EgypToz: فى عشق طرقعه صباع رجلى الكبير

Saturday, November 03, 2007

فى عشق طرقعه صباع رجلى الكبير

مش لاقى شغلانه و لا مشغله تسلى بيها عيشتك الهباب و تسترزق منها لقمه عيشك
روح اشترى يونيفورم برتقان
كل مشاكلك حاتتحل
و حياتك حاتبقى فل الفل

راجل لابس برتقان
ماسك مقشه
و بيكنس شويه وسخايه على الارض
و بعد لما يجيبهم يمين
يلف و يجيبهم شمال
بيلعب بيهم يعنى
و عينه مش على شويه الوسخيات الصوغنونيايات
عينه على اللى ماشى و اللى جاى
إن راكب عربيه او ماشى على رجليه
المهم انه يظهر ليهم انه بيؤدى عمله على اكمل وجه
او بمعنى اصح بيمثل تمثيل ممتاز
و يغلف وشه شويه بؤس على حزن على رغبات انتحاريه
و انه غلبان كحيان يصعب على الكافر
و المصيبه إن الناس بتديله
مره نص مره جنيه و مره خمسه
و همه عارفين انه بيمثل
و انا عارف انى حنتف شعر راسى كله
و هوه فخور بزى البرتقان
الشوارع حاتفضل وسخه يعنى حاتفضل وسخه
امال نشغل البرتقانيين دول ازاى

ما صدقتش غير لما شفتها بعينى
بجد انا مش مصدق اننا وصلنا للحال ده
احلف بايه انى وقفت اتفرج على المشهد ده و انا برايل على نفسى

خلاص بقيت كل ما اشوف حد لابس برتقان بيجيلى عالطول انفجار فى الزايده الدوديه و بحاول بعدها امسك نفسى انى ما اجريش ورا اللى لابس برتقان ده و اضربه قفا جامد من اللى بيوجع و بيلسوع و اقلعه اللى لابسه و البسه انا

مهما جبنا دشليون زبال
مهما جبنا شركات من كوالا ممبور
مهما حطينا اعلانات نقول اننا لازم نشد حيلنا شويه و نوسخ كمان و كمان
و مانسيبش اى حته غير ما نقلبها زريبه
برضو حانفضل شعب نظيف و محافظ و جميل
ليه طالعين شعب ما بيحبش يشتغل
شعب كسلان ممل
شعب مش منتج
و لما بيشتغل ما بيعملش شغله صح
يا يكروت
يا يبقى مهمل
يا يبوظ اكتر

كل شويه يجيبوا ناس يقعدوا يتناقشوا و يتكلموا عن حلول و مقترحات و حانعمل ايه بكره و حانعمل ايه بعده
مش عارف الناس اللى بتطلع فى البرامج اللى فى التلفزيون دى بيطلعوا يعملوا ايه
يتكلموا عن اللى حايعملوه؟
ما يعملوه و يخلصونا

يا جماعه احنا بنضيع وقتنا بنشتكى
بقنا كبير و بنتكلم كتير
عندنا جرايد كتير
الناس بتتكلم فيه كتير
عندنا قنوات كتير
المسئولين بيطلعوا فيه بيتكلموا كتير
رغى كلام كلام كلام
كلام اننا حانصلح
كلام اننا حانحسن
كلام اننا حانطور
كله كلام و ما فيش حاجه بتتعمل
ياريت نخرس بقه شويه و نشتغل
لإننا فعلا بقينا زى الزبالين البرتقانيين

سواق التاكسى مكسل يدخل بيه شارع فرعى و مصمم ينزلنى على الطريق الرئيسى

بتاعت شئون الطلبه فى الكليه مش قادره تقوم من كرسيها و الا تسيب السندوتشات و عاوزانى افتح الادراج و ادور على الدفتر بتاعى و اصور و اجيب و اكتب الطلبات و اختم النسر و اجيبلها شاى

المدرس مش عاوز يعلم التلاميذ فى المدرسه كل حاجه و لا يتعب نفسه و لا يوجع دماغه علشان يحافظ على طاقته و قوته و معلوماته القيمه اللى حايدرس بيها الدروس الخصوصيه

طلبت من النجار انه يعملى كرسى لما جيت استلمه لقيت الفينيشينج زفت و لما قعدت عليه اتكسر بعد اسبوع

الشغاله اللى بتنضف بتخلص فى السريع علشان تمشى بدرى و انا بقعد انضف وراها بعد ما تمشى لانها مانضفتش من اساسو

الراجل الى بيشتغل فى المكتبه قاعد على الكرس اسأله عن كتاب يشاورلى بايديه انى اروح ادور عليه هناك ارجع اقول له مالاقيتوش يقول لى يبقى ما عندناش ده بدل لما يروح يدور معايه و فى الاخر لما اروح تانى ادور الاقى الكتاب و احطه جوه عينيه

البواب بتاعنا اقول له ممكن ترش الجنينه بتاعتنا يقول لى حاضر انزل الاقيها ما اترشيتش اقوله تانى يقول لى حاضر يا بيه ارجع الاقيها ما اترشاشيتش فارشها بنفسى علشان الزرع ما يموتش
اكيد الفول و الكوشرى اللى بناكله فيه حاجه بتخلينا متخدرين و كسلانين عالطول
و اكيد لما الواحد يتفرم الصبح فى المواصلات و هو رايح الشغل مش حايبقى عنده و الا كالوريايه يحرقها و هو فى الشغل
و لو عنده كالوريايه واحده اكيد اكيد حايوفرها علشان يعرف ينجو من فرم المواصلات و هو راجع البيت

و الله بافكر نغطى الاهرامات اللى فى وشينا دى طول النهار بملايه سوده علشان نبطل "فيعنه" و ننسى بقى ان احنا "فياعنه" من ايام "الفياعنه"

فى حاجه فينا غلط
مش عارف محتاجين ايه بقى علشان نفوق و نجتهد و نشتغل
نشتغل صح و على اصول و بضمير

ممكن علشان بنعمل اللى احنا مش حابينه
او مجبرين نشتغل حاجه مش عاوزين نشتغلها
او المرتب مش مغرى و لا بيكفى

لازم نبتدى بقى نمشى بمبدأ إن الواحد مش بيشتغل علشان يكسب فلوس يقدر يعيش بيهم
لكن بيشتغل علشان هو موجود عايش اساسا علشان يشتغل
و يعمر الكوكب اللى عايش عليه

لازم الواحد يبتدى يستمتع بالعمل
لإن العمل متعه لما الواحد بيشوف نتيجه مجهوده اللى تعب فيه
و التقدير من الناس اللى حوليه
و قد ايه اصبح فرد مفيد فى المجتمع

ما تتخيلوش لو كل واحد عمل عمله صح اد ايه البلد دى حاتبقى تحفه و المشاكل حتتحل و النفسنه اللى فى كل واحد فينا من الرضيع لحد المسن حاتروح و تختفى و نبقى حبايب و بنحب بعض و بنموت فى بلدنا موت

شكلنا محتاجين نعمل رحله جماعيه للصين علشان نتعلم ازاى نبقى منتجين و نتقن عملنا
او تحصلنا مصيبه او كارثه كبيره تدمر المكان اللى احنا عايشين فيه زى ما حصل للالمان بعد الحرب العالميه التانيه و شوف الوقتى بقوا ايه
او ناخد الفلوس اللى الحراميه سارقينها من البلد و نعمر بيها البلد و نشغل بيها ولاد البلد و يبقى هدفنا إن بلدنا تبقى اجمد بلد زى ما بيحصل فى دبى الوقتى

او نفضل زى ما احنا كده بنحب الفهلوه و النصاحه و نظام من تحت لتحت و شعار ليه اتعب علشان اوصل لحاجه مدام ممكن ارشى و اخدها بسهوله و يا حبيبى البلد فيها بيروقراطيه و انا كفايه اللى معايا بيأكلنى و يأكل عيالى وراك كتاكيت و يعنى حد فى البلد دى عارف يوصل لحاجه و لو تعبت و اشتغلت بجد حاوصل للى انا عاوزه بس بعد المعاش يا حلو

فوووووووووووووووووووووقوا

انت بتكلم مين ياله؟
انت بتكلم شعب مش لاقى ياكل
و الوقتى مش لاقى يشرب
و بقى بيستحمى بس فى العيد
انت بتكلم شعب غلبان ضعيف هش
انت بتكلم شعب ما عندهوش هدف
شعب بيعيش اليوم بيومه
شعب احلامه على قده
انت بتكلم شعب ما بقاش اسمه شعب
لإن كل واحد بيعمل فيه اللى على كيفه
عايش فى بيئه الظالم بياخد حقه و المظلوم بياخد على دماغه
انت بتكلم ناس ما عندهاش وقت تفكر فى حاجه تانيه غير هى حاتاكل ايه النهارده و حاتدفع النور ازاى بكره
و اللى عندهم وقت يفكروا و يفلفثوا شويه للأسف مش لاقيين حاجه يعملوها غير انهم يدورولهم على مشاكل يحلوها و اسباب ما تخليهومش يشتغلوا و بيستنفدوا كل طاقتهم لحد ما يفتكرهم ربنا
يفضلوا يضيعوا وقتهم فى محاكمات و مهاترات و "لأ" ده عذبنى و "نو" ده مش عاوزنى ابقى صحفى حر و "اوبس" انا كده مش حاسس انى قاضى و ياللا نعمل طابور قطر و نمشى فى الشوارع نغنى و " جيمى راح جيمى جه جيمى سوا جيمى عمل" و"شايفينكم شايفينكم دوت كوم و انا كوم يا روح الكوم" و "سورى يا جماعه" انا كده مش حاعرف اشتغل فى البيئه الغير ديموقراطيه دى و " واو" انت فاسد و بتفسدنى طب انا حاجبلك بتوع حقوق الانسان

فتحيه و ام محمد و ام سيد و عم احمد ما يهموهمش الكلام ده
كفايه بقه
حرام عليك
حرام بجد
اقول لك حاجه
على فكره انت بتضيع وقتك مع شعب لما يبتدى يفوق تكون انت اتحللت فى قبرك من زمان

للاسف لازم تبتدى تفكر فى نفسك و بس
تحلم لوحدك و بس
تشوف مصلحتك من الاخر
و تسيب الناس تعيش فى سلام

لو كل الناس بتشتكى من نفس الشكوى بتعتى
و كل الناس ما بتشتغلش بإخلاص و اجتهاد من اساسو
يبقى انا يعنى اللى بجتهد و باشتغل باصول
انا زيى زيهم
مش باشتكى برضو و بهترف و بتكلم اهو و ما بعملش حاجه

احنا اكتر ناس بتتكلم

و اكتر ناس بتجلد ذاتها زى ما انا باعمل دالوقتى

مش الحياه ماشيه
و البلوج شغال شكاوى
خلاص خليها ماشيه
جاى تعقد نفسك وتعقدنا ليه

6 comments:

f said...

احناشعب مش بيحب يشتغل بس احنا شعب جبان خايف وعمره ماقال لا لالالالالالا والفاس بووك ده فاشل وللناس الفاضيه جدا والشباب العاطل وشكرا

Anonymous said...

احناشعب مش بيحب يشتغل بس احنا شعب جبان خاوالفاس بووك ده فاشل وللناس الفاضيه جدا والشباب العاطل وشكرايف وعمره ماقال لا لالالالالالا

WS said...

احنا شعب مش بيحب يشتغل + احنا شعب جبان + خايف و عمره ما قالش آه - الفايس بووك ده مش مش فاشل و للناس اللى مش ماليانه جدا و الشباب اللى مش بيشتغل + العفو

و بعدين



؟!

قرفان وجايب اخره said...

بجد موضوعك جاااامد جدا بس اللى عايز اقوله ان فى ناس مصلحتها كده وبيوفرو لنا كل الطرق اللى تخلينا كده زى الدش والكورة (ده حتى الكوره مش فالحين فيها ) وغيرها وغيرها بس مين دول ...الله اعلم.. الحل ان الواحد يطير بره نشفلمنا مكان نتعامل فيه كأدمين مش بهايم .. كل حته زحمه, دخان, دوشه, تهجيص (احنا المفروض ناخد جايزة اوسكار فى التهجيص والمنظره ) , نشيل احدث الموبيلات والبلوتوث(منظره طبعا ) , كله عايز ياكل التانى ..كله بينصب على التانى ,, مفيش احترام بيننا .. ده احنا مسلمييييين يجدعان خلينا ايه لليهود.. المشكله الكبرى ان البلد مش سيبانا نخرج بره البلد ولا سيبانا نعيش جوه عيشه محترمه..طب الواحد يعمل ايه يولع فى نفسه ..... الواحد قرف
حرررررررررررررررررررام انا تعبت ..انت قلبت عليا المواجع ...بس فى الاخر لازم الواحد يدعى ان ربنا يهدينا ونرجع مسلمين بجد

WS said...

يا قرفان و جايب اخرك

اقول لك حاجه بس ما تكتئبش
ما فيش حل غير بعد مثلا 300 أو 500 سنه

و أنا أول ما عرفت الحقيقه دى قررت فعلا اسيب البلوه اللى انا عايش فيها دى

و خلاص ان شاء الله هانت و اسيبها

و الهدف من البلوج ده ينتهى بقى

و أعيش

ادعيلى بس إن ربنا يسهلهالى

و لو نفسك تهج معانا اهلا و سهلا بيك

قرفان وجايب اخره said...

الف مبرررووووووووووووووك
ربنا يسهلهالك لغاية ماتستريح من الهم ده ....بس ياريت تقولنا هتخرج ازاى عشان نستفيد لحسن دماغى هتنفجر من التفكير ... ازاى افك واخلع من هنا