EgypToz: جمعه تيك اواى

Friday, August 10, 2007

جمعه تيك اواى

انا لسه جاى من الجامع اللى بصلى فيه الجمعه... و حاسس ان جه الوقت انى ابتدى اصلى فى حته تانيه... بالرغم ان الجامع ده الاقرب و تحت البيت... و الناس بتجيله مشى و بالعربيات من حتت كتيره علشان سمعته الجامده فى المنطقه... و قال ايه بيسموه جامع تيك اوى... او الجامع اللى بيخلص بسرع...بيخلص فى السريع... بدرى بدرى... يمكن عندك مشوار...يمكن مستعجل...يمكن تعبان و صاحى يا عينى يوم الجمعه الصبح و لسه ما فطرتش الفول و البيض بالبسطرمه و الشاى بالنعناع حايبرد...يمكن عازم ناس على الغدا و لازم تروح تشترى طلبات البيت من السوبر ماركت... و يمكن عاوز تروح النادى فى يوم اجازتك و تنزل البيسين... اصل احنا فى زمن بيجرى بسرعه... و صلاه الجمعه لازم تواكب العصر المتطور السريع...و فعلا مسجد تيك اواى بيقدم الخدمه دى لكل المتأخرين و المستعجلين

فهوه بالظبط بيأدن أدان اولانى... و بعديه بثانيه الأدان التانى...فتلاقى الناس بتجرى جرى علشان عارفه ان هنا العد التنازلى ابتدى... و عارفين ان ما فيش وقت يقعدوا على الارض و احسنلهم يختصروا الوقت و يفضلوا و اقفين يدردشوا مع بعض او يقعدوا فوق العربيات... و بعدين يبتدى الامام يقول جملتين فيهم المختصر المفيد إن الناس لازم تبقى كويسه و تصلى لربنا...و بعدين فى استراحه نص فمتوثانيه علشان الواحد يستغفر فيها ربنا...و بعدين جمله واحده يقول فيها ان الكويسين هايروحوا الجنه و الوحشين هايروحوا النار...و بعدين يدعى دعاء مجمع لكل الادعيه ان كلنا يا رب إن شاء الله ندخل الفردوس الأعلى من الجنه...فى ايه بقى اجمد من الدعاء ده...و بعدين يقيم الصلاه...تلاقى جيوش بتجرى و بتشبشب بشباشبها الاوه توو الارض... و اللى جايب معاه الجرنال يفرشه... و اللى جايب ملايه يصلى عليها... و اللى مش مهم يتوسخ و يصلى على الاسفلت المهم يصلى الجمعه و خلاص...و بعدين الامام يصلى الصلاه السريعه بسرعه الصاروخ و يقول فى الركعه الاولى تانى اقصر سوره و فى الركعه التانيه اقصر سوره موجوده فى القرآن... و السلام عليكم و رحمه الله و بركاته...اول ما يخلص ما فيش وقت حتى نسلم على بعض...كله بيقوم يدور على شبشبه او جزمته علشان يلحق يمشى قبل ما يهجموا عليه الشحاتين و بتوع اللامون و الجرايد
ياااه ايام زمان...لما كانت صلاه الجمعه دى بالنسبالى حدث...و كنت اقعد استمتع بخطبه الجمعه..اللى الخطيب كان بيتكلم فيها عن امور بتمس كل واحد فينا...كان خطبه الجمعه دى هى الحاجه اللى بتفكر الواحد مره فى الاسبوع ان الدنيا دى زائله...و ان الواحد لازم يراجع نفسه... و يستغفر ربنا...كانت الخطبه دى الخطيب بيقول آرائه عن الاحداث اللى بتحصل فى العالم من حوالينا...و كنت لما ارجع من الصلاه مع جدو نقعد على الترابيزه مع العيله كلها نتشاور و نتكلم عن الخطبه اللى سمعناها...و لما نطلع من الجامع نقعد شويه مع الجيران و نتكلم فى امور الحياه...و كنت باسيبهم ثانيه اروح اشترى مجله ميكى اللى كانت رخيصه زمان... زمان بقه

اما دالوقتى...فى الساحل الشمالى...لما الراجل يدن و يزعج الناس اللى بيصيفوا على الشاطىء... و على رأى ميكو تلاقيهم لما يقيم الصلاه يجروا حافيين من الشاطىء و مافيش وقت بقه يتوضوا (ما همه لسه كانوا فى البحر) و يلفوا بسرعه فوطه حولين المايوه و يدخلوا فى صف الصلاه و يقولوا الله اكبر

2 comments:

moataz said...

عندك حق والله
الواحد بقا بيشوف فى الصلاه حاجات غريبة
وتلاقى الخطيب وخداه الجلاله وبقا بينافس الخطاب التانيين اللى فى المساجد التانية
وربنا يرحمنا كلنا

mostafarayan said...

طبعا لازم الصلاة تواكب العصر يا مان
ربنا يهدينا
قول امين