EgypToz: العنوان اللى فوق مش للموضوع اللى تحت

Monday, October 08, 2007

العنوان اللى فوق مش للموضوع اللى تحت


فى واحد كان ماشى فى الشارع لقى الدنيا بتمطر

بص فوق فى السما ملقاش ولا سحابايه

كمل مشى لقى المطر بيخبط على قرعته

مسح قرعته و بص فى السما ملقاش و لا سحابايه

كمل مشى و هو باصص للسما لقى نقط مايه راحت دخله عينيه

مسح دموعه و بص فى السما ملقاش و لا سحابايه

كمل مشى و هو باصص للارض لقى نقط مايه سايبه بصماتها

وقف راجل و سأله هى الدنيا بتمطر قال له لأ

وقف راجل تانى و سأله هى الدنيا بتمطر قال له لأ

وقف راجل تالت و سأله هى الدنيا بتمطر قال له هو انت مجنون

داحنا فى عز الحر و السما مافيهاش سحابايه

راح الراجل سايب الشارع و دخل يقعد على سلالم مدخل عماره

و فضل يبص على الشارع اللى كان ماشى فيه

فلقى ان الدنيا فعلا بتمطر

بس المطر وقف يخبط على دماغه

1 comment:

مادو said...

بوست حلو جدا
تحياتي