EgypToz: اقم صلاتك بقه

Monday, December 08, 2008

اقم صلاتك بقه

فى اعلان حلو اوى فى التلفزيون بيشجع على الصلاه...الإعلان على حلقات...أول حلقه اتنين شباب راكب عربيه و بيعملوا حادثه فزيعه و الاتنين بيموتوا...الحلقه التانيه الشاب قبل ما بيموت فى العربيه بيشوف حياته كانت عامله ازاى و بيجيبوه و هو فى اوضته و صايع و بيكلم صاحبه على التليفون و مزيكا بقه و روشنه بقه و امه بتقول له من ورا باب الاوضه انه يروح يصلى و بيقول لها حاضر و بيقول الله اكبر قال بيضحك عليها و جايبين فى الاوضه روح الشاب نفسه اللى مات و هى نفسها ترجع للحياه علشان تقول لنفسها انها لازم تصلى و بيرمى نفسه على الارض و بيعيط من الحسره و الندم...و الحلقه التالته الشاب التانى اللى كان قاعد جانبه فى العربيه بيشوف حياته عامله ازاى و بيجيبوه و هو على الجيت سكى فى البحر و بيسمع الاذان فى البحر فبيرجع الشاطىء و يلف فوطه على المايوه و بيصلى على الرمل و واقف جانبه روحه لابسه جلابيه ابيض فى ابيض و فخوره و هى بتشوف نفسها بتصلى و بتبص فى النور و مبسوطه و فرحانه و بتقول الحمد لله
الدعوه إلى الصلاه واجب على كل مسلم...و الإعلان بالطريقه دى عمل اكبر خير لما قال لكل الناس اللى فى العالم و بيتفرجوا على التلفزيون و ما بيصلوش إنه يقوم يروح يصلى قبل فوات الاوان...و خاصه الشباب الضايع اللى ترك الصلاه...ده الصلاه أول حاجه الواحد حايحاسب عليها يوم القيامه...و مجتمع بيصلى لازم حايبقى مجتمع صالح...اعلان هادف بناء بدل اعلانات الجوايز و الفجور و الرقص و الهشك بشك
بأفتكر لما كنت مع زياد صاحبى بنزور محمود فى البيت...و بعدين سمعنا كلنا بودانا الاذان...أنا عملت نفسى مش سامعه...و صاحب البيت كمل الكلام اللى كان بيقوله...و زياد قطع الكلام و قال يلا بينا نقوم نصلى العشا...فين الحمام من فضلك...انا شخصيا ماكنتش عاوز اصلى...انا بحب اصلى فى البيت لوحدى...احنا الوقتى فى اعده صحاب يعنى...و بعدين العشا لسه وقته طويل لغايه الصبح...و مش عارف صاحب البيت بيفكر فى ايه...ممكن يكون ما بيصليش من اساسو...شعرت إن أنا و محمود اتجبرنا اننا نصلى معاه بالعافيه...اصل مش معقول يقول يلا نصلى و اقول له لأ ما بصليش...جبنا السجاده و بعدين لقيت زياد بيصلى السنه...هو فى سنه قبل العشا؟...و لما خلص سألنا مش حاتصلوا السنه...بجد رحت قايله لأ مش حاصلى السنه...حسيت إن المسأله بقت عند...بأعند فى مين...فى الصلاه لربنا؟...معقول...اصل بصراحه زياد زودها اوى...انا ما بحبش حد يجبرنى إنى اصلى...انت ابويه و الا ابويه يعنى...المهم كل واحد بقى عمال يمثل الادب و الاحترام و التواضع إن التانى هو اللى يبقى إمام...على فكره الموقف ده بيحصل تقريبا بنفس السيناريو كل مره نبقى مجموعه صحاب حاتصلى...ياعم اى حد يبقى امام و خلصنا...المهم محمود وقتها بقى الامام...شكله كأنه اول مره يبقى إمام فى حياته...و ابتدى يصلى وشويش وشويش...واحده واحده...اكننا بنصلى التراويح...و ايه بقى عمال يعوج لسانه و يحاول يرتل و هو بيقرا الفاتحه و السوره...اكنه بقى شيخ...بزمتك يا محمود انت لما بتصلى لوحدك فى البيت بتقرا القرآن كده فى الصلاه...يا شيخ ده كلنا تقريبا بنصلى فى السريع...كرويت كرويت...خلصنا الصلاه و طبعا زياد لازم يصلى السنه...الواد الملتزم بقى المتدين...يا ربى كنت حاتخنق خلاص

زى برضو فى الشغل لما ابى دقن لازم وقت الصلاه يسيب المكان و ينزل يروح للجامع البعيد يصلى فى ساعه و نص و بعين يرجع للشغل تانى...يا أخى ما تصلى فى مكان العمل و خلاص...آه...و لما يجى يتوضى يعمل سيرك فى الحمام...ما تستحمى بالمره...يشمر كل كمامه و البنطلون و يقلع الجرافته و الشراب و يلبس الشبشب بتاع الحمام و يطلع يورى إن وشه كله مليان مايه و مبلول...و قال ايه بيتوضى مظبوط و يغيب بقى الساعه و نص و يرجع عالشغل تانى...حرما يا راجل

ما تضايقش منى يا شيكو...بس بصراحه ملهاش لازمه خالص لما كنا بنتكلم على وقت اذاعه الماتشات من اليابان اللى حاتبقى معادها الصبح بدرى و تيجى تقول لنا انك ما عندكش مشكله ... حاتصلى الفجر و تطلع تتفرج على الماتش عالطول...عرفنا خلاص انك بتصلى الفجر...هيييه...برافو

لما حد يقابلنى يا ريت مش عاوز اسمع منك السؤال ده...إنت صليت...إنت مال اهلك...عاوز تصلى روح صلى لوحدك يا اخى...حاتجنن...بأحس إن حد بيجرنى بسلاسل من رقبتى علشان اروح اصلى...يااه...و لما اروح معاه الجامع بأكره حد يتفرج عليه و انا بتوضى...و بعدين يقول لى هو انت كده لحقت اتوضيت؟...بتمسح على شرابك كمان؟...لأ لازم تقلع الشوراب...يا عم حل عن نفوخى بقه

الشعور العام إن الصلاه بقت إعلان...عبء...تمثيل...واحد يقول لك إنت بتصلى فى البيت...حرام...المفروض تصلى فى الجامع...يا سلام...يعنى كل مره اقلع البيجامه و البس لبس و اتوضى و انزل الخمستاشر دور بالاسانسير و امشى لحد الجامع اللى على بعد شارعين و اصلى جماعه و امشى الشارع تانى و اطلع بالاسانسير خمستاشر دور و اقلع اللبس و البس البيجامه...ليه ما اصلى فى البيت اسهل...ربنا فى كل حته...و بعدين احنا بقينا فى زمن غير الزمن...الواحد مش فاضى و مافيش وقت للكلام ده...و قال ايه بيعرض عليه كمان انه يعملى ميسد بالموبايل يصحينى الفجر علشان انزل فى عز البرد...شكرا سلامو عليكم... بص بقى...ما تخليك فى صلاتك و انا اخلينى فى صلاتى احسن...يا اخى ربنا حايحاسبنى انا...انت مالك

فعلا زمان كان الشيطان راكبنى...الحمد لله ربنا هدانى

بس الله سبحانه و تعالى فعلا مش محتاج إعلان عن الواحد يصلى له...اكن كده واحد بيقول يا جماعه من فضلكم علشان مصلحتكم صلوا لربنا... يلا ما تصلوا بقه...اللى عاوز يصلى يصلى...و اللى مش عاوز يصلى ما يصليش...و فكره التخويف و الموت و التمثيليات و البكاء و الندم اللى بيجيبوها فى التلفزيون كل مره دى احنا كبرنا عليها خلاص...مش دى طريق الدعوه إلى الصلاه...الصلاه مش حركات تؤدى و خلاص...الصلاه إيمان بالصلاه...و الإيمان دى قصه طويله...و هل حقيقى مجتمع محافظ على الصلاه يصبح بالتبعيه مجتمع صالح...فى ناس كتير بتصلى و بـتـ...اللى ما بيصليش يبقى وحش

انا عاوز اتقرب إليك يا الله...عاوز اعبدك لإنى عبدك و انت خالقى يا رب...عاوز اشكرك على كل النعم ...عاوز اطلب منك المغفره...لما باسجد لك باحس بالراحه و الامان...باحس انى فعلا قريب منك...علشان كده انا ملتزم بالصلاه إليك...بس مش عاوز الناس تتفرج عليه و انا بصلي لك جل جلالك...و مش عاوز الناس تتدخل فى علاقتى بك يا كريم... و مش عاوز الناس تفرض عليه انى اصلى لك يا عظيم... نفسى اصلى لك فى الخفاء...لإنى احبك اصلى لك يا الله...سبحانك انت تعلم ما فى قلبى

6 comments:

ابن المليونير said...

«وَمَتَى صَلَّيْتَ فَلاَ تَكُنْ كَالْمُرَائِينَ فَإِنَّهُمْ يُحِبُّونَ أَنْ يُصَلُّوا قَائِمِينَ فِي الْمَجَامِعِ وَفِي زَوَايَا الشَّوَارِعِ لِكَيْ يَظْهَرُوا لِلنَّاسِ. اَلْحَقَّ أَقُولُ لَكُمْ: إِنَّهُمْ قَدِ اسْتَوْفَوْا أَجْرَهُمْ!
6 وَأَمَّا أَنْتَ فَمَتَى صَلَّيْتَ فَادْخُلْ إِلَى مِخْدَعِكَ وَأَغْلِقْ بَابَكَ وَصَلِّ إِلَى أَبِيكَ الَّذِي فِي الْخَفَاءِ. فَأَبُوكَ الَّذِي يَرَى فِي الْخَفَاءِ يُجَازِيكَ عَلاَنِيَةً.
7 وَحِينَمَا تُصَلُّونَ لاَ تُكَرِّرُوا الْكَلاَمَ بَاطِلاً كَالأُمَمِ فَإِنَّهُمْ يَظُنُّونَ أَنَّهُ بِكَثْرَةِ كَلاَمِهِمْ يُسْتَجَابُ لَهُمْ.
8 فَلاَ تَتَشَبَّهُوا بِهِمْ. لأَنَّ أَبَاكُمْ يَعْلَمُ مَا تَحْتَاجُونَ إِلَيْهِ قَبْلَ أَنْ تَسْأَلُوهُ.

http://www.arabchurch.com/ArabicBible/Matthew/6

معرفش حسيت ان مغزى كلامك ينطبق على الكلام دة بالظبط

تحياتى

allah-slave said...

وايه المشكلة لما تصلى في الجامع

انا كنت زيك بالظبط كدة من سنتين ولكن قعدت اقول لو انا ضحيت عشان ربنا اللى انا بحبه اوي بنفس طريقة حبك ليه دي يبقى اكيد لو طلب منى اموت روحى هموت روحي ما بالك لو طلب انى انزل اصلى في الجامع واطلع ...

وبالمناسبة انا معنديش اسانسير

بس ربنا شرع صلاة تانية بالنسبة للناس اللى زي حلاتك عايزة تصلى معاه في الخفاء اللى هيا قيام الليل

تعالى بالليل والدنيا ضلمة ومحدش شايفك والكل نايم اتوضى بمية دافية وكلفت نفسك كويس وصلى زي ما انت عايز الليل طويل قدامك

انما الفروض لازم تصليها في الجامع عشان ده بيعالج ( الرهبانية
)الانطوائية في العبادة اللة كانت عند اللي قبلينا

وعلى العموم بغض النظر عن الموضوع ده انت بتعجبني بوستاتك

والصلاة دي بينك وبين ربنا وكل واحد عارف الصح والغلط
سلام

mbthe2nd said...

أنا كنت هاكتب نفس الكومنت اللي كتبه إبن المليونير
بس حبيت أوضح إن الرهبانية مش مرض محتاج علاج زي ما بيقول
allah-slave
عموما موضوع الرهبنة مش هوا الهدف الأساسي من مشاركتي

هدفي الأساسي إن البوست ده يبقى فرصة المسلم يحس بإحساس أخوه المسيحي في العمل بيبقى إيه لما يلاقي مفهوم مختلف تماما عن العبادة بيتنفذ حواليه

البوست ده يوضح إنك ممكن تقبل المختلف عنك لما تفهم اسلوب تفكيره
و ده اللي أنا حسيته من الكاتب
برغم إنه ماجابش سيرة التعاليم المسيحية من قريب أو من بعيد
بس أنا متأكد إنه من النوع اللي بيقبل الآخر لإنه فهم طريقة تفكيره

و بالمثل أنا بفهم أسلوب تفكير أخويا المسلم لما يقوم يصلي في أوضح مكان في وسط ميدان عام إن هوا كده بينفذ تعاليم دينه اللي بتقوله بأمر بالمعروف و المعروف هنا إنه يفكر الناس إن ربنا موجود و شايفنا في كل وقت و في كل مكان

مصطفي ريان said...

بص ياعم ايه امشكلة لما تصلي في الجامع صلاةالجامع افضل من صلاةالبيت بسبعة وعشرين مرةغير الحسنات الكتير اللي بتاخدها وانت رايح امسجد وكمان الجزاء على قدر المشقة
ماحدش يبجبرك على الصلاة لكن لما يرن عليك علشان تصلي الفجر هو كدة بيدعوك للخير بيدعوك للأن تأخذ ثواب صلاةالفجر حاضر في المسجد وما اعظمها من ثواب
بلاش تاخد الموضوع بوجهة نظر تانية
غيراللي صحبها عايزه
لأنه بجد ماحدش يقدر يفرض حاجة على حد غصب عنه خصوصاامور الدين
لككل التحيةوالود يااخي

Anonymous said...

يا اخي اعتقد هذه اخر مره ادخل مدونتك كتبت تعليق على موضوع غزة وكنت متمني القى موضوع احسن شوي ولكن للأسف
يا اخي الله يهديك انتبه لكلامك لانك محاسب من الله اللى بتقول انك بتحبه في حد عاقل بيقول على الصلاه في المسجد:
الواحد مش فاضى و مافيش وقت للكلام ده
يا اخي ممكن الشيطان يوسوسلك ويقولك الكلام ده وانته تكسل ومتروحش تصلي بس لما انت تكتب الكلام ده في مدونتك حتتحاسب عليه
وبعدين مفيش حد منعك تصلي لربك لوحدك لكن الله الذي تقول انك تحبه حدد لنا ماذا نفعل وماذا نترك وقال ان الصلاه في المسجد افضل وبعدين انتا تيجي تقول الصلاه في البيت افضل وتمشي على الطريقة اللي انتا عاوزها وبعدين تقول انا بحب الله اللى يحب حد يسمع كلامو وبعدين يا اخي الزمان تغير لكن العبادات ما بتتغير على كيفنا والله اكبر من الجميع

Anonymous said...

أحب أوضحلك أن الشيطان بيحاربك عشان تقعد تقول انا أصلى لوحدى بينى و بين ربنا بعيد عن الناس الوحشين المرآئين دول
وبعدين يقعد يكسلك شويه شويه و تلاقى نفسك صليت مرة طول الليل وتانى يوم صليت ركعتين بلليل و تالت يوم طنشت ما أنت صليت إمبارح هو كل يوم سهر و صلى دى حتى عطله لأنى مشبقدر أقوم الصبح أقولك خليها سهرة جامدة كل خميس أصلى ركعتين فى الجون يخدولهم بتاع ساعتين بينى و بين ربنا من غير ما حد يحس بيا هو ده الصح
وبعدين تلاقى نفسك بطلتهم
لآلآلآلآلآلآلآلآ النظام ده مش للمسلم الحقيقى
لازم تصلى فى المكان اللى بينادوا فيه للصلاه يعنى الجامع و عاوز تصلى فى الليل لوحدك دى حاجة تانية لا تغنى عن الصلاه المكتوبة و اللى وصانا بها رسول الله صلى الله عليه و سلم بأن تكون فى المسجد
وسيبك من موضوع الصلاه التيك أوآى بتاعت المراهقين اللى بصوروا لنفسهم أنهم أحسن من اللى بيصلوا فى الجامع
لآلآلآلآلآلآلآلآ اللى بيصلوا فى الجامع أحسن من اللى بيصلوا فى البيت حتى لو كانت قلوبهم أنقى
عشان لو كانت قلوبهم أنقى كانوا سمعوا كلام الرسم الرسول اللى هوا كان بيصلى فى الجامع
وقال صلوا كما رأيتمونى أصلى