EgypToz: خلاص

Monday, April 09, 2007

خلاص

الوقتى بقيت متأكد ان ده مش الزمن بتاعى ، إن انا جيت على الدنيا فى المكان الغلط و الوقت الغلط ، لأن انا عندى شايف الحياه من ناحيه معينه و مش فاهم الناس بتبص للحياه ازاى ، انا فعلا بقيت مسجون فى الحياه دى و مش عارف اطلع منها ، مسجون فى بلد اسمها مصر ، صحيت على الدنيا لقيت نفسى مصرى و بتكلم باللغه العربيه ، و تعلمت من و انا صغير كل العادات و التقاليد اللى موجوده فى البلد دى ، يعنى عرفت ايه الصح و ايه الغلط بالطريقه المصريه ، و عرفت بعد كده لما كبرت شويه ان دى هيه بلدى اللى المفروض حاعيش و اموت فيها ، غير طبعا لو سافرت و الا هاجرت لحته تانيه

فى بدايه شبابى ابتديت احس باوحش احساس عرفته فى حياتى ، و هوه الوحده ، معقول ابقى عايش فى مكان مليان اكتر من عشرين مليون شخص و برضه احس بالوحده ، ايوه

انا مش عارف هوه ده الواقع و الا لأ ، بس انا متهيألى ان ربنا خلقنا على الكوكب ده مش علشان نشقى و نتعذب ، خلقنا على الكوكب ده علشان نعيش فى رخاء ، نعمر الارض بالخير و نعمل العمل الصالح ، و الهدف طبعا اننا نعبد ربنا ، نعبد ربنا بالصلاه و عمل الفروض اللى امرنا بيها ، و عباده ربنا برضه باسلوب الحياه اللى احنا بنعيشها ، يعنى اعبده بالمذاكره ، اعبده باتقان العمل ، اعبده بحسن معامله الآخرين ، اعبده بعدم عقوق الوالدين ، اعبده بالابتعاد عن المعاصى ، اعبده بمساعده المحتاج ، اليوم كله و الحياه كلها عباره عن عباده مستمره لغايه لما اموت

يعنى مش متخيل ان احنا مخلوقين علشان نشوف ازاى نقدر نقرف بعضينا ، و نحارب بعضينا ، و نقتل بعضينا ، نفضل نشوف المآسى كلها اللى حولينا و نعيط و نندم على حظنا الوحش فى الدنيا ، و نقول اصل كل حاجه وحشه فى الحياه عباره عن اختبار من ربنا ، اصبر و اتعذب و اعانى علشان فى الآخر فى حاجه اسمها جنه حتتبصت فيها ، واحد يقوللك انا عايش فى الدنيا دى علشان احمى بلدى من بشر تانيين زيى بس وحشين فاربط نفسى بقنابل و افجر نفسى مع البشر التانيين الوحشين علشان انا كده حاودى الناس الوحشه دى طوالى النار و انا اروح الجنه و كده البشر الكويسين يبقى عندهم فرصه يعيشوا كويس ، و واحد تانى يقوللك انا حاروح اسافر اى حته و اشتغل اى شغلانه حاته لو مش عجبانى علشان انا لازم اأكل عيالى و هيه الحياه شقه و تعب و بالطريقه دى اقدر اكمل الحياه على الارض من غير ماموت من الجوع او اتشرد ، و و احد تالت يقوللك هيه الحياه صعبه و بالرغم انى بكرهه الشغل اللى انا بعمله و مش طايقه بس زى ما انت شايف ما فيش شغلانه تانيه فابروح المكتب كل يوم الصبح و افضل اشتغل نفس الشغلانه لغايه لما اطلع على المعاش و استريح شويه سنين كده و بعدين اموت

طول النهار و كل يوم فى نفس المعاد تطلع المذيعه و هيه زهقانه تقوللك اليوم لقى اكثر من مائه شخص مصرعهم فى العراق ، و مش عارف كام واحد مات فى فيضانات فى الهند و و ايران و برنامجها النووى و مش عارف امريكا و بيونج يانج و حاجه زفت خالص ، همه الناس مش قادره تقف ثانيه واحده مع نفسها و تفكر و تشوف هيه عايشه على الكوكب ده ليه ، معقول احنا حيوانات من فصيله واحده نشوف نخرب بيت بعضينا ازاى ، بقه ده هوه هدف الحياه ، و الا هوه الهدف إن يكون فى مزارع بيزرع علشان يأكل ناس كتير ، و مهندس يبنى بيوت ناس تانيه تعيش فيها ، و دكتور يعالج امراض ناس عيانه ، و واحد فى المصنع بيصنع تلاجه نحط فيها الاكل ، و واحد تانى يعمل طياره علشان ننقل بيها ناس من مكان لمكان ، و واحد تالت بيعمل مسرحيه مضحكه علشان يبسط ناس ، و اكيد حايبقى فيه مثلا حد بيكذب ، و حد بيسرق ، و حد بيقتل ، و هنا المفروض المجتمع كله بيتحد مع بعض و بيعاقب اللى بيعمل حاجه زى دى ، و طبعا ربنا حايعاقبه فى الآخره ، بس إن الناس تفضل ماشيه كده فى الحياه اليوم بيومه و مش عارفه هيه رايحه فين و الا بتعمل ايه

فى حاجه مش عارف اسمها ايه او مش عارف احدد هيه ايه ، بس الحاجه دى مسيطره تماما على عيشيتنا ، ضحكت علينا يعنى ، هيه اللى بتحركنا و بتخلينا نعمل ده و مانعملش ده ، انا من زمان و انا بتعذب فى المدرسه اللى انا فيها و مش عارف ليه ، كنت عمال ادرس الايون و التغير الكيميائى فى اتحاد الفسفور مع مش عارف الاكسجين و مدرس يطلع يكتب على السبوره و هوه بيقول افتح قوس تلاته اوس سبعه ناقص خمسه اوس حداشر و اقفل القوس و عاوزين نطلع الجذر بتاعه و ان القصب بنزرعه فى المكان الفولانى و الرز بنلمه بالطريقه دى و تحتمس العاشر مش عارف حارب مين و خلف مش عارف الملك مين و مش عارف الشعر بتاع الشاعر اللى من عصر الجاهليه قال ايه و نعرب الكلمه دى مفعول بيه مرفوع منصوب مفتوح بالكسره ، و كل اب و كل ام تدفع دم قلبها علشان تؤكد للعالم ان بنتها و ابنها من اذكى الناس فى البلد دى ، انا كنت حاسس انى لازم احصل على الدرجات النهائيه ، مش مهم ازاى او علشان ايه ، المهم ترتيبى يطلع الاول علشان المفروض ابقى تحفه و ادخل الكليه السوبر علشان ابقى سوبر و اشتغل احسن شغلانه فى الدنيا و اكسب فلوس تعيشنى فى الزمن ده مليونير و اتجوز و اخلف و اركب زلموكه و اموت مستريح ، طب فين انا ، فين اختيارى انا ، فين ايه اللى نفسى اعمله فى حياتى و ايه لأ، هوه انا لازم اوتوماتيكلى بعد المدرسه ادخل الجامعه ، طب افرض انا مش عاوز خلاص ادخل الجامعه ابقى زبال ، طب افرض انا فشلت فى الجامعه لازم اسقط و اعيد علشان لازم نخرجك منها بالعافيه ، هوه انا لازم لما ارجع من الكليه اغسل وشى و اروح اتغدى مع ماما و بابا و اختى لما يرجعوا من بره ، طب افرض انا مش عاوز ، هوه لازم ابقى فى امتحان اربعه و عشرين ساعه فى اليوم علشان طول حياتى و هوه كده و مافيش غير كده ، يعنى الناس الطبيعيه ممنوع تصحى بعد الساعه اتنين باليل ، طب انا عاوز اصحى لغايه اربعه ، طب ليه ما ينفعش ، طب انا لازم افضل امتحن من الناس من و انا فى الحضانه و ابتدائى و اعدادى و ثانوى و جامعه و انا بقدم للشغل و انا بشتغل و انا باتجوز و انا بقابل فلان و علان علشان الدنيا اساسا اختبار و ربنا بيختبرنا كلنا ، مش عارف ، حاسس انى مش انا، حاسس انى مابعملش اللى انا كنت حاعمله لو انا كنت فى بيئه تانيه مع مجتمع تانى ، يمكن الشعور ده كمان كبر لما جربت العيشه لوحدى فى بلدان متحضره تانيه ، فيها قانون محدد من المجتمع نفسه غرضه الاول و الاخير حمايه الانسان و اعطائه الفرصه و المناخ المناسب للحياه المستقره الطيبه ، كل واحد عنده طموح و احلام و مشاريع بيحاول يحققها علشان نفسه مايسيبش الدنيا من غير ما يغير فيها حاجه او يفيد بعمله فى حاجه فى المجتمع اللى هوه عايش فيه ، و الواحد بيحدد تركيبه يومه و حياته تبقى ازاى

انا بقيت باشعر بالجاذبيه و هيه بتشد رجلى لتحت ، بتقوللى حاتفضل غصبنعنك على ارض الواقع ، انت هنا و حاتفضل هنا و حاتعمل زى مالناس كلها بتعمل هنا ، انا مخى بيشتغل و بيفكر فى حاجه و جسمى و ايديه بتعمل حاجات تانيه خالص ، حاجات كتيره انا مش مقتنع بيها

حاولت بكل الظروف الصعبه اللى انا اتحطيت فيها انى ابقى ناجح و اعمل باتقان الحاجات اللى لازم اعملها ، او بمعنى اصح الحاجات اللى العائله و المجتمع منتظره انى اعمله ، بس فشلت خلاص ، فشلت لانى ماعرفتش اساعد نفسى و انا ايديه ملفوفه بالسلاسل الحديديه ، و ماعرفتش علشان ماحدش بيساعد حد

حاولت الخص معاناتى فى الدنيا دى فى شىء و احاول اجد له حل ، و الشىء ده كان اسمه الوحده ، الوحده الشديده اللى بتخنق

عرفت ان لازم يكون لى شريك حياه ، يحبنى و احبه ، يخاف عليه و اخاف عليه ، نساعد بعض ، نفكر فى بعض ، بالطريقه دى يبقى ليه هدف واضح فى الحياه ، هدف باشتغل علشانه ، شىء بيخلينى سعيد ، شىء بيخلينى احس بأنى انسان حى ، كل واحد بيبقى عنده حلمه الخاص ، و ده بقى حلم من احلامى

لو الواحد عرف ان الكليه دى مش حاتخليه سعيد يبقى مالهاش معنى ان الواحد يدخلها او يفضل فيها، حتى لو الناس كلها اجمعت انك حاتبقى سعيد فى المستقبل لما تشتغل ، طب الوقتى اتقرف ليه ، هيه دى طبيعه الحياة
لو الواحد عارف انه و هوه بيشتغل الشغلانه دى و هوه مش سعيد يبقى لازم يسيبها
لو الواحد ده عايش مع انسان مش حاسس معاه بالسعاده يبقى لازم يسيبوا بعض ، حايجوا برضوا الناس اللى مش عارف بتيجى منين و تقوللك اصل فى ظروف بتحكمك ، فى مجتمع انت عايش فيه و لازم تمشى بقواعده ، انت مش حر ، و لو فاكر انك حر يبقى انت غبى ، طب الواحد بيتصرف كده فى المجتمع اللى هوه عايش فيه و هوه مضطر انه يتصرف و يعمل حاجات هوه مش عاوز يعملها ، طب المجتمع مش حايتحاسب معاه فى الاخره ، ربنا حايحاسبه هوه لواحده و بس ، طب يعنى الواحد يعمل ايه دالوقتى ، يعنى واحد سرق رغيف عيش قبل ما يموت من الجوع مثلا علشان هوه فى مجتمع ما فيهوش شغل و العيش بعشره جنيه ، حايتحاسب لوحده


المجتمع اللى على الوش مجتمع غير ادمى ما ينفعش الواحد يعيش فيه ، فى حاجه غلط فيه و أنا عارف كده بس مش عاوز اصدق نفسى ، كل شويه حد يجيلى و يقول لى أنت فاكر نفسك أنت اللى صح و الناس كلهم اللى غلط ، معقول كل احلامى دالوقتى تقلصت فى ادور على كائن حى من نفس فصيلتى علشان إيه ، مش عارف علشان ايه بالضبط ، حاسس اننا مش مخلوقين علشان نعيش لوحدنا ، عندى شعور غريب إن كل واحد فينا محتاج لحد ، أو لشىء

مخنوق خانقه سوده ، مخنوق من كل شىء ، أنا بقيت على حافه الجنون ، و ساعات بتمنى إن أنا ما كونش أنا ، زهقت من الجسم اللى أنا فيه ، عاوز اقطعه ، عاوز أطلع منه ، عاوز ابتدى الحياه من أول و جديد ، أعمل ريستارت يعنى ، و اصلح الأخطاء اللى فاتت فى حياتى ، علشان حياتى تمشى مظبوط ، خلاص الناس اللى يعرفونى عرفين أنا مين و بيتعملوا مع مين ، و بمعرفتهم المسبقه عنى بيعملونى المعامله اللى همه عاوزين يعملونى بيها ، و الواحد بيجبر إنه يكون فى المحيط ده بقه طول حياته ، و علشان يطلع منه لازم يعمل خطوه جذريه لن يرضى عنها المجتمع ، يعنى لو الواحد زهق من الناس اللى عايش بينهم الهاى كلاس اللى كل حياتهم منظره و بس و عاوز يعيش مع ناس بسيطه طيبه فى باب الشعريه ، الناس دول حيقولوا عليه متخلف

والدى الحقيقى كان زمان بيقول لى إن علشان تعمل اللى نفسك فيه لازم يبقى عندك قوة فى المجتمع اللى إنت عايش فيه ، لازم يبقى عندك حاجه الناس تحتاجها منك ، و كان دايما يقول لى إن أنا ماعنديش حاليا أى مؤهلات أو قدرات علشان يبقى ليه قدره على الاختيار ، و إن لازم استنى و اكبر و اشتغل علشان ابتدى اعيش الحياه اللى أنا عاوز اعيشها ، يا سلام ، الناس كلها بتقعد تدرس حياتها المستقبليه و هيه حاتعمل ايه لما تتخرج و بعد عشر سنين حايشتروا بيت و مش عارف بعد كام سنه حايبيعوا ده بعد لما تترقى ، و مش بيعيشوا اليوم اللى همه فيه ، طب أنا ماعنديش ضمان نهائى إن حاعيش مثلا لغايه لما ابقى اربعين ، طب ازاى الناس بتفكر كده ، أنا عارف انى بضيع وقتى دالوقتى ، فتره الشباب انتهت بدون استفاده حقيقيه ، طب أنا ماتهمنيش الاستفاده على أد ما يهمنى إنى أكون عيشت الفتره الجميله فى حياه الانسان و هيه الشباب بالطريقه اللى كان نفسى بيها ، و هيه إنى ادرس فى الكليه اللى كان نفسى فيها ، و ابقى عندى صحاب كتير ، و ابقى خاطب فى نهايه الكليه ، و إن يومى يكون مقسم الصبح للكليه و بعد الظهر فى الاستمتاع بهواياتى و بعد المغرب اذاكر ساعه و بالليل اخرج مع اصحابى أو خطبتى ، و إن يكون عندى ناس كتير بتحبنى و بتسأل عليه ، و بعد لما اتخرج اشتغل الشغلانه اللى كان نفسى فيها و اتجوز حبيبتى ، و... ده أنا تليفون الموبايل بتاعى مارنش بقالو اسبوعين غير مره ، مش معقول علشان اكتشفت بعد ما فات الاوان إنى ماعنديش صحاب انزل الشارع و الكليه و النادى و اقابل اى حد و اقول له : هاى ازيك ... ممكن نبقى صحاب ، خلاص صعب بعد ما احنا كبرنا يبقى عندنا صحاب ، كل واحد عمل المجموعه بتاعته و التكتلات اللى هوه عاوزها

مش عارف ليه الشباب المصرى بقت الدراسه هيه الخلفيه الاساسيه فى حياته اليوميه ، يجيلى واحد و يقول لى : هوه جدول الامتحانات نزل ، اروح النادى الاقى الشباب قاعد كل واحد فى ترابيزه بيذاكر ، اكلم واحد فى البيت يقول لى : معلش اصل عندى ميد تيرم ، الصبح كليه و الظهر كليه و العصر رجوع من الكليه و المغرب مذاكره و العشا مذاكره و نص الليل مذاكره و كل يوم مذاكره لغايه لما السنه تخلص و بعدها الشباب يجرى هايج فى الصيف و كل واحد لابسلى مايوه مشجر و كل بنت لابسالى ستوماك و يلا على الساحل الشمالى نقضى شهرين الصيف فى مسرحيه المنظره و أنا كوول و البت دى مزه و بس الواد عمل جسم و سمعت اغنيه عمرو دياب الجديده و حفله تامر حسنى بعد بكره و يخلص شهرين التمثيليه و نرجع تانى للكليه ، و الغريبه إن كل ده بيحصل فى الاسره كلها ، يعنى الاولاد و الشباب بيحددوا الاب و الام يعملوا إيه و يروحوا فين ، السنه المصريه بتاعتنا بقت ماشيه بالنمط ده ، و كل ده لغايه امتى ، لغايه لما يوم القيامه تيجى

مره كنت قاعد مع صاحبى فى عربيته و راكنين جنب الشارع و قولت له : بص العربيات ، بص الناس اللى راكبين فيها ، كل العربيات ماشيه كده اتجاه واحد ، كل واحد رايح حته معينه علشان يعمل حاجه معينه ، كله مشغول فى حياته اليوميه ، اللى رايح علشان يشترى كيس اريال للغسيل ، و اللى رايحه تقابل صاحبها ، و الولد اللى راجع من الدرس ، و الست اللى رايحه للمحامى ، كلها مشاغل و خلاص

و لما ببص من الشباك بتاع اوضتى بشوف مصر من فوق ، عمارات كتيره اوى ، و كل عماره فيها شبابيك كتيره اوى و شقق كتيره اوى ، و كل شقه فيها بنى ادميين ، و كل بنى ادم ليه حياته الطويله المعقده ، كتير اوى اووفر ، هوه ده اللى جه فى بالى ، كل واحد عاوز اربع حطان تستره هوه و عياله ، المكان بقى ضيق و العيشه بقت صعبه ، و مافيش مجال للتفكير أو الاختيار ، اقوم أنا بقه اللى عاوز اطلع من الكوبيبه دى ، أنا ولا شىء فى الغوغاء ديه ، أنا ماليش حق اتكلم اصلا ، أنا مين اللى يهمه امرى من اساسو ، كل واحد بقه فى حاله ، كل واحد مشغول باللى هوه فيه ، بس لما الواحد يجى يعمل اللى هوه نفسه فيه ، ماحدش بيسيبوا فى حاله ، ايه التناقض ده

والدتى مش فاهمانى ، والدى مش فاهمنى ، اختى مش فاهمانى ، بس يجوا فى كل حاجه و يقولوا همه عارفين مصلحتى اكتر ،لازم تعمل ده و ما تعملش ده ، روح ذاكر ياله ، ما تاكلش فى الشارع ، ما فيش خروج غير يوم الخميس ، انت رايح فين ، روحت الكليه النهارده ، ما فيش دخول البيت بعد الساعه اتناشر ، طب أنا كبرت خلاص يا رجاله ، سيبونى اعمل بقه اللى نفسى فيه ، لأ ، مش حانسيبك ، طول ما احنا بنصرف عليك و بنأكلك و بنشربك و بنلبسك ، إنت مش حر ، لما تتجوز بقه و تعيش فى حته لوحدك و يبقى معالك اللى يأكلك يبقى تقدر تعمل اللى إنت عاوزه ، بس برضه بحدود

طول عمرى ما بفهمش احساس الواحد قبل ما يفكر يخلص من حياته ، بس التفكير ده بقى مسيطر عليه بقاله سنين دالوقتى ، بالرغم إن الواحد بيعرف ربنا و عارف إن ده حرام و علشان كده فاكر إن عمره ما حايعمل حاجه زى كده فى حياته ، إلا إن الواحد خايف برضه يحصل حاجه غلط فى مخه زى تغير كيميائى أو اغيب عن الواقع اللى أنا عايش فيه و يحصل ده من غير ما الواحد يحس

الزمن ما بيرجعش ، و اليوم اللى فات خلاص فات ، و أنا كل سنه لما سنى بيكبر مش حايرجع يصغر تانى ، ده فى ايام بتعدى من غير ما اعمل فيها أى حاجه ، حرام بجد اللى أنا فيه ده ، حرام فى ايام بتضيع هدر ، نفسى اطلع من الدوشه اللى أنا فيها دى ، الغريبه إن العالم بقى سجون ، كل إنسان عايش فى المعتقل بتاعه ، أنا حاسس إن مخى تعب ، أنا حاسس إن خرفت خلاص ، كل حاجه دخلت فى بعضها ، عندى مشاكل كتير ، طب ما كل واحد عنده مشاكل ، ما فيش حد فاضى لحد ، ما فيش حد عاوز غير مصلحته ، ماحدش حاينفع حد غير نفسه ، أنا مش عارف أنا عاوز إيه اصلا ، أيوه أنت مش عارف أنت بتقول إيه اصلا ، انا حمار ، أيوه أنا حمار ، إنت شكلك اتجننت ، أنا اتجننت ، أيوه ، انت فاكر نفسك حاجه ، انت ولا حاجه

18 comments:

weza said...

مش عارف اقول ايه بس كلامك هو هو نفس اللى انا حاسس بيه و دايما بيدور فى راسى .. وفعلا الواحد مبقاش ملك نفسه بقى ملك غيره .. ومفيش حد بقى بيحس بحد والدنيا بايظه .. بس الواحد بردوا بيحاول والحمدلله ان ربنا مدينا نعمة المحاوله .. وانا عندى فى المدونة كاتب موضوعين على اللى بيحصل فى الكليه وطفشاااان منها .. والله القصد مش دعاية ولا حاجه .. بس لان فعلا موضوعك هو الصح اللى ماشى فى البلد .. ودايما بشوف ان الناس بتعيش يومها وبسسسسس ومش بتفكر فى اى حاجه تانى .. ومحدش بقى عنده هدف بيحلم بيه .. وقليلين اوى اللى بقوا بيحبا يعملوا خير دلوقتى .. ومش عارف اقول ايه غير ربنا يصبرك ويصبرنا .. وهبقى سعيد والله لو اتشرفت بمعرفتك اكتر .. متهيألى دماغنا قريبة من بعض .. وشكا ليك ومعلش طولت فى الرد

Anonymous said...

what a hell r u sayin or what iam sayin but this is a typical from boys they just give up easily , u have to fight to get what is urs and never give hope and whatever u want dont care about ppl and they will understand and if not "nafad lohom" dont be just a quiter and if r then u dont deserve the life u r living .and dont keep sayin those things to urself coz like this u r conveincing urself that u r a donkey or even crazy , u got to know that everyone have this feelings sometimes but not all the time also dont stop ur life on searching for someone to love u or the opposite let the love come to u by itself " w ya seidy if u want friends ana mosta3eda akon ur friend bas balash el k2aba deh coz el 7yah lesa 7elwa bs el nas heya elly me3adaha " good luck.

Organic-Muslimah said...

I am sorry that you are feeling hopeless. I hate to see you this way. Tomorrow is a brighter day.

I promise.

Mo'men said...

You and me live in a community that lives an "Identity Crisis" , if you came across a bunch of people that greet each other by spitting in each others faces , and you greet with your hand .. You'll be the wrong-abnormal Freak.

So you and I are just freaks, calling everybody else freaks... the invisible cycle goes on and on and there's nothing you and me can do

Someone here talked about hope, hope is a dangerous thing and the type of "faith" that is been advertised here and there and everywhere is also bullshit.

I'll conclude my theory with a quote:
"The reasonable man adapts himself to the world, while the unreasonable man persists in trying to adapt the world to him. That is why all progress depends on the unreasonable man" - George Bernard Shaw

It's ok to be depressed
It's normal to be depressed
It's inevitable to be depressed

Anonymous said...

مش متخيل قد إيه انتا ريحتني بالبوست ده ، نفس الكلام اللى كان نفسي أقوله بس مش عارف أكمله على بعضه ومرمي عندي في الدرافت بقاله شهرين ، بس أنا الحمد الله ابتديت أتخلص من الحالة دي تدريجيا ، وأقدر أقولك إني أقربت أوصل لحل اللغز ، بص يا سيدي .. المشكلة كلها في الكيان أو النموذج اللي بتقرر انتمائك ليه سواء باقتناع شخصي أو حتى لما تحس إنك بتتشد لتحت غصب عنك ، الكيان ده ممكن يكون بلد أو مجتمع بأكمله وممكن يكون مجرد فكرة بستدعيها كل شوية لما تكون مخنوق أو مش لاقي حاجة تعملها (الملل هنا ليه عامل كبير) تاني حاجة إنك بتبقى مُطلع على الواقع والناس زيادة عن اللزوم فبتبدأ لاإراديا تقارن نفسك وقدراتك وطموحاتك بما يبدو عليه الآخرين خاصة لما الظروف تخليك تحتك بيهم أكتر وتحطك معاهم في صندوق واحد فتكون النتيجة إنك بتفضل نفسك وبتتخنق من كل الناس اللي في المحيط بتاعك وكل ما زاد اطلاعك كل ما زادت كمية البشر اللي بتتخنق منها بعد ما تقارن نفسك بيهم وكل ما هتحس إن الدايرة بتصغر أكتر وأكتر وإن مفيش مخرج تقريبا ومن هنا تبتدي تفكر يا إما تهاجر يا إما تنتحر !
تالت حاجة ودي أهمهم في نظري وهي النشاط الروحي والصلة بالله والقراءة في كتب الدين والتفكير فيها لأن هوا ده بس اللي هيوضحلك الرؤية ويخليك تحدد مين اللي يجوز تتبع قوانينه ومين لأ ، مين اللي ليه حق يحطك في موضع تقييم وحساب ومين لأ ، هل يجوز لأحد أنه يفرض عليك قواعد وخط سير أم لا ، هل تكون مذنب وتستحق العقاب عندما ترفض الامتثال للأعراف والقوانين التي اخترعوها أم لا .. فقط عندما تعرف وتضع يدك على هذا الخط الفاصل بين الأعراف والتقاليد وبين التعاليم الربانية التي لا تحابي أحد ، عندئذ ستصل لحل اللغز وتكتشف الحقيقة المطلقة و جوهر الحرية ،
يعني إيه اللي ممكن يحصل لو "نفضت" لكل البشر الأغبياء المتخلفين واتصرفت وكأنهم مش موجودين خالص وتركز في أسطورتك الذاتية ، أنا عن نفسي جربتها ونفعت !
------
بعيد بقى عن كل ده ، إيه رأيك لو نبقى اصحاب ونأسس مع بعض مشروع الفوضى العملاق ؟!

walladshab said...

weza
أنا سعيد من التعليق اللى جالى منك و انا اللى يزيدنى الشرف لو اتعرفت عليك اكتر
بس أنا مش عارف ازاى انت متهيألك ان
دماغنا قريبه من بعض
أنا دماغى فى جمجمتى و لحد دلوقتى مش شايف أى دماغ تانيه جنبها

walladshab said...

anonymous , thank you for your comment , but how can we be friends if you are anonymous?
I'll try to do the strategy of " nafad lohom " , I hope it will work, but tell them to " yenafadoly bardo "!

walladshab said...

Organic-Muslimah,
I really appreciate you saying that you feel sorry seeing me hopeless , but don't you think that it is a cliché to tell me " Tomorrow is a brighter day " , everyone is telling me the same phrase although they know that it is not always like that.
Anyway,thank you very much.

walladshab said...

Mo'men,
wow...you do not know how much your words touched me , it really made me think about the life I am living right now , and I feel a little bit relaxed and relieved to find out that there are other people out there who suffer like me , who feel depressed because of the condition we are living in , and that I am not alone , and the quote says it all , I may be an unreasonable man , Mo'men ... it is as if you looked inside me and felt what I feel , I do not like to be depressed , but sometimes I am depressed without even knowing that I am depressed , to find out ( after that ) that being depressed was more pleasurable than accepting the cruel reality as a stupid human being!?

walladshab said...

Anonymous ,
يلا ماشى نبتدى نأسس مشروع الفوضى العملاق ، ده فعلا مشروع عظيم ، بس كنت عاوز اسألك ، عملتله دراسه جدول ولا لأ ، و نفسك تبتدى تنفيذ المشروع امتى ، يا ريت بكره مش بعد بكره

كلامك بيدل على انك حكيم و عرفت ازاى المجتمع اللى احنا عايشيين فيه بيعيش ، و انا سعيد انك وجدت لنفسك حل للمعضله دى ، المشكله انى حاولت انفض فعلا للناس و امشى بالقواعد الاساسيه اللى خالقى محددهالى ، بس ما بينفعش ، احنا مش زى زمان لو كنت عايش فى صحرا و ممكن اسعى فى ارض الله الواسعه و اعمل اللى يرضينى و يرضى خالقى ، الوقتى انت بقيت متقيد بأسره كامله ما قدرش امشى فجأه و اسيبها ، و لا دراسه اقطعها من النص و اروح اعمل اى حاجه تانيه ، طول النهار فى احتكاك مستمر مع اشخاص بيجبروك انك تتصرف بطريقه انت مش عاوز تتصرف بيها ، يعنى سواق التاكسى لما ينزلك فى وسط الشارع و مش عاوز يوصلك لمشوارك علشان الدنيا زحمه ، انفض ماشى ، و الراجل بتاع الكوشك بيبيع البيبسى ليه باتنين جنيه بدل جنيه خمسه و سبعين ، انفض ماشى ، و انى اطول دقنى الاقى ابويه و امى و اختى و صحابى و الاساتذه و المدرسين و المجتمع كله بيقول لى ايه الوساخه اللى على وشك دى ، ده انت شكلك اكنك طالع من السجن ، احلقها من فضلك ، الموضوع مش بالسهوله دى ، انك تعمل اللى انت شايف انه صح و فى نفس الوقت تحافظ على علاقاتك الاجتماعيه و احترام الآخر ليك

دى طبيعه فى الانسان انه يقارن نفسه باللى حواليه ، حتى لو اقنع نفسه انه مبسوط و راضى عن حاله ، الناس حاتفكره بمعاملتهم معاه انه ولا حاجه ، يعنى لما تكون زبال و الناس بتتعامل معاك كزبال غير لما تكون مستشار و الناس بتتعامل معاك كمستشار ،

مشكله فعلا ان الناس فكرت ان الواحد لازم يكون بينتمى لكيان ، لدوله ، لحزب ، طب انا مش عاوز انتمى لحاجه غير انى مخلوق بعبد خالقى على كوكب الارض ، ده انتمائى الوحيد ، فبلاقى نفسى منعزل ، طب و بعدين

فى ناس كتيره عملت اللى انت قولت عليه فى الاخر علشان يعرفوا الحقيقه ، و المجتمع أو السلطه رمت بعضهم فى السجن و تلاقى فى يوم من الايام محكوم عليك بالاعدام

المجتمع لو اجتمع انه ياكلك ، حايكلك

يا ريت طعمى بس يبقى حلو

Organic-Muslimah said...

I m not a big cliche fan and I don't say anything I don't believe. And I wouldn't care to comment if I wanted to drop you a cliche.

I meant what I said.

walladshab said...

organic-muslimah,
your comment means a lot to me , and I understand that you believe in the bright tomorrow that is waiting for us , but let us imagine you telling me the same phrase 10 years ago , and we meet today to discuss this phrase , isn't it a proof that it is not like we thought it would be , I know we have to be optimistic , but life is showing us everyday that this phrase "Tomorrow is a brighter day" is not true.

We are waiting for Judgment Day.

MaMaDo said...

As you can see, don't think or even emagine that you are alone. Because you could really see how many people share the same problems with you, and how many people think on the same Wave as you do. The issue is all about communication my friend, communication. Now you can see easily how many Bloggers have the same problem and feel the same misery. Now if we could just comm. together and work on our own, we could find answers, and even solutions.

WS said...

mamado,
khalas...lets activate the WUB...to make the world a better place.
You have my email and I have yours,so where and when can we start?





ps:start what!

Dreamer said...

عمونا
حاذى جنب أخواتك ، و ماتقلقش مش انت لوحدك اللى الجاذبية ماسكة فيك باديها و أسنانها.. فى كثير لديهم تلك المشاعر و الاحاسيس و يمكن تكون أكثر منك ومنى و من اللى بيقرا الكلام دة و من اللى بيفكرش يقرا عشان يرحم نفسة
لكن اكيد ان على فترات فى اشياء جميلة فى حياتنا ...يمكن مش قدرين نشوفها لانها بقت روتينية او تقليدية او عادى طبيعية ، لكن اخرين يتمنوا ولوا نصفها فلا تستطيع ان تقول الا الحمد الله لكن بايمان الحمد الله على تلك النعم و ليس بروتينية الكلمة او التعود عليها .... فكلما قارنت بين حالك و من اقل حمدت الله على حالك ... و طبعاص الكلام دة مش بمعنى أحمد ربنا و اقعد جنب الحيط
لا
اسعى يا عبد و انا اسعى معاك
لازم نسعى و نحاول .... على الاقل بعد ما الايام تجر الايام و تفتكر شىء ما تقولش ياااااا رتنى عملت كذا ... او كذا
اسعى ان نجحت فشىء جميل ، و ان لم يكن فيكيفك انك عرفت نتيجة المحاولة و لن تقول او تتخيل انك فى يوم من الايام لو " و هى من اعمال الشيطان لتنكيد على بن الانسان و تزفيت حياتهم" كذا و كذا كان الحال بقى غير الحال

المهم يا عمونا ... عشان ما اطولش عليك و اتفلفس و ارسطوا يتقلب فى تربتة

أكيد الواحد مش راضى عن حاجات كثير فى مجتمعه
اكيد الواحد كان نفسة يحقق حاجات غير اللى هو عايشة

لكن السؤال
متى ننتقل الى مرحلة من اللافعل الى الفعل

راى الشخصى تواصل مع الاخريين ... ابحث عن المناسبات و جامل حتى لوكانت حجج فارغه لكن ضع نفسك فى بؤرة الضوء ... و يارب يكون الحال احسن

توقيع
أخيك فى الصف

WS said...

dreamer,

كلامك ده فعلا بيدل ان فى لسه ناس جميله و طيبه عايشه فى الزمان ده ، و انت فكرتنى بايامى الجميله ، انا فعلا لازم اتذكر الايام الحلوه و اتعايش معاها و انا فى الحاضر ، ساعات الواحد بيقول لنفسه انه كفايه عليه اللحظات القليله الحلوه و السعيده اللى عاشها فى حياته الماضيه و ممكن تبقى الملح و الفلفل بتوع الزمن الصعب اللى احنا عايشين فيه الوقتى و يصبروا الواحد شويتين ،
انا و الحمد لله باحمد ربنا على كل النعم اللى ادهالى زى ما قولت قبل كده ، بس فى كلام معاد باسمعه ليل نهار و حاسس ان ده وراثه او اتعلمناه من اجدادنا و هوه لما تقول لى ان لما ابص على حال واحد اقل منى و اوحش منى يبقى لازم احمد ربنا ، انا فى كل الاحوال فى حاله بصيت على اللى اقل منى او ما بصتش و لا قارنت ، انا فى كل الاحوال لازم احمد ربنا لإن الحمد و الشكر لربنا واجب على كل بنى ادم عنده شويه دم و حس بالنعم الكتيره اللى ربنا سخرهاله من جهاز المناعه الى فى جسم الواحد اللى بيدافع عن الانسان من هجوم اى عدو من الامراض لورق الشجر اللى بيقف تحتيه علشان يتظلل من الشمس الحارقه و هوه واقف مستنى الاوتوبيس و لغايه الفرصه الذهبيه اللى ربنا ادهالنا و هى الحياه علشان نعمر الارض و نبقى اقوى و ارقى المخلوقات عليها ، نيجى للكلام المعاد ان المفروض ما نقعدش جنب الحيط ، ما كل واحد عارف الحكمه دى ، ايه الجديد ، و ان اسعى يا عبد و انا اسعى معاك ، و الله انا عارف ان لو العبد سعى ربنا حايساعده الخ الخ الخ ، و ان قول " لو" دى من عمل الشيطان و الخ الخ الخ ، و متى ننتقل الى مرحله اللافعل الى الفعل ، و الكلام بقه اللى انت عارفه اكتر منى ، المشكله اللى حاولت اوضحها فى موضوع "خلاص" ان حتى لو الواحد سعى ، حتى لو الواحد اجتهد ، حتى لو الواحد كان عنده احلام و اهداف عاوز يحققها ، حتى لو الواحد تعب ، و حتى لو الواحد حاول مره و اتنين ، فى حاجه ، ايه هي اسم الحاجه دى انا مش عارف ، حاجه بتسلسل الواحد بقيود غير مرئيه ، بتخليه ما يقدرش يحقق فعلا الحياه الطيبه اللى نفسه فيها ، يعنى فى فتره من الفترات كانوا بيتغنوا فى كل انحاء العالم بموضوع الحلم الامريكي ، ليه كانوا بيقولوا عليه حلم ، علشان كان فى حاجه كده خفيه هناك فى امريكا فى وقت من الاوقات بتخلى الواحد فعلا لو سعى و اجتهد و اشتغل ليل نهار ممكن يوصل من زبال فى الشارع لرئيس الجمهوريه او ملياردير صاحب شركه ، طبعا ده ما بقاش موجود فى الفتره الاخيره بس هوه ده اللى انا بتكلم عليه ،الوقتى للاسف فى قوه من جهات كتيره مختلفه ما تقدرش تهرب منها او ما تخلهاش تأثر عليك ، الغريبه ان الجهات الكتيره دى بعضها عارف و بعضها ممكن ما يكونش عارف او قاصد انه يوقف تقدمك او مصيرك اللى انت بتسعى اليه ، فدى تركيبه مجتمع انت عايش فيه و لازم تتعايش معاه حتى لو مش عاجبك ، انا بتواصل مع الاخريين ، و بتواصل معاك اهو ، انا عارف ان الموضوع صعب ان الواحد يشرحه ، و خلينى معلش ابتدى الجمله الجايه بكلمه لو ، لو الواحد كان عارف يحدد فعلا الشىء الخفى المنتشر فى المجتمع اللى بيأثر فى الواحد من بعد ما يتولد و لغايه لما يموت ، كان الواحد وجدله حل ، و بطل يتكلم و يسأل نفسه مليون مره ... هوه انا مسير و الا مخير ... انا مسير و الا مخير

Sameh Simon said...

انت عارف... انا كان بيشغل تفكيرى ومستغربلة جداً ان الواحد يتخرج و يشتغل ويطلع عينة هو ومراتة ويحوش...واللى بيحصل فى الاخر ان الاب بياخد تحويشة العمر دى ويشترى بيها شقة لابنة عشان يجوزة ويجهزة... تخيل...تشقى حياتك كلها عشان فى الاخر شقاك كلة تجيب بية شقة وعفش لابنك عشان يجوز.. وهكذا الابن بيعمل بعد لما يجوز. ياترى هو دة الهدف من الحياة اللى احنا عايشنها؟؟؟
لو هو كدة..ياريت لو عرفت تشترى شقة لآبنك اقبل حتى ما تجوز !!

medoooo44@gmail.com said...

باشا‏@ياباشا‏@ياباشا‏@عندك حق واللهي يابرنس‏@الموضوع جاااامد موت‏@هو ده فعلا اللي بيشغل تفكيري الوقت ومن ٣ سنين كمان اه‏@بس ده لييييه‏@هقولك يامعلم‏@عشان دي ثقافه مجتمع تالت‏@اه مجتمع المظاهر والعادات حتي لو كانت غلط‏@وأولا طبعا بعدنا عن ربنا ونسيان الغايه الأسمي في الوجود‏@وشكرا علي حسن استماعكم‏@