EgypToz: الدرجه واحد تحت الصفر

Wednesday, October 21, 2009

الدرجه واحد تحت الصفر

-->

انا السحب البيضه بتدخل من شباك الاوضه...وااااو...كوول...و لا فى الاحلام
منظر رهيب...كنت لازم اقف و اقول سبحان الله
بررر ثم بررر ثم برر...ما هذا يا شانكيزلانك...انه الصقيع يا ولدى
بس لأ دى لازملها وقفه...لأول مره فى حياتى اعيش هذه اللحظه الحرجه...كنت لابس التي شيرت و الجاكيت فوقيه و نازل ترلم ترلم على السلالم علشان الحق المحاضره و إذا بى افتح باب العماره و اخرج و اتجمد...عمرى ما كنت اتخيل انى اموت بالطريقه دى...ما كنتش فاهم...مشيت على الكوبرى و فجأه ما بقاش ليه صوابع...فين الصوابع...نو صوابع...بكيت...و جريت على الكوبرى ادور على صوابعى اللى وقعوا...و ما فيش حد من الناس اللى على الكوبرى كان عاوز يساعدنى...كله مشغول و مش عاوز يتأخر على الشغل...المهم ما لقيتش غير تسع صوابع و كتر خير أم مايكل اللى لمت الصوابع فى كيس المكياج بتاعها و جرينا على اقرب مستشفى...و دخلونى فورا اوضه العمليات و فى اللحظه دى كنت عاوز ماما و بابا و كنت قلقان ما فوقش من البنج...بس الحمد لله العمليه فشلت و ما بقاش ليه صوابع العب بيها و من النهارده حاكتب فى البلوج عن طريق جهاز الفيربال سبيكار...و حطينا على الكوبرى اعلان إن لو حد لقى صوباع مصرى اللى فى نص الايد يحطه فى أى حته هوه عاوزها علشان خلاص ما ينفعش نخيطه النهارده
و ده اللى انا حلمت بى أول يوم تحت الصفر لأنى ما كنتش مستعد و ما فيش لحاف و لا بطانيه و لبست كل اللباس اللى عندى و تلات شرابات فوق بعض و لبست شرابات فى ايديه و لفيت راسى بالفوطه و الا الهوا...جالى كوابيس و فى نفس الوقت ما عرفتش انام و مش عارف إزاى...دى ممكن تسمى كوابيس اليقظه...الشحات فى مصر بينام برضو متدفى
بس الله...الدرجه واحد تحت الصفر...طب ما كانش ينفع صفر بس...يعنى كانت حاتفرق يا واد...طبعا روحت اشتريت بطانيات و الحفه و جوانتيات و شالات و الذى منه و دفعت بقه اللى دفعته كله يهون و ابنى ما يبردش على رأى مامى
بس لذيذه...واد مصرى جاى من ورا الجاموسه و طول عمره عمال يعرق يعرق...فى اتوبيسات النقل العام و فى الشارع و فى البيت و فى الغيط...و لابس توانتى فور سفن فاليله بيضه بيضه و واقف بالفليله البيضه البيضه ابو حملات حملات ادام المروحه و بيقول مش عارف اذاكر اللى بذاكره من الحر...اهو انت النهارده يا ولدى فى الفريزر...ايه رأيك و رأي مامى
و الله رأيى إن هذا هو احساس الانتعاش بالفعل...مش محتاج غير شيشه و فيروز اناناس بالتلج...مره اخرى فيروز اناناس بالتلج...لانى عمرى فى حياتى ما شوفت التلج...و يا رب يجى اليوم اللى اشوف فى التلج ...و المسه...ايوه المسه...بصوابعى كلها... و ابقى سلملى على التاتااااكيف
هو صحيح...الجو عامل ايه فى مصر...مش فى سحب بيضه برضو بتدخل من الشباك؟


-->

8 comments:

helperF1 said...

حاجة من اللي بتميز بلد زي المانيا عن مصر انك فعلا هنا بتعرف يعني ايه تعاقب الفصول.

الصيف حر و عواصف رعدية و مطر
الخريف رياح شديدة و شجر اصفر و احمر في كل مطان
الشتاء برد و ثلوج و اشجار بلا اورق
الربيع ورود و زهور وجمال في كل مكان يقع عليه نظرك

اللامطار اللي بتنزل على المانيا في سنة بتزل على مصر في 25 سنة( 700 مم
مصر حوالي 27 مم)
و مع ذلك في عصر الامبراطورية الرومانية اوربا كانت على مشارف مجاعة حقيقة لكن يحمدوا ربنا ان في مصر كان عندنا فائض ضخم من الغلال يأكلهم.

انا عايش في اوربا من سنين و جيت هنا هروبا من عصر الانحطاط اللي بتمر بيه مصر دلوقتي و بالرغم من ذلك اذا ما قارنا اوربا بمصر فمصر تفوز بامتياز

اوربا كانت دائما مركز الفقر و المرض و التخلف العلمي و الطغيان السياسي و الديني و لم تعرف التحضر الا في السنوات الاخيرة من عمر الانسانية
مصر على الجانب الاخر تعيش في وضع مؤسف منذ اقل من 50 سنة منهم 30 مبارك
و تستطيع ان تكون في مصاف الدول الغربية في ظرف جيل واحد

WS said...

يا بختك يا عم عندك تعاقب فصول...للأسف عندى هنا ما فيش غير شتا و صيف...الربيع فين ما اعرفش...الخريف فين برضو ما اعرفش

و فى مصر بقه ما تعرفش الجو عباره عن ايه...بس ممكن يتلخص فى كلمه تراب

انا انصحك ما تفضلش فى اوروبا و ترجع فورا إلى عصر الانحطاط لإن زى ما بتقول مصر فازت بامتياز

و 30 مبارك خلاص عدوا
و 30 جمال هو المستقبل

و الرك على العقول النابغه اللى معششه فى اوروبا و سايبه مصر تفوز

أحمد said...

أنت عملتها وخلعت؟
مش تقول يا جدع علشان نبارك لك

WS said...

هىء هىء
أيوه يا أحمد
عملتها
هى هى

allah-slave said...

يا باختك يا عم وعقابل ما اجي المانيا وادرس اتوميشن بس شايف ان الموضوع صعب

انت مش هوجا هونجر ولا حاجة من كتر البرد ده

WS said...

حانؤر بقه...لأ بهزر...شكرا يا عبد الله...و يا رب تروح المانيا اللى انت عاوز تروحها دى...مع انى باسمع إن الالمان دول بردين حبتين...ايه بقى هوجا هونجر ده...عصير؟

المعلم برعى صاحب القهوة said...

اتعرفت على مدونتك من يومين بجد شئ رااااااائع اللى انت كاتبه ده بطولها وعرضها وحسستنى ياخى انكوا 4 او 5 اشخاص بتكتبوا فيها بس بجد اسلوب ولا اروع ولو كنت بشخصيتك الحقيقية اللى كتبت احداث بوست كريم اليتيم فانا اتمنالك من قلبى حياة جديدة موفقة من غير مزز ولاكبائر!!

WS said...

ما احنا خمس اشخاص
انثتين و دكرين و الجنس التالت
و الا انت ما كنتش تعلم يا معلم

امضاء:مزز