EgypToz: زباله تى فى

Saturday, October 14, 2006

زباله تى فى


بصراحه التلفزيون المصرى والعربى بقه زفت ، زفت زفت زفت ، مافيش حاجه عدله الواحد يتفرج عليها ، بالذات لما جه شهر رمضان ، قمه التفاهه التلفزيونيه ، لما الواحد بعد الفطار يعمله كده كبايه شاى و ياكله حته بسبوسه مع بلح الشام ، نفسه يفتح التلفزيون و يتفرجله كده على حاجه لذيذه تسليه شويه ، مش القرف اللى بيشوفه كل لما بيفتح التلفزيون المصرى ، يعنى مش كل لما اجى اركز مع الاعلانات يروحوا قطعينوا بإعلان ، قال كنت باتتريأ على البرنامج التافه الى بيقدمه حسين فهمى ( الناس و أنا ) ، بقيت مش لاقى حاجه عدله تانيه أفطر عليها غيره ، اصل أنا ماعرفش افطر كده لوحدى على ترابيزه و اتفرج على الحيطان اللى حوليه ، اهة حاجه تسليه و السلام ، و بعدين العبط الازلى اللى عمله حسين الامام ده ، نفسى اعرف اللى ألف البرنامج ده كان بيعمل ايه لما كان بيألفه ، اظن انه كان فى وضع مش ولا بد كده ، و يا سلام على الظرافه اللى فى تامر و شوقيه ، بالمناسبه هوه ايه اللى فحل احمد الفيشاوى للدرجه دي ، نفسى اقول لكل واحد فى المسلسل الظرافه ده ، يا ظرييييف ، و بعدين يجولى بتوع البيت مش بيتك و ليلى علوى و النور و الصبح و بالليل ، لما بحس اننى خلاص حولع فى نفسى بروح قالب عالطول على القنوات العربيه التانيه ، الاقى عيال شحتين فى مسلسل و حنان ترك فى دور ساره بس بعقل بقه و ناس مشوهه ، هوه أنا ناقص اشوف فى رمضان حاجات توجع القلب و شوارع و وساخه ، و تيين ادج فيفى عبده و البوى فريند بيبيعوا بطاطس فى سوق الخضار ، انا عاوز حاجه خفيفه كده لايت تبسطنى و كل افراد عيلتى ، مافيش افراد اساسا ، يعنى اتخيل كده ان عندى افراد عيلتى و نتلف حولين التلفزيون لمه يعنى، أعت عشر تيام ادور على المسلسل بتاع تيته ورده ابو مليون جنيه لغايه ما جبته ، و ياريت ما جبته ، و اربعتاشر يوم لغايه ما وصلت للحاجه سهير و اخواتها ، و اول لما وقعت غلط على قناه فيها عبله كامل اتبصت ، اصلى بحب عبله كامل ، بس انبصاتى تلاشى تماما لما لقيت الواد بتاع كليب عصابه اشباح العندليب طلعلى كده خبط لزق بحواجب و آى لاينر ، بيطبطب على كل واحد معاه فى المسلسل ، الواد صعب عليه يا جماعه ، بجد صعب عليه مووت ، اروح راجع عالطول على الاراضى المحليه الاقى تيسير و تامر بلوند بادى تانى ، و عراق و امريكا و حاجات كده كانت حاتجبلى انسداد فى المسالك البوليه ، قلبت عالطول على حاجه تانيه لقيت مين ، يا ترى لقيت مين ، ممم ، منى زكى فى دور السندريلا ، سيبك من المسلسل التاريخى التسجيلى ده و ركز فى اللى جى ، تا تا تا تان ، مدحت صالح فى دور العندليب ، ايوه العندليب برده ، انا اول لما شفته سخسخت من الضحك ، ايه يا مدحت اللى انته عامله ده ، مين اللى اقنعك تعمل ده ، بلاش مين ، ازاى اقنعك انك شبه ، بلاش شبه ، انك تقدر تقلد العندليب ، انا كنت حاطت آمال كبيره على مسلسل يحيى الفخرانى سكه الهلالى ، بعد الفشل الزريع السنه اللى فاتت ، بس المسلسل مش نازللى من الزور ، بطىء بطىء بطىء ، حدائق الشيطان حلو بس انا زهقت من مسلسلات الصعايده و الفلاحين ، أه فكرتونى ، فين ماما يسرا ، محدش شافهه فى قناه هنا و لا هنا ، فى مسلسل بجد عاجبنى ديكوره و ملابسه و تصويره ، مش عارف اسمه ايه ، انا بتهيألى انه سورى، و فى مسلسل خالد بن الوليد اوك بس انا مش من هواه المسلسلات التاريخيه ، يادوبك المسلسل الوحيد اللى الواحد اهوه يقدر يتفرج عليه هو حضره المتهم أبى ، سريع و مثير بالرغم انه خيالى شويه ، مأفوريين فى حاجات كتير حبتين شويه ، و الواد ابن نور الشريف ، قصدى ابن المؤلف بتاع المسلسل جابللى بواسير، بس دى غلطه المخرجه رباب انها معرفتش تعمل كنترول على الممثليين اللى معاها ، زينه انتى بتفكرينى ببنوبلى كروز بس على فلاحى ، نفسى ابقى زى هنا و خالد ، بصراحه التلفزيون عاوز يتنفى من البيت تماما ، فين الحاجات الجميله بتاعت زمان ، لن اعيش فى جلباب ابى و العائله و ليالى الحلميه و المال و البنون و من الذى منه ، فين فوازير شريهان ، و الف ليله و ليله الجميله بتاعت شريهان و نجلاء فتحى ، فين اول مره كاميرا خفيه ، و فين لما الممثلين كانوا بيلعبوا افلام فى بدون كلام ، طب فين بوجى و طمطم ، طب تصدق أن بوجى و طمطم ارحم ، بصراحه احنا بجد كان لازم ناخد جرعه مكثفه تطفيشيه فى رمضان علشان نسيب التلفزيون الهبل الهبوللى اللى لحس مخنا و جابنا لورا مش لقدام ... و يلا باى

10 comments:

ayman said...

متعملش فى نفسك كدة ...
طيب فاكر سلاحف النينجا وباور رينجرز اللى كنا بنستنى الأذان مخصوص عشانها أنا بصراحة مبقتش استمتع برمضان على التليفزيون من حوالى سبع تمن تسع سنين كده من ساعة ما بدأوا يعرضوا بكار أفندى ومعزته الشقية !
بس بيقولوا في مسلسل بيتعرض على mbc اسمه أحمد اتجوز منى وشكله حيبقى لذيذ .. هوا المفروض بيتعرض كل يوم الساعة ستة بتوقيت السعودية يعنى خمسة بتوقيت مصر
اه بمناسبة سكة الهلالي اقرا المقال اللى تحت ده: http://www.elaph.com/ElaphWeb/ElaphWriter/2006/10/182489.htm

walladshab said...

المقال اللى مكتوب عن سكه الهلالى فعلا نقد بناء اتمنى الفخرانى انه يقرأه ، لأنه فعلا محتاج يفوء بالرغم إن يحيى الفخرانى هدفه نبيل جدا بس للأسف مش موفق ، ياااه ، فينك يا دوناتيللو و مايكل انجلو و سلاحف النينجا ، كنت باستمتع جدا لما كنت بافطر عليه كل يوم ،كانت ايام ، قال جايبينلنا بكار و الناس اللى بتمشى معوق ، انا ححاول اتفرج على احمد و هوه بيتجوز منى ، ياريت يبقى اظرف من شوقيه اللى اتجوزت تامر
خلاصه الموضوع : انا فعلا السنه دى فى رمضان ما بتفرجش على اى حاجه خالص فى التلفزيون ، علشان ما فيش حاجه تستاهل الفرجه ، باتفرج على دى فى ديز بس

dawyomeldonya said...

NAqd laze3 ...laze3 awi...but I'm not watching any of those so I can't judje ....But I have a little comment bgad, how can u critisize all these,,,and @ the end say that "bedun kalam" walla el camera el khafeyya (zakeya zakareya )wel 3atah dah!...are good or even better or ay 7aga,,,,these are were the begginig of all the habalollis u mentioned

walladshab said...

dawyomeldonya,to sum it all>>>
egyptian + arabic TV = hypnotic treatment for psychotic citizens

walladshab said...

ايمن ، احمد لازم يطلق منى حالا او منى لازم تخلعه

mafiaegypt said...

" عليه العوض ومنه العوض "

mafiaegypt said...

يا كتاب العرب لا ننكر مكانة الكثير منكم لكن ياأيها المسئولون عن المسلسلات التى يقوم بتمثيلها فنانون مصريين عاوز أقول كلمة حق لكم إرحمونا وبلاش الأدوار الرخيصة خاصة بمسلسل سوق الخضار خاصة من هذه التى تمثل بجسمها وصدرها فعليها أن تنظر للمراية لترى عمرها وسنها بدل ماكل شوية تبص للكاميرا لفرحتها بالعدسات التى بعينهاوزى المثل الذى أطلقوه أهل زمان على كل من تناسى أو يتناسى عمره " إخترمى سنك ياختى وإن كان فى نظرى للأسـف لايوجد مسلسل يستحق إحترامه نوعا ما سوى ســكة الهلالى التى واقع حقيقى للكثير من المجتمعات العربية خاصة المصــرية

walladshab said...

على فكره انا حاسس ان مش من المفروض اساسا اللى احنا نتكلم كتير عن الاعمال الهابطه دى علشان هيه ما تستاهيلش ان الواحد يذكرها اساسا او يدخل فى مخه كلام فارغ ، الواحد اول لما يشوف ان المسلسل تافه يغير القناه و يروح لغيره، أو احسن يقفل التلفزيون خالص و يشغل وقته بحاجه مسليه احسن ، بس يا جماعه انا كنت كل سنه بجد بحب اتفرج على التلفزيون فى رمضان ، مش عارف ليه السنه دى جعل نفسى تغم عليه ،و بعدين الموضوع بقه اساسه فلوس و بيزنيس ، مش فن يأثر و يغير فى المجتمع ، ربنا يسامح اللى كان السبب

Anonymous said...

i am watching Cinderella on Dubai Tv .Medhat saleh is ridiculous. i cant stop laughing when i see him.
Mona Zaki is a thousand miles away from Soad Hosny. Mona looks like a small mouse.the whole series is a fiasco.

walladshab said...

i think they have to make a new series or a film for cinderella,and with mona zaki.