EgypToz: Please leave your comment after reading this post

Monday, August 18, 2008

Please leave your comment after reading this post

فى جمله كده كتير بقولها ممكن ناس كتير تلاقيها مش ظريفه بس دى الحقيقه...و هو انى مش بكتب علشان الناس تقرا اللى بكتبه...لكن بكتب علشانى...اصل انا بحب نفسى أنا و بس...مابحبش حد غير نفسى و بس...أنا أنا هيفا...اكيد حد حايجى و يقول دى انانيه...و يقول امال بتنشرها ليه...ما ممكن تكتبها فى كراسه و تحفظها عندك فى درج المكتب...بصراحه ما عنديش رد للموضوع ده...علشان الناس اللى بترد ما بتفهمنيش...ناس هيفا...حد فاهم حاجه

ببساطه اول ما اكتشفت بلوجرز كنت وقتها انسان مكتئب من الحياه عايش لوحده فى بيت آيل للسقوط فى شتاء شديد البروده ...وحيد و لقى صديق اسمه بلوجسبوط يفضفض معاه...بدل ما كنت بمشى فى البيت من غير ما اتكلم ولا كلمه ايام و اسابيع...بقيت اكتب و اقرا اللى انا بكتبه...أنا و بس...و اعوذ بالله من كلمه أنا

ما علينا...المهم لقيت كمان ناس بترد عليا فى الكومنتس...و اكون كداب لو قولت انى ما كنتش بتبسط جدا لما الاقى فى حد بيكلمنى و اكلمه...يا يقول رأى يا اقتراح يا تعليق يا اى حاجه...المهم ده كان بيحسسنى إن المدونات دى حاجه حيه بتتكلم و بتتناقش...بالرغم من إن معظم...لأ كل بصراحه اللى بيعلقوا بيقولوا كلام فارغ فى فارغ...بس بصراحه موضوع الكومنتس ده ما كنتش بهتم بيه اوى...لإن زى ما قولت مش بكتب علشان ناس تقرا و بعدين تعلق
_
انا بس كنت عاوز اعرف ظاهره...هى مش ظاهره و الا حاجه...بس ملاحظه كنت بشوفه زمان لما كان عندى وقت فراغ كبير و كنت بقرا المدونات قبل نكستها...إن فى ناس كان بيكتبوا سطر و الا سطرين...كلمه او كلمتين...كلام قليل او كلام كتير...فارغ و مش فارغ...المهم إن الاقى عندهم يجى ستين كومنتس...ميت كومنتس...ميه خمسه و ستين كومنت...كنت بنهار...اجرى على الاوضه و اقفل على نفسى و اعيط...انزل تحت الملايه و اتبول غير اراديا...و اقول مش معنى الناس دى عندهم كل الكومنتات دى و انا ما عنديش و الا كومنتايه...صفر...بيفكرنى بصفر المونديال...كنت اقعد احسدهم احسدهم...و الغل كله فى قلبى...ليه...همه مين يعنى...المدونين التافهيين الهايفانيين دول...و عملت دراسه ميدانيه تفصيليه و وجدت الاتى

(1
يا امه الناس غبيه و ما بتفهمش اللى انا بكتبه

(2
يا امه انا فذ عبقرى و الناس مش فى مستوى انها تفهمنى

(3

على فكره النقطه الاولى تقريبا زى النقطه التانيه...آه صحيح...تتصور ما كنتش واخد بالى...و على فكره...هى مش يا امه انا فذ عبقرى...أنا فذ عبقرى فعلا

(4
يا امه الناس بتقعد تعلق تعلق فى مدونات و عقبال ما تيجى عندى تكون تعبت خلاص و فيصت ...بالمناسبه هو فيصت بالسين و الا بالصاد

(5
يا امه انا بكون خلاص قولت كل حاجه فى الموضوع اللى بتكلم عليه لدرجه إن الناس ما بتلاقيش خلاص حاجه تانيه تقولها

(6
يا امه الناس دى بتعرف بعض من زمان و صحاب بقى و نسايب و بيسلموا على بعض بالكومنتات...و انا ما عنديش صحاب...و ما فيش حد يعرفنى

(7
يا امه صاحب المدونه بينتحل صفات ناس مختلفه و بيعلق قال ايه متخفى...و انا ما بعملش كده

(8
يا امه الناس بتكتب حاجات مستفزه بتستفز اللى بيقراها لدرجه انه بيعلق عليها...و انا ما بستفزش حد خالص

(9
يا امه اللى بيقروا دول ما بيفهموش الانجليش اللى بانجلشه

(10
يا امه عمله اكن الواحد بينادى يامه
_
(10.5
يا امه أو يإمه أو يا إمه او يئِمه برضو العربى اللى بكتبه مش مفهوم
_
على فكره بقه...كل واحد بيعلق لازم ياخد باله إن تعليقه ده و الا بيودى و الا بيجيب...يعنى علق زى ما تعلق...و ما تعلقش زى ما تعلقش...يعنى تعليقه ده حيعمل ايه يعنى...و الا حاجه...اهو كلام فارغ و رغى و خلاص...فووو...اوعى لاحسن اعلقك...ياعِلق

يعنى ابقى بقشش علينا بكومنتايه...قول ازيك مثلا...هاى...أو أنا اهو...أو هاو ار يو ياواد...ياض

لا لا لا لا...نو نو نو نو...اوعى عقلك يلعب بيك و يقول لك إنى باشحت...إلا الشحاته...أنا ما باشحتش من حد

الخلاصه بقه لاحسن زهقت...المدونات بتختلف عن اى وسائل اعلاميه اخرى انها فيها تبادل آراء...يعنى ممكن كلمه منك يكون لها تأثير فى حد...و ممكن تعليق من حد يأثر فيك...من الاخر يعنى عاوز اقول إن الكومنتات دى هاجه هلوه

بس برضو الكومنتس ما بتهمنيش

يا راجل
أه...و لو بعد كل ده ما حدش علق عندى...حانتحر

بى.اس : فى لسه تلات نقاط ما ذكرتهمش علشان يكونوا إن شاء الله سبب و حافز إن حد يعلق و يقول التلات نقاط اللى ناقصين


بى.اس : نقطه من النقاط موجوده فى نقطه 6 فى رساله الماجستير الخطيره بلوجاوى سيندروم

بى.اس تانى معلش: لو ما فهمتش العنوان الانجليشى اللى فوق ... لو سمحت علق

_

14 comments:

0xDEADBEEF said...

بسم الله الرحمن الرحيم
الإجابة: نمرة 5

Abdou Basha said...

مرحبا يا ايجبتوس
بوسشت جميل
مدونتك من أحلى المدونات اللي بزورها ، رغم اني تقريبا مش بعلق عندك
انا اقولك السر
تقريبا اسلوب الكتابة بيعبر عن حالة الاكتفاء اللي انت قولت عنها دي
فمش بيبقى فيه تجاوب
وده بيفرق من بوست للتاني او من مقال للتاني
فيه حاجات بتتكتب بيبقى فيها اشتباك ممع القاريء او الزائر
أما الأهم ففي حاجة في المدونات ملحوظة هي الشللية
زي اي مجتمع تاني، يعني اصحاب بيعلقوا على بعض
تحياتي ليك

Lasto-adri *Blue* said...

بالنسبة لى الوضع مختلف
اصلا مابقتش أحب أعلق من حيث المبدأ.. لا فى بلوجى ولا بلوجات الآخرين

حالة ملل؟ حالة قرف؟ حالة إكتفاء؟ حالة غباء؟
معنديش أدنى فكرة


بس بلوجك يا ولد يا شاب إنت جامد.. كمل كتابة.. وماتحودش

Mo'men said...

comments do not validate you, watching your metamorphosis to a hopeful humanbeing in your posts, day in and day out .. does

:)

محمد آل ربيع said...

طب أنا مثلاً بأتفرج على مدونتك من حوالي سبع شهور من غير ما أعلق، لأنو الإجابة هيا تونس، يوووه، قصدي خمسة و يمكن كمان تكون ستة بس مش ف كل الحالات، لاحظ كمان موضوع الولاد اللي بيظبطوا بنات و البنات اللي بتظبط أولاد

عَ فكرة، فيصت بالصاد، لأنو أنا بأكتبها كدة، نرجسية لا أكتر

أنا فاكر إني كنت فِ بداية تدويني بردو شحتت تعليقات بس كانت تدوينة من خمس سطور بس، مش بوست كامل

تشحتني وقت فراغ؟

Innate_Inanenuss said...

I too get no comments...in my case, it's most probably reason # 2...WELL I DON'T CARE..ha. I think.

مراقب مصري said...

:D

نهارو إشطة يا عسل

مــهــا said...

أنت أساساً - و بدون أدنى مبالغة - خسارة فى البلوجرز .. و ماتسألنيش يعنى إيه ..

هو كده ..

و مش هابالغ برضه لو قلت لك إنى أحياناً باجى علشان ألاقى نفسى هنا ..

و اتقابل أنا و صاحبتى كل شوية و نقول لبعض : شفتى الواد ولد شاب كتب إيه ؟

و نرغى على حسك ..

أراك لاحقاً said...

السلام عليكم و رحمة الله

على فكره انت عبقري زي ما بتقول , مواضيعك يعني بتعرف تعبّر فيها عن حاجات مش أي واحد يعرف يعبّر عنها !

سيبك من الكومينتات لإنها مش مقياس , ممكن تكتب موضوع تاخد عليه جايزة نوبل و تلاقي مفيش كومينتات , و ممكن تكتب موضوع أهبل و يجيلك 100 كومينت , فالكومينتات مش مقياس .

Anonymous said...

بسم الله

بص كل اللي اقدر اقوله انك شخص غريب

وساعات بحس انك متناقض

ما علينا

حكاية الكومنتات دى ليها ظروف كتير ومش كل اللي بيقرأ موضوعات بيعرف يعلق

المهم ربنا يوفقك

pureblue

sara said...

الأهم ففي حاجة في المدونات ملحوظة هي الشللية
زي اي مجتمع تاني، يعني اصحاب بيعلقوا على بعض
تحياتي ليك
http://www.alqaly.com

المعلم برعى صاحب القهوة said...

مدونتك جميلة جدا جدا بجد تنبع باحاسيس صادقة الى حد كبير بالرغم انى اظن انك ممثل بااارع لاقصى حد تتقن فن خداع القارئ باسلوبك المبهر كأنك واحد او واحدة تانية خالص غير الشخص الحقيقى وهو ما اظن انه الكتابة العكسية اللى تحدثت عنها ، موضوع التعليقات ده متحطوش فبالك اوى مع التدوين قائم على التواصل مابين الكاتب والمتلقى لكن نصيحة اكتب لذاتك ، لمتعتك الخاصة لااكثر ولا اقل فضفض عن اللى جواك وكتير هتلاقى ناس اثرت فيهم بكلامك زيى يمكن بدون ماتعرف ، ولو على التعليقات ياسيدى فعلا اغلبهم بيكونوا على معرفة ببعض وبيجاملوا بعض او انك تروح تعلق عند واحد مشهور بيدون كنوع من انك خلاص بقيت بتكلم واحد معروف على النت وهكذا قد لا تكون كثرة التعليقات مؤشرا على جودة الموضوع المثار ، ... كما ان موضوعاتك بالفعل أغلبها استوفى جانب المتعة وحكت وقائع من الذكريات فلا يجد المعلق شئيا يدلى به لديك .. تقبل خالص تحياتى

Anonymous said...

...please where can I buy a unicorn?

Anonymous said...

...in heaven