EgypToz: كريم مجنص

Tuesday, May 29, 2007

كريم مجنص

بصى يا منى ، كريم جسمه بقى جامد طحن ، واو ، يجنن يا منى ، و السيكس باكس و اوعى وشك ، و المايوه الاحمر المشجر ستايله حلو اوى عليه يا منى مش كده ، ياي ، و ضحكته زى العسل ، بايبى فايس، نفسى اروح اتكلم معاه

كريم طول عمره نفسه يسمع الكلام ده ، بالذات من بنات شاطىء اوكسجين ، بس يعمل ايه يا عينى ، جسمه رفيع و معصعص و مافيهوش امل ، الصيف ده بقه لازم يحدث فرق ، لازم يجهز و يبقى شغال ، المشكله انه الوقتى امتحانات ، و بعد الامتحانات حايجى الصيف ، و كده مش حايبقى فيه وقت يظبط جسمه صح ، ده لازم على الاقل يبات فى الجيم من الوقتى لغايه الصيف علشان ينفع ، يعنى يسيب المذاكره و يروح يلعب جيم ، و الا يلعب جيم و يسيب المذاكره ، انا شايف انك يا كريم تذاكر و انت بتلعب جيم ، او تلعب جيم و انت بتذاكر ، كريم جسمه مش عاجبه خالص ، و المدرب قال له روح لماما احسنلك ، اصله تخين و رفيع فى نفس الوقت ، يعنى دراعاته عامله زى عودين قصب و صدره عامل زى صدر البنات و عنده كرش كبير جدا من تحت ، كله من اكل البطاطس المحمره ، بس كريم مصمم يعنى مصمم

كريم راح سبورتس موول علشان يستعد للجيم ، راح اشتراله جوانتيين ، و شويه دامبلز و عوقله ، بس مش عارف يبتدى بأيه


كل ما يروح الجيم يلاقيهم مشغلين موسيقى ترانس مزعجه ما بيعرفش يركز بيها فى اللعب ، بس هوه مكسوف يروح يقوللهم يوقفوها من بعد اللى حصله اخر مره لما وقفها و جاله واحد حيطه بصله بصه مش و لا بد و قال له لو عاوز تشغل اغانى تامر حسنى بوسنى بتاعتك دى ابقه روح شغالها بعيد عند بيت امك يا له ، و من يوميها كريم ساكت على الوضع ده


كريم مش فاهم همه ليه ماليين الجيم كله مرايات ، ليه لازم لما الواحد يلعب يبص على جسمه ، من حلاوته يعنى ، كريم ما بيحبش يبص على نفسه و هوه بيلعب ، اصله بيكتئب و نفسه بتتسد لما يلاقى جسمه لسه بايظ خالص و جسم اللى حواليه قوى و مش ممكن ، كريم فضل يتفرج على الناس و هيه بتلعب ، كل واحد ماسك الدمبلز و بيبص على نفسه فى المرايا ، كل واحد ملامح وشه بتتغير تماما ، ملامح بتعطى انطباع بالقوه و العزيمه و الطموح ، ملامح شرسه ، و يقول يا سلام على عضلاتى اللى طلعت ، و بعد لما يخلص لعب يقف وقفه من زاويه جانبيه و يبص على نفسه من على الجنب ، و بعدين من الضهر ، و بعدين من قدام ، و بعدين يلم صحابه حواليه و يقلع التى شيرت و يتمنظروا ادام بعض، ده فى ناس بتلبس حملات مخصوص علشان تبين للى حواليها انها متأكده ان جسمها ممتاز

كريم بقاله اهوه اسبوعين بيلعب جيم و ما فيش اى فايده ، بيلعب بطن ليل نهار و الكرش لسه فى مكانه بيسلم عليه و بيبوظ لبره كمان ، و لا فى عضلايه طلعت ، و لا جسمه قسم و لا حاجه ، و اكتر حاجه بتدايقه لما واحد يجيله من ورا و يقول له يا حبيبى انت بتلعب غلط ، ايه اللعب ده ، العب كده ، و كده ، فقرر فى الاخر يبلبع امينو ، علشان يلحق الصيف ده
مره و كريم بيلعب فى الجيم و منهمك فى اللعب على ماكنه التراى ، لقى صوت ناعم دلوعه بيقول له ممكن ادخل معاك ، كريم سمع ادخل معاك دى و بص كده لقى بنت حلوه زاى القمر واقفه قدامه و بتبصله ، قال لها ايوه طبعا اتفضلى ، كريم كان لسه فى مرحله الصدمه ، عمره ما كان يتخيل انه يشوف بنت و ايه ، بنت حلوه فى الجيم ، ساب الجيم و قعد يتفرج على البنت ، و هيه بتلعب و بتقول هىء هااااه هىء هىء ، طول ايامه فى الجيم بيسمع اصوات رجاله بتهىء هىء ، الوقتى بيسمع اصوات حريمى ، و هنا الفرق الشاسع ، البنت عجبته ، مش بس علشان حلوه ، علشان جريئه انها تنضم مع الرجاله فى المكان الخشن ده ، و ياريت اليوم ما عدى ، لما كانت البنت بتلعب على جهاز البتر فلاى ، وقف كريم ادامها و سألها نفس السؤال ، ممكن ادخل معاكى ، قالت له اتفضل و مشيت ، و ياريتها ما مشيت ، كان اخر يوم البت دى تظهر فى الجيم

ايه القرف ده ، عرق و عرق ثم عرق ، كريم مش مصدق انه بيشارك سوائل جسمه مع الناس ، عرق الناس لازق فى الكرسى يقوم يقعد هوه على الكرسى بعد ما قعد عليه ميت واحد قابليه اكيد واحد فيهم عنده جرب او فيروس سى ، كل ما يرجع من الجيم يستحمى ساعه يدعك فى قفاه لغايه لما يطلع كل عرق الناس اللى ما يعرفهمش اللى لزقوا فيه

و بعد لما بيلعب جيم جسمه كله بيبقى تعبان موووت و ما بيقدرش يذاكر و لا يفتح كتاب و بيروح على السرير طوالى ، طب ايه النظام دالوقتى

مره كريم راح الجيم و مالعبش ، راح يتفرج على الناس اللى سبقوه ، اللى عملوا جسم جامد و عضلات و شكلهم بقى كويس ، كريم اكتشف حاجه ، قال ليه احنا بنسمى اللى جسمه على شكل سبعه و مجسم ده هوه الجسم الحلو ، ليه مش الجسم التخين هوه اللى حلو ، او الجسم الرفيع ، دى يعنى حاجه الناس كلها اتفقت عليها من زمان ، و اكتشف ان لعب الجيم ده ممل جدا ، واحد يفضل يشيل حديد طول النهار و يموت فى نفسه و يهلك اللى جابوه علشان ايه ، ليه ، علشان البنات ، مش مهم البنات ، علشان جسمه يبقى حلو ، يبقى حلو ليه ، علشان يبقى عنده ثقه بنفسه اكتر ، كريم كان عنده ثقه بنفسه اكتر قبل ما يلعب جيم ، و الا علشان الناس تبص عليه و تقول ده شكله كويس ، طب حايستفيد إييه فى حياته ، قصدك الرياضه يعنى مفيده للجسم ، بس مش لازم حديد ، يلعب كوره احسن ، يلعب باسكت ، يلعب سباحه ، كويس ان الشباب بتوع اليومين دول بيهتموا بنفسهم اوى ، و بيشغلوا وقت فراغهم فى حاجه مفيده زى بناء العضلات بدل الحاجات اللى مش مفيده اللى احنا عارفينها

وكريم ساب الجيم ، و بطل الامينو ، و حضر نفسه للامتحانات ، و امتحان القانون بعد بكره ان شاء الله ، ادعوا لكريم، كريم مجنص

4 comments:

kareem said...

حلو قوي البوست ده
و موضوع جميل والله انا كمان روحت الجيم لفترة لحد ما اتحرق دمي و زوهقت و قعدت

و اقتنعت انى كويس كده

بس هو مين كريم ده ؟؟
و الصور كمان مش لشخص واحد

و لا الموضوع عمومي يعنى مش مرتبط بشخص معين

عموما موضوع جميل جدا

تحياتي
كريم بس مش كريم مجنص
ههههههههههههههههه

walladshab said...

اهلا كريم

انت ما تعرفش كريم؟
كريم ده واحد صاحبى اوى و غاوى حديد
فى الواقع هو مسمى نفسه كريم مجانس
بس انا متهيألى انه كريم مجنص فقط
يا ريت ما يزعلش منى فى الموضوع ده

Queen eraser said...

موضوع حلو يعنى انت اتناولته بطريقه خفيفهو مش علميه و ده الطف كتير.
ابقى اقنع صاحبك انه مش لازم يكون شكل جسمه حلو عشان يعجب البنات عالبحر,فى ناس كتير قوى مش بتهتم بالعضلات..خليه يقتنع بجسمه لما هوه يرتاحله مش لما غيره ميعجبهوش شكله..شكرا

walladshab said...

queen eraser حاضر يا
بالرغم انى قولت له مليون مره انه مش لازم يعمل عضلات
بس فى ناس كده غريبه مخها كله ناشف و بتصمم ان جسمها لازم يبقى فيه عضلات
و كريم واحد من الناس دى
ممكن تقنعيه من فضلك
اصل كله بسببكم
انتم البنات اللى عئتوا كريم
:-)