انكم ما تطلعوش فى يوم من الايام على يوتيوب

يا ريت كل واحد يجرب الشات روليت و يحكيلى كده عن مغامراته
يا مصريين...سيبكم من الفيس بوك...سيبكم من الانتخابات...سيبكم من المظاهرات و الاعتصامات...التحرشات و البعبصات...من النهارده ما فيش عالم واقع...من النهارده فى شات روليت... كان معكم ولد شاب شات روليت من التواليت...اف9

15 comments:

sham3on said...

روليت راديو....سيكولوجيه التواليت

allah-slave said...

انا عارف الشات روليت من زمان بس ببساطة معنديش كاميرا من زمان برضه

WS said...

allah-slave
زمان؟شات روليت ما بقالوش اكتر من خمس شهور
وليه ما تشتريش كاميرا و تجرب الشات روليت
من زمات برضو؟

wasla said...

الزملاء الأعزاء تحيه طيبة وبعد:
تسعي الشبكة العربية لمعلومات حقوق الإنسان لإصدار مطبوعة دورية خاصة بالصحافة الشعبية تحت اسم "وصلة " تنشر فيها بعض مما ينشره المدونين من كتابات وتعليقات على الأوضاع المحيطة بهم في مصر والعالم العربي .
ونرجو مشاركتكم معنا في المطبوعة بالسماح لنا الاستعانة ببعض مما تكتبونه على مدوناتكم من موضوعات بعد موافقتكم على النشر .
نرجو سرعة الرد
مع الشكر
ابتسام تعلب
للتواصل
الايميل : wasla@anhri.net

الكلمة نور said...

هايل فعلا يا معلم
مذهلة مدونتك
تشبه البشر الحقيقى

WS said...

الكلمة نور
شكرا يا معلم
مدونتك مذهلة ونص
بس اخر جمله ما فهمتهاش
اصلى بشر

الكلمة نور said...

ليس فيها ادعاء
او اشياء غير مفهومة
كلها احاسيس بشر عاديين
وكلنا بشر بس مش كلنا نقدر نقول الحقيقة

Anonymous said...

سؤال بيطرح نفسه
هو ليه الناس بتدخل شات وايه
الاستفاده الحقيقه منو ؟

moon

WS said...

منو؟

Anonymous said...

من الشات يعني
بحس انو هيافه ولما بحس بملل اقول لنفسي ياله ادخل اتسلي واتعرف علي ناس جديده يمكن دا يزيد من شخصيتي بس بعد دقائق بقرف وبمشي لاني بحس اني بحقر من شخصيتي فيه

Anonymous said...

مش اول مرة ادخل على المدونة دى بس اخيرا قررت انى اسيب تعليق ومع احترامى الشديد لحق كل شخص فى الدنيا فى حرية التعبير
بس انا ليا حق برضه اعبر عن اعتراضى
"اولا مش عاجبنى اسم المدونة "طظ فى مصر
ثانيا ايه الحكمة من ان اى حد فى الدنيا يكتب عن ادق خصوصياته زى ممارساته للعادة السرية
فعلا مش قادرة افهم
عموما انا عارفة ان حضرتك ممكن تقوللى بمنتهى البساطة مادام مش عاجبك متقريش
بس انا اول مدونة قريتها لحضرتك كانت اسلام يوحانيس وعجبتنى جدا جدا جدا
بس اتصدمت لما قريت التدوينة اللى قبلها واللى بعدها
إنجى أحمد محمد

WS said...

شكرا يا انجى على التعليق
أنا فاهم قصدك كويس و باحترمه بشده

مش عارف المدونه دى عباره عن ايه بالظبط
و أنا ما اقدرش اقول انى إنسان كويس او وحش
التدوينات مش مقياس للى كاتبها

بس تخيلى مثلا لو المدمنين ما اتكلموش عن تأثير البانجو

أنا مكس من حاجات كتير مش فاهمها أنا شخصيا
كنت عايش فى حياتى فى مصر لأسباب خارجه عن ارادتى بشخصيات مختلفه

الوقتى خارج مصر الحمد لله استقريت على شخصيتين
و ربنا يا انجى الوحيد اللى عارف حقيقه ولد شاب

مين قال إن كلمه طظ وحشه
و مين قال إن المدونه إسمها
toz for egypt

Anonymous said...

اممممممم
عجبنى فى رد حضرتك كذا حاجة
اولا الاهتمام بإنك بترد على كل حد بيسيب تعليق
ثانيا الاسلوب الراقى فى الرد على حد معترض
و الله انا مش عارفة اذا كان الكلام عن المشاكل و الاوضاع الغلط بيساعد انها تتصلح فعلا و لا لأ
بس مرة واحد مثقف قاللى ان مشكلة الشذوذ الجنسى فى امريكا نسبتها قلت لما الناس ابتدت تتكلم عن الموضوع ده اصلا

بس برضه مش عارفة
عموما ربنا معاك فى الغربة اللى حضرتك فيها لانها اكيد صعبة جدا

انجى برضه

محمد ناصر الدين الهلالى said...

عاجبنى فى مدونتك دى أٌقتحامك للمواضيع المثيرة بطريقة جريئة جدا واحيانا فجة جدا جدا لم نعتادها والغوص فى اعماق دواخل حياة الشخصيات اللى بتكتب عنها كأنك بتألف روايات وليس تدوينات من الواقع ..الحقيقة المدونة دى المفروض تصنف ايه وان بس لولا بعض المواضيع واحيانا الالفاظ الخارجة عن حدود الكيبورد واللياقة عند الكتابة كان هيبقى لها شأن أخر .. اتمنى لك التوفيق فى حياتك واستمر فى امتاعنا بروعة اسلوبك وموضوعاتك الشيقة ..ولكن حذارى من الموضوعات المثيرة جدا حتى لاتوضع فى بند المحرضين على الفساد وانحلال الاخلاق برغم نبل غايتك فى الاصل . تقبل تحياتى

Anonymous said...

نديم