EgypToz: ليلة الدخلة

Tuesday, June 19, 2007

ليلة الدخلة

اغرب احساس فى حياتى لما كنت قاعد فى الكوشه فى اخر الفرح و المعازيم و الاهل و الاصحاب كلهم بيبصولى و يصقفولى و بيستعبطوا و بيستهبلوا و عاملين نفسهم قال ايه مش واخدين بالهم و مش فاهمين و لا عارفين ان ليلة دخلتى عالطول حاتبقى بعد الفرح و حايتقفل علينا الباب و نبقى لوحدينا...كان نفسى الدوشه دى تنتهى بقه باسرع وقت ممكن...بس الناس كانت قاعده قاعده ... مش عاوزه تمشى...انا حابقى اتكلم عن الفرح ده بعدين علشان بصراحه كان مهزله... المهم خليت الراجل يوطى النور بتاع القاعه شويه علشان الناس يبقى عندها شويه دم و تتكل بقه...بس برضه ما كنش فى فايده... بس الحمد لله و الشكر لله ان الفرح خلص... هوه ما خلصش يعنى بس انا قلت نقوم بقه انا و س و نسلم على اللى لسه قاعدين ... بصراحه كل حاجه كانت جاهزه زى ما اتفقنا عليها و كنا فى الريسبشن بتاع الهوتيل لما لقيت ماما و خالتو و م و ع اخواتى و انكل أ و حماتى طبعا واقفين معانا ادام الاسانسير... فضلوا يرغوا و يضحكوا مع س و انا طبعا عاوز امشى بقه بس قلت خلاص هانت و ما جتش على دى

فى اللحظه دى حاولت افتكر كل اللى قالهولى حوس...يا جماعه الكلام ده انا مش بقوله علشان تفتكروا كده و لا كده انى قليل فى المعرفه و كده يعنى... بس أنا حبيت اروح لحسام قبل الفرح باربع تيام علشان اسأله على شويه حاجات كده كنت مكسوف شويه اتكلم فيها مع حد تانى... انا و حسام كنا بنهزر زمان على اليوم ده و فعلا جه اليوم اللى اتكلم فيه عن المواضيع دى علشان بقيت خلاص فى الامر الواقع...و احنا اكتر من الاخوات... و الله باعزك اوى يا حسام...كان فى بقه حاجات كده صغيره كنت عاوز استفسر عنها مش عارف مين اللى يقولهالى ... مالقيتش غير صاحبى و حبيبى حسام... هوه متجوز و عنده خبره فى الحاجات دى ... المهم حسام بصراحه كان راجل جدا معايه... ساعدنى و كان صريح جدا معايه...كنت فاكر انه حايضحك على الاسئله بتاعتى بس هو قال لى انه كان المفروض حد من اهلى كان يقول لى على الحاجات دى من الاول... بابا متوفى و علاقتى مع عمى مش اوى كده... يمكن فى حد من اهلى كان لازم فعلا يتكلم معايه ... بس انا كان احسنلى انى انا اتكلمت مع حوس علشان حسيت ان الموضوع ما فيهوش حرج بين اتنين صحاب يعنى

انا اكيد كان عندى ثقافه جنسيه قبل الجواز...بس كان اكترها من الافلام اللى انا كنت اتفرجت عليها زمان بقه و كده يعنى... بس كنت خايف وقتها ان اللى كنت باشوفه فى الافلام ما يكونش الواقع يعنى... يعنى بصراحه يعنى مش عارف لما الواحد يخلص الفرح المفروض يعمل ايه بالضبط...الخطوات يعنى ... اصل فى الافلام الموضوع ما بيكونش فيه فرح و كده يعنى... بيخشوا فى الموضوع عالطول... بصراحه الافلام كلها كانت اجنبيه و مش عارف فى مصر هنا المفروض يحصل ايه يعنى بالضبط... كنت خايف انى البخ و اعمل حاجه غلط و منظرى يبقى مش كويس ادام س

مش عارف دى غريبه و الا مش غريبه إن انا و س عمرنا ما اتكلمنا فى الموضوع ده خالص قبل ما نتجوز... اكيد يعنى مش حافتح معاها موضوع زى ده... و الا هوه كان لازم و الا ايه

لما قعدت مع حوس قاعده خاصه كده سألته بقه عن ازاى الليلة دى المفروض تمشى صح
قال لى بص يا سيدى انت اول ما تطلعوا الاوضه تتأكد اهم حاجه انك تقفل باب الاوضه كويس و بعدين المفروض انك تقرب منها و تقلعها فستان الفرح كمدخل يعنى فى الموضوع و بعدين حسام لمح لى كده على شويه حاجات كده
قلت له اوكى ... انا عارف ده و شوفته فى البورنو كمان بس مثلا انا عاوز اعرف هل ادخل استحمى الاول و الا مش مهم
قال لى على حسب الظروف... من الافضل طبعا انك تخليها تدخل تستحمى الاول و بعدين انت علشان حاتبقوا جايين عرقانيين اوى من الفرح و كده يعنى
قلت له طب فى سؤال عندى كده بس ما تضحكش عليه فيه
قال لى اتفضل
قولت له هو انا المفروض احلق الشعر اللى فى جسمى قبل الفرح و الا لأ
قال لى ... بص ... بصراحه كل واحد و اللى شايفه هوه... يعنى مثلا فى ستات بتحب الراجل يبقى عنده شعر فى صدره... ده فى ستات كمان بتحب الراجل يبقى عنده دقن خفيفه علشان
قلت له طب شعر البطاط
قال لى ... هممم... انت شوف بقه... دى حاجات مش مهمه
قلت له لأ دى مهمه بالنسبالى
انا فاكر لسه اليوم ده لما بص لى حسام و ضحك
و بعدها قلت له طب الشعر تحت
قال لى قصدك شعر العانه... برضه فى ناس كده و فى ناس كده
قلت له و انا اعرف ازاى يعنى
قال لى بلاش احسن خليك على طبيعتك
وقتها كنت حابب اسأله هوه عمل ايه بس حاسيت إن حايبقى فيها احراج ليه و ممكن يفهمها غلط
فى الاخر اكد لى ان المفروض كنت اتفق معاها على موضوع الخلفه ... الموضوع ده ما كنش فى بالى وقتها خالص... ما كنتش عارف ان لازم نعرف فى ليلة العمر كان امتى اخر مره فيه دورة شهريه عندها لو انا مش مستعجل على الخلفه... و قال لى لو انا مهتم اوى بالموضوع ده و مش عاوز خلفه فى المرحله الاولى يبقى لازم استخدم توبس بس انا فى ذهنى وقتها قولت فى نفسى انا اكيد مش حاعمل كده فى ليله زى ده
حسام نصحنى برضه على شويه وصفات جامده كده من الاكلات تخلينى شغال كويس جدا فى الليله المهمه دى بس انا اكيد ما باصدقش الهبل ده و الكلا م الفارغ ده اللى بيجيبوه فى التلفزيون

فى الليلة دى كنت قلقان شويه... اول مره بقه و كده يعنى... انا باضحك على فكره و انا باكتب الكلام ده... كنت مش فاهم اوى يعنى وقتها... و قولت يا ريت كنت قريت عن حد كتب عن اللى عمله وقتها يعنى الواحد كان برضه يبقى عنده فكره اكتر

انا و س طلبنا اننا نطلع بالاسانسير لوحدينا و بعدين دخلنا الاوضه اللى كنا حاجزنها... الاوضه كانت ملخبطه شويه... كان فيها الشنط بتاعتنتا علشان كنا مسافرين بعديها بيوم
اعدنا على حرف السرير و فضلنا نتكلم عن الحاجات اللذيذه اللى حصلت فى الفرح ... الحاجات اللى كنا مرتبنها و ما اتنفذتش زى ما كنا متخيلين و الحاجات اللى طلعت احسن مما كنا نتصور
بجد انا وقتها كنت هلكان موت من بعد الرقص و التنطيط و الدوشه و مصدع شويه... و هى كمان كانت تعبانه اوى
قالت لى انها داخله الحمام... سمعتها و هى بتاخد دش و انا فى الفتره دى وضبت الاوضه شويه و رتبت الهدوم و بعدين قلت هل ادخل بعدها اخد دش و الا اغير هدوم و البس البيجامه و استناها على السرير قبل ما تخرج من الحمام... ساعات كنت على فكره اخبط على الباب و اهزر معاها و اقول لها انى حادخل عليها
هى خرجت و كانت لابسه بالطو حمام ابيض و لفه شعرها بالفوطه و قالت لى انى اخش اخد دش
قلت وقتها ادخل استحمى علشان شكلى يبقى نضيف برضه بس كده طبعا كل الخطه اللى كنت مرتبها من الاول و انى اقلعها فستان الفرح باظت... مش عارف ازاى عرفت تقلع الفستان المكلكع ده كله فى الحمام

طلعت من الحمام و انا فريش الحمد لله و كويس و جاهز بس لقيتها بتسرح شعرها و مش عارف ازاى مش مبلول بس كده طبعا احسن
كان تقريبا وقت الفجر لما بصيت فى الساعه و قلت لنفسى اصلى و الا ما صليش اصلى و الا ما صليش... بس انا غلطت و ماصليتش... قلت وقتها ابقى اصلى الصبح بعدين و انا زعلان انى عملت كده... بس ده اللى حصل
على فكره انا كنت عارف وقتها كمان ان الواحد المفروض احسن كمان انه يصلى ركعتين و كده يعنى
شميت برفيوم حلو جدا فى الاوضه مش حانساه للنهارده و قعدت على السرير و انا لافف نفسى بفوطه الفندق و قلت لها ما تيجى تنامى بقى ... ده كان يوم طويل علينا اوى
راحت جايه و نايمه جنبى فى السرير... و بعدين قربتلها و بدأت اهمسلها عن فرحتى بأننا اخيرا اتجوزنا و بقينا مع بعض ... و هى كمان كانت فرحانه اوى و قربت منى ... و بعدين طلبت منى اقوم اقفل النور... فقفلته... مش عارف ده كان كويس وقتها و الا لأ بس كنت محتاج بصراحه للنور و لو كان بسيط حتى زى نور الاباجوره ... بس الاباجوره بتاعت الاوضه كان نورها عالى قوى و مزعج و مش رومانسى خالص... النهارده بتخيل ان المرايه بتاعت الهوتيل كان ممكن تكون فيها حاجه ممكن تشوف اللى بيحصل فى الاوضه او كده يعنى ... المهم قربتلها اكتر و هى قربت لى و بعدين بوستها على خدها و بعدين

*تم حذفها من الرقابة*

انا كنت باعمل نفسى ان الموضوع ده عادى خالص و انى مش مكسوف بس اول مره الواحد يقلع و يبقى عريان ادام حد دى حاجه مش سهله لو كانت لأول مره... النور كان مقفول و الاوضه ضلمه فكان الموضوع طبعا اسهل شويه ... انا مش متخيل انى عملت اللى عملته اليوم ده و انا تعبان جدا... بس الواحد بعدها مش عارف ازاى بتجيله قوه و نشاط
كان فى شويه حاجات كده صغيره ... مش غلطات ... بس كان ممكن يعنى تبقى احسن لما ابص على ليلة الدخلة... حسيت انى اتسرعت اوى فى عمليه الايلاج... يعنى كان لازم يبقى فى مقدمات شويه زى البوس و الاحضان و الملاطفه و الغزل و التحسيس الخ الخ زى ما حسام نبهنى...طبعا كان فى بس كان لازم يبقى اكتر شويه... و علشان كمان عرفت بعد كده ان س بتحتاج شويه وقت لغايه لما تبقى مهيئه نفسيا للموضوع ده و ميبقاش صعب و متعب و ميوجعهاش

و اللوبريكانت اللى كنت شاريه قبل الفرح عمرى ما استخدمته ... س لاقيته فى الشنطه و احنا فى شهر العسل
و بعدين الخيالات اللى كانت فى دماغى عن فض غشاء البكاره كله كان اوهام و ان دم كتير حاينزل و كده... انا بصراحه ماشوفتش الحاجات اللى بيتكلموا عليها دى... أنا ماشوفتش و لا نقطه دم واحده حتى
وبالنسبه للوقتى فضيحه لما افتكر انى يوميها قذفت بسرعه شويه...الموضوع طبعا لازم كله يبقى اطول بكتير من كده بس يمكن وقتها كنت مستثار اوى و كده يعنى
كان احساس حلو اوى ان الواحد لأول مره يلمس جسم واحد تانى بالطريقه دى و يضمه اليه ونبقى كيان واحد

المهم ان الليله عدت على خير... ليلة ايه بقى ده كان الصبح طلع خلاص... بس بعدها دخلنا فى النوم عالطول و كويس اننا كنا عاملين السفر بعدها بيوم علشان ناخد وقت نريح فيه شويه فى الهوتيل
بعدين انا عرفت انى انا مش لوحدى... فى كتير ليلة الدخله بتاعتهم بتبقى اوحش من كده بكتير... اللى بيلاقى صعوبه فى عمليه الانتصاب و اللى عنده مشكله فى عمليه الايلاج و اللى عنده قذف سريع و الحاجات التانيه بقه
ما ينفعش الواحد يتعرف عن الليله دى... ليله الدخله من قرايبه او معارفه او حتى صحابه... شكرا يا حوس على النصايح بس انا عاوز اقول حاجه... ان كل واحد قبل الجواز بيبقى متخيلها بشكل معين بالنسبه ليه هوه بس... و كل واحد بيختلف عن التانى

الحمد لله انى ما دخلتش فى اى علاقات كده و الا كده قبل الجواز علشان فعلا الواحد بيحس بعد ليله الدخله بتاعته ان ده احسن حاجه حصلت ... بالرغم ان ده ممكن ما يبقاش حقيقى... انا و س بينا كيميا معينه ماحدش يقدر يعلمهالنا غير احنا بس... انا طبعا عمرى لغايه الوقتى ما قلتها عن كلامى مع حوس و القلق اللى انا كنت فيه يوميها ... بس كانت ايام جميله و لذيذه كل ما افتكرها اضحك
انا مش عارف ليه لازم ليلة الدخله تكون عالطول طوالى بعد الفرح ما يخلص... ليه ما ينفعش تبقى بعدها بيوم... او يومين... او حتى تلاته

و على فكره... بعد الفرح بشهر جالى خاطر غريب اوى فى بالى... قلت هوه ده اللى انا كنت مستنيه طول حياتى... و بقه كل التخيلات و الاوهام والاحلام و كل التعب ده علشان الواحد يتجوز... اه فى الاخر الموضوع كان حلو... بس يعنى ما كنش اوى روعه تحفه خالص يعنى زى ما الواحد كان متصور قبلها... ايام الشاب المحروم

5 comments:

Anonymous said...

I liked your respectable post, & appretiate your skills in writing, as sometimes you write as an old man, a student, a guy, or even a girl. But from your profile, you are a WS.

You are right that boys & girls should know about marital things before marriage, as not always families do that task. It's also not easy to ask friends, even if they're close ones, the best thing is to be self cultured by reading from repectable sources, by the way, there're now some very good sites that offer this knowledge in a clean way.

أحمد said...

يعنى سواء من خلال الزواج
او حتى علاقات خارج المؤسسة
الجنس حاجة بسيطة جدا

مش بالشكل اللى الناس بتتخيله

ألِف said...

الكلام دا لو بجد تبقى شجاع جدا يابني :)

قصدي شجاع أنك بتحكي.

شفت البنت دي كاتبة إيه؟

طيب و دول؟

walladshab said...

هممم

Mr M said...

ههههههههههههههههههه انا ضحكت كتير اوي اصلى مكنتش متوقع انك تكتب الكلام دة