EgypToz: الليله

Thursday, October 19, 2006

الليله

النهارده كانت ليلة القدر... لأ امبارح ... لأ بعد بكره... لأ دى كانت اول امبارح... لأ دى اول اول امبارح علشان السعوديه صاموا يوم قبلينا...هوه ده النظام كل سنه فى العشر الاواخر من رمضان ... الجامع اللى جنب بيتى هاو مافيهوش غير تلاته علشان الناس كلها بتروح للمساجد الكبيره المشهوره ... أو بيصلوا ورا شيخ صوته حلو و جبار فبيحسوا بخشوع مختلف ... أو علشان المسجد ده بيختم القرآن فى ليله سبعه و عشرين و الجامع ده فى ليله تسعه و عشرين... أو علشان بيقابلوا اصحابهم هناك... أو علشان الخطبه اللى فى النص بتأثر فيهم أوى ... أو علشان الامام هناك بيدعى دعاء حلو أوى... أو علشان لما بيصلى بيبكى فبيعيطوا وراه يعنى انا بصلى فى جامع معين كل يوم و المسجد بيبقى مليان عادى لغايه فى يوم فجأه بعد صلاه العشاء الراجل راح اعلن انه بيتشرف بحضور الشيخ جبريل فى المسجد و امامه الصلاه فى هذه الليله و لقيت حصل هرج و مرج و الجامع بسرعه اتملى و الماستجات اشتغلت و كله بيجرى وعاوز يلاقى مكان... و بعدين ماعرفش المسجد بيتملى فولل كومبليت ليه ليله سبعه وعشرين بالذات ... هيه الناس مش عارفه ان ليله القدر فى العشره الاواخر... طب خلاص يصلوا و يدعوا كل يوم من العشره الاواخر و واحده فيهم حتكون إن شاء الله ليله القدر... بسيطه يعنى ... ليه نشغل بالنا بهيه انهى واحده فيهم ... و مين كان فى السعوديه و شاف العلامات هناك ... و مين و هوه بيصلى حس بنور ادامه... و امتى حصلت معجزه لحد فتبقى هيه دى ليله القدر... يعنى ناس لخصت عبادتها لربنا فى صلاه الفروض طول السنه... و ناس اكتر لخصتها فى التقرب إلى الله فى رمضان... و ناس اكتر و اكتر فى العشره الاواخر بس... يجوا ناس و يدوروا على ليله القدر
يا رب توعدنا بليله القدر

7 comments:

Hope said...

I enjoyed this post a lot. For someone your age, you have a lot of wisdom and you talk from the heart.
It is amazing how people tend to think about getting closer to God, isn't it.
Ta7eyati, and may God bless you this Ramadan and after Rmadan as well.

Hope said...

Another thing,
even in our relatuionship with God , we seem to want the easy and sure way out. Fahlawa!

walladshab said...

unfortunately our lives are based on fahlawa in everything,and god is mercy.

شعار حياتنا
يا بالفهلوه يا جتك اوى

daktara said...

يا رب توعدنا بليله القدر
اللهم امين

walladshab said...

انا حدعيلك ان ربنا يوفقك فى الامتحانات اللى فاتت و اللى جايه يا دكتارا ، علشان الدكاترا دول بيصعبوا عليا اوى ، و ابقى ادعيلنا احنا كمان

أحمــــــــدبــــــــــلال said...

على فكرة ده الاسلوب المتبع فى الدول العربية كلها تقريباً
أنا واحدة صاحبتى بعتتلى ماسيج بتقولى أن النهاردة ليلة القدر
كان يوم19أكتوبر
مش عارف ليه أن يوم ليلة القدر دى ممكن تبقى ليلة معينة مختلفة لكل واحد فى العشرة الاواخر
يعنى ماحدش يحسها غير اللى ربنا عاوزه يحسها بدليل أننا منعرفش هى أى يوم لغاية دلوقتى
بس أنا بدعى العشر أيام كلهم

walladshab said...

و هوه ده المفروض اللى الناس تعمله طول ايام العشره الاواخر يا احمد يا بلال