EgypToz: هــــــــا واى

Wednesday, January 09, 2008

هــــــــا واى

البارح حصل معايا موقف هزنى جدا...كان نفسى اى مسئول عنده ضمير كان يكون معايا فى الموقف ده...كنت راجع بالميكروباص من السيده زينب و عاوز انزل الجامعه...ركبت الميكروباص اللى كان مليان على الاخر و كنت قاعد جنب واحده ست طخينه...المهم كل واحد لم الفلوس علشان يديها للسواق...فسألت الست اللى قاعده جانبى هوه الاجره كام...قالت لى 65 قرش...اديتلها 75 قرش و هى اديتلى 5 قرش...قلتلها مش مهم خلاص قالت لى لأ لازم اخدهم...اخدتهم...و كان راكب معانا فى الصف الاخير بنات راجعين من كلياتهم او مدارسهم مش عارف...و كل واحده كانت بتلم من اللى جنبها الفلوس...كلنا لمينا الفلوس على بعضها و اديناهم للى قاعد ادام اللى اداهم للسواق...بعد شويه لقيت السواق بيقول لنا ناقص ربع جنيه...محدش رد...فى ربع جنيه ناقص يا جدعان...ما حدش رد...راح مفرمل بنرفزه فجأه و موقف الميكروباص و اتدور و بصلنا بغضب...اللى مادفعش الربع ياريت يطلعه...راحت الست الطخينه اللى قاعده جانبى مزعقه فيه...احنا ادنالك الفلوس مظبوطه ياسطى...راح مدور وشه تانى لقدام و باصص لينا فى المرايه و قال انا كده مش حاشتغل...راح واحد من اللى قدام و شكله يخوف قال له طب حات الفلوس تانى...راح مديهمله السواق...و فضلنا نرجع الفلوس بتاعتنا تانى لكل واحد فينا...و جمعنا الفلوس من اول و جديد و اديناهمله...راح شاخط فينا و قايل ناقص ربع جنيه...الرجاله اللى قاعدين ادام محدش نطق و كل واحد عمل نفسه اكنه مش سامع و راحت بنت اموره قاعده ورايه شاخطه فيه ماحدش حايديلك حاجه بعد كده...راح السواق مهددنا و قايل انا كده مضطر انى انزلكم هنا...راحت مجعره فيه الست الطخينه اللى قاعده جانبى...هى ايه...بلطجه...روحت انا مطلع المحفظه بتاعتى و مطلع منها ربع جنيه علشان اديهم للسواق...لقيت اللى فى الميكروباص كلهم بيبصولى بشر و الست اللى جنبى بتمسك ايديه و بتقول لى حطهم يابنى تانى فى محفظتك...قلت لها مش مشكله ربع جنيه عادى يعنى...قالت لى لأ رجعهم تانى محفظتك...ليه تدفع حاجه هوه مالهوش حق فيهم...هوه حرامى و احنا عارفين الحركات بتاعته دى...قولت لها علشان بس ما يحصلش مشاكل...راحت شخطه فيه رجعهم...حطيت الربع جنيه فى المحفظه و بصيت للركاب التانيين اللى كلهم كانوا بيبرئولى باندهاش...قلت لهم ربع جنيه دول يعنى مش حاجه...لما قلت الكلمه دى حسيت انى شتمتهم...كلهم بصولى بحرقه شديده...و واحد منهم بصلى باحتقار...و فجأه البلاستيك اللى على العجله اللى ورا طارت و السواق وقف الميكروباص على جنب علشان ينزل و يجيب الحته اللى اتكسرت...لما نزل السواق و راح يمشى مسافه طويله لورا الركاب فضلوا يقولوا لبعضهم ربنا كبير...شفت يستاهل...يمهل و الا يهمل...شفت ربنا عمل فيه ايه...انا انتهزت الفرصه دى و قولتلهم ممكن تحاسبوا انا عاوز انزل...كلهم قالوا لى ليه بس...ما تزعلش...ما فيش حاجه يا بنى...افتكروا انى خفت من السواق او الموقف...او انى اتضايقت من اللى حصل منهم لما حاولت ادى السواق ربع جنيه...بس الحقيقه انا كنت عاوز انزل الجامعه...و انا كنت فاكر الراجل حايعدى على الجامعه...بس الراجل لقيته خد طريق تانى و رايح الجيزه...و لما نزلت من الميكروباص لقيتهم بيكلموا بعض...اكنى كنت واحد اجنبى راكب معاهم و نزل...و شفت واحده بتضرب كف على كف...اكنها بتقول لى لا حول و الا قوه إلا بالله...شوف الواد دفع 65 قرش و عملنا الهوليله دى كلها عالربع و نزل بعد دقيقتين...ده رمى فلوسه على الارض

فى اللحظه دى اكتشفت انى واد متدلع...و اننا فعلا فى مأساه...و الغريبه اننا لسه عايشين...و الله الشعب ده ابن حلال طيب

6 comments:

gjoe said...

LOOOOOOOOOOOOOOOOL!!

I would have done the same thing. Kont hattala3 el rob3 geneeh 3ashan el mawqef ye3addyy!

WS said...

gjoe...people are khalas 3ala akherhom...haram begad...alnas dol se3bo 3alaya...although I can take a taxi...or even buy a car...but I love being with ordinary people and to feel what they feel

3abra2of said...

mosh 3aref..bas ana shayef en elly 3amaloh el naas dh sa7 w sa7 gedan kaman..el sawa2 mosh 7a2oh el rob3 geneh dh,yeb2a mosh heya5doh y3ny mosh heya5doh...w meen 2alak en elly 7awalek dool maye2darosh yedfa3o 10 geneeh kaman..bas el 7a2 7a2..w ta7ya masr!

WS said...

3abra2of...kalam gameel geddan...weghet nazar bardo...w ta7ya masr besha3b masr

mostafarayan said...

على فكرة انا بعد ماقريت لاقيت اني لو كنت في مكانك كان ممكن اعمل زيك وادفع الربع جنيه علشان ننجز يظهر اني زيك بالظبط واد مدلع

WS said...

mostafarayan
فى ناس الربع ده و الا حاجه...زيى مثلا...يعنى مثلا لو حسبنا بادفع كام ربع فى اليوم فى الهوا حانلاقى كتير...يعنى مثلا انا باشترى كان بيبسى باتنين جنيه اللى كان زمان بجنيه خمسه و سبعين...مع انى ممكن اشترى البيبسى اللى فى زجاجه ازاز كان يبقى ارخصلى...بس مافيش منه دايت...متدلع انا صح...تصوير ورق بتمانين قرش اديله جنيه...مش حاتخانق على عشرين قرش...طب شوف الفجور...باشترى علبه النوتيلا بتسعتاشر جنيه من مترو علشان عندى ادمان للشيكولاته و بخلص العلبه فى اسبوع...العلبه اللى كانت زمان بستاشر و نص و بعدين بقت بسبعتاشر...يعنى بيتى حايتخرب...و اتناشر سن رصاص زيرو بوينت فايف ليرا باتنين جنيه يعنى السن الرفيع الرصاص الواحد ثمنه اكتر من 15 قرش يعنى اكتر من تمن العيش البلدى بتاع زمان...و حاجات تانيه بقه ما تعدش...يعنى فى اكتر من خمسه و عشرين قرشات بتقع كل يوم منى فى الارض فى حاجات بسيطه و تافهه و ممكن الناس البسيطه اوى تدبحنى علشانها...يبقى انا بالنسبه ليهم باتدلع...بس مش متدلع اوى يعنى...يعنى مش معقول بعد السنين دى كلها و بعد ما عجزت اركب و اتبهدل فى مواصلات لغايه الوقتى و ناس تانيه كتير عندها عربيات ...مش عارف...فى لخبطه فى الموضوع...فى لخبطه فى مصر...الدنيا بقت غاليه و مضطر انى اقبل الصدقه اللى باخدها من اهلى علشان اعرف اعيش
لـــحين ميسره