EgypToz: حسنى بوسنى

Monday, May 04, 2009

حسنى بوسنى

فى ممثل كده اسمه حسن أو حسنى مش عارف بيقولوا دخل موسوعه الارقام القياسيه النهارده بسبب إنه اكتر ممثل ظهر على الشاشه فى التاريخ...و كنت عاوز اعرف مين حسنى ده و لما شوفت شكله عرفته...ده فعلا موجود فى كل حته...و بيطلع فى كل فيلم و مسلسل...و فى المسرحيات و الاعلانات كمان...وشه منتشر فى جميع انحاء الجمهوريه...تلاقى حسنى على يمينك...و حسنى على شمالك...حسنى فوق...و حسنى تحت...بيطلع الصبح و الضهر و بالليل...فى موسم الصيف و فى موسم الشتا...على كل القنوات الارضيه و الفضائيه و اقلب...شعاره حسنى اولوايز اند فوريفار افتار...تو انفينيتى يا معلم...لدرجه لو ماشوفتوش فى مسلسل أو فيلم احس إن فى حاجه غلط...ليه كده يا حسنى...فى ناس طلعت اشاعه إن حسنى بوسنى...و جه على هنا بعد الحرب فى البوسنه و الهرسك...بس انا عندى دليل قاطع إنه كان هنا قبل الحرب...شوفته فى اعمال جميله زى الكرنك و سواق الاوتوبيس و زوجه رجل مهم و سارق الفرح و الهروب و ليه يا بنفسج و عفاريت الاسفلت و و و...ده كان زمان...بس الوقتى لما الموضوع طول بقيت بشوفه فى كل وسائل الميديا الموسميه....بوحه و كتكوت و كركر و كرر مكرر و كلم ماما و لما بابا ينام الخ الخ الخ إلى ما لا نهايه...حرام عليك يا حسنى... ليه كده يا حسنى...حافظ على صحتك شويه...مش قادر اتخيل بيعمل كل الاعمال دى ازاى...حاولت و حسبتها و معرفتش...لدرجه إنى مش حاستغرب لو جم بعد خمسين سنه و قالوا إن حسنى ده مش حقيقه و لا واقع بس خيال...يعنى تعالوا نتخيل يوم فى حياه حسنى... صورت مشهد فيلم أ فى اللوكايشن...و بعدين صورت مشهد فيلم ب عبر الاقمار الصناعيه و انت فى العربيه رايح للوكيشن فيلم ج...و بعدين صورت مشهد فيلم ج... و بعدين مسرحيه ن بالليل...اما مشهد مسلسل د فصورته منتصف الليل...و مشهد مسلسل هـ صورته فى الفجر...و هكذا تستمر الحياه...سنوات و سنوات...من كتر ما عمل اعمال نسى نص اللى عمله...نادرا ما بيعمل فى العمل و بعد ما يعمله ما يعملوش تانى...يعنى يلاقى نفسه فى الفيلم مرتين...عادى و طبيعى...طب ممكن اسأل سؤال...اسأل...انت بتاكل...انت بتشرب...انت بتنام...انت بنى ادم...زينا يعنى...و الا سوبر خارق...فين العيله...فين الاهل...فين الاصدقاء...انا خايف لاحسن يكون فاكر إنه جوه فيلم و حياته اصلا مسلسل...جايز...و الغريبه إن مش كتير بيتكلموا عنه...علشان بقى جزء من حياتهم الترفيهيه...تعود يعنى...رضا...ده اللى مقسوم علينا...نفسى يا حسنى تنزل الشارع و تشوف آراء الناس عن الوضع ده...انزل بس مره واحده امشى كده فى وسط البلد...شوف الناس احوالها ايه...عامله ايه...اسألهم عن رأيهم فيك...بس و انت متخفى...كتغيير يعنى...آه أنا نسيت...منهجه لا للتغيير...كله اسطمبه واحده...كله تمثيل واحد... نفس الشكل...تمثيل فى تمثيل...يعنى كده و كده...تمثيل فول اوتوماتيك...اللى بيسموه تمثيل تلقائى ارتجالى و تحدى...يعنى ينفع الواحد ياكل كل يوم طول الوقت موز موز موز...حياتى كلها بقت موز...المشكله إن كتاب السيناريو مش لاقيين حد تانى يعمل الدور بتاعه...شخصيته استحاله الواحد يلاقيها...اللى هيه شخصيه الراجل...الراجل اللى هو...الراجل و خلاص...شخصيه بدون ملامح و لا روح...سد خانه و السلام...يبقى حسنى...مافيش غير حسنى...حانعيش ازاى من غيرك يا حسنى...الدنيا تبوظ لو سبتها يا حسنى...انا كرهت كل اللى اسمهم حسنى...و الكل فاكر إنه ضلع اساسى فى الحركه الفنيه ككل...لو الاساس اتشال كله حايقع...و الكلام ده حاليا جزء منه صحيح...علشان بقى فى استسهال اسهال...اعمال كتير لازم تخلص...موسم الصيف قرب...رمضان قرب...عاوزين فلوس...و خلص...و الخوف شديد لو نزل الفيلم أو المسلسل من غير حسنى لاحسن يقع... يا شعب لو بحثنا لوجدنا...لو اعددنا لوجدنا...لو غيرنا لوجدنا...علشان كده باطلب من كل واحد أو واحده شايف أو شايفه فى نفسه أو فى نفسها انه انها ممكن يجى تيجى مكان حسنى... ارفعوا ايدكوا و علوا صوتكوا و قولوا ستوب تصوير...علشان إناف إز إناف...و ربنا يطول فى عمرك يا حسنى...كمان و كمان

13 comments:

Anonymous said...

Enta ostaz we ra2ees quesm! ana etfasha7't de7k!

WS said...

etfasha7't :o

Anonymous said...

مهو ممكن الي يجي يكون انيل وي انيل قولي الحمد لله علي الربناقسملك بية ومتبصسش علي اليي في ايد غيرك

الدرعمي said...

أنا من بدري و أنا متضايق من وجود حسن حسني في كل الأعمال وكنت بلاقي الناس كلهم مبسوطين لحد ما شفت الأستاذ الراحل فؤاد المهندس في ساعة صفا على art بينتقد ظهور حسن حسني و بيقول هو مفيش غيره ؟ أنا كل ما أتفرج على حاجة ألاقيه طلع لي زي عفريت العلبة ! وبصراحة من ساعتها بدأوا ياخدوا بالهم من لطفي لبيب لحد ما بقى المنافس الأول لحسن حسني و بدأ مظهر أبو النجا و حسن كامي ومحمود القلعاوي و وحيد سيف يظهروا تاني في الأفلام و المسلسلات ،، بس رغم كدة فهو مش وحش يعني مش هدخل الفيلم عشانه ولا هسيبه عشان هو فيه بالعكس هو بينفع في الأفلام الساقطة بيعمل لها طعم @ تحياتي لأسلوبك و عرضك الجميل لفكرتك @ @ آدم الدرعمي @

WS said...

أدم
يا ريت كانت جت على حسن حسنى و انا كنت استحمله...و الأعمار بيد الله

جاد الربيع said...

بابا بيقوللي إنه كان دكتور في كلية الطب البيطري و يدّعي أيضاً إنه درسهم كمدرس زائر من جامعة القاهرة أيام السبعينات

WS said...

مين يا جاد؟حسنى؟

جاد الربيع said...

آسف، أنا خلطت بينه و بين ممثل سوداني لأنو كنا بنتكلم في الموضوعين في نفس الوقت و اختلط عليا الأمر :)

دا بيثبت إن سيرش صغير على جوجل ممكن يجنبك حاجات كتير

WS said...

حصل خير يا جاد
يا ريت كان دكتور فى كلية الطب البيطرى كان ريحنا شويه

سارة said...

ليه بس ..طب والله حسن حسنى روحه خفيفه ..اللى كان يستاهل التريقه بجد بقى واحد ..رذيل بجد ودايما يعملك نفسه التت النت الفت
خالد النبوى بصراحه ..وواحده عملت كل الافلام الساقطه اسمها داليا البحيرى

سارة said...

فاكرنى ياولد شاب انا بنت شابه
بزور المدونة دى بقالى يجى اهو 3 او 4 سنين

حسام عامر said...

تدوينة حلوة وعلى فكرة كل الكلام ده ينفع كما لو كان عن اللي بالي بالك حسني مبارك اللي تبص يمين تبص شمال تلاقيه في وشك تفتح الحنفية ينزل منها تفتح التلفزيون يطلع فيه أهو ده بقا أسمج وأرذل من حسن حسني بتير

WS said...

اللى باللى بالك يا حسام