EgypToz: فلس طين

Thursday, January 15, 2009

فلس طين

كله عمال يتكلم دوش عن غزه... غزه غزه غزه...صدعونا...علشان كده مش حاتكلم عن الموضوع ده خالص...هو موضوع غزه ده مش حايخلص بقه...ما يمشوا الفلسطينيين من غزه و يريحونا...اكتر من الف شهيد... ده شرف فئران تجارب لاسلحه امريكاسرائيليه حديثه الصنع...عقبال الالفين شهيد...خساره إن شارون مش موجود...كان الماتش حايبقى مشعلل احسن من كده...بس الفلسطينيين دماغهم ناشفه بقى...نعمل ايه...قاعدين قاعدين...لغايه لما كلهم يموتوا...و لغايه لما يجيلنا شلل...خليكم قاعدين ما وراناش حاجه...و اهو بنتسلى...علشان ايه مش عارف...قال الارض قال

كل ما اقلب قناه الاقى حاجتين...ناس ميته و ناس بتموت...اروح قالب القناه عالطول...الاقى ناس ميته و ناس بتموت...ملل...الواحد طهق خلاص...انا ممكن اقتل بعد كده...عادى خالص...و موضه الشالوتيب الفلسطينى انتشرت و الناس ماشيه اوقات فراغ فى الشوارع مظاهرات و قاعده فى البيت ادام التفلي زيون خانقه زماره رقابها بشال اسود فى ابيض... لأ و إلا حرق العلم الاسرائيلى...حاجه تموت من الضحك...قمه الهبولبول...و جروب الفيس بوك...إيه شغل البنات ده... قال تدامون...تدامون ايه يلا منك له

المغنى لابس الشال اياه و ماسك فى الايد دى عيل و الايد التانيه عيله و ماشيين على المقطم و وراهم عيال عيال و دخان الديسكو اشتغل و سكوت حانصور...و يلعب ببقه باحساس دفين و من تحته قشر بصل
المغنى: نفديكى يا فلس
كورال ولاد الشوارع من وراه يمين:طيــــن
المغنى تانى: نفديكى يا فلس
كورال بنات الشوارع من وراه شمال:طيــــن
الكل: دموووع دموووع دموووع

ايه حكايه فلسطين دى...فيها اسرائيليين كوخه وحشين محتلين الارض دى...و عمالين يقتلوا فى الفلسطينيين...انا لو فلسطينى و عندى مراتى و عيالى امشى...اهرب...اقعد ليه...علشان اموت و عيالى يموتوا...و بعدين...استفدت ايه...ادخل الجنه و ابقى شهيد...يا راجل...طب ما كل واحد يعمل كده...طب ما كله عمال يعمل كده من ساعه ما الصهاينه ما احتلوا فلسطين...حصل ايه بقى...و الا القدس اتحررت و الا حاجه...يبقى تمشى من سكات احسن...و مترميش نفسك و اللى معاك إلى التهلكه...إحنا مش زى زمان عشره يغلبوا الف...ما همه مش عارفين يمشوا...همه فى حصار...ازاى ربنا خالق الارض دى كلها علشان الانسان يعمرها بحريه و يجى الانسان اخر ميت و الا متين سنه تيجى فى دماغه فكره فاشله اسمها حدود و دول و كلام فارغ بدل شعوب و قبائل و كل واحد يتكتف فى الارض اللى صحى و لقى نفسه فيها...ايه العبط ده...سيبك من الكلام الفارغ ده...انت يا فلسطينى اركب مركب و ابعد عن ارض الموت و الخراب دى و روح اى حته تانيه...و احتلها زى الاسرائيليين ما عملوا فيكم...نصيحه من اخوك...اعملوا عصابه و اهجموا على قبائل العوعو فى جبال البنطيق ...ده حق مشروع...خلى عندك روح رياضه و تقبل للهزيمه فى فلسطين...مش عندكم زى الاهلى و الاسماعيلى...لأ...طب اهلى و زمالك...لأ برضو...فتح و حماس...لأ انا عاوز اقاوم الاحتلال يا ناس...بإيه يا بابا...بأى حاجه...بنفسى...برافو...موت بقه و حرر فلسطين...تخيل ربنا خالق الناس دى تموت نفسها علشان تحمى القدس...تتولد علشان تعيش شبابها شويه و بعدين تروح تحج تمسح بيها ذنوبها و بعدين ترجع القدس تموت نفسها شهداء للقدس...و كله يدخل الجنه...ده منطق ده بالذمه...دى حياه دى...لو ربنا عاوز يحمى القدس حايحميها

انت عارف لو الفلسطينيين دول اتلموا على بعض كده و راحوا يحاربوا الاسرائيليين...قنبله واحده و يبقوا كور كفته...انت عارف لو العرب كلهم اتجننوا و طقت فى مخهم انهم يجتمعوا علشان يحاربوا الاحتلال...قنبله واحده و بوسه من امريكا و يبقوا فسيخ مدخن...انت مش قوى... بس بُق و خلاص...يبقى خليك فى حالك و انا فى حالى

انا مش عارف الناس مش متقبله الاسرائيليين يبقوا وحشين ليه...مجرمين حرب...بيقتلوا فى الاطفال و الشيوخ و النساء...امال عاوزهم يبقوا حلوين...امامير...طيبين...ما فيش حاجه فى العالم الوقتى اسمها طيب و شرير...واحد زائد واحد يبقى اتنين...انت يا خويا لما تبقى تحارب باسم الاسلام و تحرر بلاد الكوكب تبقى تحمى اطفال و شيوخ و نساء العدو...ده لما بقه...الوقتى لأ...و همه لأ...همه مش كده...همه حرين انت مالك...غلطه كبيره كل الاجيال عايشه واكله شاربه نايمه عليها...يعنى ايه الاسرائيليين مش من حقهم يبقوا فى فلسطين...من حقهم و نص...ليه هو الفلسطينيين علشان كانوا عايشين فيها الاول يبقى من حقهم يعيشوا فيها للابد حتى نهايه الكون...ايه الغباء الازلى ده...عاملين عقد تمليك مدى الحياه بارض فلسطين...نسوا موسى و اليهود...طب ما اليهود كانوا فى مصر مع فرعون...اى حد قوى عاوز يجى و يقعد مكانك من حقه يجى لو اقوى منك و كسبك...قانون الغابه...مش احنا حيوانات...و البقاء للأقوى...مش كفايه الاسرائيليين عندهم شويه رحمه و مخليين الفلسطينيين يعيشوا فى بيوتهم...تقوم ترمى عليهم ببمب العيد يا حماس...ايه الحماس اللى فى ده...لأ اخييه عليك...اخييي بجد...مش اتيكيت خالص

راجل عسكرى شكله صهيونى كل يوم الساعه خامسه طالع فى قناه اخبار اجنبيه عمال يبرطم:خماس ماست ستوب ذا خوكيتس...خماس داز نوت وانت تو اكسبت زا اكزيستانس اوف اسرائيل...خماس داز نوت وانت بيز...وى هاف زا رايت تو ديفنت اوغ سيتيزن ...و يروح بابتسامه مش خبيثه مطلع ايديه من تحت المكتب و عامل بصباعه علامه السلام

يبقى يا خماس افهم انك لازم تحترم وجود عدو ليك... تقبل وجود دوله اسرائيليه...و ماله...فيها ايه يعنى...تبقوا جيران و حبايب...و إن اسرائيل اقوى منك و انه عنده حق يضربك بالقفى مره و اتنين و كفايه بقى شغل المسكنه و الستات اللى بتولول شريط سف و العيال اللى عمالين تبنوا بيهم دروع بشريه و بعد ما يتعوروا واوا تجروا بيهم على المستشفى و بعد ما يموتوا تروحوا تخلفلكم عشر عيال تانيين علشان الشغل يمشى و ما تنقرضوش...مش مكسوفين من شغل الشحاته يا مامى الدنيا ضلمه ما فيش كهربا و الا نور...عمال تمد ايدك يمين و شمال على المساعدات الخارجيه...و تكوش فى الفلوس...عاوزين ناكل هام هام هام...عاوزين فلوس هام هام هام...و تسيب الدول اللى حوليك تلعب بيك علشان مصالحها...و تفضل تعمل فى قمم عقيمه و همه لسه لابسين الجلاليب ابو خطوط مدهبه...عيب...و بتقول شروط و تعديلات على المبادرات كمان...لأ دى سفاله...يلا مش عارف تضرب اسرائيل اضرب مصرى ما فيش مانع...و الا بلاش...اضرب فلسطينى زيى...ما هو مننا و علينا برضك...أو لف نفسك بحزام متفجرات و اقف جنب اسرائيلى و قول الشهادتين و فرقع يا جدع

مين اللى قال انك يا فلسطينى حامى القدس من كل الاشرار...ايه القدس دى...عملت اللى عليك و ما عرفتش تحمى المسجد الاقصى...تروح تموت نفسك علشنها ليه...فيها ايه...بتطلع شعاع جبار...اهو انت و عيالك مت و بعدين...ما تخلى اللى عاوز ياخد القدس ياخده و اللى عاوز يهدمه يهدمه و اللى عاوز فلسطين كلها ياخدها و سيبوا بقه يشبع بلبعه فى ترابها...الحياه اهم و الا الموت فى سبيل قضيه خسرانه اهم...الحياه طبعا...لإنك لو مت ما استفدناش منك حاجه...ده حب ذات علشان تدخل الجنه ببلاش...انت يا فلسطينى خليك ذكى و احمى مستقبلك و مستقبل عيالك و روح شوفلك حته تانيه تقعد فيها...حايروحوا فين...مش بتقولوا كلنا عرب...مصر تاخد شويه و الاردن شويه و سوريا و السعوديه و كدا يعنى...على فكره كويس يجوا يعمرولنا صحراء سيناء...و بعدين الصحراء الجرداء الغربيه واسعه و برحه...مش همه بنى ادمين برضو...لو انانيين و مش راضيين... على فكره فى جزر كتير فاضيه ناحيه اندونيسيا انا باقترح تروح تعمل مخيمات لاجئين عليها...يلا يا عم رمل و شمس و بحر و عيش مع نفسك فى سلام

مش عارف اساسا إيه علاقتنا بفلسطين دى...هو علشان فيها شويه ناس بيتكلموا عربى...و الا علشان فيها مسلمين...و الا علشان لازقه فى حدودنا و خايفين على بلادنا برضو...و الا علشان بنكره اسرائيل...و الا علشان صعبانه علينا الابرياء الغلابه اللى بتموت...طب ما نشوف اللى بيموتوا عندنا اولى...قال متطوعين رايحين غزه...روحوا...بس ابقى خدوا بالكم من الصاروخ لاحس يجى فيكم

الكلام بقه المقرر فى المنهج المدرسى...الصهاينه دول فاكرين نفسهم الجنس الاسمى...عاوزين يحتلوا الارض من النيل للفرات...انت تحب تبقى عايش فى بيتك و حد من بره يدخل بيتك و يطردك منه...تخيل دخلوا مصر حاتعمل ايه...لو قوى ححاربهم و ادافع عن مكانى...لو المعركه محسومه من اولها حلملم عزالى و امشى...حاتقول الكرامه الكرامه...ما هى الكرامه دى هى اللى جايبانا ورا...طب جبن...جبن ايه بس و رومى ايه...ده غباء ذكائى...انت بتقول الكلام ده بس علشان قاعد فى بيتك تحت البطانيه مدفى و بتشرب كاكاو سخن...لو حصل ده فى الحقيقه حـاتتـ...
الاسرائيليين امه يهوديه شاطره عرفت توحد اليهود من جميع انحاء العالم على هدف واحد و هو انشاء الدوله الصهيونيه...اما احنا فخيبه عرفنا نفرق بعضينا...و قال بنحلم بالامه الاسلاميه...يا ترى حنبقى عاوزين نعمل فى العالم دوله اسلاميه برضو زى الدوله الصهيونيه...و نبقى نفس الهدف...احنا ننشر العدل و السماحه...و نتوسع و نتوغل و ننتشر... و نهدى البشر فى جميع انحاء العالم من الضلاله إلى النور...بدل نشر ثقافه القتل و عدم الرحمه و الدبح اللى بيحصل من الصهاينه النهارده...هىء...يعنى الفرق بس انهم بقوا الوقتى دوله وحشين اشرار...و احنا عاوزين نبقى فى المستقبل دوله طيبين خيرين

مش احنا عارفين إن احنا حانقعد نحارب اليهود دول لغايه يوم القيامه...خلاص بقه نسكت و نتقبل الواقع بصدر رحب و نستنى يوم القيامه

لو عاوزين نحارب بجد نحارب بذكاء...نحارب بطرق دبلوماسيه متحضره...نحارب بالعلم...نحارب بالإصلاح الداخلى الاول...نحارب بالوحده العربيه الاول...نحارب بالتقدم العلمى...نحارب بالتعليم...نحارب من اجل السلام...لما يجى اليوم ده بقى...بعد تلات تلاف سنه كده إن شاء الرحمن...نبقى نرجع زى صلاح الدين و نحرر القدس...و يرجع اليهودى يعيش مع المسيحي و المسلم و اللى ماعندهوش اى دين خالص فى سلام على ارض الاديان
بس الوقتى نخرس احسنلنا
لو ابنك كان محمد الدره و اتقتل ادامك انسى انك حاتقول الكلام ده...حتى لو كنت مقتنع بيه ميه فى الميه...النظريه تـُهزم امام الواقع...أنا آسف

7 comments:

Anonymous said...

after this post im not gonna visit this blog again, yala salam

محمد احمد said...

انتا مينفعش الواحد يتكلم معاك بالعقل

كس امك

Eng.Ahmed said...

شوف....انت اسلوبك حلو وعندك هوايه شغلات اتخلي الي يقرأ يستمر بلقرايه وميحس بلضوجه(يعني ميزهئش)بس انت هم شويه حاول تحرتم الامور الي دتصير داير مدايرك,,,,,(اقصد الي بدور حواليك)متكلي اللهجه المصريه شبيها,,,,اني اكرها
المهم اني حبيت احييك بس,,,,
باي صغيروني
يله ادعبل

Anonymous said...

سلام عليكم

اتفق معاك بان وضعنا يكسف

ولكن اختلف معاك كثيرا فى السخرية من الجهاد والشهاده

وعلى فكرة الناس دى احياء عند ربهم يرزقون

وبهديك بعض الآيات .. ركز فيها شوية واكيد هتستفيد

{الَّذِينَ قَالَ لَهُمُ النَّاسُ إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ} [آل عمران

{قُلْ هَلْ تَرَبَّصُونَ بِنَا إِلَّا إِحْدَى الْحُسْنَيَيْنِ وَنَحْنُ نَتَرَبَّصُ بِكُمْ أَنْ يُصِيبَكُمُ اللَّهُ بِعَذَابٍ مِنْ عِنْدِهِ أَوْ بِأَيْدِينَا فَتَرَبَّصُوا إِنَّا مَعَكُمْ مُتَرَبِّصُونَ} [سورة التوبة: 52]

{إِنْ يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِثْلُهُ وَتِلْكَ الْأَيَّامُ نُدَاوِلُهَا بَيْنَ النَّاسِ} [سورة آل عمران: 140]،

{إذْ يَقُولُ الْمُنَافِقُونَ وَالَّذِينَ فِي قُلُوبِهِمْ مَرَضٌ غَرَّ هَؤُلَاءِ دِينُهُمْ وَمَنْ يَتَوَكَّلْ عَلَى اللَّهِ فَإِنَّ اللَّهَ عَزِيزٌ حَكِيمٌ} [الأنفال: 49]

واختلف معاك فى نقطة ان عدد قليل يهزم عدد كبير ودى آية

{كَمْ مِنْ فِئَةٍ قَلِيلَةٍ غَلَبَتْ فِئَةً كَثِيرَةً بِإِذْنِ اللَّهِ وَاللَّهُ مَعَ الصَّابِرِينَ} [سورة البقرة: 249].

و الاية دى بترد على كلامك بشكل واضح

{إِنَّ اللَّهَ اشْتَرَى مِنَ الْمُؤْمِنِينَ أَنْفُسَهُمْ وَأَمْوَالَهُمْ بِأَنَّ لَهُمُ الْجَنَّةَ يُقَاتِلُونَ فِي سَبِيلِ اللَّهِ فَيَقْتُلُونَ وَيُقْتَلُونَ وَعْدًا عَلَيْهِ حَقًّا فِي التَّوْرَاةِ وَالْإِنْجِيلِ وَالْقُرْآَنِ وَمَنْ أَوْفَى بِعَهْدِهِ مِنَ اللَّهِ فَاسْتَبْشِرُوا بِبَيْعِكُمُ الَّذِي بَايَعْتُمْ بِهِ وَذَلِكَ هُوَ الْفَوْزُ الْعَظِيمُ} [التوبة: 111]،


و شكرا لك

WS said...

Anonymous el akhrany

انا باتفق معاك فى كل ما تقول ، بس الجهاد مش بس بالقتال زى زمان ، الجهاد بالعلم و التقدم و المعرفه ، هل تسمى فلسطينى فتحى ماسك طوبه و رايح يحارب عشرين دبابه اسرائيليه و فلسطينى حماسى ماسك نبله و رايح يحارب عشرين طياره اسرائيليه بجهاد فى سبيل الله ؟

و ارجو انت تقرأ هنا

http://egyptoz.blogspot.com/2009/01/blog-post_16.html

Anonymous said...

والله لا اعرف كيف ارد على كلامك لانه بكل بساطة يدل على سذاجة صاحبه ولا يجدي الجدل مع امثالك
اسف يا اخي لا احاول اهانتك ولكن ارغب ان اقول لك امرين:
الأول الحمد لله الذي جعل الانترنت وسيله لكل شخص ان يعبر عن رأيه ولكن اعلم ان هذه ايضا مسؤوليه وانك سوف تحاسب على كلامك هذا امام الله لذلك يا اخي عندما تكتب شي احسبها صح
الثاني كلامك في الموضوع يدل على جهلك العميق في موضوع فلسطين وجهلك العميق في الدين الاسلامي وجهلك العميق في الحياة بشكل عام لذلك انصحك بالقراءة في كل المجالات حتى تزيد من ادراكك الذهني وتنمية عقلك والله اني لا اقول هذا الكلام للإستخفاف بك وانما هي فعلا نصيحه لك لوجه الله لانك فعلا تحتاجها اذا كنت ترغب بالاستمرار بالكتابة

WS said...

TOLERANCE :(