EgypToz: و على فكره ده مسيحى

Monday, November 05, 2007

و على فكره ده مسيحى

فى واحد مسيحى صاحبى امير اوى...و اسمه الحقيقى امير...امير ده انسان مش عارف اوصفه ازاى...عمرى ما شوفت واحد طيب قد امير...وشه كده بينور لما بيضحك من كتر النقاء اللى هوه فيه...بيخاف من ربنا جدا...يعنى مره بقول له يمضي بدالى الحضور فى المحاضره فرفض...فسألته ليه...قال لى علشان ده غلط و حرام و بيخاف من ربنا...بصراحه انا لحظتها ضحكت...قولت هوه فى مين فى الزمن ده بيقول انه مش حايعمل غلطه صغيره زى دى علشان هى حرام...و مره فى الامتحانات قولت له انه يغششنى...فرفض...برضه علشان حرام...يا ابنى ده كلنا بنغش عادى يعنى...بس هوه ما بيغشش... و كمان هوه ما بيكذبش...بيقول دايما الحقيقه...بصراحه برضه دى حاجه غريبه جدا علشان مين فينا فى الزمن بتاعنا ده ما بيكدبش...ده و احنا بنتكلم طول النهار بين كل تلات كلمات فى كلمه فيهم كدب...كدبه بيضا يعنى...انا باعترف انى بكدب...و باكدب كتير كمان...مش عارف ما باقيتش باحس ان ده حرام خالص...بالرغم ان الاسلام بيحرم علينا الكدب و الغش و السرقه و النفاق و و و ...بس احنا بنعديها... يا اخى كبر...اصل بقى عادى ان الواحد يكدب...اصل الواحد لو ما كدبش مش حايعرف يعيش فى الوطن ده

المهم امير النهارده اتصل بيه فى البيت علشان يسألنى عن احوالى...احاولى ايه يا مان...هوه فيه فى الدنيا دى لسه بنى مش حيواناتيين بيسألوا عن احوال حد...امير بيسألنى عن اخبارى...بيسأل عن حياتى عامله ايه...و لو أنا كنت محتاج اى حاجه او مساعده...و بس...يعنى ما فيش مصلحه و لا حاجه...انا بصراحه ما صدقتش نفسى...ايه الطيبه و الوفاء ده...انا فى حلم و الا ايه...لدرجه بعد ما خلصت التليفون جريت جرى للسايبر كافيه و قولت لازم اكتب عن امير ده

الانسان ده دايما بيبتسم ادامى...دايما بيخفف عليه المى و حزنى...دايما واقف جانبى...و الله اكتر من الاخ...بسيط إلى اقصى الحدود...متواضع اوى...بيحب الناس كلها...عمره ما كلمنى عن دينه...بس بيقول لى انه بيدعيلى لما بيدعى للرب

فى حاجه لاحظتها فى حياتى...ان اكتر صحابى من المسيحيين...مش عارف ليه...همه بيرتاحولى و انا برتاحلهم...باحس ان فيهم هدوء غريب...سكينه كده...فيهم حب عمل الخير و مساعده بعضهم البعض...يمكن علشان همه اقليه...جايز...عرفت الوقتى ليه والدى شغل واحد مسيحى كرئيس حسابات للشركه...علشان قال لى انه عمره ما بيسرق...مجتهد فى شغله و بيخاف من ربنا...انا النضاره بتاعتى لما روحت اشتريها...اشتريتها من بياع ادهالى بالتمن الحقيقى بتاعها...و قال لى كمان هوه بيكسب فيها قد ايه...امين يعنى...و لما اتكسرت صلحهالى بامانه برضو...عرفت بعد كده انه مسيحى...و خالتى عندها شغاله مسيحيه ما شافتش ائمن و احسن منها...بقالها عندها سنين و سنين و بتخدمها بكل اخلاص و حب

خدمه لايف ما كانتش عاوزه تشتغل عندى...فروحت لخدمه العملاء بتاع فودافون...و قعدت مستنى دورى ساعه علشان يجى...و لما جه شرحت للراجل المشكله اللى عندى...اخد الموبايل و فضل يجرب حاجات...و يتصل بناس...و يحاول يحل المشكله عن طريق الكمبيوتر...بس و هو بيعمل كل ده فضل يسألنى عن احوالى...و لو انا تعبان انى ممكن اقعد استريح لغايه ما يخلص ... و لقانى زهقان فضل يتكلم معايه... و عمر الابتسامه ما مشيت من وشه... و خلال الساعه و النص اللى فضلت واقف فيه معاه نحاول نحل مشكله السيرفس... كنت ببص على العاملين التانيين اللى بيشتغلوا جنبه...كان فى واحده جالها عميل زحلقته...جالها عميل تانى فضلت تتريق عليه بعد ما مشى... جالها عميل يطلب لو معاها فكه قالت له لأ بشخت و وش عكر... و العامل التانى اللى واقف جانبه الناحيه التانيه بيعامل العملاء كأنهم بضاعه فى مصنع... بيعاملهم بمنتهى البرود و الروتينيه... اما الراجل اللى كان مسئول عن خدمتى فكان بشوش و بيعاملنى بمنتهى الاحترام...انا كنت خلاص حاصدق انى فعلا مش حيوان كلب... بالرغم ان بعد الساعه و النص زائد الساعه اللى كنت مستنى فيها دورى...المشكله اللى كانت فى السيرفس اللى على موبايلى ما اتصلحتش...و انه طلب من الشركه انهم يعملولى ست اب للبروفايل بتاعى من اول و جديد... و بالرغم من انه فضل يقول لى انه اسف جدا انه ما عرفش يفرحنى النهارده...و انه زعلان انه ماعرفش يحل المشكله...إلا انى كنت فرحان...سعيد...مبسوط جدا من المعامله الادميه دى...حاسيت ان فيه لسه بنى ادمين عايشين على الارض...كل الغضب و الحزن اللى كانوا فيه بسبب المشكله اللى فى موبايلى راحت بس من المعامله اللى اتعاملت بيها من راجل ماعرفوش و عمرى ما حاشوفه بعد كده فى مركز خدمه للعملاء...بصيت على الكارت اللى متعلق على قميصه...لقيت مكتوب عليه ماجد جورج...و ما صدقتش انه يكلمنى على الموبايل الساعه اتناشر بالليل يقول لى انه لسه مخلص شغل الوقتى و انه اسف انه ماعرفش يحل المشكله و اكد لى انه كلم المسئولين انهم يستعجلوا شويه فى فحص حالتى
و اتكلم بعدها باسبوع علشان يطمن ان الخدمه دخلت عندى فى الموبايل
ايه ده...ايه ده...هو فى لسه ناس كده فى البلاد دى

تعاله نقول ان الواد امير ده اللى اتكلمت عليه فى الاول بيلعب بعقلك يا خويه...و بيأثر عليك وشويش وشويش لغايه ما الطوبه تقع فى المعطوبه...و انت اهبل و مبسوط بيه...اخرتك حاتبقى سوده و منيله بستين نيله...لإنك

ايه قول...لإنك ايه...ما تقول...عارف حاتقول ايه...لأ ماتخافش...و علشان كده انا نفسى اتكلم عن الموضوع ده لإنه منرفزنى بسبب التفكير العقيم ده اللى لسه مش عاوز يغور فى سبعين داهيه

يمكن الخير و المحبه و الامانه و الصدق و الاخلاص و بقيت الحاجات الكويسه اللى ما بقيتش موجوده على الطبيعه باينه و واضحه شويه عند المسيحيين علشان همه قليلين...و مش واضحه اوى بين المسلمين علشان همه كتار...اكيد طبعا فى فى المسلمين ناس كويسه جدا

بس المعامله الكويسه...السلام النفسى...الروحانيات الجميله بقت قدامى صفه من صفات المسيحيين...المسيحيين المصريين...اللى بنقول عليهم اقباط...ولما الواحد يقول صفه عامه يبقى معناها الصفه الغالبه فى الفئه من الناس دى...او بمعنى اخر الانطباع العام اللى الواحد بياخده من مجموعه من الناس فى مجتمع معين...و ده لا يعنى باى حال من الاحوال إن الكلام بينطبق على الكل و لكن بينطبق على الاكثريه فقط... يعنى مثلا الناس اللى من جنوب الصعيد يقولوا عليهم انهم حاميين حبتين...الانجليز مثلا يقولوا عليهم يخنقوا حبتين...الالمان يقولوا عليهم رخمين حبتين...اليهود يقولوا عليهم غدارين حبتين...احنا بقه المصريين المفروض معظمنا مسلمين... و كنا زمان يقولوا علينا قمه فى الطيبه...قمه فى الموده...قمه فى الاخوه و المحبه...و يا على الجار المصرى...و يا على الاخ المسلم...فين ده الوقتى

بس بالرغم ان ما فيش اى شىء حساس بين المسلمين و الاقباط...الا ان لغايه النهارده فى حاجه كده بتفصل المسلمين عن المسيحيين من غير سبب...كتير اوى اسمع الجمله دى : على فكره ده مسيحى...انت عارف انه مسيحى...خد بالك ده مسيحى...فى وسط اى مناقشه مع حد عن حد تانى مسيحى...اكن الواحد المسيحى ده عيب...خطر...كخه...حاجه المفروض اخد بالى منها فى المستقبل و اعرفها كويس

وفى فعلا ناس بتحب تشوشر على المواضيع دى و تشعللها...و من الطرفين...و من الداخل و من الخارج...بس مالناش دعوه بيهم...دول ناس معقده و متطرفه و مش لاقيين حاجه فى الدنيا يعملوها غير الشغلانات دى

ليه ناس كتير بتفتكر ان المسيحى ده عاوز يخلى المسلم اللى جنبه يبقى مسيحى زيه
و ليه فى مسيحيين بيفتكروا ان المسلم عاوز يخطف مسيحيين علشان يخليهم مسلميين...اصل من قله عدد المسلمين يعنى...و كل ما حد يتكلم عن مسيحيين و مسلمين يروحوا جريين جرى و يقولوا ده انت بتعمل بلبله و بتبل الارض و لما الارض تبقى مبلوله ممكن الناس كلها تتزحلق و تقع...و يوقفوا رجل دين مسيحى جنب رجل دين مسلم و يخليهم يسلموا على بعض و يبوسوا بعض و يحضنوا فى بعض ادام عشرات الكاميرات و فى التفاهازيون...و مش مشكله لما نصوم يوم مش فى رمضان علشان نعمل فطار نعزم فيه مسيحيين علشان نورى ازاى بناكل عيش و ملح مع بعض


يا جماعه...مش محتاجين كل ده...اكتريتنا فعلا بتعيش مع الاقباط دول فى ود و سلام...بس بيفضل كده فى حاجه جوه كده تريد مارك فى كتير من قلوبنا تجاه الاقباط...و ده طبيعى و صحى و حاجه مش عيب او لازم نموت نفسينا علشان ما نظهرهاش للجمهور...او نظهر بمظهر اوفر و زائد عن الحد علشان نثبت العكس

جدتى مثلا كانت بتكره المسيحيين ...تقول شوف القبطى ده عفريته عمل ايه... و تقول انها بتعرف تتعرف عليهم من بعيد بالذات اللى من طبقه متوسطه او فقيره...اصل زى ما بتقول ليهم لبس كده مميز بالذات الشتوى اللى الوانه بتكون باهته زى بتاعت السبعينيات و بشرتهم غير بشره المسلميين و شعرهم غريب و بيلمع كده و فيهم رائحه مميزه كده...و واحد صاحبى مسلم يقول لى النصارى دول عاملين نفسهم مضطهدين و بيتلككوا و عاوزين حقوقهم...خد بالك...ياي...تانى كده...اخد بالى من ايه يا صاحبى...الموضوع ده ما يهمنيش اساسا

انا مالى بالناس دول..انا على ارض الواقع و بتعامل مع مسيحيين بكل احترام...و واحده تقول لى ده رجل الاعمال ده قبطى و بيشغل الاقباط عنده فى الشركه... و تلاقى اى قبطى لو لقى جروب قبطى يروح لازق فيه زى المغناطيس...و بيتعالجوا عند دكاتره اقباط...و بيروحوا عند محامين اقباط...و بيشتروا من بقال قبطى...اخيييييى ...كوخه كوخه غلط...و راجل يقول لى انا لو ادامى قبطى متميز و متفوق و مسلم نص نص و فاشل...و لازم اعين واحد فى المكتب من الاتنين اعين المسلم طبعا... قبطى ايه يا راجل...هوه انا ناقص اقباط...اقول له السلام عليكم و رحمه الله يقول لى سعيده

مش عارف ليه ما باحسش بالموده و الاخوه الحقيقه زى عند صاحبى امير ده فى واحد زيه مسلم طبيعى...لأ فى طبعا عزيزى ميكو علشان مايزعلش... و شويه مسلمين كده تانيين...وغير طبعا مع حبايبى الاخوان لما اكون مطول دقنى و مقصر البنطلون...اى حد اخوانى او من اللى بيطلق على نفسه ملتزم دينيا بلاقيه يسلم عليه بالاحضان و يبربش بعينيه و يطبطب على ضهرى و هوه بيقول لى بصوت رفيع يكاد يسمع... بلاش احسن اقول بيقول ايه

باحس ان المسيحيين دول متربيين بجد...متربيين على الاخلاق الطيبه و السماحه و الاخاء...و هو عارف انه لازم يجتهد فى دراسته و شغله لانه عمره ما حايلمع و الا حاينجح و لا حايمشى فى البلد دى الا لو اثبت نفسه فى المجتمع ده اللى اكتره مسلمين

انا غيور جدا على الاسلام...امير خلانى احلم ابقى اطيب منه...ابقى عندى سماحه اكبر منه...ابقى عندى اخلاق طيبه اكتر منه...نفسى المسلمين يرجعوا مسلمين بجد زى زمان...مش بس علشان احنا كتير و حسينا بالامان و الاستقرار فى البلد دى نعيش بالنظام الاونطه ده بيننا... هوه احنا يعنى كان لازم نبقى اقليه علشان نبتدى نخاف على بعض و نحب بعض و نساعد بعض...نفسى يا رب الاكتريه المسلمه يبقى التعامل بينها هوه الاسلام الحقيقى...الاسلام المعامله...نفسى المسلمين يهدوا شويه و يبقى عندهم سكينه و سلام مع النفس زى ما المفروض إن يكون فيهم...مش عصبيه و زعيق و صوت عالى و نرفزه و شخط و كدب و فهلوه و و و...نفسى ابقى فخور انى تبع المجتمع المسلم ده...لإنى فخور جدا انى مسلم

و اكيد الاقباط دول برضو عندهم اللى وحش و اللى بيكدب و اللى بيسرق كمان...طبعا يعنى...كل مجتمع فيه الوحش و اللى كويس

و اكيد المسلمين فيهم الخيرين و الكويسين و الممتاز و كل الحاجات الحلوه اللى ممكن الواحد يلاقيها فى بشر...بس نفسى اشوفها و احسها...تبقى حاجه ملموسه يعنى...تبقى صفه لازقه فى المسلمين انهم الناس اللى ما بيسرقوش...الناس الطيبين اللى ما بيكذبوش...الناس الخيرين اللى بيساعدوك فى اى مشكله...الناس الهاديين الصافيين اللى اول ما تعاشرهم و تعرفهم لازم تحبهم و تقدرهم و تحترمهم...زى المسلمين اللى عايشين فى المدينه المنوره كده

نفسى الاخلاق الجميله بتاعت الاسلام تبرق كده و تنور على السطح بتاع المجتمع بتاعنا اللى اكتره مسلمين...لإن الاسلام دين جميل كله الحب و الاخاء بين البشر...حتى تجاه اللى مش مسلمين...ده احنا الاكتريه يا جماعه...علشان لما اتعامل باخلاق الاسلام الطيبه دى مع اخويه المسلم احس بالنتيجه عالطول و رد الفعل منه و يبقى فى تواصل و تعامل فى الخير و المحبه مش زى كل مره ما باخد على قفايه و اقول حسبى الله و نعم الوكيل...مش مهم بقه الاجر الى فى الدنيا و كفايه الاجر و الثواب اللى فى الاخره

شوف الناس بتفكر ازاى...واحد يقوم قايلك ده تلاقيه واحد قبطى خبيث عامل نفسه قال ايه مسلم و بيتكلم على الاقباط

و نلف و ندور فى دائره مفرغه و الاقى نفسى مجبر انى اعيد و ازيد فى الكلام زى الكلام اللى جاى ده دالوقتى اللى هوه

انا بحمد ربنا كل يوم انى الحمد لله طلعت مسلم مؤمن و دينى الاسلام... بس باحس ان المجتمع المسلم اللى انا عايش فى ده اكتره ما بيدلش على انهم مسلمين غير انهم بيصلوا و بيصوموا فى رمضان...انا بقول تانى انى بتكلم على البعض و مش على الكل لإن فى فعلا مسلمين باتشرف انى اعرفهم و كويسين جدا...و بعدين انا بتكلم عن المسلمين فى البلد دى مش المسلمين فى اى حته تانيه

بادعى للرحمن انه يخلى المسلمين مسلمين بجد و فعليا مش ناس عايشه طول حياتها شايله خانه الديانه مسلم على البطاقه و الدنيا صعبه بقى و الاحوال مش و لا بد و ما باليد حيله و ربنا اسمه الغفور الرحيم

و فى الاخر بقه يجى حد و يقول لى انت كده بتحب المسيحيين يبقى همه لعبوا بعقلك...و شكلك عاوز تبقى زيهم... زى الواد محمد ابو صليبه

اهو هوه ده بالظبط الهبل و التعصب اللى بتكلم عنه...ما حدش فاهم اللى انا قصدى عليه...انا تعبت...بص...انا و الا بحبهم و الا بكرهم...انا بس مستغرب و خلاص

7 comments:

Lasto-adri *Blue* said...

انا فهماك وكويس قوى
وكنت لسا بقول لوالدى ووالدتى نفس الكلام لما مأخرا قابلت ولد بجد ونعمة الأخلاق
وفخورة انى اتعرفت على شخصية زيه

karakib said...

كلامك حلو اوي و نظرتك للأخر بكل هذا القبول فعلا حلوه

على باب الله said...

كلامك حلو اوي و نظرتك للأخر بكل هذا القبول فعلا حلوه

كلام سليم

falas6eenye said...

ana mo3jabe be mwadee3ak kteer

totaaaa said...

دى لازم فعلا الروح اللى تكون موجودة بينا مش معنى ان فى حد مسيحى انه خلاص نحكم عليه انه انسان مش كويس لان دى عمرها ماكانت حقيقة ولا الاسلام امرنا بكده ولا الرسول انا برده ليا جارتنا مسيحية وست طيبة جدا ودايما هى اللى بتبادر بالسؤال علينا
وكلامك جميل وياريت المسلمين فى مصر وفى كل مكان على الارض يرجعوا لتعاليم دينهم ويلتزموا بيها بجد عشان نكون احسن ناس فى العالم زى ماكنا طول عمرنا
تقبل تحياتى

mostafarayan said...

بص يا اخي اناعايز اقولك حاجة انا معاك المفروض نبق مسلمين بجد مش مسلمين بطاقة وبس احنا فعلا لو التزمنا بالإسلام في سلوكنا هيكون اكبر دعو للإسلام
معاك بردة ان في مسحين مش كويسين انا الراجل اللي اشتريت من عنده السراميك كان مسيحي واداني حاجات غير اللي اتفقت عليها
بس المشكلة ان في ناس من الطرفين بيحاولوا يكرهو الناس في بعض
في مسحين كتيردلوقتي تحس انهم متحفزين للمسلمين وبقيت تسمع عن اهمية زيادة عدد المسحين علشان النسبة السكاني
و وكدة
فياريت لو نرجع زي زمان مصريين بجد كلنا بنحب بعض
وياريت لوتشرفني بزيارة مدونتي
(ابداعات شاب ثائر )

scorpion said...

انا بصراحة معجب بيك جدا