EgypToz: انتحار نمله

Tuesday, October 10, 2006

انتحار نمله

نمله دخلت بيت من بيوتنا تدور على لقمه عيشها ، دخلت المطبخ مالقيتش فيه حاجه قالت أل له ، دخلت التلاجه مالقيتش فيها حاجه قالت أل له ، راحت تتفسح فى الشقه تدور على الناس مالقيتهمش قالت أل له ، سمعت صوت واش طالع من أوضه ضالمه قالت أل له ، دخلت الأوضه لقت فيه الأب و الأم و العيال قاعدين على كنبه و مبلميين فى التلفزيون قالت أل له طلعت على التربيزه اللى قدامهم لقت طباق بيضه فاضيه قالت أل له ، لفت طبق طبق مالقيتش و لا فتفوتايه أو اثر لأى أكل قالت أل له ، طلعت على الأب أرصته طنشها قالت أل له ، طلعت على الأم أرصتها ما عبرتهاش قالت أل له ، طلعت على الأولاد هرتهم أرص أدولها الطرشه قالت أل له ، طلعت على الكبايه أبو شاليمو اللى فى أيد الأب واللى كان فيها نقطه ميه علشان تبل ريئها، و قبل لما تنزل للكبايه بصت تشوف هما بيتفرجوا على أيه فى التلفزيون فلقت نقط سوده و بيضه كتير بتتحرك بسرعه قالت أل له لما نزلت الكبايه لقت نقطه الميه اختفت قالت أل له ، طلعت من الكبايه و بصت للأب و الأم و الأولاد و قررت تنتحر فزعقت بأعلى صوتها : أل له ، و راحت نطه من حرف الكبايه بس وقعت على السجاده فماتتش فقالت : أل له بقه

6 comments:

foxamr said...

ال له هي ليه مش ماتت
ال له يمكن بتستعبط
ال له حلوة كيك

walladshab said...

أنا شخصيا متهيألى إن النمله مش ماتت علشان لسه قدرها مجاش

Anonymous said...

جميل بس ايه المقصود ؟؟لكن في النهايه حكايه دمها خفيف

walladshab said...

المقصود حاجات كتير ، انت فهمت ايه منها؟

Anonymous said...

لو النمله نزلت تحت السجادة كانت هتلاقى باكو شيكولاته نسيته هناك ومشيت هههههههههههههه المرسل روميو مصر

walladshab said...

يا ظريف