EgypToz: You Are Not Alone

Wednesday, May 14, 2008

You Are Not Alone

من زمان ما حاسيتش بالشعور ده...شعور إنى نفسى كلها اتبسطت و كل خليه فى جسمى فرحت فى لحظه واحده و مره واحده من غير ما تتحكم فيها و الا تعمل لها حساب...عارف لما تكون متدايق متدايق متدايق عالطول و فى ثانيه واحده مؤشر السعاده يضرب عندك لفوق...انا كنت باستغرب لما اشوف ناس وشها بيحمر لما يكونوا فرحانين...بس من الوقتى مش حاستغرب...علشان انا و لأول مره احس إن الدم كله كان بيجرى فى عروق وشى من قمه النشوه اللى انا كنت فيها...مش عارف من ايه...هل من الخجل و الا من المفاجأه و الا من الكسوف...آه تتصور بقيت باتكسف...باتكسف من نفسى و من اللى انا فيه...بالرغم من تاريخى فى البلطجه و عدم الرضا و بحر الكئابه اللى أنا غارق فيه...عمرى ما كنت اتصور إن حاجات بسيطه زى دى ممكن ابدا تبسطنى ...عمرى فى حياتى ما كنت اتخيل إن ثانيه شعور بالفرح ممكن يشبعنى لشهور ادام...عمرى فى عمرى ما كنت احلم إنى احس ببنى ادميتى اللى من لحم و دم و لسه فيها قلب بيعرف يحب اللى حواليه...خوش بقه يابنى فى الموضوع

طيب حاضر...بس الفكره انى كتير باسأل نفسى عن معنى كل ده...اصل انا ما بحبش افكر اللى انا عاوز اكتبه...انا باكتبه و خلاص...و هنا بيجى فايده التدوين...و دايلمة النسيان... يعنى شوف اللى انا كاتبه فوق ده احس انى اول مره باكتبه...بس لما ارجع لورا الاقى انى كتبته قبل كده و برضو بنفس قمه الاحساس اللى انا فيه دالوقتى...و يمكن كتبته خمسميت مره طول حياتى قبل كده و انا مش فاكر...و انا عارف إن الكلام اللى باكتبه الوقتى ده شكله ملعبك و مش مفهوم بس انا فاهمه كويس الوقتى...حتى لو الوقتى بقى من غير "دال" دالوقتى...كلهم كانوا الوقتى

بص انا حاحكى تلات احداث حصلولى الاسبوع اللى فات...و كل حدث كان منفصل عن الاخر بس الغريبه فيه ان اول واحد كان زى تانى واحد...مروا مرور الكرام...بس تالت واحد خلانى افتكر اصلا إن فى حدث اولانى و تانى حصلولى

الاحداث عاملين زى قطع الدومينو المترصصه ورا بعض...زقه بس لقطعه الدومينو اللى ادام وقعت كل القطع اللى ورا

مش عارف ابتدى احكى الحدث الاولانى و الا التانى و الا الاخير احسن... بص حاحكى اللى لسه حصل لى امبارح

انا باشتغل مؤقتا تدريب بالليل فى مكان المفروض حاسيبه بعد شهرين إن شاء الله...و كالعاده بقه باروح الشغل تعبان و متدايق و تهقان و زعلان و قرفان علشان ما بحبش اساسا اللى انا بعمله...و شكلى بالبله زى واحد ضايع من امه...شكلى فعلا عامل زى... بص عارف ساعات بانشوف واحد كده هدومه مقطعه و شعره طويل و بدقن طويله
و ماشى حافى و وسخ و لونه اسود و شكله ماستحماش من اربع سنين ماشى فى الشارع و الحشرات بتبيض عليه تايه شارد مش عارف رايح فين...اهو انا كان شكلى كده...مش كده اوى يعنى...عالاقل كنت حاسس انى بقيت كده...و زمايلى فى الشغل كانوا بيشوفونى بالشكل الضايع ده...و على فكره مره من كتر قرفى و الخنقه فضلت ارسم بقلم الجاف على ايديه الاتنين لدرجه فى يوم بعد كده السكرتيره فى المكتب و احنا ماشيين مروحين قالتلى اوعى ترسم على ايدك بعد كده...ده الناس جوه بيتكلموا عليك و بيقولوا كلام صعب...قولتلها صعب ازاى يعنى...قالتلى يعنى...بيقولوا عليك مجنون...بصيتلها و قولت هممم

المهم خلينا فى الموضوع...انا جه فى بالى بقه من زمان لما
واحده مدونه ماعرفهاش مره قالتلى ان فى كتاب اسمه مش عارف لا تزعل و الا لا تحزن و انه كويس و كده...و قولت يمكن الكتاب ده يطلعنى من اللى انا فيه...المهم روحت مكتبه مدبولى قال لى ده بالطلب ادفع 35 جنيه و انا اجيبهولك...قولت له بس انا عاوز اشوفه الاول قبل ما اشتريه...المهم روحت ادور فى مكتبات تانيه فى المنطقه اللى انا ساكن فيها ما لاقيتش الكتاب...و فى يوم فى الشغل سألت زميله ليه كده معروف عنها اهتمامها بالقراءه عن هل الكتاب ده يستاهل و الا لأ...قالت لى اه يستاهل و انه كويس و كده...قولت لها اصل انا مش لاقيه...قالت لى اصله مش عارف معمول فى السعوديه و الا ايه...المهم يعنى روحت فى يوم بعد كده سألت واحد بيبيع كتب على الرصيف و سألته عالكتاب...قال لى استنى اكلملك الراجل اللى بيوزع الكتاب ده بالذات...و كلمه ادامى و وعدنى انه يجيبلى الكتاب اليوم اللى بعده...و قال لى انى يا ريت ما اشتريهوش من مكان تانى علشان هوه حايجيبهولى مخصوص بالطلب و انى اجيله الساعه اتنين بكره...قولتله اوكيه...جه بكره ده و روحتله الساعه اتنين مالقيتوش...تلاته اربعه خامسه...مالقيتوش...المهم خليت واحد يعرفه يكلمه ادامى عالموبايل فقال لى الراجل انى اجيله بكره تانى و هو حايكون جاب الكتاب...قولتله شكرا و مشيت زعلان... و بقالى فعلا تلات ايام ماشى فى شوارع مصر المزدحمه علشان ادور على كتاب قال ايه ممكن يطلعنى من الهم و الحزن اللى انا فيه...بلا نيله...روحت الشغل الساعه سته...و بعد ما خلصنا الميتينج مع المانجر...و الستاف كله مجتمع فى الاوضه...لقيت زميل ليه بيطلع من شنطته كتاب لا تحزن و بيدهولى ادام زمايلى كلهم

اده...ستوب

لأ بجد اده...هو فيه ايه...ازبهليت ادام زمايلى كلهم...مسكت الكتاب بين ايديه الاتنين...و قريت العنوان لا تحزن ببطىء شديد...اتفاجئت بصراحه...حاجه ما كنتش متوقعها خالص

اولا زميلى ده ماعرفوش غير من اسبوع...و بعدين مش صاحبى و الا حاجه...و اتكلمنا فى الشغل يجى مره و الا مرتين...و هو بيدينى الكتاب قال لى انا شوفتك كنت بتسأل زميلتنا عن الكتاب و كان نفسك فيه فجبتهولك

اده ببساطه كده

الفكره كلها إن و انا ماسك الكتاب فكرت بالايام اللى فاتت اللى ليها دعوه بالكتاب و اللى مالهاش

اللى ليها دعوه بالكتاب إن تخيل مثلا لو كنت روحت اى مكتبه و من اول مره لقيت الكتاب و اشتريته هل كنت حاسأل الزميله عنه...بلاش...حتى لو كنت سألتها الاول و بعدين روحت اشتريت الكتاب هل كان نفس الشعور الحلو اللى جالى كان حايبقى موجود لما زميلى ده يديلى الكتاب...تخيل انا عندى الكتاب و زميلى بيدينى نفس الكتاب تانى... و لازم ابقى ذوق بقى و اقول شكرا و كده و اتصنع الانبهار...الموضوع اكيد فيه حاجه

وقتها فعلا حاسيت بايام
ملسى...و انا عارف يا ميكو انك حاتعرف انا باتكلم عن ايه...و لما كنت زمان بادون فى نوته صغيره كل حاجه بتحصل فى اليوم و ان كل حدث متصل بحدث اخر انه فى الاخر يبقى خير ليه مش شر...موضوع كبير مش عاوز اتكلم فيه هنا...او ما كنت اطلق عنه آنذاك طريقه التواصل مع ربى...او الشعور الداخلى و الدليل النفسى لوجود الرب

بس اللى انا عاوز اقوله هو إن الموقف ده فتح عينى على حاجات...إن لما ساعات الواحد يسيب الموضوع اللى بيدور عليه و مشغول بيه لوحده...هو حايجيله لحد عنده...و إن الواحد لما يكون متوقع من ناس معينه فى حياته حاجات...بتجيله حاجات من ناس هو مش متوقع منهم اى حاجه...و إن اجمل حاجه لما الواحد يفرح بشىء هو ما كنش عامله اى حساب او خاطر...انا اساسا ما باحبش اقرا كتب و عمرى فى حياتى ما كنت حافرح مثلا لو حد جابلى فى عيد ميلادى كتاب...بس مش عارف ليه المره دى كانت حاجه تانيه خالص...ببساطه واحد عرف انه يفرحنى

ياريت اعرف افرح
حد كده زى ما هو عرف يفرحنى فافرح

حاولت اديله فى وقتها الفلوس بس هو رفض بشده...و الموقف ده و الفرحه اللى كانت على وشى كمان اثرت بشده على زمايلى التانيين اللى كانوا فى الاوضه...يعنى عمل ملتيبل ايفكت على الحاضرين من غير ما يشعروا...حسيت انهم سعداء علشان شافونى و لأول مره سعيد فى مكان العمل

كل ده حصل امبارح...و ده خلانى افكر طول الليل...افتكر حاجات مشابه حصلتلى خلال الاسبوع اللى فات...بس يمكن كانوا محتاجين حدث جامد زى ده علشان يفوقنى و يرجع الذاكره تانى للحدثين التانيين...و يمكن لاحداث حياتى كلها الماضيه و الحاضره

فكرنى إن كان ليه برضو زميل بيشتغل فى الشركه اللى تحتينا...و كان صديق بس مش انتيم يعنى...بس يمكن صداقتنا بقت اقوى بحكم وجودنا فى نفس مكان العمل...هو عارف انى متدايق من الشغلانه اللى انا فيها...و من احوال البلد...و من العيشه المقرفه اللى انا بتعذب بيها كل يوم...و قد ايه نفسى اسيب البلد دى...المهم فى يوم شافنى و انا باجرى من العماره اللى فيها الشغل غضبان جدا... و هو عارف انى كذا مره كان فى نيتى إنى اسيب الشغل...بالرغم إن ده حيؤثر على مستقبلى المهنى جدا بس انا كنت فعلا ناوى اسيب الشغل علشان كنت خلاص حاتخنق...مش معقول فى البيت ابقى قرفان و فى الشارع ابقى قرفان و فى الشغل كمان...
ده ايه الحياه القرف دى...لقيته بيكلمنى فى البيت و لأول مره يسأل عليه...و يطمن على احوالى...و كان فعلا بيهون عليه مصائب الشغل...حكيتله إن سبب غضبى علشان حصل حوار كده مش ظريف مع زميل غتت و رخم كده بس الفكره يمكن إن اكن كنت مستنى حاجه او سبب تافه اسيب بيه الشغل...فضل صديقى ده يقوينى و يؤكد عليه إن خلاص هانت و فتره التدريب حاتخلص و قد ايه شهاده الخبره دى حاتفيدنى فى المستقبل الخ الخ الخ...و اهم جمله قالها فى التليفون هى...و اوعى ما تجيش النهارده الشغل

اده...ده فى واحد خايف عليه بجد...بعد عدم المبالاه من الاهل و الاقارب بحالى...حاسيت اكن كان نفسى حد يقول لى كلمه زى دى...حد وجودى مهم بالنسبه له...على الاقل اضحك على نفسى شويه...برضو فضلت افكر افكار شيطانيه عن إن يكون ورا المكالمه دى غرض او مصلحه بس فشلت فشل زريع...ماكنش في اى سبب يخليه يعمل كل ده غير انه واحد و خايف على مصلحتى...و فعلا يوميها روحت الشغل و لما قابلنى قال لى عارف لو ما كنتش جيت...كنت حاجيب زمايلى و نجيلك البيت و نركبك العربيه و نجيبك على هنا

و بعدين افتكرت برضو من شهر فات لما كان فى واحد اجنبى من انجلترا بيعمل بروجرم فى الشغل و انا فاكر حتى لما ناس كتيره فى الشغل كانت بتتلزقله...مش عارف المصريين بينبهروا بالاجانب اوى كده ليه...ياريت الاجانب ينبهروا بينا اوى كدا لما نروح احنا المصريين بلدهم...و مره بالصدفه سألنى فى التورئه عن مكان هنا فى القاهره ممكن يخرج فيه فقولت له يروح سيتى ستارز...يعنى واحد اجنبى بيسأل واحد اللى هو انا اللى كان ماشى بالصدفه فى نفس التوقيت اللى كان ماشى فيه الاجنبى و قال ايه جه فى باله السؤال ده يسألهولى بالرغم من انى و الا اعرفه و الا حاعرفه اساسا

الاسبوع اللى فات كان نفسى اروح السينما و فيلم معين كده بس ماكنتش لاقى حد يروح معايه علشان معظم صحابى فى امتحانات و كده...كنت ساعات باحس انى باشحت من اى حد يروح معايه...زهقت من حكايه انى اروح السينما لوحدى

المهم فى يوم فى الاسبوع اللى فات قابلت الاجنبى ده برضو بالصدفه فسألته هوه عرف يتفسح فى القاهره...فشكرنى على المكان اللى قولتله عليه قبل كده و بعدين اتكلمنا كده خمس دقائق انجليش و فى الكلام مش عارف ليه برضو قولت له انا نفسى اروح الفيلم الفولانى...فقالى لى انه كمان نفسه يخرج...قولت له تحب تروح معايه بس انا بخلص شغل بالليل فمافيش غير منتصف الليل...قال لى اشطه...و بالرغم من انه كان فاضل له يوم و يمشى من مصر...و بالرغم ان فى كذا واحد كان واقف ادامى و انا باكلمه و يقابله و يقوله انه نفسه يخرج معاه و انهم يعنى يكلوا فى مطعم و الا و الا و الا قبل ما يسافر...و هو يقول لهم انه للاسف مش فاضى...إلا انه مش عارف ليه اختار انه يخرج معايه...بالرغم انى عمرى ما حاشوفه بعد كده...و ماكنش ليه دعوه بيه قبل كده...و برغم مشاغله قبل السفر بيوم...و انه لسه لازم يشترى هدايا لاصدقائه...الا انه جه معايه...معايه أنا

لما روحنا السينما اصر انه يدفع تذكره السينما...و اشترى لنفسه و ليه و لمراته فيشار و بيبسى...و استمتعت جدا بمشاهده الفيلم...مش بس علشان الفيلم كان ممتع...بس علشان ماكنتش لوحدى...و بعد لما طلعنا الساعه تلاته بالليل مالسينما...ادالى الايميل بتاعه و انا اديتله الايميل بتاعى...و

الموضوع إن الحدث الاخير عادى يعنى...يعنى عادى مافكرتش فيه اساسا...و ما كنتش حافكر فيه غير لما حصل موضوع البارح بتاع الكتاب...الفكره إن في فعلا ناس كويسه...و فيه فعلا فى يوم الواحد احداث جميله...بس الواحد اتعود انه ما يحسش بيها...اتوعدنا خلاص عالغم و الهم و الغلب و اللوم و الشكوى...يعنى ممكن اخلى حدث السينما ده حدث عادى...و ممكن اخليه فرح كبير...النقطه مش فى الحدث...النقطه فيه انا...انا باشوف الحدث ازاى...واحد كلمنى فى التليفون...و ايه يعنى...او واحد كلمنى فى التليفون بس بيسأل عليه...اده...هايل...تحفه...ابسط يا عم

الموضوع مش عارف احكمه لإنه فيه تفاصيل صغيره جدا هى اللى ادت فى النهايه إلى انى اشعر بشعور مختلف زى اللى فضلت ارغى عنه ساعه فوق ده...شعور إن طريقه مشاهدتى و معايشتى لليوم يجب ان تتغير...و إن الدنيا ناس...مش إن الناس فى الدنيا...و الاحداث مش وقت...الاحداث مكان بيتلاقوا فيه الناس دول...و حارجع تانى و اقول...إن اللى فات ده عادى و مش عادى...عادى علشان انا اكيد حصل لى حاجات زى دى كتير قبل كده...و يمكن ميت مره احلى و احسن من كده كمان...و مروا مرور الكرام...بس مش عادى علشان خلانى اعرف الخلطه اللى مش سريه للحياه...الخلطه اللى مش حتتذوقها غير لما تعيشها بنفسك...مش لما تسمعها من واحد زيى مش عارف يوصل اللى عاوز يقوله و الدليل على ذلك انه لسه عمال يكتب فى جمل و هو عارف إن ما حدش بقه عنده نفس يقرا كل اللى انت كاتبه ده

يلا اقفل بقه الموضوع...لأ فعلا...كان عندى اعتقاد خاطىء إن معظم الناس خلاص بقوا مش كويسين...المجتمع بقى قاسى على الواحد و الواحد اساسا مش ناقص...بس الناس الطيبه موجوده...والانسان الكويس ده ممكن يبقى مصرى او مش مصرى...و الانسان الكويس ده ممكن يبقى كويس معاك علشان انت كويس...و ممكن يبقى كويس معاك بالرغم من انك وحش...المهم انت كويس زيه و الا لأ...ممكن الناس الكويسه بيلاقوا بعض...مش عارف بقه دى صدفه و الا لأ...و ممكن اللى مش كويس يكون معاك كويس...او تشوف الكويس اللى فيه...بس ده سبب كافى تخلى الواحد مقبل اكتر على الحياه...لإن فيه ناس كويسه معاك فى الحياه دى...علشان انت عاوز الحياه دى تبقى كويسه

مش عاوز هنا اتفلسف فى فكره هى ده صدفه...و الا احنا مصيرين...و الا احنا مخيرين...و الا هى حياتنا وحشه علشان هى وحشه غصب عنا و الا احنا اللى بنخليها وحشه و الا احنا الوحشين

بس الفكره انك مش لوحدك

11 comments:

gjoe said...

WS, as always a "multiple effect" post!

I have to tell you that I am glad that you actually were clever enough to watch for the signs and that they actually made you happy, thinking clear and regaining faith in people around you.
You are lucky because many people get such signs and ignore them all together!

Your interpretations from the events was very smart and you got me thinking about what a person thinks he wants in life and what he actually gets.

My father always tells me something very similar.He told me that his life is full of a search of something that he thinks is best for him, while actual good comes to him from totally unexpected places.

Yes, you are not alone.Yes there is hidden good in people.Yes some people do care and yes you deserve to get better things in life.

I don't know you, but I feel that your frustration. I also feel that you should be more patient and believe that this too shall pass!

I hope you enjoy the book ba3d koll dah! :)

P.S: I am curios, was the movie Iron Man? Asl ana lessa shayfaah w 3agabny awy!

عـلا - من غـزة said...


لأ فعلا بجد انا استمتعت جدا بقراءة البوست ده
خاصة انو بيعكس اد ايه انت مبسوط .. باين اوي من كل كلمة ومن طريقة تعبيرك عن الاحداث وحتى من تخيلك ان; اتكلمت كتير او انك مش عارف توصف .. هو ده الي بيحصل لما تحصللك حاجة حلوة وتبقى محتار توصفها ازاي عشان توصفها بجد

اهم حاجة في الموضوع نقطة ان احيانا بيحصل معاك لحظة اتتباهة .. بيوقف عندها الزمن .. وبتخرج في اللحظة دي من تيار الحياة الي ماشي بسرعة اوي .. وتبتدي تشوف حياتك انت بالذات ماشية ازاي وفيها ايه

انا عندي قناعة ان معظم الايام مش شبه بعض وان كل يوم لازم يكون فيه حاجة غير الي قبله .. بس زي ما قلت الحكمة ان; تاخد يالك وتنتبه !

ربنا يديمها عليك نعمة يارب

تحياتي

bea* said...

نحن اللي بنختار كيف نشوف الدنيا و بأي عيون..يعني لو عايز تشوف الدنيا حلو حتلاقي عشر أسباب..و لو عايز الدنيا تبقى سوووودااا..حتلاقي مليون سبب والحمد لله الاسباب العشره دي كفايه ..
مش قالوا السعاده بأبسط الأشياء؟!..و حلو الواحد يحس باللي عنده..كلنا بنبص لفوق عايزين نكون من أسعد الناس زي الناس اللي شايفينهم أحسن مننا وشكلهم فرحانين دايما أقلّها مادياً يعني..بس هل همّ سعداء فعلا ً؟..صدقني بتهون حاجات كثير لمّا بفتكر ان غيري مش لاقيها..وان في حد بالعالم بيحسدك على حاجه انت مش شايفها أصلا ً..اكتشفت ان السعاده باللي عندي ..واني لو ما عشتش حياتي حلوه بالطول و العرض وارتفاع..ممكن أندم بكره..يمكن اصلاً مكنش هنا بكره

قلت حاجات كلنا بنمر بيها..بس ما عترفناش بيها

http://www.4shared.com/pageDownload1/dCounter.jsp?fid=37204967&fpwd=1f9784ee
مش عارفه ذوقك:بس حاول تقراه وتفهم الرساله
ربنا يديم الهنا عليك يارب:)

WS said...

gjoe

Life is full of signs…you just have to recognize them…it may be a person…a place…an event or an object…and use them for your process of living…they may be used as tools for happiness…or tools for sadness…believe in your power to control your life…even if it is not true…is it?

At least I am trying.

I am still reading the book…thank you for your advise…you really changed my life though I don't know you...and yes your are right…it was Iron Man…but how did you know?

WS said...

علا

فعلا كل يوم مش زى التانى
بس اللى مش فاهمه هو ليه كل فتره ...فتره بمعنى كل سنتين و الا حاجه...بغير اسلوب حياتى و بعدين بعد شويه ارجع تانى لاسلوب حباه معين... شكله بقى لازق فيه...يعنى مش عارف هل كل واحد فينا ليه حياه اصليه بيغيرها بين الحين و الاخر و بعدين يرجعلها تانى

دى تاسع مره اغير فيها من طريقه حياتى...يارب تفضل كده عالطول

WS said...

bea*

شكرا بجد عاللينك...انا بحب اقراله كمان

حكايه إن الواحد يبص للى تحتيه انا مقتنع بيها تماما علشان الواحد يبقى سعيد و راضى عن اللى فيه...المشكله بس إن ساعات الواحد لما يحاول بالعافيه يدور على الفسافيس الصغيره الحلوه اللى لسه موجوده فى الحياه علشان يبقى سعيد بالعافيه...الموضوع بيبقى إلى حد ما متصنع...مش طبيعى...و زى ما قولت ممكن واحده تبقى تخينه و عايشه فى جحيم و دى مصيبتها...و تقوللها تبص على اللى معندوش رجل...فتهون عليها مصيبتها...المصيبه فى لحظتها بتكون مصيبه و عامل للاكتئاب بغض النظر عن حجمها او قيمتها...طب هى بصت على الراجل من غير رجلين...الراجل من غير رجلين يبص على اللى من غير رجلين و ما بيشوفش...و الراجل الاعمى و من غير رجلين يبص على الراجل اللى مات و كويس إن هو على الاقل لسه عايش...الموضوع معقد شويه

Anonymous said...

بسم الله

انا مش عارفه اذا كنت حضرتك هتقرى الكومنت دا ولا لا بس انا حسيت من اول زيارة ليه هنا ان حضرتك طفل جميل متقنع بداخل شاب كبير

وفعلا احنا بايدينا نخلى الحياه حلوة وباييدينا نخليها وحشه كل واحد حسب نظرته ليها وعلي حسب وجهه نظره في معنى الفرح ممكن الواحد يتبسط من حاجه تافهه وممكن حاجه كبيرة متبسطهوش

اهم ما في الموضوع مدى رغبتك في انك تكون سعيد وفرحان

وانا حسيت من كلامك ان اوقات الفرح عندك قليله بس انت بايديك تخليها كتيرة

وعششان تحس ان الحياه حلوة لازم تقدم حسن النيه الاول

وحاجه كمان لازم انت تحاول تفرح الناس من حواليك لانه اكيد هينعكس عليك يعنى مثلا لو زرت ايتام او مرضي مجرد روءيتهم سعداء اكيد هيسعدك
واخيرا احنا بايدينا نفرح نفسنا

pure blue

WS said...

pure blue

انا بقرأ الكومنت اهو و عاوز اقول انى سعيد بالتعليق ده جدا علشان اول مره حد يقول انى طفل متقنع و جميل كمان بداخل شاب كبير

و مش عارف دى حاجه وحشه و الا حاجه حلوه...للاسف فى الحقيقه انا و الا شاب و الا طفل

الرغبه فى السعاده لما تكون هدف فى حد ذاته بيكون مش اسمه سعاده اوى...بيبقى اسمه رضا ممكن مغلف بطبقه سعاده اللى بسبب الرضا برضو

السعاده احساس عفوى المفروض ينبع بدون تخطيط او دراسه او بحث

بس ممكن ينبع من اسلوب حياه و فلسفه الواحد عايش بيها

و فعلا فكره ان الواحد يسعد لما يسعد الاخرين موجوده من زمان و ناس كتير بتعملها

بس فى الاخر بتبقى برضو تحت اسم البحث عن السعاده

الطبيعه فى الحياه مش البحث عن السعاده

الطبيعه فى الحياه ان السعاده هى اللى تبحث عن اللى يستحقها و تسعده

زمان فعلا كانت اوقات الفرح قليله

و مين بصراحه فى الزمن ده ايام الفرح عنده كتيره

مش وحش الواحد يبقى زعلان...بس ما ينفعش يبقى زعلان عالطول

لإن السعاده مش حاتبقى سعاده غير لو فى حزن قبله

حسن النيه جميل بس ساعات بينقلب على الشخص نفسه و بيبقى مصدر مشاكل

الكلام يبقى عن التوازن فى كل شىء

فى الفرح و الحزن و حسن النيه و الحذر

و اللى حصل لى فى الموضوع اللى فوق ده هو مش انى فكرت ابقى سعيد و خلاص
فدورت على اسباب تسعدنى

الموضوع إن لقيت كده انى سعيد... فبعدين دورت هو انا عندى شعور السعاده ده ليه... فلقيت الاسباب البسيطه دى

و بس

شكرا على التعليق الجميل يا

pure blue

و اتمنى لك السعاده دايما

Anonymous said...

بسم الله

اولا بشكلا حضرتك انك رديت علي كومنتى

واوضح انك تكون كبير وكلنا هنبقي كبار اكيد وتكون محتفظ بطفل جواك اكيد يبقي حاجه جميله جدا وياريت نبقي واحنا كبار كده يبقي جوانا شويه طفوله

اما بالنسبه للبحث عن السعاده فانا نقولتش ادور عليها بعينها وسورى انا مش موافقاك ان السعاده بتدور علي ناس وتسيب ناس

في وجهه نظرى الشخصيه ان سعادتى هى نتاج شغلي نتاج اللي بعمله نتاج سلوكى نتاج اى حاجه بعملها بغض النظر عن العالم حوليه بيسعدنى او بيحبطنى صحيح انا جزء م المجتمع بس ليه اللي جوايه في قلبي في نفسي
عارف لما الواحد يكون قريب من ربنا وحاسس ان ربنا راضي عنه اكيد هحس براحه وصفاء فهبقي سعيد

لما انا اعمل حاجه افرح بيها امى او صاحبتى او اى حد معرفهوش هبقي سعيد
مش قصدى اتنطط م الفرح بس علي الاقل هحس لفترة كبيرة بالراحه والهدوء النفسي والتصالح مع نفسي فهبقي سعيد

اما لحته الرضا فانا شايفه ان الرضا دا هوة بجد مفتاح السعاده صدقنى الانسان لو مكنشي راضي عمرة ما هيكون سعيد

جملتين لسه قرياهم من شويه هديه منى ليك عشان تبقي سعيد وانا ابقي سعيدة عشان انت بقيت سعيد
أحيانا كثيرة نري كل الكون من حولنا ظلاماً فنظل نبحث عن السبب
طويلا ولا نجده...لنكتشف في النهايه انه كان خطأنا حينما نسينا أن نفتح أعيننا لتري النور

وبيتين الشعر دول

يا خالقي

ماكــــــنت يوما يائساااااا

رغم الضنى..رغم الأسى

رغم الجـــــــراح الماضيهْ ْ

مادام نــــــــــــورك داخلي

مادام حـــــــــــــبك شاغلي

والنفــــــــــس نفسٌ راضيهْ

سيــــــظل قلـــــــبي باسماً

وتظـــــــــــل روحي دائماً

في درب حبّــــك ماضيهْ


pure blue
...............................................

Amidos said...

mashee ana shayef en feeh se7ah fe kalamak bas bardo el wa7ed dayman feeeh 3andoh mashakel y3nee ana kol yoom fel agazah bab2a fel beet we bashoof so7abee aw a5rog marah fel el esboooo3 leeeh 3lshan maleesh so7ab anteem marah kont ma5nooo2 fa kalemt wa7ed fa2aleee enta ma5noo2 leeeh famrdetsh we la2anee modet esbooo3 keda fa2leee fe eh 2oltel 3ala el moshkelah fa est`3rab ezay ana maleesh sadeeek anteeem atklem ma3ah aw ashoofoh kol so7abee 3andohom training fe sharekat we ba3d el training by5rogo ma3 so7abhom el anteem ama ana fa ma3deesh training wala 3andee so7ab anteeeem we da ana bab2a a3ed fel beet 7ases eneeee morakab we 5ayef we dayman lazem altezem bel awamer 7ata law 3ala 7esab sa3teee we ba2yet el 3ellah a3mameee we keda fa 3elet mama fel qaherah bas mofakakah mafeesh 7ad byb2a 3awez yeshoof el taneee ama 3eleet baba fa fel shar2yah fa benshofhom kol 7een maysarah we ma7desh feeehom byte2nee aweee fa ana lasheee2 ana ba2alee fatrah nefseee amoooot mesh 3aref leeeeeh ana bakteb el kalam dah bas ma5nooo2

WS said...

amidos

مش حتصدق انى بعد ما قريت اللى كتبته كلمت واحد صاحبى اسأله هل هو اللى كتب ده
قال لى لأ
قولت له ده فيه واحد اكنه انت كاتب نفس الكلام اللى انت طول الوقت بتقولهولى
قال لى طب سلام حاروح اقراه
و لما كنا خارجين بالليل و قاعدين فى كوستا جبنا فى سيرتك
و عجبه الكلام اوى اللى انت كاتبه
قال ده فعلا فى ناس زيى حاسه بنفس الاحساس
قولت له ايوه
و كمان اكتشفنا إن بقى كتير اوى الناس اللى بتشتكى انها معندهاش صحاب
و كمان بقى عادى إن الترابط الاسرى مابقاش زى الاول
و الافراد اللى فى عيله واحده ماباقوش يعرفوا بعض و الا بيسألوا على بعض
لدرجه انى قولت لصديقى انه يكتب رد لتعليقك بدالى
و كمان قولت له ليه ما تكلموش و تتعرفوا على بعض
ما ممكن تبقوا صحاب برضو
علشان عندكم نفس المشكله
بس مش عارفين نوصلك ازاى