EgypToz: ANHEDONIA

Thursday, January 10, 2008

ANHEDONIA

انا مش عارف اقول ايه
انا حصل لى حاجه غريبه جدا حاحاول اشرحها
بدأ من خمس او ست شهور لما واحده واحده ابتدى يجيلى شعور جديد بإن الدنيا بقت كتير اوى عليه
كتير بمعنى بقت معقده...بقت متشابكه اكتر من اللازم...و بقيت مش عارف انا فين و الا عارف انا بعمل ايه

بقيت مش عارف استمتع بالحاجات اللى انا كنت باستمتع بيها طول عمرى...جالى فتور فى كل شىء...مش قادر اتفرج على فيلم على بعضه...و الا اسمع اغنيه...و الا اقرأ حاجه...و الا اكتب فى البلوج بتاعى حتى...لما باخرج مع صحابى و واحد يقعد يتكلم معايه باسرح و ما بقيتش مركز و الا مهتم فى اللى بيقوله...الاكل حتى بقى كله طعم العدس

طول عمرى كنت باتفرج على البنى ادمين اللى حوليه و همه منغمسين اوى فى الدنيا...منشغلين اوى فى احوالهم و مشاكلهم و مشاغلهم اليوميه



و ده الطبيعى...و انا كنت واحد منهم...كنت زمان باروح الحضانه و بعدين المدرسه و بعدين الجامعه و بعدين اشتغل و كان ليه طموحات و احلام زى كل واحد فينا...و كل مرحله من حياتى كانت ليها الامور اللى تكفى و تخلى الواحد يقعد مشغول بالدنيا بجد...و بالطريقه دى يبقى محصن من اللى حصل لى حاليا

اللى حصل لى جه لما كل الظروف دى اختفت...او لما بقيت فاضى...فى فراغ تام...عاطل ممكن نقول...مش مرتبط بشىء...او بشخص...او بعيله...او باولاد....او باصدقاء...و فعلا مش عارف انا عاوز اعمل ايه و ليه

ممكن اعرف انا باعمل ايه...مش عارف...بالرغم من انى شاب بس حاسس انى عندى سبعين سنه...حاسس انى قربت اموت...حاسس ان حياتى كلها عرفت اختصرها فى كلمتين...حياه و
خلاص



من زمان و انا خايف على نفسى انى اتجنن...يحصل لى اختلال عقلى من كتر التفكير فى حاجات كتيره...من كتر الفلسفه و التحليل فى اشياء عديده...من كتر انغماسى فى امور صعبه المفروض مافكرش فيها

البلوج بصراحه ساعدنى انى اطلع جزء بسيط من مخزون داخلى جوايه...خفف عنى حمل كان جوه عقلى من زمان...بس عارف لما الواحد يكون عاوز يتكلم عن حاجات كتير و مش عارف...اول لما الحاجات بقت كتير اوى و الناس بقت كتير اوى و الكلام بقى كتير اوى...انا جالى اختناق...او بالظبط اكن الدنيا عباره عن صوت رفيع مزعج عمال يرن فى ودنى تييت

طب الكلام بقوله ليه...بلاش ليه...بقوله لمين...كنت بقول له لنفسى...طب ما انا عارف اللى عاوز اقول له اقول له لنفسى تانى ليه

عندى صديق عزيز اسمه ميكو...كنت انا و ميكو ما نشوفش بعض لفترات طويله و بعدين نقعد مع بعض فى النادى او فى اى حته و نقعد ندردش مع بعض...نتكلم فى امور مختلفه فى الحياه...بالرغم من انى انا و ميكو مختلفين عن بعض فى حاجات كبيره اوى...و اكبر اختلاف إن ميكو انسان طبيعى...انسان عادى...و انا باحسده انه عادى...ما شاء الله ما وصلش للحاله اللى انا فيها دى...لإنه بيفكر و بيتفكر بحدود...و بعدها يرجع لطبيعه الحياه

اما انا...فأنا عندى شغف شديد بمعرفه فلسفه الحياه و انا عايش ليه و علشان ايه و باحفر عميق اوى لتحت لغايه لما وصلت للى انا فيه دالوقتى...و حياتى بقت فيلم هندى

داوشه...دى الكلمه اللى انا عاوز اوصف بيها حالى...ممكن اكون فعلا خرفت و انا مش عارف...هوه فيه ايه

فى اوقات بابكى من غير سبب

ساعات باحلم انى عاوز اقفل عليه الاوضه و اقعد اصلى و اقرأ قرآن لغايه ماموت علشان ما احسش بطول السنين اللى الواحد ممكن لسه يعيشها...نفسى اعيش بقى الحياه الحقيقيه اللى فى الآخره

ما تتخيلش كان قد ايه صعب عليه اكتب الكلمتين الفارغين التافهين اللى فوق دول و انشرهم على البلوج من كتر الملل اللى انا فيه

زهقت من الحياه...انا مش مكتئب و الا مبسوط...انا بس زهقت...تعبت...ما الكلام اللى بانقوله بانعيده و نزيده...و الايام بتعدى و ناس بتموت و ناس بتتولد...و بعدين



الحمد لله على كل شىء

ادعوا لى

14 comments:

gjoe said...

Emptiness. This is the only thing you need for your mind to drive you crazy. You don't have something specifically to think about, so naturally your mind starts to think about everything at once!
Right after graduation, I went through the same exact phase. My mind thoughts were driven towards 2 things: Fear and the worthlessness of my life. I feared anything concerning the future. My mind was actually making up scenarios and I would eventually be terrified that it would happen. I had the same notion of wanting to lock myself up, or to die as soon as possible so that I don't have to go through life. I felt that I would never be as good as I want. I felt paralyzed, or trapped in this life. I couldn't enjoy people's company. I cried when watching anything sad on TV, just because I imagined that it would happen to me. I even got an offer from a multinational company and instead of siezing the opportunity, I thought "what would happen if I wasn't accepted". And sure enough, i blew the opportunity!

Bottom-line: My father told me that I am searching for reasons to be sad and that if I continued like this, I would be leading A miserable life

The Cure? Fortunately there is one. I recommend that you read لا تحزن
A best-seller book written for almost anyone. Its a thick book but all you have to do is to read a couple of pages to feel much better. I remember exactly how I felt when I read this book. I felt so energetic I actually stood up in the middle of the reading wanting to do something!
The next day, I was out all day in the streets, just to enjoy "nature"!!
It got me really enthusiastic and until now, I recommend it to anyone feeling down, depressed or the worthlessness of his life.

I am a much more energetic, optimistic person right now. I have a descent job el7amdolellah, I have more faith and I try to set an example for people around me.

I am terribly sorry for the long comment. But I related so much to this post. It was like reading my own thoughts I once had.
I hope you get over this phase really soon. I also recommend that you try to read ال عمران .

محمود عزت said...

مش حتصدق يا ولد شاب
نفس شعوري
نفس الكلمة بتاعت العنوان دي أنا كنت بستخدمها الفترة الللي فاتت و أنا بوصف إحساسي تجاه كل شئ بعد الفراغ اللي إنفجر فجأة قدامي
مش عارف
معنديش نصايح قد ما أنا نفسي أقعد مع نفسي أفكر بشكل حقيقي
أنا موجود ليه في الدنيا دي
أنا عايز أعمل إيه ؟

Anonymous said...

You have depression, by medical definition: It the presence of sleep and appetite disturbance, psychomotor retardation, sense of guilt, sense of worthlessness and suicidal ideation for more than 2 weeks.... this is depression.

ma2tshren said...

عارف عادى انك تحس كده بس المش عادى انك تخالى الاحساس دة يسيطر عليك على فكرة اى مكنت اى مكان تخصص اى مكان عمرك اكيد في ناس كتير عايزينك حوليك موجودين بس انت مش شايفهم بص حوليك هتلاقي السعاده والاحساس بااهمية الحياة يارب تكون فهمتنى

Anonymous said...

أقل حاجه ممكن أوصف بيها البلوج دي ان صاحبها انسان عبقري .. بغض النظر عن استخدام بعض الألفاظ في المواضيع .. لكن هو فعلاً عبقري .. انا طول عمري بدون لكن في حاجات مبعرفش اقولها زي ما صاحب البلوج دي بيعمل !

للأسف مش هقدر اقولك اسمي ولا عنوان مدوني .. لكن اكتفي بإني اقولك انك عبقري !

Mazen Mason said...

Hey Buddy...

Whatever happened to Sigur Ros and Chris Mccandless? You are the master of your own life...you have the power to change. Just know that.

Also keep in mind that faking a smile does work...fake as many as possible. It's magical and best of all effortless.

You're still young man...

Mazen Mason said...

Hey Buddy...

Whatever happened to Sigur Ros and Chris Mccandless? You are the master of your own life...you have the power to change. Just know that.

Also keep in mind that faking a smile does work...fake as many as possible. It's magical and best of all effortless.

You're still young man...

مــهــا said...

أصبت !!!!
يمكن ربنا خلاك تكتب البوست ده علشان ماتكتبش نفسك لوحدك ..أنت بتكتب ملايين معاك ..و تريحهم من الكبت .!
.....
باعترض كتير على بوستات هنا ..
لكن مابامنعش نفسى إنى آجى أزورك كل شوية ..
و البوست ده حسيته ..طلقة مش عارفة هاتودينى على فين .؟؟
تقريبا زى كل مرة ..هافضل فى مكانى
!!!

..

مــهــا said...

أصبت !!!!
يمكن ربنا خلاك تكتب البوست ده علشان ماتكتبش نفسك لوحدك ..أنت بتكتب ملايين معاك ..و تريحهم من الكبت .!
.....
باعترض كتير على بوستات هنا ..
لكن مابامنعش نفسى إنى آجى أزورك كل شوية ..
و البوست ده حسيته ..طلقة مش عارفة هاتودينى على فين .؟؟
تقريبا زى كل مرة ..هافضل فى مكانى
!!!

..

Anonymous said...

عايزه اقولك ان مش انت لوحدك بتحس بكده اكتئاب ويائس وان بكره زي انبارح زي اي يوم هيجي بعد سنه زمان كنت بتخيل نفسي بعد سنه هكون فين او بعمل ايه دلوقتي بطلت لاني لقيت السنه بتجري وانا زي مانا لا تغير وساعات بحس اني اتغير للاسوء انا مش بهزر انت مش لوحدك بفكر كتير ازاي اطلع من الحاله دي اعمل حاجه بحبها وفعلا ببدا بس بعد فتره بحس انه ملوش لزمه نفسي الدنيا يكون ليها طعم ولون علشان اعيشها وابطل يائس حتي شغلي ال كنت بحبه بقا عادي وبقول ساعات قلته احسن بس انا معنديش الجراءه اني اسيبه واوجه الفضا الشنيع لامي ساعتها مش عرفه هعمل ايه ياريت لو عندك حل جزري او اي حد يقوله يمكن يكون حياتنا يبقا فيها طعم
شكرا

Rain_Drops said...

حاول إنك تجعل لنفسك هدف تعيش من أجله في الحياة ، ممكن مثلا تجعل من مساعدة الناس هدف لحياتك مرة قريت الجملة دي في كتاب و أعجبتني لما تأملت فيها

عندما نعيش لذواتنا فقط، تبدو لنا الحياة قصيرة ضئيلة ، تبدأ من حيث بدأنا ، وتنتهي بانتهاء عمرنا المحدود ! … أما عندما نعيش لغيرنا ، أي عندما نعيش لفكرة ، فإن الحياة تبدو طويلة عميقة ، تبدأ من حيث بدأت الإنسانية ، وتمتد بعد مفارقتنا لوجه هذه الأرض ! …

Wild at Heart said...

ايه ده بقى ده بقى ده
يعنى ايه "The End
ماينفعش
ماينفعش خالص
ماينفعش آجى افتح المدونة كل شوية من هنا ورايح ألاقى الكلمة دي في وشي
اوعى تكون ناويها
اوعى

ٍSOU said...

مين قال ان دول كلمتين تافهين؟؟
دول اقل كلمتين ممكن يوصفونا كشباب و خاصة بعد التخرج...تحس انك زير فاضى من جوا مليان هوا ..نفسك تملا الفراغ اللى فى الزير دة بس مش عارف..تلاقى نفسك توهت فى متاهة و بتلف فى دايرة ..بتلف على اية انت نفسك بردوا مش عارف..لدرجة انك من كتر الفارغ ممكن تكون نسيت احلامك زمان كانت عبارة عن اية و يمكن مابقتش عايز تحققها خلاص ..اصلها مابقتش فارقة...بس مرة قلت لواحدة الكلام دة قالت لى دى تهيؤات م الفراغ الو لما تلاقى الخطوة بتاعتك كل شيئ هايتغير و اعتقد انها صح

Anonymous said...

سيبك من الكلاشيهات الي فقدت معناها من كثر التكرار , ذي خللي لحياتك هدف , وان الي جاي احلي , كان فيه زرار تدوس عليه تلاقي بقي لحياتك هدف وتلاقيها بتدوب في البق ذي البنبوني... ده غير
طبعا نظرة المجتمع للمكتئب علي انه مجنون , ويبقي طبعا السؤال الابدي مالك فيه حاجة ؟؟؟ مفيش !! لا اكيد فيه حاجة تعباك ... منا يا ذكي لو اعرفها كنت قتلتها مش حلتها و بس .....
انت لسه في مرحلة اولي لسه ان شاء الله الارق بقي وده اسوء صديق انا تقريبا مبقتش انام ... الاول كنت بلاقي متعتي في الشغل دلوقتي توووووووووووت
نصيحتي ليك و متقولش عليا مجنون سجارة حشيش في البلكونة و تقعد تقلب في الدش جرب وحتدعيلي هههههههههههه