EgypToz: Facebook sucks

Sunday, July 08, 2007

Facebook sucks

ال فايس بووك ده يا جماعه ابشع اختراع عرفته فى حياتى ... فاشل... لو شوفت اللى اخترعه مش عارف ممكن اعمل فيه ايه... و لو سمعت اى حد بيقول كلمه فايس بووك ... احسنله ما يقولهاش قدامى

اول ما عملت بروفايل فى ال فايس بووك دورت على حبيبه زمان ... اقوم الاقى اللى كنت بحبها و فضلت احب فيها لأكتر من تلات سنين حطالى صوره ليها هى و جوزها ... فعلا كان عندها حق مش بس ترفضنى اياميها ... ليها حق تتف عليه كمان... بجد الاتنين شكلهم لايقيين على بعض فشخ ... ما فيش مقارنه بينى و بينه... هو شكله احلى بكتييير و اغنى بكتيييير و شكله اجنبى كمان

قلت ابص على صحابى بتوع زمان ايام المدرسه... كنت متشوق اعرف همه العيال دول عملوا ايه بقه فى حياتهم بعد ما اتخرجنا ... انا مش كنت عاوز بقه اتف على نفسى ... انا كنت عاوز ارمى نفسى من اى بلكونه قاهريه ... ايش البت اللى كانت قاعده جنبى فى الفصل بتدرس فى هارفرد ... و البت التانيه فى اوكسفورد... و ايش الواد ده خلص ايه يوو سى ... و ده بقه استاذ سياسه و اقتصاد فى ال جاى يوو سى ... و ده بيشتغل فى ال اى تى بيزنيس فى شركه كبيره فى ابراج نايل سيتى ... و ده بيشتغل فى انجلترا ... و التانى فى دبى... و ايش اللى خلف و حاطت بنته الاموره بيتمختر بيها على الفايس بووك ... و ايش اللى اتجوز ... و ايه... عروسه زى القمر... بجد ... ما شاء الله ... و حاطت كمان صور الفرح التحفه ... معمول باستيل امريكان فى حته جميله اوى على النيل و الصور طالعه بتنطق و تقول يا حلاوتك يا عريس و يا عروسه ... و مش بس كده ... ده حاطت كمان صور شهر العسل فى اسبانيا... و يا سلام على الكومنتات بتاعت الناس ... تقطع المراره... و انا شكلى الوحيد اللى لسه فى كليه مهببه بستين نيله مع ناس معفنين باسلق فى البيض بتاعى علشان لسه ما استواش

و كل واحد و ماليلى الصفحه بتاعته صور صور صور ... كل دول اصحاب ... جايبهم منين دول... ده انا صحابى ما يتعدوش على صوابع الايد الواحده مش الايدتين... اده... الاقى زميلى اللى كان فى المدرسه بيتهته و خجول و حالته حاله و شكله استغفر الله العظيم ... الاقى البنات حايتجننوا عليه .. كل واحده كاتباله كومنت جابلى الأللوط... يا حبيبى واحشنى ... و واحده كاتباله البارتى بتاعت امبارح فى سنجاريا كانت منوره علشان انت كنت موجود ... و صورتك دى سكسى اوى و دى كوول مووت ... و انا طبعا بقره ببربور... ما تيجى تبوسينى احسن

ده انا حاطت فايس بووك بروفايل بتاعى شهور و ولا واحد كتبلى فيه كومنتايه ... طب شحتونى كومنتايه ... منظرى مش حلو خالص كده

عملت ايه بقه فى حياتى ... كل الناس ناجحه و مظأطته ... مش عارف مظأطته تتكتب ازاى ... كل الناس مبسوطه يعنى ... مفرفشه ... متهشتكه ... متدلعه ... كل الناس مصاحبه بعض ... و انا مصاحب نفسى
حظى دايما وحش ... ما عرفتش اعمل صحاب و انا فى المدرسه ... و ماعرفتش اعمل صحاب و انا فى الجامعه ... خلاص راحت عليه
هو انا وحش و الا ايه ... اكيد انا وحش بس مش شايف نفسى كويس ... اكيد فيه حاجه غلط و انا مش عارفها

حاسيت ان الناس مش هاممها تطلع نفسها بالبكينى... او تقول هيه حاتعمل ايه فى حياتها ... ده انا عرفت تقريبا قصه حياتهم كلها من ال فايس بووك
من الاخر... لو عملت لنفسك بروفيل يبقى اعتبر نفسك من اللحظه دى شبه عريان امام الجميع...فى ناس حاتعرف عنك كل حاجه...و فى ناس تانيه حاتستغل المعلومات دى اسوأ استغلال...و كل ده و انت مش عارف
اعتبر الخصوصيه اللى هى جزء اساسى من صفه الجنس البشرى مافيش... بح خلاص...راحت...حاتيجى البت تقولك اصل انا ممكن اعمل كنترول على اللى يدخل لى و اللى ما يدخلنيش...ما فيش اصل و لا فصل...انت اهبل ياهبل...انت عارف مين اساسا اللى عامل الط*ز بووك ده...مين...قول لى مين...المعلومات و الصور الجنان اللى منوره شاشات الكميوتر حول العالم فين...فى الهوا...لا طبعا...اكيد فى حته متخزنه...و مين عالم ممكن يحصل ايه
و بالمناسبه...احنا عارفين يا اختى انك شريفه و سجلك زى الفل
و مش عارف لاقيت ده طلع يعرف ده...اده...و ده يعرف ده كمان...اده و همه دول اصحاب من امتى

ده فى اتنين زمايلى فى الكليه عرفت انهم اتخطبوا قبل ما يعلنوا فى الكليه بشهر علشان البت حاطه الصوره الرئيسيه فى البروفيل و هى ماسكه ايد الواد

و الاقى ناس بقه عمله صوفح تخليك تاكل شعر راسك ... كان نفسى اقول كلمه تانيه بدل راسك بس عيب كده خلاص ... مش عارف لاقيت صفحه احلى بنوته تحت العشرين ... و جروب اختيار فتى ابو جسم جامد كيك ... و محبى مش عارف المطرب هباب... و اللى بيكرهوا الفنان الفلانى... و جرووب محبى التهييس...ايه الفراغ ده... ده واحد من صحابى لاقيته كاتب انه رايح ياكل دالوقتى ... ما تروح ... و انا اعمل ايه دالوقتى ... اسأفلك ... ناقص تكتب انك حاتروح تشخ بعديها ... تحس الناس صاحيه نايمه على ال فايس بووك ده

اخويه بيقول لى هو مين قال ان كل دول سوعده فى حياتهم ... اكيد لازم يطلعوا فى الصور بيضحكوا ... بس ممكن يكونوا عندهم مشاكل... و اكتر منك كمان

امى لما شافت ال فايس بووك و صحابى اللى كانت تعرفهم و تطورات حياتهم قالت لى ... انت عندك حق يا بنى ... يلا اكتئب ... و الله العظيم قالت لى كده ... احباط ثم احباط و يتبعه احباط ... احباط متواصل

اللى ضايقنى اوى انى عرفت ان اتنين اللى كنت اعرفهم ايام المدرسه ماتوا ... صحابهم عملين صفحه فايس بووك لذكراهم ... كاتبين انت واحشتنا اوى ... و انت كنت ملاك يا بوزو... و انت كنت البهجه فى حياتنا ... عمرنا ما حاننساك ابدا

طب فى حد ممكن يعمل لى بروفايل للذكرى بتاعتى لما اموت... مين حايعمل كده و انا ماعنديش حد اساسا
لما ببقى متنرفز مش عارف فى صوباعين من صوابع ايديه الشمال بيتشلوا ... مش بيتشلوا اوى بس بيجيلى وجع بينئح بطريقه عجيبه... لإن اكتر حاجه بجد باكرها فى حياتى لما اكون عامل حسابى على حاجه ... و ما تحصلش ... اصل كل يوم باخد خابور كبييير ... إن حد يخرج معايه فى الاجازه ... مافيش ... انا قولت بقه الاجازه جت و مافيش حجه ... ايش اللى اكلمه يقول لى ماشى يلا نخرج و حاكلمك بعد نص ساعه و تعدى نص الساعه و ما يتكلمش ... اكلمه مش بقه يقفل عليه زى زمان ... الموضه الجديده انه يسيبنى ارن ارن
هى الناس ما بقاش عندها ذوق و الا ايه ... هى الناس دى بتفكر ازاى ... حاموت اعرف الناس دى ما عنداش اى احساس بالاخر ... و اللى يقول لى اصل عنده مشاوير مع اهله و اللى يقول لى اصله لازم يوصل مش عارف مين مارينا و لما يرجع حايتكلم

امبارح بقه كنت خلاص حانفجر و نفسى حامووووت اخرج .. حلقت دقنى بقه و استحميت و عملت شعرى بالجيل و لبست احلى لبس و رشيت هيوجو بوص و مستنى صاحبى يرنلى زى ما قال علشان انزل ... مارنش ... كلمته بس الموبايل خارج نطاق الخدمه ... قلت ما ليش دعوه لازم انزل ... مش معقول بعد كل اللى انا عملته فى نفسى ده و فى الاخر ما انزلش
حاولت اكلم اى حد من صحابى انه ينزل ... مش عارف ليه كل واحد عاملهالى قضيه ... ايه يعنى الساعه حداشر بالليل ... احنا فى الصيف يا جماعه ... ايه يعنى لما ينزل ... اصل بابى ... اصل مامى ... اصل مش كنت تقول لى من بدرى و النظام الكحيان ده ... جيل متدلع ... كسل ... يا اخى ما تنزل و ماتكبرهاش ... ما فيش و الا حد رضى ينزل... وقتها الدنيا كلها ضلمت فى وشى ... انا فعلا و لا شىء فى الدنيا دى زى ما قلت زبرميييت مره قبل كده ... ما عنديش حد يبقى صاحبى فى الحياه... شريك حتى الموت

فضلت ماشى فى الشوارع قلت اروح اقعد شويه فى سيلانترو ...لاقيت الولد حاطتلى اللاب توب و حواليه اربع بنات عسل تقريبا مش لابسين حاجه و عمالين يضحكوا و يشاوروا بايديهم على شاشه اللاب توب... يا ترى ايه اللى عاجبهم اوى كده و عمالين يتفرفشوا عليه... عملت نفسى رايح الحمام و بصيت على شاشه اللاب توب بتاعته و اذا الاقى المصيبه الكبرى ... ال فايس بووك ... جالى عقم ... قررت انى مش حاخرج من بيتى ده تانى ... خرجت من سيلانترو مخنوق و حاسيت ان روحى حاتطلع ... و روحت اشتريت بيتزا هت ببرونى وسط بواحد و عشرين جنيه و نص و من البقال الحرامى اشتريت بيبسى دايت باتنين جنيه و جبت فيلم دى فى دى و اتفرجت عليه و نمت

41 comments:

السهروردى said...

تصدق وأنا كنت لسه بأفكر أعلق لك لاقيت فيه رسالة جاي لى من كتاب الوشوش (بلاها فيس بوك)

أنا بأحييك على البوست ده على فكرة

أقولك حاجة تعالى نعمل جروب ونسميه نحن نكره كتاب الوشوش
ونخلى الشعار بتاعه
"get a life"

WS said...

كتاب الوشوش؟
ما هذا الاسم اليونييييك؟
سوف يكون فعلا من الجروبات الشديده اذا استخدمنا هذا الاسم الصعلوكى
بس نخلى الشعار احسن
get a kheyaar

Anonymous said...

بص يابنى...انا واحدة من الناس اللى ليهم زفت عال فايس زفت...و جااتلى الامراض برضه...وشفت المدهول على عين امه خطيبى السابق...بس عادى....جوايا كنت حاسة ان انا احسن مالبهايم دول...و بعدين مش ممكن يكون واحد دمه
خفيف اووووووووووووووووووووووووى كده صحابه يتعدوا عال ايد...هما اللى مابيفهموش بقى :D:D:D

WS said...

مش ممكن
anonymous
ايه الكلام الجامد ده
طب مش كنت تسيبى اسمك
بصى بقه
سيبك من الفايس بووك الفاشل ده و تعالى خلينا نتعرف هنا احسن
اسمك ايه؟
بتدرسى و الا خلصتى؟
لأ بهزر :-D
بجد انا متشكر على الكلام الجميل اللى انتى قولتيه ده
بالذات اخر جملتين
ده انا ممكن اعيش باخر جملتين دول طول حياتى مبسوط و سعيد... و من مين ، من بنت
لأ... برضو بهزر :-)
فعلا همه ما بيفهموش
كفايه ان حد فهمنى زيك
thanx a lot

Anonymous said...

bos yabny enta shab menafsen we makrooh fe el mogtama3 7awel te3'ayar men nafsak 3ashan matmotesh men kotr el 7ekd ely enta feeh yabny danta wa7da katabetlak kelmteen 7elwwen se7t we hatmoot tezabat ma3aha men gheer 7ata matshofha 3ommoma yabny el facebook dah e7'tra3 3azeem la2eno beygeeb lak 3elakt adeema ma3 nass ba2alak met sana mashoftohomsh fakar fe kalamy ana wa7ed ma3rafaksh we ba2olak lazem teghayar men nafsak et3araf 3ala naas godad keda we mateb2aash shab menfasen we shoof 3eyobak eih w sala7ha ya bany adam
we akeed kol wa7ed 3aref menenea 3aref eih 3eyooboh we bye7awel yesala7ha mato3odsh tonbor keda zay el neswan we tefta7 website makhsoos 3ashan te7ky keset 7ayatak yabny el mafrood enak ragel ya3ni el donia lesa yama hatwareek fa mesh ma32ola termy zanbak 3al facebook wala 3ala naas el 3eeb feek matez3alsh men kalamy ya man bas walahi lazem tesala7 men nafsak

WS said...

ok

Anonymous said...

فتره كنت مداومه على مدونتك وكنت بحب اقرأفيهالاسباب
صدقك وصراحتك
وخفة روحك
وانك واحد من الشباب اللى زي اى شاب بسيط وبيحلم
الحلم حلو
والامانى جميله
والواقع مر اوى
بس كل حاجه فى ايدك
احنا اللى بنكتب دستور افراحنا واحزانا
وبالمناسبه
انا حاولت اوصلك
واخدت ايميلك
بس معرفتش اوصلك ويكفينى الضحكه
والاستمتاع وانا بقرأارائك
لو فعلا محتاج جروب معاك فى ناس كتير
يسعدهم اكيد
وفكر كدا هتلاقى ان ربك عادل جدا
كل العباد متساويين فى النصيب
فهمتنى
ارق تحيه ليك
ساره

WS said...

ساره
انا سعيد جدا بشعورك الراقى و كلامك الجميل
انا مؤمن طبعا ان ربنا عادل فى كل شىء
كفايه بس انى و الحمد لله بصحه و ان ربنا ادالى عقل انى اؤمن بيه
و المفروض فعلا ان احنا اللى بنكتب دستور حياتنا
بس للأسف فى البلد دى ما بينفعش
الدستور بيتكتب علينا بالعافيه
زى ما قولت فى بوست خلاص
http://egyptoz.blogspot.com/2007/04/blog-post.html

يعنى مش كل حاجه فى ايدى

معرفتيش توصلينى ليه؟
انا ايميلى مكتوب فى البروفيل على الناحيه اليمين من الصفحه

انا يسعدنى انى انضم لجروب

مع ارق التحيات
دابليو اس

Anonymous said...

wade7 en enta me3a22adha shewaya

bos yabny matermeesh 7omolak 3ala facebook 3ashan ana kont faker zayak keda awel ma3amalt facebook 2olt hayeb2a 3andy so7ab olayeleen w no comments w hafshal w kol el 7ewarat de, ma3 ennaha kolaha gowwa nafsak ya3ny ma7asalsh 7aga men elly oltaha..

a2olak 3ala ra2y..ebtedy enta el sadaqa, e3mel friend request lel nas elly ta3rafha w ba2alak keteer mashoftohomsh, w momken kaman el nas elly ta3rafhom w mosh friends aw konto friends w sebto ba3d, w ekteblohom comments w keda, hatla2y ennohom raddo 3aleik w zay el fol w kol el tahayo2at de wala 7aga, garrab keda w 2olly..

3ala fekra..mosh ma3na en el wa7ed fe facebook 3ando bel 200 wel 300 friends yeb2a mesa7ebhom kolohom w beyo5rog m3ahom w keda, wallahy hatla2y 3/4 el friends dool ya mogarrad nas ye3rafhom w 5alas aw 7atta sa3at maya3rafhomsh 5ales w 7atethom keda belbaraka, w el comments de nosaha mogamlat w keda

esma3 kalamy bas w matnafsensh el omoor w 5aleek cool zay kalamak =)

Anonymous said...

انا يا مان لسه مشترك انهارده فى ال facebook
و سبحان الله اليوم الى اشترك فيه اقرا ال blog
!!!!!!
بس على فكرة انا زيك فى حلجات كتير انا برضه صحابى قليلين و كده و معرفش بنات خالص!!

بس اتمنى الموضوع يتحسن معايا و معاك

WS said...

anonymous,
ان شاء الله تتوفق فى الفايس بووك بتاعك،الفكره و ما فيها ، و اللى ناس كتير ، كتير اوى مش فاهمنها، ان اللى فى الفايس بووك ده يبقى على ارض الواقع ، اه عندك صحاب كتير، بس على شاشه الكمبيوتر، فين دول بقه فى الواقع، فى الحقيقه، طب نتعب نفسنا ليه، ما احنا بنشوف بعض على الفايس بووك و بنسلم على بعض و بنكلم بعض و الحمد لله، نتعب نفسنا ليه و نشوفك فى الحياه

اصل الحياه بقت سريعه و احنا للاسف مابقناش فاضيين لبعض

Aboutabl said...

انت بتدور علي الصحاب بالطريقة الغلط .. وهي دي المشكلة الاساسية اللي لاحظتها ف كلامك .. انت بتدور علي الصحاب الحلويين الروشيين اللي معرفش ايه .. الناس اللي بالشكل دة غالبيتهم للأسف بس مش كلهم .. مبيهتموش اوي بصداقة الرجل بالرجل .. همهم الشاغل الحريم .. والا هما روشين ليه .. فاهمني ؟ و قليل قوي اللي بيهتم .. و البنات نفس القصة .. الامانة و الوفاء صعب تلاقيهم .. و بعدين مين قاللك ان لازم يبقي ليك صاحب من اولي حضانة عشان يبقي صاحبك الانتيخ و الكلام الهجص دة ؟ محدش قال كدة .. ممكن تتعرف النهاردة بحد يكون صاحبك ..وممكن وانت 85 سنة تتصاحب بحد تحس انه صاحبك بجد .. بس متقلقش ..محدش بيموت بدون ما يحس انه لقي صديق حقيقي .. اهم حاجة تدور صح .. او بمعني اصح ..سيب نفسك علي حالها .. ومتتمنظرش .. كن كما انت .. هتلاقي نفسك بتشد ناس عايزينك زي مانت بالظبط بدون حسوكة .. انا اول مرة ارد علي بلوج لحد وتقريبا اخر مرة ... ولو عندك اي استفسار او عاوز تكمل مناقشة ..كلمني علي ايميلي mota3agref@hotmail.com ومتتريقش .. الايميل دة من 96 وانا ف اولي اعدادي .. احسبها بقي شوف عندي كام سنة

WS said...

aboutabl,
انا سعيد انى اسمع تعليقك،ليه اخر مره حاترد على بلوج،هوه انت حاتسيب الحياه و الا ايه،على العموم حافكر فى حاجه كده او كده استفسر عنها منك او نكمل المناقشه بس لما ارجع من السفر ان شاء الله ، بالمناسبه...مناقشه ايه؟

اه ه ه ، موضوع الصحاب و الفايس بووك

و الله ممكن نبقى صحاب يا ابوطبل ، مين عارف

احمد جلال said...

بسم الله الرحمن الرحيم
"إن المتقين في جنات ونهر "
عليك بتقوى الله فإنها رأس الأمركلة
واصحى من النوم لانك قضيت حياتك نائماً فكفى

Ahmed Elsabbagh said...

بجد البوست ده مش ممكن روعة بجد
جميل اوى
والكلام ده بيدور جوايا اوقات كتير اوى فعلا هى الحياه مش متقسمة بالتساوى حتى مع الفرد الواحد ممكن تلاقى اوقلات اصحاب كتير حواليك واوقات مش لاقى حد خالص
بجد انت رائع وانا هحط المدونة بتاعتك عندى فى المدونة سلام يا صاحبى

أحمد الصباغ

mahmoud said...

bos ya man enta leek so7ab fel school,fel college,fel work,fel club,fe any fuckn place 3amtn,,sure ente 3arf sa7bk 3ando net wala l2,,2olo enta 3andk account 3ala el zeft facebook even idont like it hai2olk a 2olo taib ana el account beta3e aho da low enta mesh 3amlo add 3ala el hot,yahoo,2alk l2 2olo tab mat3ml da gamed wenta bezat bet7bo neeee* k w hakza ya pop ama low mesh 3andk friends fe ai makan khals aw enta el area ely feha nas 100/100 me2t3in el internet yeb2a 3azl::D lol shof enta any way ya man w zay ma2lk a3ml add lel te3gbk w nasi7a mat3mlsh add le guys mesh te3rfhom 3ashn sure ma7dsh bes7ab guys 3ala el net ely eza o3tbr gay**sry 4 ma shit may be its wrong bt many belive in this ok t.c

WS said...

kararna ne3mel group gedid fil facebook esmo "facebook sucks" lelnas antifacebook we elmomtane3a tamaman 3an elfacebook

:-0

Anonymous said...

انا علي فكره معجب بالمدونه بتاعتك اوي وكنت اتمني انك تعمل منتدي كبير تحط فيها الموضوعات بتاعتك
وانا مش موافقك علي كلامك لان النت الكل سواسيه فيه الفقير والغني فعيش حياتك فيه زي منتا عايز

http://word3.blogspot.com

WS said...

ثانك يوو فرى ماتش

بس ما فهمتش الجمله دى

وانا مش موافقك علي كلامك لان النت
الكل سواسيه فيه الفقير والغني

Anonymous said...

ya gama3a ay 7ad 3ando sowar 3al facebook yeshelhom fawran 3ashan fe hackers beysrako el sowar w ye7otooha 3ala sites safla

lo2ay said...

bos ya m3alm momken ykon 3andk 7ak bass al al3am menk msh men facebook enta t3ban nfsean 7awl tnsa kol dh 7wrat s7abk w tkon new man

Anonymous said...

el moshkelaaa 3andaaak enta ehnaaa zanbeeenaaa ehhhh enak mesh mahboooob we ma3andakshhh sohaaaab
mesh lazem tetala3 3o2adddak ala el naaaaas law kont ensaaan nagehhh we 3andaaak hadaf kont 3ereft ezay tehafez ala sohabaaak we kont weselt ahsan na weslooo bas wadeeeh enak mesh aref te3mel ayy haga

JuLLiE said...

انا بالصدفه شوفت المدونة بتاعتك و مش عاوزة اقولك قد ايه انت موهوب ما شاء الله عليك ... ز بالنسبة لموضوع الfacebook ده فا انا علي فكرة حسيت نفس احساسك لما شوفت قد ايه ناس زمان كانوا معفنين و بيئة موووت و دلوقتي مفيش حد بينده اسمهم الا و جنب منها لقب cool :D بس عادي يعني يا دابليو .... انا قررت اني اطنش و افوت و اتعايش مع الوضع الحالي و بالعكس انا حسيت بنوع من المنافسه بس منافسه في حاجات مفيده يعني قررت اني أخد كورسات و اتعلم حاجات جديده علشان ابقي في المستوي الثقافي احسن و كمان في شغلي اتطور و اشتغل في اماكن احسن و احسن و احسن ... يعني برضو الي حد ما الfacebook مش وحش اوي كده .. بالنسبالي هو جه بفايده علشان فوقني و عرفني مكاني فين بالظبط و المفروض ابقي فين ....

وبحييك مرة تانيه علي موهبتك الجميلة دي
ربنا يوفقك :)

WS said...

ufff

حلخص الموضوع فى كلمتين علشان انا ز**ت

الفايس بووك تعدى على خصوصيه الانسانيه

الفايس بووك بيغير العلاقات بين البشر

الفايس بووك عالم وهمى بيبعدنا عن الحقيقه

اووبس دول طلعوا مش كلمتين

طب كلمه اخيره

الشخص اللى فى الموضوع يبقى كده مش انا

طب كلمه كمان

Facebook sucks

طب خلاص اخر كلمه

الجمله اللى قبل قبل قبل اللى فاتت انا مش فاهمها

boba said...

ezayak ya (w)3ala fekra ana 7abeet eslobak moot begad lazem testa3'el elmawheba dy fesho3'l aked hateb2a hayel wehatenga7 gedan .heba

Anonymous said...

3ala fekra el 3eib msh mn el facebook el 3eib 3andak enta enta fe3lan menafsen w 2albak eswed w 7alet el e7bat eli enta 3ayeshha dih enta eli 7atet nafsak fiha w 3agbak enak te3ish tool el wa2t dor el mazloum eli el donia gaya 3aleh w msh medeyalo forsa yefra7!!! el facebook dah aslan gamed gedan w law enta ma3andaksh as7ab 3aleh dah 3alashan enta aslan ma3andaksh as7ab 3awez yegilak as7ab menen ya3ny?????? w ba3den kolena awel mabtadena 3al facebook makansh 3andena as7ab w ba3den ebtadena wa7da wa7da nela2y as7abna betoo3 el madrasa w betoo3 el koleya weli ma3ana fel sho3'l weli eshta3'alna ma3ahom zaman w ne3raf a7'bar ba3d w 3ala fekra enta lama bet2oul enta bete3mel eh aw betekteb 7'abar 3anak da 3alashan enta 3awez el nas te3raf dah!!!! mn el a7'er es7abak eli shoftohom 3al facebook ba2o kaza w ba2et kaza homa le3bouha sa7 w akid enta msh 3abit w te2dar te3mel zayohom w law shayef en el facebook dah gayeblak e7bat e2felo w mated7'olsh 3aleh tany laken msh ma3na eno msh 3agbak eno we7esh!!!!

WS said...

A.Y.

I hope you are reading all this dude.

Emo-Kid said...

WTF?

nenoz said...

السلام عليكم ....

بص يا مان يمكن انا ما إتعاملتش مع الفيس بوك ده لإنه يعتبر جديد نسبياً بالنسبالي
بس شفت آصحاب كتير ليا بيستخدموه
بس للآسف الكل بيستخدم مواقع تكوين الصداقات إستخدام غلط
وبصراحه شديده...... كل اللي بيلجئ لإستخدام المواقع دهية (صايع)سوري .... بس هي دي الحقيقيه
لو انت عندك وقت فراغ ممكن تستخدمه في آي حاجه مفيده تتعلم حاجه تطور نفسك توسع آفقك etc.....
انا قاعد على النت تقريباً من سنة 97 آيام الكليه والواحد من خلال قعدته على النت طور نفسه وزود معلوماته صحيح بقى ليا آصحاب جداد وكثر بس مش زي آصحابي اللي بجد في منهم اللي بقى صديق وفي منهم مر مرور الكرام
عايز يكون ليك آصدقاء ؟
شوف هواياتك آيه ... آيه اللي ممكن يجمعك أنت وآصحابك مع بعض ويخليكوا تفضلوا تتكلموا مع بعض وعايزين تتقابلوا تاني بكره عشان مخلصتوش كلام ؟

ممكن تكون لعبه, برنامج , منتدى , موقع وحاجات تانيه كمان.
ممكن تتكلموا في الدين في الدراسه في آي حاجه شوف جيرانك
مفيش حد يخرج معاك آخرج لواحدك (مش عبط) أنت عايز تخرج آخرج إتمشى روح نادي خليك إجتماعي ومتكونشي طفيلي
يعني ما تحاولشي تفرض نفسك على ناس حاول تصاحب ناس وتجاذب معاهم آطراف الكلام
ولو محتاج مساعده في التكيف الإجتماعي أو آي حاجه
أخوك موجود
Dr Hany
m.hany@live.com

WS said...

Dr Hany
و عليكم السلام
كلامك اكثر من رائع
و اقتراحاتك مزهله
و لا اعرف ماذا اقول بعد ذلك
تكوين اصدقاء ليس من العمل السهل
و خاصه فى وقتنا الحالى
و لاسيما ان العولمه باتت تكون عالم واحد باشخاص يتميزون بالوحده و العزله
و بالرغم من ان انشاء مواقع الاصدقاء و منها الفايس بووك كان هدفه الاول تقريب المسافات و تسهيل عمليه التقاء الاصدقاء الذين لم يكن لديهم وسيله للتلاقى بعد سنوات كثيره
الا انه احدث فجوه اعمق بين البشر
و التلاقى فى الكمبيوتر
ادى الى عدم تلاقى فى الواقع

تكوين اصدقاء اصبح امر اكثر من معقد
و مئات من الاشخاص حاولوا عمل ما اقترحته فى تعليقك
و معظمهم فشلوا

لان الانسان اليوم اصبح يكتفى بدائره الصداقات التى كونها فى سنين
و ليس لديه الجرأه فى ادخال شخص جديد فى دائره معارفه

تكوين صداقات فى الكبر
ليس بسهوله تكوينه فى الصغر

و اشكرك مره اخرى على تعليقك الجميل
و ساحاول ان اكون ايجابيا و استخدم بعض من نصائحك الذهبيه حتى اكون اجتماعيا من جديد

Anonymous said...

قال الشاعر :"إن حظي كدقيق فوق شوك نثروه ,صعب المر عليهم, ثم قالوا لحفاة يوم ريح مشمس إجمعوه

Sama said...

enta mas7'ara bgd ana bamoot feek mn 3'er ma 23rafak:D

7aneen said...

plz thats my mail i'd like to be ur friend am haneen mn alx w 3andy 18 sana bgd nefsy ashofak soon isa
t.c
w cya later isa
byeeeeez



o0o__nona__o0o@hotmail
or
nona_bosbos_2006@yahoo
realy i w8 u

Anonymous said...

wade7 enak msh bs 7ad mnafsen fe3lan l2 kaman 7akood w mesh by3gebak 7aga w nazretak motasha2ma w soda lel 7ayah ya3ny 3amal tetala3 el 2otat el fatsa fi el facebook w mesh 3agbak el 3agab badal ma tosheed eno bygama3 el nas w y2arabhom l ba3d, wala enta mn el mo3ardeen ely mesh 3agebhom 7aga w mesh fal7een gheer fi el tarya2a w el kalam w bas ya 3am roo7 bos fi el meraya w etarya2 3ala nafsak yemken maykonlaksh enta fayda bs 3ala el a2a2l el facebook leeh fayda w shaghal nas kteer mn ely by3melo mashroo3 el open day w yebe3o la2o nas teshtery w t3raf 3anhom mn khelalo ya3ny leeh madeyah plus en el nas bt3mel groups tetkalm fi 7agat mofeeda w fi groups btetkalm fi el deen w gam3eyat khayreyah te3ln 3an nafsaha 3ashan el nas tesa3ed ya3ny kaman fayda deeneya w ensaneya gheer el concerts w el nadawat ely to3tabar fayda thakafeya el 7ayah mesh kolaha pics w picnics w el safar w meen gab eh w meen by3ml eh wala enta sat7y lel daragady!!

WS said...

ال فايس بووك ده يا جماعه احسن اختراع عرفته فى حياتى...كفايه انه خلى مصر كلها تضرب

Anonymous said...

utyutyuutyuty

Anonymous said...

يا عم يا بتاع المدونة انتة شكلك مريض نفسى احسنلك تروح تعرض نفسك على دكتور يعلجلك مشكلتك
وتخلض من الارف الانتة فية

WS said...

حاضر

Tei7a said...

بوست ظريف....بس ماتاخدش الأمور جد أوي كدة
عبارات زي "فيس بوك بيدمر العلاقات الانسانية" مش في محلها خالص.

بس البلوج بتاعك جامد

WS said...

شكرا على التعليق
لو عارفنى من زمان
تعرف انى ما باخدش اى حاجه جد فى البلوج ده كله
ده كلام بقوله على لسان واحد صاحبى اوى
كنت عاوز اوصله للبنى ادمين و بس
و كويس انه عجبك
و لو شوفت مشكله الخصوصيه اللى اثيرت فى الفتره الاخيره
و إن الفيس بووك حايحتفظ بكل الصور و المعلومات بتاعتك حتى لو مسحت صفحتك تماما
تعرف إن الفيس بووك ده طلع فعلا زباله
و اهى هوجه و قربت تخلص فى مصر
زى اى حاجه جديده بتيجى و الناس تفرح بيها شويه هييييي و تختفى

Wael said...

أستمر بروح الفكاهة اللي عندك ..