EgypToz: KRASS

Saturday, August 22, 2009

KRASS


النهارده اول يوم رمضان ليه فى اوروبا...اتسحرت بيتزا و كنت مستنى اذان الفجر لما افتكرت إن مافيش اذان هنا اصلا...دخلت على النت علشان اعرف الفجر امتى...مفاجأه كبرى...الفجر تلاته و نص و المغرب تسعه و نص...نعم...تانى كده...و لا تانى و لا تالت حاتصوم يعنى حاتصوم...و بإذن الله ربنا حايصبرك...على العموم اتسحرت و نمت و الوقتى الساعه سابعه و نص و فاضل ساعتين على المغرب...قولت اكتب فى البلوج و اسلى صيامى...لسه فى مرحله ما قبل الغيبوبه و اهو يوم و يعدى...يوم؟...دول تلاتين يوم...تلاتين؟...يعنى كل يوم عندى ست ساعات بحالهم اكل فيهم...يعنى شغلتى فى الساعات دى الاكل و الشرب و بس...لأ مش بس اوى...و الفرجه على المسلسلات...مش عارف الفرجه اونلاين بالانترنت على المسلسلات حايبقى ليها طعم و الا لأ...اهو حانشوف...لسه من شويه كنت رايح اشترى الاكل من السوبر ماركت و الدنيا حر مووت و طول ما انا ماشى اقول اللهم انى صايم...اللهم انى صايم...اشى واحد بيبوس واحده فى الشارع...و واحده ماشيه قالعه خالص مالص...و اشى ناس عماله تاكل فى ايس كريم كريم...و انا ريقى ناشف ناشف...ناش...ففففف..ف..،.نز...كفايه الكلمتين دولت علشان أنا صايم و ابتديت اهترف...ابقى اكملهم لما افطر...و رمضان كريم

10 comments:

Abdou Basha said...

ربنا يتقبل

محمد said...

كان الله فى عونك وثبتك
وجزاك خير جزاء

Anonymous said...

أولا كل سنه وأنت طيب
وربنا يجعل كل أيامك خير وبركه
الان أنت تواجه مشكله طول وقت الصيام
أعتقد أن ممكن تختار أقرب بلد أسلامى
وتشوف مواعيد الافطار والصيام فيها
وتلتزم بيها لآن ست ساعات
فترة قليله جدا والقصد من الصيام
مش أنك تبقى فى حاله تؤذيك
عموما أذا كنت عايز تتأكد أدخل على موقع دار الافتاء المصريه
وشوف الحكم الشرعى
ربنا معاك
وتمنياتى لك بكل الخير
محمد- القاهرة
الساعة 12 بتوقيت القاهره

M.Sameer said...

In which country are you ?

It's from 4 to 9 here in Finland. It becomes shorter everyday :D

WS said...

آمين يا عبدو باشا

WS said...

شكرا يا محمد
ادعى لأخوك

WS said...

و الله أنا كنت محتار أعمل ايه ، و الحمد لله المسجد الو حيد اللى صليت فيه الجمعه وزع علينا عنوان الموقع اللى ندخل عليه و فيها اوقات الصلاه و امساكية رمضان الخاصه بالمدينه و هو آه الوقت قصير للفطار و طويل للصيام ، بس أنا متخيلش نفسى اصوم لغايه سته أو سبعه مثلا و افطر و الدنيا لسه منوره

و ربنا يصبرنا

helperF1 said...

Oh My God , when I first saw this Photo I thought something familiar here. is this photo in Heidelberg?!!!!

عابر سبيل said...

هو اصلا انت في بلد اوروبية وانا لو مكانك قبل رمضان اشتري اكل واخليه في البيت وميكرويف واسخن الاكل علطول لمدة اسبوع او اتنين على قد ما اقدر واخرج في يوم كدة يكون مفيش ناس كيتر اشتري اكل يعني احاول بقدر الامكان اني اقعد في البيت في رمضان على قد ما اقدر بالذات في دول اوروبا
تقبل مروري ومدونتك رائعة جدا

WS said...

انا إن شاء الله حاحاول انزل مصر بعد كده فى رمضان أو اروح السعوديه
هنا رمضان عذاب