EgypToz: نظرية عمك محمد

Sunday, January 14, 2007

نظرية عمك محمد

الدنيا بقت زحمه جدا فى الفتره الاخيرة بطريقه تخنق...بقالها شهر أو شهرين بالحال ده... حتقول علشان الوقتى فى امتحانات نص السنه... لا يا حبيبى... من قبل الامتحانات و احنا على الحال ده ...الواحد علشان يضرب مشوار النهارده لازم ينزل قبليها من امبارح بالليل...بقيت مش عاوز اروح الكليه و لا اشوف اللى فيها...من الغولب اللى باشوفه فى المواصلات...ده انا باحس انى بانزل علشان اقضى اليوم كله فى المواصلات... انا نص حياتى باعيشها اولردى فى الشارع ... و الامتحان كان حايفوتنى بسبب المنيل على عينه المواصلات... قال الراجل بتاع التاكسى مركبنى و بعدين مركب واحده رايحه مكان تانى اساسا...و بعدين قولت للسواق انه مش حينفع يقوللى ما تيجى تسوق مكانى احسن ...و بعدين الست تقول له خش من الشارع ده ...يقوللها لا يا مدام ...انا ماشى طوالى ....حضرتك تنزلى و تتمشيها ...تقول له فى مخها يا سافل يا حقير و تديله جنيه مع بصه وحشه ... و انا طبعا مخى المفروض فى الامتحان اللى انا رايحه ... و بعدين الراجل قاللى بعد نص المشوار انه لازم يمون ... و نقف ورا طابور عربيات... كنت عاوز اش**له بس قولت بلاش ... و الامتحان حيبتدى خلاص...اتعلمت طبعا انى لازم انزل قبل ميعادى بيوم ...طب انا طالب فاشل رايح الكليه علشان ينام فى المحاضرات...امال الموظف و اللا العامل اللى رايح شغله ده...حينام برضه؟ و الله الناس فى مصر دول صعبانين عليه... ده انا بيجيلى شلل لما اشوف وقفه المواصلات و نفسى بتتسد انى اركب مواصله منهم...باروح اشترى حاجه اكلها و اقف اتفرج على الشارع الواقف...منظره جميل مش كده...الناس محشوره جوه علب و نفس كل واحد فيهم ان عربيته تطير... على فكره انا اكتشفت ان كل مصروفى بيضيع فى المواصلات... طب الدنيا طول عمرها زحمه...بس الوقتى بالذات بقت زحمه اوى...زحمه بزياده...اوفر ...زحمه اوس حداشر...زحمه موووت... ليه...قوللى ليه...اقوللك ليه...اصل الشوارع قلت...كشت يعنى...و العربيات خلفت عربيات صوغنتاتين...و بعدين الناس بتموت... بس العربيات بتعيش... تلاقى العربيه البيتلز الخنفسه ماشيه مطلعه لسانها للعربيه البى ام دبليو...كل سنه انواع جديده بتنضم لقافله العربيات المكسحه... و بعدين كل الناس بتنزل فى نفس الوقت...مش عارف ليه يا اخى...الناس هايجه و عاوزه تنزل الشارع...ما تسيبها يا اخى تنزل تنفس عن اللى جواهاانا بجد خايف على كوبرى اكتوبر ده لحسن يقع و يبقى كوبرى 67...و لغايه دالوقتى عمالين يمطوا فيه...لما بابا يبقى عنده عربيه و ماما كمان تبقى عندها عربيه و اخويه برضه عنده عربيه و اختى برضه عندها عربيه انا مايبقاش عندى عربيه ليه...قوللى ليه...اقوللك ليه...اصل يا بنى لو ركبت عربيه مش حاطلع منها... يا حخلف جواها... يا حيجيلى عقم... يا حدخل النار بعد ما شتمت كل رايح و كل جاى ماشى قدامى...اللى بقه حايكسر عليا و اللى يولع الفلاش فى عينى و اللى بيزمرلى ... انا اعصابى بتتعب بسرعه جدا و بتنرفز من اى حاجه حتا الدبانه اللى بتقف على قفايا...تخيل بقه واحد ينرفزنى فى المواصلات...حتتشتم حتتشتم...لا مفر يا بنى... و ايه مش شتايم يا وحش و يا كوخه و انتى انسانه مووش محترمه و كده ... لا...لا لا لا ... نو نو نو... الشتايم اللى بتطلع منى زى ضرب الاقلام.. بتلسع... و لازم يبقى قبليها يابن ال أو يابت ال...و شتايمى طوييييله خالص... طب اعمل ايه... خاللينى اخلل فى التو- كوس-آه والتوبس-آت و الميكروبعبصات اللى بركبه ده...كفايه بقه هزار و خللينا فى الموضوع...لازم نلاقى حل سريع مريع فى الزحمه دى...يعنى ممكن مثلا مثلا اننا نخللى يوم للارقام الزوجيه و يوم للارقام الفرديه بالنسبه لعربيات الملاكى... و طبعا احنا مصريين... و كل حاجه و ليها حل... يبقى الحل انى اشترى عربيه بارقام زوجيه و عربيه بارقام فرديه... او اجيب لوحه وشها يبقى بارقام فرديه و الوش التانى بارقام زوجيه...و لما الراجل يمسكنى بالارقام الفرديه فى يوم الارقام الزوجيه و يقول لى حات الرخصه... حاقول له طب ما تاخد عشره جنيه احسن...يقول و ماله...و ممكن مثلا مثلا نقسم الطرق قسمين...قسم للعربيات تتحشر فيه... و قسم للعجل... اللى عاوز يركب بسكلته يركب...و لما الناس المحشوره فى قسم العربيات تشوف الناس بتجرى فى قسم العجلات حتتغاظ...ماتتغاظ... و بعدها يحولوا من نظام الكار لنظام البيتيسيكلوم... بس فى مشكله واحده...اولا الستات حيسوقوا بسكلته ازاى...بالنسبه للستات المحجبات حيكون الامر شديد الصعوبه فمن احسنلها تقعد فى البيت او تتحشر فى قسم العربيات...اما الستات اللى مش محجبات فلازم ينسوا خالص موضوع الجيب و الفستان... و يركزوا شويه فى موضوع البنطالونات...طب لو بنت حلوه و سايقه العجله...طبعا حايجى الولد و يروح ضاربها كتف من بتوعه تقع من العجله فيعمل نفسه جينتل و يشيلها من على الارض...سيبك خالص من موضوع الستات دول...خاللينا فى الرجاله...طب الراجل حايسوق العجله ازاى لما لازم يشيل معاه الشنطه و الادوات و اكياس مليانه بمستلزمات البيت و الحاجات اللى فى بطنه كمان...اكيد اكيد حايقع...بصراحه المشروع ده فاشل...خش عاللى بعده...المجلس الاعلى لحقوق المواصلات حيقرر ان ممنوع اى عيله تكون عندها اكتر من عربيه واحده فقط...حل جميل...بس لما الراجل يتجوز اتنين...حايبقى عنده عيلتين...و علشان كده طبعا عربيتين...و لما يبقى عنده ولدين...و اللتنين متجوزين...حيبقوا عندهم برضه عيلتين...و كل واحد عربيه...حل موش بطال...انا جاتلى فكره تحفه...حل بثيت بثيت جدا...نغلى سعر البنزين...نخللى اللتر بخمسه جنيه...و كده نقطع العرق و نسيح دمه...اصل المشاكل فى مصر ما تتحلش غير بقرار عنيف و حازم... برضه مش عاجبكم الحل ده...طب خد ده بقه...حنقضى على آفه التاكسى و الميكروباص و الاتوبيسات العامه و نشيلهم من الخريطه خالص...و المواطن اللى عاوز يروح حته يروحها بعربيته... و لو معهوش يخللى صاحبه يوصلله...و لو معندهوش صاحب يروحها بالمترو...و لو ماينفعش... يروحها مشى...و لو مش قادر يمشى يخليه فى البيت احسن...هوه ده النظام و اللى مش عاجبه مش حاقول له يدور على اعلى جمل و اللا حصان واللا بهيمه يركبه...لا...لا لا لا ...نو نو نو...حاقول له اتلهى... فكت...كفايه بقه تريأه و خللينا فى صلب الموضوع...الحل هوه اللامركزيه...يا عم غور فى ستين داهيه...الحل هوه انه مافيش حل...قوللى ليه...اقوللك ليه...أو احسن اقوللك نظريه عمك محمد و خلاص...عمك محمد سواق تاكسى...من كتر ما بركب تكاسى تكسيات تكوسه فى اليوم بقابل ساعات نفس التاكسى كذا مره...ومنهم تاكسى عمك محمد و خلاص...لما ركبت معاه المره السادسه سألته عن رأيه فى سبب الزحمه الرهيبه اليومين دول قال لى إن فى مؤامره كبرى...أو بمعنى آخر خطه جهنميه...الزحمه دى مقصوده منهم...سألته من مين...قال لى منهم و خلاص... قولتله ماشى كمل...همه عاوزين الدنيا تبقى زحمه كده عالطول...و الشوارع تبقى مقفله باحكام...ليه...قوللى ليه...اقوللك ليه...علشان يا سيدى الناس تنهار فى الزحمه...و هيه رايحه الشغل...و هيه راجعه مالمشوار...عاوزين الناس تبقى منهكه عالاخر... و تقعد تتخانك عالاجره زى ما حاعمل معاك لما اوصلك...اصل المشوار اللى بخمسه جنيه فى الزحمه بيبقى عشره جنيه... و الميكروباص من رمسيس بدل ما كان بجنيه بقى بجنيه و عشره قرش...هوه العشره قرش دول حيعملوا حاجه الايام السوده دى...يا سلام لما الناس مايبقاش فيهم نفس يتنفسوا...عاوزين يتشغلوا بالمواصلات و يطلعوا طاقاتهم المكبوته و اللى لسه حاتتكبت فى الزحمه... ما يفكروش فى اى حاجه خالص غير فى قرف الزحمه...زى ما هوه ماكتوب فى قائمه عبده قلقاس لازم يتم...اوكاى...انت اسمك ايه بقه...اسمى عمك محمد و خلاص...ماشى يا عمك محمد و خلاص...اهو و خلاص اللى فى الاخر دى هيه اللى مواديانه فى داهيه...انا قررت خلاص...و ده قرارى الاخير خلاص...انى اسود الدنيا فى عيشيتكم اكتر... اخليها ضلمه مش كحلى... و ازود الطينه بله...ما هيه خربانه خربانه...و بإجماع الآراء... قررت بعد تفكير عميق... و مصالحه مع النفس...انهم يجيبولى عربيه

4 comments:

Princess said...

والله رحمت نفسك من سؤال اللئيم
أركب عربية يا بني.. بس بلاش موضوع الشتايم دي لحسن بجد حتصرف حسناتك كلها على يسوى واللي مسيواش

walladshab said...

حاضر يا برنسيسه-ححاول

Mo'men said...

دنتا داخل فى حوار جامد أوى
الي بتصرفه أيراط في المواصلات حتصرفه 24 في العرببه

أيشي بنزين و زيت و فلاتر ....

و سلملي على المرتب / مصروف

walladshab said...

انت فاكرنى حاجيب عربيه بجد،منين يا حسره،ده انا بحلم يا مؤمن