EgypToz: اسهال

Friday, November 03, 2006

اسهال


المشهد الأول

:رساله للضابط اللى واقف على باب كليتى
ليه ضربتنى؟
ليه جرتنى على الارض فى التراب؟
ليه حسستنى انى خرئه وسخه بتمسح بيها الارض؟
ليه ادتلى بوكس فى دماغى؟
على فكره الضربه وجعتنى جدا
ليه خلتنى امسك دموعى علشان منظرى مايبقاش وحش ادام زمايلى؟
ليه قطعتنى التى شيرت اللى كنت لابسه؟
ليه زعقت فى وشى جامد و شتمتنى ؟
كل ده علشان انا طالب علم عاوز ادخل كليتى؟
كل ده علشان انا وريتك الكارنيه بتاع الكليه؟
هوه انا عدوك و انا مش عارف؟
و بعدين كنت عاوز تعمللى محضر فى كليتى ليه؟
هوه انا مش زى ابنك برده؟
مش قادر احكى لأى حد عن اللى حصل لى ده
انا حاسس انى جربوع

المشهد الثانى

و انا قاعد فى السينما لقيت شباب كتير قاعد ورايا عمالين يهزروا و يتكلموا بصوت عالى فلما ابتدى الفيلم قولتلهم: ممكن تبطلوا كلام من فضلكم فراح واحد قال لى: بص ادامك يله قولتله: ليه الغلط ده قال لى واحد تانى: هوه ده الكلام و لو مش عاجبك اطلع من السينما


المشهد الثالث

و بعدين روحت قسم عابدين بعد الساعه واحده بالليل علشان اعمل محضر باللى حصل فجالى ضابط وان يسألنى على اللى حصل فحكتله فقال لى استنى خمس دقائق و بعدها جالى ضابط توو يسألنى على اللى حصل فحكتله فقال لى استنى خمس دقائق و بعدها جالى ضابط ثرى و بعدها ضابط وان تانى و بعدها ضابط فور و بعدها ضابط توو تانى و بعدها ضابط وان تالت وقعدت فى القسم ساعتين و بعدين جالى ضابط توو و قال لى اجى بكره الصبح احسن و اعمل المحضر فاجيت اليوم اللى بعده و حصل اللى مكتوب فوق ده بس اوس تلاته و كل لما احكى على اللى حصل احس انى زهقت من اللى حصل و احسن لى انسى اللى حصل و اروح البيت... اللى حصل انى رحت لواحد فى سوق الكهربه علشان يعمل لى اباجورات مودرن ديزاين و حدد لى يوم و ميعاد معين اخودها فيه و خد منى عربون و خليته يمضى على الكارت بتاعه انه خد منى الفلوس دى و لما جه اليوم والميعاد الساعه عشره بالليل جبت عربيه تشيل الاباجورات بس الراجل قال لى لسه ساعه و حاتخلص... العربيه اللى انا كنت جايبها مشيت و فضلت قاعد على رصيف فى شارع عبد العزيز اكل فى دوريتوس لغايه لما خلصت الساعه و روحت للراجل لقيته مش موجود فى المحل فاستنيته ساعتين كمان لغايه ما جه الساعه واحده و قال لى انه ماعملش الاباجورات فقولت له خلاص مش مشكله ورينى الاباجورات التانيه اللى عندك فقال لى لأ مش حاوريك هوه انت حاتشغلنى على مزاجك قولتله طب خلاص حات العربون اللى انا اديتهولك علشان اروح قال لى لا مش حاديهولك قولتله ازاى يعنى مش حاتديهولى قال لى اهوه كده بقه شغل بلطجه و بدأ الشتايم و صوتنا على و الناس اللى فى المنطقه كلها اتلمت حولينا و اللى على القهوه اللى قدامه قاموا و لقيت الناس كلها واقفه معاه وادبهدلت فى الحته و كرامتى راحت و مارجعتش فاروحت ماشى من الزحمه على القسم

المشهد الرابع

الشغاله جت علشان تنظف البيت و بعد نص ساعه لقيت أنا حد بيضرب على جرس الباب جامد جدا ففتحت الباب لقيت الجاره اللى ساكنه ادامى و عمرى ما باشوفها بتقوللى هيه مين الست اللى دخلت الشقه عندك دى دالوقتى قولتلها دى الشغاله و حاولت تبص من فوق راسى و من جنبى على اى حد فى الشقه قولتلها اتفضلى حضرتك قالتلى لأ انا بس كنت عاوزه اطمن عليك

المشهد الخامس

كان عندى ميعاد مع الدكتور المشهور ابو كشف بتمانين جنيه فى العياده اللى فى وسط البلد فلما روحت لقيت عيانين قاعدين و نايمين على سلالم العماره بيولولوا و بيترجوا حد يفتحلهم العياده فحاولت ادخل لقيت التمرجى منعنى من الدخول و رزع الباب فى وشى و فتح شباك صغير فى الباب يسألنى انا عاوز ايه فلقيت ناس كتيره قاعده جوه فاقولتله انى عندى ميعاد مع الدكتور النهارده قال لى ادفع الحلاوه عشرين جنيه الأول و انا ادخلك بكره إن شاء الرحمن


المشهد السادس

كنت ماشى فى النادى ادور على مكان مناسب اذاكر فيه لقيت فجأه راجل بيشتمنى بالأب و الأم من غير ما اجى جنبه و بيقوللى انى انا بابص على مراته اللى شايله عيل و إن انا كده بعاكسها فامردتش عليه و كان جنبى عضو نادى استاذ جامعى شاهد باللى حصل فكتب معايه شكوى لرئيس النادى عن العضو ده فقالوا لما يجوا ينظروا فيها حيكلمونى على الموبايل فامحدش كلمنى خالص فارحت بعدها علشان اشوف الشكوى قالولى روح شوفها فى الارشيف فارحت عند الست بتاعت الشكاوى فقعدت تدور بين ورق مبعتر فى الأرض و فى دواليب و قالت لى : معلش ، شكوتك مش موجوده

المشهد السابع

بعد لما التاكسى وصلنى الكليه قولتله معاك جنيه قال لى ايوه ليه؟ قولت له علشان اديك خامسه و تديلى جنيه فقال لى : ماشى فأديتله خمسه فاخدهم فقولتله فين الجنيه قال لى مافيش جنيه و اعمل اللى ما بدالك و اعلى ما فى خيلك اركبه ففتحت باب التاكسى و نزلت


نصائح لولد شاب
خد الموضوع ببساطه و خليك ايزى موزو وكبر يا اخى شويه -
هوه انت عاوز تغير الناس كلها ، متغير نفسك الأول -
لازم تحاول تتأقلم مع المجتمع اللى انت عايش فيه -
يعنى الناس كلها اللى غلط وانت اللى صح ، انت اللى غلط و ستين غلط -
انت محتاج حد يفهمك الدنيا على حقيقتها -
انت عبيط -
على فكره انت شكلك بتجيب لنفسك مشاكل و انت انسان تافه ، مالناس كلها عايشه زى الفل -
انت عمال تدور على النكد و خلاص ، متدور على الحاجات الحلوه ياد-
انت يا بنى ما تنفعش فى البلد دى خالص -

5 comments:

Anonymous said...

Das kürzeste und wunderbarste Märchen der Welt:

Es wareinmal ein stattlicher Prinz, der die wunderschöne Prinzessin fragte:

"Willst Du mich heiraten?"
Und sie antwortete: "...NEIN!!! Und der Prinz lebte viele Jahre lang glücklich und
ging angeln und jagen und hing jeden Tag mit seinen Freunden herum und trank viel Bier
und betrank sich so oft er wollte, spielte Golf, ließ seine Jacke auf der Stuhllehne
im Esszimmer hängen und hatte Sex mit Dirnen und Nachbarinnen und Freundinnen und
furzte nach Herzenslust und sang und rülpste und kratzte sich ausgiebig am Sack.


Ende

Jannah said...

wala 3aysheen zay el fol wala 7aga!!!
metbahdeleen mo3aksat w 2ellet 2adab bardo

wana mesh shayfa enak ghalat!! ezay yedrabak keda el zabet da???? da 3shan el entekhabat?????
7asbona Allah wa ne3malwakeel. Allah y3ezzak w yeb3ed 3annak sharohom...

sa3bana 3alaya ya masr!!!!!!

Anonymous said...

enough reality please..:(

this country is so screwed up sometimes it makes me puke..

btw, you are not wrong, you'll just die young, trying at best ..

labido said...

انت عمال تدور على النكد و خلاص ، متدور على الحاجات الحلوه ياد
انت اللي قولت مش انا
ههههههه

محمد عوض said...

يا عم مش لوحدكما احنا بناخد بالصرمة القدمة بس بنحاول نعيش
كبر