EgypToz: مطلوب عريس - فورا أو حالا أو دالوقتى

Friday, December 28, 2007

مطلوب عريس - فورا أو حالا أو دالوقتى

التجربه دى يمكن تكون نادره شويه فى مصر بس انا حبيت انى اجرب من خلال المدونه انى اتواصل مع نصفى الآخر ، و مش عيب ان الواحده تأخذ بالاسباب و فى نفس الوقت تجتهد انها تلاقى رفيق الحياه من خلال الانترنت ، و بما انى عندى مدونه ليه ما استخدمهاش كوسيله للتعارف و خاصه إن المدونين أو اللى بيقروا المدونات معظمهم مثقفين و متفتحين و كمان انا اعرف مدونين كبلز اتعرفوا على بعض من خلال المدونات و اتجوزوا دالوقتى بنجاح... و بعدين اهى تجربه ، مين عارف يمكن تنفع ، و الله الموفق

مطلوب فقط انسان بسيط متعلم بيعرف دينه الاسلامى كويس و ذو اخلاق حميده و يكون من اسره كريمه و يكون شكله مقبول و الا يزيد عمره عن تمانيه و عشرين و شكرا

و على من يرغب فى الالتقاء و التعارف ارسال 3 صور حديثه و السى فى بتاعه و صوره من البطاقه على الايميل اللى مكتوب على الناحيه اليمين فى صفحه المدونه و شكرا

سوف يتم ارسال ايميل للعريس المختار مع ميعاد و عنوان مكان اللقاء و شكرا
لى الحق فى عدم قبول اى عريس من العرسان المتقدمين للزواج بدون ابداء الاسباب لعدم الاحراج و شكرا

اهم حاجه عندى انه يكون ملتزم دينيا و على الاقل يكون حافظ عشر اجزاء من القرآن الكريم و شكرا

كنت حانسى...ياريت يكون مش تخين و ما يكونش عنده شنب و الا كرش و الا اقرع و ما بيلبسش نضاره و تكون عينيه يا اخضر يا ازرق و ما بيشربش سجاير و شكرا

و فرصه اختيار عريس الحظ سوف تزيد اذا كان رجل اعمال مهندس أو رجل اعمال دكتور أو رجل اعمال دبلوماسى

آه و حاجه كمان...يا ريت يكون عنده شقه لا تقل مساحتها عن 300 متر مربع و يكون فى منطقه المهندسين و الدقى حيث اننى من مشتركى نادى الصيد و شكرا

يااه كنت حانسى حاجه مهمه جدا...يا ريت يعنى يكون مرتبه فى الشهر لا يقل عن 4000 جنيه علشان انا لا مواخذه مش ناقصه بهدله و شكرا

بس...و ياريت يكون جنتل و حنون و طيب و ما بيزعقش و الا بيتنرفز و الا بيشتم و الا بيضرب و من مؤيدى حركه تحرير المرأه و شكرا

و يستحسن انه يكون مثقف جدا و من عشاق نصير شمه و صنع الله ابراهيم و من محبى افلام جورج كلونى و يكون قرأ ذا الكاميست اربع مرات و شكرا

و حتكون ميزه لو عنده نزعه انسانيه و اسهامات فى قضايا المنطقه كالقضيه الفلسطينيه و دارفور و زوبان الجليد فى القطب الشمالى و شكرا

و اخر حاجه انه يكون مش بخيل و المقدم ما يقلش عن 100 الف جنيه و المؤخر ما يقلش عن 500 الف جنيه و الشبكه ما تقلش عن 50 الف جنيه و يشيل تكاليف الفرح و الخطوبه و شكرا

و ايه كمان...هممم...يبقى جميل اوى لو الوالده تكون مش موجوده فى مصر او فى الحياه...و شكرا

و يا ريت بس اخر حاجه علشان نبقى متفقين من الاول ان شهر العسل يجب ان يكون فى منطقه خارج الحدود المصريه و الا يكون فى دوله عربيه أو اسلاميه و شكرا

و يبقى كويس برضه لو بيحب الحيوانات و خاصه القطط علشان انا عندى 2 قطه و ما اقدرش اعيش من غيرهم و شكرا

شفت كنت حانسى...اهم اهم حاجه يكون عنده عربيه بتكيف من انتاج سنه 2000 أو فما فوق و شكرا

اللى يحب يعرف اكتر عن شخصيتى ممكن يتعرف عليها من خلال مدونتى و شكر
ا
و اخيرا احب اقول ان اهم حاجه بالنسبه لى فى شريك الحياة انه يكون بيعرف يطبخ حاجات تانيه غير البيض و شكرا

8 comments:

Wild at Heart said...

دمك خفيف بس إحنا والله مش كلنا مفتريين كده :)

3abra2of said...

حقيقى حقيقي...انت ضحكتنى...شكرا

mostafarayan said...

والله بجد انت ضحكتيني وانا ماكانش ليا نفس
بس يعني لماالأخ هيعمل كل دة
سيادتك يعني هتديله ايه في مقابل كل الحاجات دي اللي حضرتك طالبها

economic said...

انا عكس الصفات اللي قلتيها كلها وبرضة مش راضي بيكي

مصطفى نجم مصر said...

ههههههههههههههههههههه انا عيز اشتغل مش اجوز اشتغل اولال وبعد كدة افكر فى الجواز بقئ وبقئ مدمين قدير وبقئ اشهر وحد شغال فى الوطن الغربى وسيتى قطقطة تيتفشخر بية فشحير بقئ وبقى مدمين قدير هوبا هوبا هوبا ههههههههههههههههههههههههههه

Anonymous said...

بصراحة كنت هكتب كلمة مش كويسة بس ربنا ستر ـ الحمد لله ـ تعرفي ان ده نكته سخيفة جدا يا تري انت شكلك ايه ؟؟؟؟

Anonymous said...

شكلى زباله

Anonymous said...

هههههههههههه امفكرة الجواز هيك بسولة طيب ابل ما تحكي انك بدك واحد حلو لازم اتكون حلو بعدين هلا ايام كل الحلوين عندهم حبايب