EgypToz: كولاته

Friday, June 23, 2006

كولاته

انكشف سرى و اتفضحت ، اكتشفوا انى مدمن ، ايوه مدمن ، بس مش بانجو ، و لا حشيش ( الحشيش معرفتش ادمنه ) ، و لا اكستسى ، انا مدمن كولاته ،لازم اكل طول النهار كولاته ، من الفطار لازم اتنين سندويتش نوتيلا ، و بعدين كورن فليكس بالكاكاو ، و بعد الغدا لازم احلى بحته كولاته ليندت ، وبين الاكلات بلحس فى ايس كريم كولاته ، و قبل مانام طبعا لازم اكل اتنين سندويتش نوتيلا ، لو خدوا منى تحليل دم حيلاقوا كولاته بتجرى فى دمى ، و يووه ... يووه لما اكل كولاته فيريرو روشييه ... كارثه ... المصيبه انها غاليه ، بس على مين ، يدوب بحطها فى بقى احس انى فى عالم تانى و تالت و رابع ، لو حد سألنى نفسك تطلع ايه اقوله نفسى اطلع صاحب مصانع فيريرو روشييه ، مره طلعونى فى جريده من جرايد بلاد بره لما اكتشفوا ان فى حد بياكل سندويتش كولاته بلانشن ديك رومى ، طب و الله طعمه تحفه خرافيه ، قال صورونى و كتبوا جنب الصوره : هذا هو الطفل المصرى الذى يأكل كولاته بالسجق... طبعا غلطانين ... انا اساسا ما بحبش السجق خالص ... ده يا جماعه كان لانشن ديك رومى ( يمكن كانت غلطه مطبعيه أو معرفوش يترجموا ) المهم اشتهرت فى هذه البلده و من يوميها و الناس كل لما تشوفنى تديلى كولاته... و بعدين اكتشفت كمان حاجه مهمه خالص مالص ... إن انا لما بتضايق و بهيج ... لأ بلاش كلمه بهيج دى ... لما بتضايق و بيجيلى حاله الاكتئاب ... لو ماكلتش كولاته اموت ...يعنى لو حد عاوز يرشينى ... يديلى حته كولاته

5 comments:

el-amiro said...

Charlie and the Chocolate factory might impress you.

If you aren't already living there

*wink*

walladshab said...

;-)I do not need Willy Wonka,I have my own factory,nutella is always by my side.

يحي said...

وماله يا حبيبي مش عيب
بس متعملهاش تاني
:)

Anonymous said...

chocolate is better than an orgasm ;)

WS said...

I know the chocolate taste but I don't know the orgasm taste.
Hey, I heard people saying that with chocolate you can be fat but with orgasm you can't.
Look, I will taste orgasm and I will tell you my opinion.
If I didn't say "mmm" after a piece of orgasm like I do say when I eat chocolate, then chocolate is definitely better than an orgasm.